GENESIS 6
6
Gitlouhna
1Huan hichi ahong hi a, leitung a mite ahong pun ua, tanute ahon neih un, 2Pathian tapate'n mite tanute melhoih in amu ua; adeihlam chiat uh zi in anei uhi. 3Toupa'n, “Ka Kha in tangtawn in mi asual nilouh kei ding, amah lah sa ahi ngal a, himahleh kum za-le-sawmnih adam ding,” achi hi. 4Huai hun lai in lei ah miliante a-om ua; huai nung in leng Pathian tapate'n mite tanute thei a, amau toh tate aneih zel lai un, huaite mah nidanglai a mihat, miminthangte ahi uhi.
5 Toupa'n lei ah mite gitlouhdan nasa ahi chih leh alungtang lunggeldan uh gilou ngen ahi ngitnget chih amu hi. 6Leitung a mi abawl ziak in Toupa akisik a, lunggimna in aneihloh hi. 7Toupa'n, “Leitung a kipan ka misiam ka hihmang mai ding. Mite, sate, ganhingte leh tung a leng vasate tan in; ka bawl ziak in ka kisik,” achi hi.
Noah
8Noah in bel Toupa mitmuh in deihsakna atang hi. 9Noah suan hiaite ahi uh: Noah midik ahi a, adam tonpihte lak ah gensiatbei ahi a; Pathian toh Noah atonkhawm uhi. 10Noah in tapa thum Shem, Ham leh Japheth anei hi. 11Pathian' mitmuh in lei asia a, hiamgamna in lei adim khin hi. 12Huan Pathian in lei a-en a, ngai in, asegawp a; sa tengteng in leitung ah a-omdan uh ahihse khinta uhi.
13Pathian in Noah kiang ah, “Sa tengteng beina ka ma ah ahong tungta; amaute ziak in hiamgamna in leitung adim khinta ngal a. Ngai in, leitung toh amau ka hihmang ding. 14Nang a ding in meilah sing in long bawl inla; long ah dantante na bawl ding ahi. Asunglam leh apolam meilah nai in na zut vek ding hi. 15Hiai na bawldan ding ahi. Long dunglam tong zathum hi henla, availam tong sawmnga hi henla, asanlam tong sawmthum hi hen. 16Long ah tohlet na bawl ding a, atunglam tong khat chiang a na zoh ding ahi. Apang ah long kongkhak na bawl ding a; chial nuainung leh chial nihna leh chial thumna nei in na bawl ding ahi. 17Ngai in, kei mahmah in, sa tengteng hinna hatna pai khempeuh, van nuai a kipan hihmangthang ding in leitung ah tuichim ka tungsak ding a; lei a thil chih omte asi vek ding uh. 18Himahleh nang toh ka thukhun ka kipsak ding a, long ah na lut ding ahi. Nang na lut ding a, na tapate leh na zi leh na tapate' zite leng na kiang ah alut ding uh ahi. 19Sa tengteng a thil hing chiteng lak a kipan, chi chih nihnih in, na kiang ah hinsak ding in long ah na pilut ding ahi. Amaute anu leh apa zel ahi ding uhi. 20Vasate amau chi omdan bang chiat in, gante amau chi omdan bang chiat in, chi chih nihnih in na hinsak ding in na kiang ah ahong pai ding uh ahi. 21Nek theih an chi tuamtuam kaikhawm inla, na kiang ah koih in. Nang leh amaute a ding in an ahi ding uh,” achi hi. 22Huchibang in Noah in ahih a; Pathian in akiang a thu apiak tengteng ahi bangbang in ahihta hi.
လက်ရှိရွေးချယ်ထားမှု
GENESIS 6: PAITBSI
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.