Kuxh 3

Uvaʼs ibʼant quBʼaal Jesuus bʼaʼn iqʼabʼ val u vinaq tu xeem qʼij saavado

Tio 12.9-14; Luk 6.6-11

1Ibʼanetz paqul, tuulbʼal invaʼt u xeem qʼij saavado, tul paloʼk Jesuus inpaqte tuul u kʼulbʼal tibʼ inqʼa tij imam Israeel. Atich val u vinaq tzitzi uvaʼ koxhelich paqʼil iqʼabʼ. 2Tul nikich kuxh isaqil Jesuus taʼn jolol inqʼa fariseeo, inqʼa eesanaq yol. Tan aʼichaq kuxh isaʼ tiltaʼ oq laʼich ibʼan Jesuus bʼaʼn viqʼabʼ u vinaq tuulbʼal u xeem qʼij saavado; echetz laʼich itxhej iyole tiʼ ixotxhox Jesuus tiʼ tel iqʼij u bʼekʼbʼal.

3Tul ech tal Jesuus te u vinaq, uvaʼ koxhelich paqʼil iqʼabʼ, s-eche: —Txakpen. Tul avul s-quxoʼl, —xeʼt Jesuus s-te.

4Yaʼne ech tal Jesuus te inqʼa fariseeo s-eche: —¿Nik kol ikuy u qubʼekʼbʼal uvaʼ laʼ qubʼan bʼaʼnil te invaʼq xaol tu xeem qʼij saavado? Pet ¿maq aʼ u yeʼbʼaʼn laʼ qubʼana? ¿Laʼ kuxh quvatzi ikam u xaol? Pet ¿maq laʼ qutxum u qʼij isaq? —xeʼt Jesuus.

Tul tira yeʼl inqʼa fariseeo tzaqʼbʼi. 5Tul itiila saqi Jesuus ivatz inqʼa eesan yol. Tul lakp iviʼ Jesuus s-tiʼ, tiʼ yeʼ itxumt ivatz u vinaq. Atz txumun vet Jesuus s-tiʼ inpaqte.

Tul ech tal Jesuus te u vinaq s-eche: —Jikbʼa vaqʼabʼ, —xeʼt Jesuus.

Tul ijikbʼa vet u vinaq viqʼabʼ. Tul yekich ibʼan vet bʼaʼn viqʼabʼ u vinaq.

6Yaʼne motx el vet tzaan inqʼa fariseeo kʼatz Jesuus. Tul yekich xeʼtaq vet tiʼ ibʼant eela iyol tuchʼ jolt inqʼa eenich tiʼ Eroodes Antiipas, u mam iqʼesal tuulbʼal Galileea. Tan aʼaqich titzʼabʼal iyatzʼax el Jesuus.

Uvaʼs tabʼit inqʼa xaol itziulal inqʼa mam bʼaʼnil nikich ibʼan quBʼaal Jesuus, tul mamala xaol sibʼ motx tzajk tiʼ taqʼbʼ kʼatz quBʼaal Jesuus

7Yaʼne el bʼen Jesuus tzitzi. Tul aqʼbʼ vet Jesuus tziʼ u mam aʼ tuchʼ inqʼa nikich itxhus tibʼ s-kʼatza. Tul mamala xaol txhʼuyich tiʼ Jesuus: Txhʼuyich aj Galileea, aj Judeea, 8aj Jerusaleen, aj Idumeea, tuchʼ inqʼa jeqlich jala el u xaomla aʼ Jordaan, tuchʼ inqʼa jeqlich tinaaqaʼ u tenam Tiiro, atz tinaaqaʼ u tenam Sidoon. Tan motx tabʼi itziulal inqʼa mam bʼaʼnil uvaʼ nikich ibʼan Jesuus. Echetz imolt tzaan tibʼe inqʼa mamala tenam tiʼ Jesuus. 9-10Tan tiʼ uvaʼ maʼtich ibʼant Jesuus bʼaʼn mamala xaol, tul mamala tel yaabʼ nikich motx iyaʼlu ok tibʼ tiʼ ikanax Jesuus.

Yaʼne tal Jesuus te inqʼa nikich itxhus tibʼ s-kʼatza uvaʼ bʼanoqich kuxh tutxh vaʼq vaarko taʼn. Tan avoqe laʼich potxhʼox Jesuus taʼn inqʼa mamala tenam, tul nal kuxh laʼich ipal jaʼ Jesuus tuul u vaarko. 11Ajtetz nikich tilix Jesuus taʼn inqʼa demoonio uvaʼ atich ok t-taanima inqʼa xaol, tul yek nikich ijoqbʼal inqʼa xaol taʼn inqʼa demoonio vatz Jesuus. Tan yek nikich ixoʼv inqʼa demoonio te viyakʼilal u tiqleʼm Jesuus.

