Kuxh 2
2
Uvaʼs ikuyt quBʼaal Jesuus ipaʼv val u vinaq uvaʼ tzeʼuʼxich kuxh itxhiʼoʼl, tul ibʼan vet bʼaʼn
Tio 9.1-8; Luk 5.17-26
1Yeʼxh jatvaʼl qʼij atin Jesuus t-inqʼa txʼavaʼ uvaʼ yeʼl xaol jeqlel s-tuul. Yaʼne xamtel bʼen vet ok Jesuus tu tenam Kapernauum inpaqte. Tabʼietz vet inqʼa xaol uvaʼ eenich vet Jesuus tu otzotz, 2tul nal kuxh imol vet tibʼ mamala xaol tiʼ Jesuus. Tul mij nikich tutxh vet ipaloʼk inqʼa xaol tziʼ u jubʼal. Poro sebʼtich talt vet el Jesuus viyolbʼal quBʼaal Tiuxh xoʼl inqʼa xaol.
3Yaʼne aqʼbʼ kajvaʼl inqʼa vinaq uvaʼ txhelemalich val u vinaq taʼn, uvaʼ tzeʼuʼxich kuxh itxhiʼoʼl. 4Tiletz vet inqʼa vinaq uvaʼ yeʼ laʼich utxh vet ipaloʼk kʼatz Jesuus tuchʼ u yaabʼ taʼn u mam tenam, tul aʼl ijaqaq vet iviʼ u otzotz talxh uvaʼ atich Jesuus. Maʼtichetz ijaqp bʼiil viviʼ u otzotz, tul taqʼaq vet koʼp u yaabʼ viʼ txʼatxh tzeʼ vatz Jesuus, u yaabʼ uvaʼ tzeʼuʼxich kuxh itxhiʼoʼl.
5Tiletz vet Jesuus uvaʼ kʼuqlichxh ikʼuul inqʼa vinaq tiʼ ibʼant Jesuus bʼaʼn u yaabʼ, tul ech tal Jesuus te u yaabʼ, uvaʼ tzeʼuʼxich kuxh itxhiʼoʼl, s-eche: —Txa, qat inkuy sotzsal vet inqʼa apaʼv, —xeʼt Jesuus.
6Atichetz jolol inqʼa nikich txhusun ibʼekʼbʼal inqʼa qumol s-tijaq imam Israeel. Tul kʼuqinyich tu otzotz. Tul echaq nikich titzʼa t-taanima s-eche: 7—¿Kam talaxeʼ uvaʼ?: «Qat inkuy sotzsal vapaʼv,» chich kuxh naq u vinaq uvaʼe. ¡Tira nik teesa naq iqʼij quBʼaal Tiuxh tuchʼ uvaʼ nik taleʼ! Tan yeʼxhabʼil invaʼq laʼ kuy sotzsan ipaʼv inqʼa xaol, pet taʼn kuxh quBʼaal Tiuxh, —xeʼtaq t-taanima.
8Yaʼne nal kuxh ibʼen titzʼabʼal inqʼa vinaq te Jesuus. Tul ech tal Jesuus s-te s-eche: —¿Keʼch nik etitzʼat tetaanima s-eche, tul yeʼ nik eqejeʼ uvaʼ at viqleʼm tiʼ ikuyux vipaʼv u vinaq? 9Atz ¿jabʼisteetz uvaʼ yeʼ laʼ oleʼv in s-tiʼ nik etitzʼa? ¿Maq tiʼ uvaʼ?: «Qat inkuy sotzsal inqʼa apaʼv.» Atz ¿maq tiʼ uvaʼ?: «Lakpen. Tul eeqʼo vatxʼatxh tzeʼ. Tul quxh tavotzotz,» chaq in te u yaabʼ. 10Pet toq inkʼutxh sevatz uvaʼ at viqleʼm taʼn quBʼaal Tiuxh tiʼ ikuy sotzsal vipaʼv inqʼa xaol tzitza vatz u txʼavaʼ, in, u Kʼaola uvaʼ qat bʼen s-alam aanima, —xeʼt Jesuus.
