Matius Uram 7
7
Yesus biryi Er miliramnyi nang asi eterenmouci, “Sunci yuk nang ati, ‘Malyi kun dinyi kunubde baraming se,’ minola tenebde baramunyei,” ebmou uram
7:1-5
1Er Yesus biryi mutuk kon dam aryi kuboka tuba eterenmouci, Erci Er miliramnyi nang amolbaryi asi ato eboka eterebmou. “Sunci yuk nang ati, ‘Malyi kun dinyi kunubde baraming se,’ minola tenebde baramunyei. Sunci yuk nang ati talyi ati, ‘A nang ara wenebmanto kunung se,’ teneramunyi uca, Er Imtamnyi biryi sunbabyi, ‘A nang ara wenebmanto kunung se,’ tenen wenebkwansir. 2Sunci yuk nang ati, ‘A nang ara wenebmanto kunung se,’ minola teneramunyi ura, Er Imtamnyi bibabyi neiktoto sunti, ‘A nang ara wenebmanto kunung se,’ tenen wenebkwansir. Ba, sunci yuk nang ati talyi ati, ‘A nang ara wenebmanto kunung se,’ kum teneramunyi ura, Er Imtamnyi bibabyi neiktoto sunti, ‘A nang ara wenebmanto kunung se,’ tenen kum wenebkwansir.
3Sunci malyi kun dinyi weikto dinyi asi kunubde baramuncok, ‘Nun malyi kun dinyi ton kum kuramib,’ tenerdarandum. Bok, yuk nang ara malyi kun dinyi weikto kum dinyi asi kunubde baraming asi sunci, ‘Malyi kun dinyi kunuraming,’ tenerandum se. Sun baramnang asing ara tiling co iya weik dinyi dakdoba wekmasute bok, sunci, ‘Tiling co ni asing kum wekmanir,’ tenerandatiryok, sun kwit asing ara co bulbula iya mitik dinyi wekmaci asi sunci, ‘Co bulbula asing wekmakir,’ ebdate do? Ato tenen kum. 4Tonda, sunci sun kwit bisi, ‘Ni kwit e, kan asing co bulbula mitik dinyi wekmakir ati, kwinibkabokwankin,’ ebdate do? Ato tenen kum. Sun baramnyi asing ara co tiling ilila dinyi wekmasici dinyi asi kum kwinirdarandum ati, sunci ato ebdate ura, kikiman kum kubte. Ati, sunda malyi kun dinyi weik dinyi tanglona kum uca kunubde baramuncok, sunci yuk nang aryi mitik malyi kuramingnyi dinyi asi wenebmunyei ati ebman. 5Sunci malyi kun dinyi kunubde baramuncok, sunci kiknibdeiboka sun damnyi teleb kun nang kimdamunyei se. Eda, sun malyi kun dinyi lak eboka taklobdarur. Ati, sunci sun malyi kurandum dinyi sirya taklobmunyi ura, sun kwit yabwe yuk nang aryi malyi kun dinyi asi aminda aryi, ‘Bitabdeibkwayeb,’ tenen wenebdarur. Ara, tiling co ilila weik dinyi sun asing wekmasici asi sirya kwinibmunyi ura, sunci sun kwit yabwe asing wekmaci dinyi ara weik dinyi kum mitik dinyi kum ur dobkabokdarur.”
Er Yesus biryi, “Sunci Teleb Uram etereramunci, ‘Sun dib tenen nang aryi a uram asi talyi ati ina ngilikingnyei,’ tenen kalikdarur,” ebmou uram
7:6
6Er Yesus biryi eterenmouci, ton ato ebmou, “Sunci Teleb Uram etereramunci, sunci kalikoka, ‘Sun, “Teleb Uram nun li,” tenen nang aryi Teleb Uram ina ngilikingnyei,’ tenen Teleb Uram bikdob dinyi eterebmunyei. Ati, sunci Er Imtamnyi biryi Er mabwe nermabwe karebkwande dinyi asi sun yu kam ato kun nang asi talyi karebmunyei. Yu kam ato kun nang asi Teleb Uram bikdob dinyi eterebmunyi ura, a nang aryi dobkirikoka obsingnyei. Tonda, sunci iya bikdob dinyi dengna weik keil ato dinyi yu bisam ato kun nang asi talyi karebmunyei. Yu bisam ato kun nang asi Teleb Uram bikdob dinyi etereramunyi ura, a nang aryi a uram asi ina ngilikoka yan yanisitablobingnyei,” ebmou.