Tul yek nikichaq motx isichʼineʼ. Atz ech nikich motx tal s-eche: —¡Aʼ axhe viKʼaol Tiuxh! —chichich inqʼa demoonio te Jesuus.

12Tul tira nikich imaq Jesuus inqʼa demoonio. Tan yeʼ nikich isaʼ Jesuus uvaʼ, aʼ inqʼa demoonio laʼich aqʼon ootzaqiloq Jesuus te inqʼa tenam.

Uvaʼs taqʼt quBʼaal Jesuus tiqleʼm kabʼlaval inqʼa bʼanol itxhaq; aʼe inqʼa apoostol

Tio 10.1-4; Luk 6.12-16

13Yaʼne bʼen vet jaʼ Jesuus viʼ val u vitz. Tul itxaj vet el Jesuus jolol vinaq, jabʼiste uvaʼ isaʼ te Jesuus. Tul ulaq vet kʼatz Jesuus. 14Echetz itxhabʼat vet Jesuus ikʼuqeʼve kabʼlaval inqʼa vinaq, uvaʼ nikich itxhus tibʼ s-kʼatza tiʼ itxhʼuyeʼv s-tiʼ, atz tiʼ itxhaqax bʼen tiʼ ipaxsal viyolbʼal quBʼaal Tiuxh. [Aʼe inqʼa toksa siapoostol.] 15Tul taqʼ Jesuus tiqleʼm tiʼ itukil el demoonio t-taanima inqʼa xaol. 16Echetz ibʼij inqʼa vinaq, inqʼa itxaj Jesuus, s-eche: Simoon Luʼ, 17tuchʼ Jakoovo, vikʼaol Sevedeeo, tuchʼ Xhun, u titzʼin Jakoovo, inqʼa motx toksa Jesuus ibʼij s-‹Voaneerjes.› Tan ech nik tal u yol Voaneerjes s-eche: ‹inqʼa vinaq uvaʼ ikʼaol raaya,› chiche. 18Yaʼne itxajat Jesuus Lixh, tuchʼ Piʼl, tuchʼ Tuʼl, tuchʼ Tio, tuchʼ Maxh, tuchʼ Jakoovo, vikʼaol Alfeeo, atz tuchʼ Tadeeo, tuchʼ Simoon, uvaʼ atich ok xoʼl inqʼa Kanaan,{*}#3.18 ¿Kam nik elkaʼpun u yol ‹inqʼa Kanaan?› Aʼ vibʼij jolol inqʼa xaole uvaʼ nikich txhʼaʼoin inqʼa sol, inqʼa aj Rooma. Tul aʼ atich inqʼa xaol, inqʼa Kanaan ibʼij, tuulbʼal vitxʼavaʼ inqʼa tij imam Israeel. Tan antichaqxh tij imam Israeel. Pet jutx kuxh nikich motx inukʼit tibʼ tiʼ ibʼant txhʼaʼo. 19tuchʼ Juudas, u aj tenam Karioote, uvaʼ xamtich ex oksaloq ok Jesuus tiqʼabʼ inqʼa iqʼesal uqʼeʼybʼal taʼn. Tul bʼen vet Jesuus tu otzotz tal uvaʼ jeqliche, imolich tibʼ tuchʼ kabʼlaval inqʼa itxaja.

Uvaʼs talt quBʼaal Jesuus yol tiʼ jaʼl uvaʼ laʼ eesan iqʼij viTiuxhil Tiuxh

Tio 12.22-32; Luk 11.14-23

20Aqʼbʼetz Jesuus t-val u otzotz. Yaʼne mamala xaol molelich vet tibʼ tiʼ Jesuus inpaqte. Tul mij nikich tutxh vet itxʼaʼon Jesuus tuchʼ inqʼa nikich itxhus tibʼ s-kʼatza. 21Tabʼietz vet inqʼa titzʼin tatzik Jesuus itziulal u yol uvaʼ nikich tutxheʼ, tul aʼ titzʼaaq veteʼ uvaʼ laʼich bʼen qitzixoq tzaan Jesuus taʼn. Tan ech nikich motx tal tiʼ Jesuus s-eche: —Qat yany vet iviʼ Jesuus, —chichichaq veteʼ.

22Poro atich kaʼt inqʼa nikich txhusun ibʼekʼbʼal inqʼa qumol s-tijaq imam Israeel, inqʼa een tzajnaʼqich tu tenam Jerusaleen. Tul ech motx tal s-eche: —¡Velsevuue, viqʼesal inqʼa demoonio, nik aqʼon tiqleʼm Jesuus tiʼ itukil el inqʼa demoonio t-taanima inqʼa xaol! —chichichaq tiʼ Jesuus.