Tul ech tal Jesuus te u vinaq, uvaʼ tzeʼuʼxich kuxh itxhiʼoʼl taʼn yaabʼil, s-eche: 11—Toq val see: Lakpen. Tul iqʼo vatxʼatxh tzeʼ. Tul quxh tavotzotz, —xeʼt Jesuus.
12Taʼnetz kuxh tal Jesuus u yol uvaʼe, tul lakp vet u vinaq. Atz yekich tiqʼo vet vitxʼatxh tzeʼ. Tul ech ivatz jankʼal inqʼa xaol, bʼen veteʼ. Tul kaayichxh vet taanima inqʼa xaol. Atz motx toksa vet iqʼij quBʼaal Tiuxh. Tan ech motx tal vet s-eche: —¡Yeʼtix qil ibʼanax invaʼq kam s-eche! —xeʼtaq veteʼ.
Uvaʼs talt quBʼaal Jesuus itxhʼuyeʼv bʼen Levii s-tiʼ
Tio 9.9-13; Luk 5.27-32
13Yaʼne bʼen vet Jesuus paqte tziʼ u mam aʼ. Poro mamala xaol nikich taqʼbʼ kʼatz Jesuus. Tul nikich motx itxhus Jesuus. 14Sebʼtichetz ixaon Jesuus tziʼ u mam aʼ, tul til Jesuus val u vinaq, uvaʼ Leviich ibʼij; ikʼaolich Alfeeo. Tul kʼuqlich Levii t-val u atibʼal tal uvaʼ nikich jaqaxik puaq tetz Rooma.
Tul ech tal Jesuus te Levii s-eche: —Txhʼuyeʼven s-viʼ, —xeʼt Jesuus. Tul yekich ok vet bʼen Levii tiʼ Jesuus.{*}#2.14 Atichetz jolol inqʼa tij imam Israeel uvaʼ atich ok tiʼ imolox puaq tetz u mam tenam Rooma. Tan jankʼal inqʼa tij imam Israeel atich ok jaqʼ ibʼekʼbʼal u mam iqʼesal uvaʼ tu Rooma. Atz eesamalich iqʼij inqʼa tij imam Israeel taʼn. Echetz aʼ u mam iqʼesal nikich alon uvaʼ tetxhal kuxh laʼich itxhoj inqʼa tij imam Israeel tatin te u mam iqʼesal. Antichetz Levii, u tij imam Israeel, atich ok tiʼ imolox puaq tetz Rooma. Echetz nikich itxhiʼane inqʼa tij imam Israeel tiʼ inqʼa jaqol puaq.
15Ibʼanetz paqul, bʼen Jesuus txʼaʼon t-totzotz Levii tuchʼ inqʼa nikich itxhus tibʼ s-kʼatza. Tul tzum tok Jesuus viʼ meexha tuchʼ jolol inqʼa jaqol puaq tetz Rooma, atz tuchʼ jolt inqʼa xaol uvaʼ aj paʼvomich vatz u tenam. Tul vaʼl txʼaʼonk Jesuus s-tuchʼ. Tul mamala xaol atiche, inqʼa txhʼuyich tiʼ Jesuus.
16Atichetz jolol inqʼa fariseeo, aʼe inqʼa nikich txhusun ibʼekʼbʼal inqʼa qumol s-tijaq imam Israeel xoʼl u tenam. Tilaqetz veteʼ uvaʼ tzum nikich itxʼaʼon Jesuus tuchʼ inqʼa jaqol puaq tetz Rooma, atz tuchʼ jolt inqʼa aj paʼvom, tul ech motx tal te inqʼa nikich itxhus tibʼ kʼatz Jesuus s-eche: —¿Keʼch taltxheʼ uvaʼ vaʼl nik txʼaʼonk naq, u txhusul etetz, tuchʼ txhaqnaq inqʼa nik jaqon puaq tetz Rooma, atz tuchʼ jolt inqʼa aj paʼvom? —xeʼtaq tiʼ talax yol tiʼ Jesuus.