Er Yesus biryi, “Sunci Er Imtamnyi si weik eboka molobmamunyi ura, Erci sun molona asi diboka kekebkwansurur,” ebmou uram
7:7-12
7Er Yesus biryi tuba eterenmouci, Erci Er miliramnyi nang asi ton ato ebmou, “Sunci Er Imtamnyi si weik eboka sun molobkwamunyi tok molobdarur. Sirya molobmunyi ura, Er Imtamnyi biryi sun molobkwamunyi tok karebkwansurur. Tonda, sunci Er Imtamnyi urasintam bindoka Erci sunsi teleb tenebmaci dinyi ingkirikdarur. Sirya ingkirikmunyi ura, Er Imtamnyi biryi sun ingkirikmamunyi tok karebkwansurur. Tonda, sunci, ‘Er Imtamnyi biryi bublan kukeibsute,’ tenen congom-congom ebdobdarur. Bublan congom-congom ebdobmunyi ura, Er Imtamnyi biryi sunti bublan kukeibkwansurur ati ebman. 8Unanyi-unaner ara Er Imtamnyi bisi molobingnyi asi Er Imtamnyi biryi karebkwande. Tonda, unanyi-unaner ara Er Imtamnyi biryi teleb tenebmaci dinyi ingkirikingnyi asi Er Imtamnyi biryi karebkwande. Tonda, unanyi-unaner ara, ‘Er Imtamnyi biryi bublan kukeibnute,’ tenen congom-congom ebingnyi ura, Er Imtamnyi biryi bublan kukeibkwande. A deyok aryi, Niryi sunti, ‘Er Imtamnyi bisi molobde bindarur,’ ebmasin.
9-10Sunda tukwetam kun nang ara sun mabwe aryi moloransingnyi tok teleb dinyi karerandum bok, sun Nai Imtamnyi ara bisibkaboka sunci Ersi moloramunyi tok teleb dinyi karebkwansir. Sun mi ara, ‘Roti ton yibtinyi,’ eboka molobsici ura, sunci erti, ‘Kum, keil du akwe yibdum,’ ebkwandum do? Ato tenen kum. Tonda, sun mi ara, ‘Mekinaia ton yibtinyi,’ eboka molobsici ura, sunci ersi kwatima karebkwandum do? Ato tenen kum. Eda, sunci sun mabwe aryi moloransing tok teleb dinyi karerandum. 11Ati, sunda tukwetam kurandum nang ara malyi dinyi tenebde barandum ababyi sun mabwe aryi yina ton yuk dinyi teleb dinyi ton asi karerandum. Bok, sun Nai Imtamnyi bira Iya Telebnyi biryi sunda tukwetam nang asi bisibkaboka sun Ersi moloramingnyi nang asi sunglona kum uca iya teleb dinyi karesurur. 12Ura, sunci, ‘Yuk nang aryi boukwe weik kiboka nunti teleb kurdeiriransiting,’ tenerandum to, sunbabyi neiktoto, ‘Nunda yuk nang asi boukwe weik kiboka teleb kubdeibkwayeb,’ tenen kunubde bana teleb. Yuk nang asi boukwe weik kimdeirin dinyi ara Musa kerek sengna umbura aryi iya nunukeiboka kunubde ban dinyi kurur. Tonda, Er Imtamnyi Uram ebdeibmaci to lak etereramnyi nang kerek sengna umbura kerek sekeiamnyi ababyi a dinyi ara iya nunukeiboka kunubde ban dinyi kurur,” ebmou.