23Yaʼne motx isikʼle tzaan Jesuus inqʼa nikich txhusun ibʼekʼbʼal inqʼa qumol s-tijaq imam Israeel. Tul txumbʼalimal talt Jesuus kaʼl u yol s-te. Tul ech tal Jesuus s-te s-eche: —¡Yeʼxh paqule uvaʼ antxh Satanaas laʼ tukin el demoonio t-taanima invaʼq xaol! 24Tan jankʼal eche tatin invaʼq u mam tenam, uvaʼ jit eela iyol inqʼa iqʼesal s-vatzaq, tan yeʼl paqul laʼ elaʼpun tibʼaʼnil. 25Atz kʼuxh tatin xaol t-totzotz, tan oq jit eela iyol, tul yeʼl paqul laʼ elaʼp tibʼaʼnil. 26Tan oq junt kuxh laʼ xeʼt Satanaas tiʼ itukil el imol, tul aʼetze jit eela iyol s-vatzaq. Yeʼletz paqule laʼ yakʼin u tatineʼ. Tul tiraetz laʼ sotz vet el Satanaase. 27Tan yeʼxhabʼil invaʼq laʼ oleʼv tiʼ tokebʼel totzotz invaʼq u vinaq uvaʼ sibʼxh tial ikʼuul, eche Satanaas. Pet bʼaxa laʼ qitzix u vinaq taʼn elqʼom, yaʼne laʼ utxh telqʼal inqʼa kamaq tetz tu totzotz, echetz uvaʼ nik inbʼane tiʼ itukil el demoonio.

28Nuqxh toq val sete: Laʼ utxh ikuy sotzsal ipaʼv inqʼa xaol taʼn quBʼaal Tiuxh, kʼuxh kamxh paʼvil bʼanel taʼn. 29Pet ech koq u paʼv tiʼ teesal iqʼij viTiuxhil Tiuxh, tan yeʼl paqul laʼ kuyuxi. Tan aʼ vet u kʼaxkʼo, uvaʼ yeʼl iyaʼebʼal imotxebʼal, laʼ jaʼp s-tiibʼa taʼn quBʼaal Tiuxh, —xeʼt Jesuus te inqʼa nikich txhusun ibʼekʼbʼal inqʼa qumol s-tijaq imam Israeel.

Tan yeʼ nikich motx iqej viTiuxhil Tiuxh uvaʼ nikich aqʼon tiqleʼm Jesuus. 30Tan ech maʼtich motx talt s-eche: —At vet ok val u demoonio t-taanima naq uvaʼe, —chichichaq tiʼ Jesuus.

Uvaʼs talt quBʼaal Jesuus uvaʼ eela kuxh nikich isaʼt quBʼaal Jesuus inqʼa niman tetz tuchʼ inqʼa titzʼin

Tio 12.46-50; Luk 8.19-21

31Aqʼbʼetz vet itxutx Jesuus tuchʼ inqʼa titzʼin Jesuus, tul motx kuxh kaj vet tiʼ otzotz. Pet aʼl itxhaq vet vaʼl xaol tiʼ tiqʼol eluʼl Jesuus. 32Tul ech tal inqʼa xaol, inqʼa kʼuqinyich txala txhaq tuul Jesuus, s-eche: —Il atxutx, at tiʼ otzotz tuchʼ inqʼa eetzʼin. Tul il, axh, nik itxhok axh, —xeʼt eʼl Jesuus.

33Yaʼne ech tal Jesuus s-eche: —¿Jaʼletze uvaʼ toq inbʼan eela tuchʼ intxutx, atz tuchʼ inqʼa vitzʼin? —xeʼt Jesuus.

34Tul isaqi Jesuus inqʼa xaol, inqʼa kʼuqlich txala txhaq tuul. Tul ech tal Jesuus s-eche: —Aʼetz inqʼa eela kuxh nik insaʼt tuchʼ intxutx, atz nik insaʼt tuchʼ vitzʼin, inqʼa xaol inqʼaa. 35Tan jatvaʼlxh inqʼa xaol uvaʼ, aʼ laʼ ibʼan kam u titzʼabʼal quBʼaal Tiuxh; tul aʼetz inqʼae, ech tatin, eche vitzʼin, atz eche vanabʼ, atz eche intxutx, —xeʼt Jesuus.

လက်ရှိရွေးချယ်ထားမှု

Kuxh 3: ixlC

အရောင်မှတ်ချက်

မျှဝေရန်

ကူးယူ