17Tabʼietz vet Jesuus u yol uvaʼ tal inqʼa nikich txhusun ibʼekʼbʼal inqʼa qumol s-tijaq imam Israeel, tul ech tal Jesuus s-te s-eche: —Jankʼalxh inqʼa xaol, uvaʼ bʼaʼn ikʼuul, tan yeʼl tzʼakvil nik isaʼon s-te. Pet taʼnxh inqʼa yaabʼ nik isaʼon tzʼakvil s-te. Echetz jit aʼ ulk in tiʼ inqʼa xaol, inqʼa yeʼl ipaʼv s-vatz. Pet aʼ ulk in tiʼ itxhokox inqʼa aj paʼvom, —xeʼt Jesuus.{*}#2.17 Kʼuxhetz tal quBʼaal Jesuus yol tiʼ inqʼa yaabʼ tzitza, aloq tan jit aʼ koqxh tal quBʼaal Jesuus u yaabʼil tetz txhiʼoʼl. Pet tiʼ u taanxelal inqʼa xaol talvat quBʼaal Jesuus. Tul jitatetz aʼ talvat quBʼaal Jesuus yol tiʼ u tzʼakan tetz txhiʼoʼl, pet aʼ talvat quBʼaal Jesuus yol tiʼ u tzʼakan tetz taanxelal inqʼa xaol. Aʼetz quBʼaal Jesuuse uvaʼ tal tibʼ s-tzʼakanal, uvaʼ laʼ bʼanon bʼaʼn taanxelal inqʼa xaol.
Uvaʼs tabʼil inuqul te quBʼaal Jesuus tiʼ u maqo ibʼ tiʼ txʼaʼoʼm tiʼ inatxhax Tiuxh
Tio 9.14-17; Luk 5.33-39
18Nikichetz imaq inqʼa xaol itxʼaʼon tiʼ inatxhax Tiuxh, inqʼa nikich itxhus tibʼ kʼatz Xhun, u aqʼol kuʼ xaol xeʼ aʼ. Tul echat kuxh nikich motx ibʼane inqʼa nikich itxhus tibʼ kʼatz inqʼa fariseeo. Tul echaq tal te Jesuus s-eche: —¿Kam s-tiʼil yeʼ nik motx imaq txhaqnaq itxʼaʼon tiʼ inatxhax Tiuxh, inqʼa nik itxhus tibʼ sakʼatza? Pet ech koq oʼ, inqʼa txhusel oʼ taʼn Xhun, atz oʼ, inqʼa txhusel oʼ taʼn inqʼa fariseeo, tan nik qumaq qutxʼaʼon tiʼ inatxhax Tiuxh, —xeʼtaq te Jesuus.
19Yaʼne ech tal Jesuus s-eche: —¿Maqetz laʼ isaʼ imaqt inqʼa xaol itxʼaʼon tiʼ inatxhax Tiuxh?, inqʼa bʼekʼel vet tiʼ tatin kʼatz u aj tzʼaloʼm. Tan oq ant atil u aj tzʼaloʼm s-xoʼl, tul yeʼ laʼ isaʼ imaqt itxʼaʼon tiʼ inatxhax Tiuxh. 20Pet topoon u qʼij uvaʼ toq eesaloq el u aj tzʼaloʼm s-xoʼl, yaʼnetze laʼ imaq vet itxʼaʼon tiʼ inatxhax Tiuxh.{*}#2.20 Kʼuxhetz tal quBʼaal Jesuus u yol tiʼ u aj tzʼaloʼm, tan aʼ quBʼaal Jesuuse tal tibʼ s-aj tzʼaloʼm. Xaʼtetze laʼich chiibʼ inqʼa xaol tiʼ quBʼaal Jesuus tuulbʼal uvaʼs atich quBʼaal Jesuus s-xoʼl. Echetz yeʼ nikich tutxh imaqt tibʼ quBʼaal Jesuuse tiʼ itxʼaʼon tiʼ inatxhax Tiuxh tuchʼ inqʼa nikich itxhus tibʼ s-kʼatza. Pet uvaʼs maʼtich ibʼen vet quBʼaal Jesuus tu amlikaʼ, tan laʼich utxh imaqt vet inqʼa xaol itxʼaʼon tiʼ inatxhax Tiuxh. Tan vimaqt tibʼ inqʼa xaol tiʼ vitxʼaʼon tiʼ inatxhax Tiuxh, tan aʼe nik itxumun tiʼ vipaʼvineʼ.