Er Yesus biryi, “Sunci, ‘Er Imtamnyi bisi milibdobkwayeb,’ tenen nurubdob bisik asi wengbindobdarur,” eboka eterebmou uram
7:13-14
13Er Yesus biryi ton ato ebmou, “Sunci, ‘Iya kam kun dinyi dobdobkwayeb,’ tenen nukubdob bisik bublan dam wengbimunci, Er Imtamnyi biryi teleb tenesurur to kunubde bindarur. Ninyi aryi wenen dinyi dobdobkwaming ban bisik ara ila bisik kurande ati ebman. A bisik ara ila bisik kurande deyok aryi, ninyi ilinto ara, ‘A bis binkwayeb,’ tenen baraming. Tonda, a bisik wengban bublan ababyi ara weik kurur deyok aryi, ninyi ilinto ara a bisik bublan dam biriman aryi wengbaraming. A deyok aryi, Niryi sunti, ‘Malyi bisik bublan asi wengbingyei,’ tenen, ‘Bisik bublan dam nurubdob dinyi wengbimunci, Er Imtamnyi teleb tenesurur to kunubde bindarur,’ ebmasin. 14Ba, iya kam kun dinyi dobdobkwaming bisik ab a bisik wengbana bisik bublan ab ara iya dukub kurur deyok aryi, ninyi mitikanun wengbaraming. A bisik ara nukubdob bisik kurur bok, sunci, ‘Iya kam kun dinyi dobdobkwayeb,’ tenen nukubdob bisik bublan dam wengbindarur ati ebmasin,” ebmou.
“Ninyi ton nang ara tola uram etereryankwaming ati, sunci, ‘Ato en uram dib tenebibyei,’ tenen kalikdandobkwandarur,” eboka eterebmou uram
7:15-20
15Er Yesus biryi mutuk kon ai aryi kuboka Erci Er miliramnyi nang asi eterenmouci, ato ton eboka eterebmou, “Ninyi ilinto ara tola ati, ‘Nunda Er Imtamnyi Uram ebdeibmaci to lak etereramnyi nang kunub,’ ebdankwamingiryok, tola uram etereryankwaming. Ati, sunci sun damnyi kalikdandoka, ‘A nang aryi eterebkwansing uram dib tenebibyei,’ tenen kubdarur. A nang ara, ‘Ninyi kanya bowanikminikwayeb,’ tenen sun dam yamingiryok, sunci sun damnyi ati, ‘Nunda Er Imtamnyi bisi milin nang kunub,’ erdaraming. A nang ara kiknibdeiboka domba borande kanya namin kanya bon nang ato kimdaramingiryok, sunci sun kanyatam ara bai kam kanya aryi yu kurande ato kanya bobmangiryok yankwaming. 16A nang ara tola uram etereboka malyi dinyi kunubde baraming asi sunci asing eibmunci, ‘A nang ara tola uram en nang yanaming,’ teneboka bikwandum. Ninyi aryi, ‘Anggur du moubmar ati dak yibkwayeb,’ teneramingiryok, sunci tiling co ara du moun kum co bindoka du dakde yiraming do? Ato tenen kum. Tiling co ara anggur du kum mourirande. Tonda, tiling co kirikna co kwarang du kum mourirande. Ato kuboka sun malyi kanya bon nang aryi du mouna kum uca, malyi dinyi akwe kunubde baraming. 17Tonda, teleb co nirya ara neiktoto du teleb dinyi akwe mourande. Ba, malyi co ara du malyi dinyi akwe mourande. Ara, sun teleb kanya bon nang aryi teleb dinyi kunubde baraming bok, sun malyi kanya bon nang ara malyi dinyi akwe kunubde baraming. 18Teleb co ara co du malyito moubmana kum kurur. Tonda, malyi co ara co du teleb ton asi moubmana kum kurur. 19Ura, co du teleb asi mouna kum co asi ninyi aryi kweboka uk daraming to, Er Imtamnyi biryi sun malyi dinyi kunubde ban nang nirya asi weneboka uk me kwan asi donokwande. 20Ati, sun tola uram eteren nang ara sun dam yamingiryok, malyi kun dinyi kunubde binkwaming asi sunci asing eibmunyi ura, sunci, ‘A nang ara tola uram en nang yanaming,’ teneboka bikwandum,” eboka eterebmou.
