GENESIS 5
5
Adam Suante
1Hiai Adam suante khangthubu ahi. Pathian in mihing asiam ni in Pathian batpih in amah abawl hi. 2Pasal leh numei in amaute asiam a; avualzawl a, siam a a-om ni un amin uh Adam asa hi. 3Adam in kum za-le-sawmthum ahih in amah mah bang, akibatpih ngei tapa anei a; amin Seth asa hi. 4Seth aneih nung in Adam kum zagiat adam lai a; tanute leh tapate anei lai hi. 5Adam damsung tengteng kum zakua-le-sawmthum ahi a; huchi in asita hi.
6Seth in kum za-le-nga ahih in, tapa Enosh anei hi. 7Enosh aneih nung in Seth kum zagiat-le-sagih adam lai a, tanute leh tapate anei lai hi. 8Seth damsung tengteng kum zakua sawm-le-nih ahi a; huchi in asita hi.
9Enosh in kum sawmkua ahih in tapa Kenan anei hi. 10Kenan aneih nung in Enosh kum zagiat sawm-le-nga adam lai a, tanute leh tapate anei lai hi. 11Enosh damsung tengteng kum zakua-le-nga ahi a, huchi in asita hi.
12Kenan in kum sawmsagih ahih in, tapa Mahalalel anei hi. 13Mahalalel aneih nung in Kenan kum zagiat-le-sawmli adam lai a, tanute leh tapate anei lai hi. 14Kenan damsung tengteng kum zakua-le-sawm ahi a; huchi in asita hi.
15Mahalalel kum sawmguk-le-nga ahih in tapa Jared anei hi. 16Jared aneih nung in Mahalalel kum zagiat-le-sawmthum adam lai a, tanute leh tapate anei lai hi. 17Mahalalel damsung tengteng kum zagiat sawmkua-le-nga ahi a, huchi in asita hi.
18Jared in kum zakhat sawmguk-le-nih ahih in tapa Enok anei hi. 19Enok aneih nung in Jared kum zagiat adam lai a, tanute leh tapate anei lai hi. 20Jared damsung tengteng kum zakua sawmguk-le-nih ahi a, huchi in asita hi.
21Enok in kum sawmguk-le-nga ahih in, tapa Methuselah anei hi. 22Methuselah aneih nung in Enok kum zathum sung Pathian toh atonkhawm ua, tanute leh tapate anei lai hi. 23Enok damsung tengteng kum zathum sawmguk-le-nga ahi. 24Pathian toh Enok atonkhawm ua, amah a-omta kei a; Pathian in alata hi.
25Methuselah in kum zakhat sawmgiat-le-sagih ahih in tapa Lamekh anei hi. 26Lamekh aneih nung in Methuselah kum zasagih sawmgiat-le-nih adam lai a, tanute leh tapate anei lai hi. 27Methuselah damsung tengteng kum zakua sawmguk-le-kua ahi a, huchi in asita hi.
28Lamekh in kum zakhat sawmgiat-le-nih ahih in tapa anei hi. 29“Hiai ngei in Toupa hamsiatkhum leitung ziak a i nasepna leh khut a i sepgimna ah hon lungmuan ding,” chi in amin Noah asa hi. 30Noah aneih nung in Lamekh kum zanga sawmkua-le-nga adam lai a, tanute leh tapate anei lai hi. 31Lamekh damsung tengteng kum zasagih sawmsagih-le-sagih ahi a; huchi in asita hi.
32Noah kum zanga a upa ahi. Noah in Shem, Ham leh Japheth anei hi.
လက်ရှိရွေးချယ်ထားမှု
GENESIS 5: PAITBSI
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.