21Tan ech u vatin, eche vaʼq akʼla kʼoj. Tan yeʼxhabʼil invaʼq laʼ kʼoan ok inbʼeeq akʼla kʼoj tiʼ vaʼq oʼtla oksaʼm. Tan oq ech uvaʼe laʼ ibʼana, tul laʼ kʼolon vet u akʼla kʼoj. Tul aʼl laʼ ilitxʼm vet u oksaʼm taʼn.{*}#2.21 ¿Kam nik elkaʼp u yol tal quBʼaal Jesuus tiʼ u oʼtla oksaʼm tuchʼ u akʼla kʼoj? U oʼtla oksaʼm, aʼ nik elkaʼpun u oʼtla txumbʼal tiʼ inimal inqʼa bʼekʼbʼal uvaʼ tal ka quBʼaal Tiuxh te Moisees s-naʼya. Tan chianaʼqich kuxh te inqʼa tij imam Israeel vinimal inqʼa oʼtla bʼekʼbʼal. Tul echatich kuxh Xhun inpaqte, u aqʼol kuʼ xaol xeʼ aʼ. Tan chianaʼqich te Xhun inimal inqʼa naʼyla bʼekʼbʼal. Tan nikichat imaq tibʼ inqʼa nikich itxhus tibʼ kʼatz Xhun tiʼ itxʼaʼon tiʼ inatxhax Tiuxh. Pet u akʼla kʼoj, tan aʼ nik elkaʼpun tiʼ inqʼa akʼla txumbʼal uvaʼ ul tal quBʼaal Jesuus xoʼl inqʼa xaol. ¿Kam nik elkaʼp vilitxʼt u akʼla kʼoj u oʼtla oksaʼm? Aʼ nik elkaʼpun, tiʼ uvaʼ jit nal laʼ tok vet inqʼa iqʼesal uqʼeʼybʼal tiʼ inimal kam uvaʼ ul tal quBʼaal Jesuus, tan chianaʼqichaq vet s-te vinimal inqʼa oʼtla bʼekʼbʼal. 22Atz echat kuxh vatin, eche taʼl uuva uvaʼ yaʼnaqxh ipotxhʼox el. Tan yeʼxhabʼil invaʼq laʼ aqʼon kuʼ taʼl uuva uvaʼ yaʼnaqxh ipotxhʼox el tuul invaʼq oʼtla tzʼuʼm, u tatibʼ aʼ. Tan oq ech uvaʼe laʼ ibʼana, tul laʼetz rinp vete u oʼtla tzʼuʼm taʼn vixev. Tul laʼ motxeʼl u taʼl uuva s-tuul. Tul yeʼxhkam vet laʼ itxaʼki u tzʼuʼm. Pet aʼl bʼaʼn uvaʼ, aʼ laʼ qʼuʼuxik kuʼ u taʼl uuva tuul akʼla tzʼuʼm, —xeʼt Jesuus.{*}#2.22 ¿Kam nik elkaʼpun u taʼl uuva uvaʼ naʼy iqʼuʼux vet tuul u oʼtla tzʼuʼm? Aʼ nik elkaʼpun tiʼ u naʼyla bʼekʼbʼal uvaʼ chianaʼqich kuxh ibʼanax te inqʼa qʼesla txhaq tijaq imam Israeel uvaʼs tul quBʼaal Jesuus. ¿Kam nik elkaʼpun u taʼl uuva uvaʼ yaʼn kuxh vet iqʼuʼux kuʼ tuul u akʼla tzʼuʼm? Aʼ nik elkaʼpun tiʼ inqʼa bʼaʼnla txhaq yol uvaʼ yaʼn kuxh ixeʼt quBʼaal Jesuus tiʼ talaxeʼ. Aʼetz nik tal vet quBʼaal Jesuus uvaʼ yeʼ laʼ utxh imolotaq tibʼ inqʼa yol s-vatzaq, eche inqʼa maqo ibʼ tiʼ txʼaʼoʼm tiʼ inatxhax Tiuxh. Tan yeʼich laʼ utxh imolot tibʼ tuchʼ uvaʼ iqʼomich taʼn quBʼaal Jesuus. ¿Kam nik elkaʼp u oʼtla tzʼuʼm? Aʼ nik elkaʼpun tiʼ inqʼa tij imam Israeel uvaʼ, aʼ kuxh chianaʼq