Er Yesus biryi, “Er Imtamnyi biryi teleb tenesurur to kunubde baramingnyi nang ara lemna dinyi dobdobkwaming,” ebmou uram
7:21-23
21Er Yesus biryi ton ato eboka eterebmou, “Sun Nisi, ‘Se, Nai Arungdeirisurumnyi, Nai Arungdeirisurumnyi,’ eraningnyi nang nirya ara lemna dinyi doboka Er Imtamnyi amwetam kun nang kum kibkwaming. Ara, sun si bambul dem deib aryi kisal dangnaning nang ati ato ebman. Eda, sun Er Imtamnyi teleb tenesurur to kunubde ban nang akwe Er Imtamnyi amwetam bun nang kibkwaming. 22Sirya kobdob berekwande uki tum berekci ura, ninyi ilinto ara si bambul deib aryi Nisi, ‘Se, Nai Arungdeirisurumnyi, Nai Arungdeirisurumnyi,’ ebningiryok, ‘Kan si deib aryi Er Imtamnyi Uram ebdeibmaca asi lak etereramoubwe ati, Kanci nunsi lebdeibsurum,’ eboka molobkwaning. Tonda, sunci, ‘Se Nai Arungdeirisurumnyi, Kan si deib aryi isa yangdonongnamoubwe ati, Kanci nunsi lebdeibsurum,’ eboka molobkwaming. Tonda, ‘Kan si deib aryi ilil tenen dinyi yuk-yuk asi kikniramoubwe ati, Kanci nunsi bublan kukeibsiminci, nunbabyi wengdoryankwayeb,’ eboka molobkwaning. 23Ato eboka molobningnyi bok, Niryi a nang ara Er Imtamnyi teleb tenesurur to kunubde ban kum nang asi ato eboka lak ebkwan, ‘Sunda malyi kun dinyi kunubde barandum nang se. Sunda Ni dam kun nang kum kundarur ati, Ni urasin dam akiryi bindobdarur,’ ebkwan,” eboka eterebmou.
Er Yesus biryi kemdeirin uram doboka, “Sun Ni uram kekeboka kunubde baramingnyi nang ara teleb ai don nang ato kunung,” eboka eterebmou uram
7:24-29
24Ura, Er Yesus biryi ton ato eboka eterebmou, “Ati, unanyi-unaner aryi Ni uram asi kekebmangnyi ura, kunubde baramingnyi nang ara bikdob kanya borandinyi, ai abyokomna diboka katabum eboka ikoka dorandanyi kiklibkun. 25Ai abyokomna diboka ikoka doanci deyok aryi, mo yeinya kiboka me onmaci tum ababyi akai ara kum dalungnande. Ni uram kekeboka kunurandinyi bira erda atonyi kurandiryi. 26Ba, unanyi-unaner ara Ni uram kekeboka kum kunuramingnyi nang ara lub kanya bonanyi, ai abyokomna diboka katabum eboka iki kum dorandanyi kiklibkun. 27Ai abyokomna diboka kum ikoka doanci deyok aryi, mo yeinya kimaci tum ara me onmariryi, akai nirya dalubokabdiryi ururuboka bobarande. Ni uram kekerandiryok kum kunurandinyi bira erda atonyi kurandiryi,” eboka eterebmou.
28Ura, Er Yesus biryi a uram nirya asi eterenmou ani, sirya eterebmou ura, ninyi ilinto aryi Er eterena ati, “Nai kobe, anyi bira bikdob bikwe ati dantam nang aryi eterebyi ba, bikwe aryi eterenmasir do?” tenebmai. 29Ara, “Er Yesus biryi eterenmasir ara imtam aryi kuboka mikib dobdobmunyi bitonyi kuboka dib en uram lak eterenmasir,” tenebmai. Sun Musa kerek sengna etereramnyi nang ababyi etereramiryok, sunci ato kuboka dib en uram lak kum kimdeiriramnyi.
လက်ရှိရွေးချယ်ထားမှု
Matius Uram 7: MTG
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
@LAI 2007 (New Testament), @LAI2022 (Old and New Testament)