s-te inimal inqʼa oʼtla bʼekʼbʼal. Xaʼtetze tal quBʼaal Jesuus uvaʼ jit nal laʼ ichian s-te inimal u akʼla txumbʼal uvaʼ ul tal quBʼaal Jesuus. Tan jankʼal koq laʼich ok tiviʼ inqʼa iqʼesal uqʼeʼybʼal iyaʼsat vimaqtaq itxʼaʼon tiʼ inatxhax Tiuxh, tan chianaʼqichaq s-te. ¿Kam nik elkaʼpun u akʼla tzʼuʼm? Aʼ nik elkaʼpun tiʼ inqʼa xaol, inqʼa yaʼnaqxh nik motx tok bʼen tiʼ iqeex inqʼa bʼaʼnla txhaq yol uvaʼ tal quBʼaal Jesuus, eche inqʼa iapoostol quBʼaal Jesuus tuchʼ jolt inqʼa xamich tok bʼen. Tan jit kuxh tzaʼl tok bʼen tiʼ iqeex inqʼa bʼaʼnla txhaq yol.
Uvaʼs pal itxʼitt inqʼa nikich itxhus tibʼ kʼatz quBʼaal Jesuus vivatz inqʼa triigo tu xeem qʼij saavado
Tio 12.1-8; Luk 6.1-5
23Ibʼanetz paqul tuulbʼal val u xeem qʼij saavado, tul pal itxʼit inqʼa nikich itxhus tibʼ kʼatz Jesuus kaʼl inqʼa triigo.#Deuteronoomio 23.25
24Yaʼne ech tal inqʼa fariseeo te Jesuus s-eche: —¡Nik kol eel inqʼa nik itxhus tibʼ sakʼatza! ¡Aʼxh nik itxʼit inqʼa triigo! Tul yeʼ nik ikuy u qubʼekʼbʼal uvaʼ ech laʼ bʼanaxe tu xeem qʼij saavado, —xeʼtaq te Jesuus.
25Tul ech tal Jesuus s-eche: —Yeʼetzebʼ nik ibʼen sete uvaʼ nik esikʼle kam uvaʼ ibʼan Daviid s-naʼya tuchʼ inqʼa imol uvaʼs motx ikam t-vaʼy. 26Tan paloʼk Daviid tuul u bʼuʼqla tatibʼal quBʼaal Tiuxh tuulbʼal uvaʼs atich ok Aviataar s-mam iqʼesal oksan yol vatz Tiuxh. Tul itxʼaʼ Daviid inqʼa paan, inqʼa maʼtich toksal vet vatz quBʼaal Tiuxh s-tetz natxhkʼuulabʼal. Atz taqʼ Daviid tetz inqʼa imol, inqʼa txhʼuyich s-tiʼ. Tul yeʼ nikich ikuy inqʼa bʼekʼbʼal uvaʼ ech laʼich bʼanaxe. Pet taʼn kuxh inqʼa oksan yol vatz Tiuxh atich tokebʼal tiʼ itxʼaʼaxeʼ.#Leviitiko 24.9; 1 Samueel 21.1-6
27Pet toq val sete tiʼ u xeem qʼij saavado. Tan aqʼax ka u xeem qʼij s-tilanbʼal inqʼa xaol. Poro jit aʼ talax u xeem qʼij uvaʼ iqatz koq te inqʼa xaol. 28Echetz bʼenoq sete uvaʼ, aʼ ine, at viqleʼm, in, u Kʼaola uvaʼ bʼen s-alam aanima, tiʼ talax kam laʼ utxh ibʼant inqʼa nik itxhus tibʼ sinkʼatza, tuulbʼal u xeem qʼij saavado, —xeʼt Jesuus te inqʼa fariseeo.
လက်ရှိရွေးချယ်ထားမှု
Kuxh 2: ixlC
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
© 2016, Wycliffe Bible Translators, Inc. All rights reserved.
