Keriben 14
14
XIV
O Dešuštārto Šero
1Avl’as auka andro Ikoniumos, kaj jon so‐duǧene gēle andre biboldengri kangeri, he auka vakerenas, kaj but bibolde he Junāne pat’anas.
2Uva o bipat’ade bibolde xanǧārde upre e gāǧen, he kamenas len te liǧan mamuj o phrala.
3Odoleske ačle but d’ivesa, he vakerenas bi‐e‐dar pal o Raj, havo sikad’as kaj peskre lava pal o lāčipen ehi čāče, he kerd’as preko lende tsinki he bāre būt’a, have ehas kerde lengre vastentsa.
4Uva but gāǧe andro foros ehas kerde pro duj koter, he jek pes ikerenas e biboldentsa, āver e Bičhadentsa.
5Kana kamenas te mārel e gāǧen h’e bibolden lengre šereskrentsa, kaj te pes košen lentsa, he te čhivrden e barentsa,
6Prinǧārde odova, he gēle andri Listra h’andri Derba, andre Likaoninska fori, h’andri phuv so ehas pāšle.
7Odoj sikl’ārenas mre Devleskro Lav.
8Odoj andri Listra bešelas jek manuš, havo našt’i phirelas, he ehas bango kana ūl’as pri phuv, he ñikana našt’i phirelas.
9Adava šund’as e Pavlos te vakerel, he dikhelas phusade jakhentsa pe leste. Jov ǧānelas kaj ehi les o pat’aviben he kaj sast’ola.
10He phend’as bāra vikaha, ušt’i! he phir! Jov xutl’as upre he ǧalas.
11Kana o manuša dikle so o Pavlos kerd’as, kerde viki, he phende andri Likaoninsko čhib, O devla avle k’amende tēle andro manušeskro uriben.
12He jon phenenas e Barnabāšiske Jupiteros, h’e Pavloske Merkurios, odoleske kaj akadava vakerelas buter.
13O Jupitersko rašaj, havo ehas angal lengro foros, and’as guruven, have ehas phandle lulud’entsa, ko vudāra, he kamelas len te čhinel e manušentsa vaš mro Devel.
14Adala, kana o Bičhade, o Barnabāšis h’o Pavlos šunde, phrāde peskro uriben, he prastanas pašal o gāǧe, he kerenas viki,
15He phenenas, Rajalen, soske adava keren? Amen sam manuša, have ikerahas e dukha har tumen, he sikl’āras tumen, kaj te tumen irinen kathar o diliñipena ko ǧido Devel, havo kerd’as o uprūno devel, h’e phuv, h’o bāro pāñi, he savoro so odoj ’hi.
16Havo angleder mukelas savoren kaj te peren pe peskre droma.
17Prek odova, na garud’as pes bi‐o‐jakhengre, kaj jov kerd’as o lāčipen, he diñas amenge biršind kathar o uprūno devel, h’o linaja e phabajentsa (t’hilaventsa), he pherd’as amāre jile e xabnaha he baxt’aha.
18H’akadale laventsa ehas phāro te ikeren e manušen, kaj te na čhinen e guruven vaš lende.
19Odoj avle varehave bibolde andral i Antioxia h’o Ikoniumos, have kamenas te sikl’āren e manušen, he čhivrdine barentsa pal o Pavlos, tsrdine les avri andral o foros, he phende peske kaj ehi mūlo.
20Prek odova, har o Sikl’ārde terd’ile pašal leste, ušt’il’as upre, gēl’as andro foros, he aver d’ives gēl’as e Barnabāšiha andri Derba.
21He pales, kana sikl’ārde mre Devleskro Lav andr’adava foros, he sikl’ārde but manušen, gēle pāle andri Listra h’andro Ikoniumos h’andri Antioxia.
22He zoral’ārde e Sikl’ārdengre jile, he vičinde len te ǧan dureder andro pat’aviben, he phende, Amen bāra dukhaha ǧas andre mre Devleskri Phuv.
23He kana vičinde ke peste e Najphurederen andre sako kangeeri, he mangenas bokhaha, dine len e Rajeske, andre havo jon pat’anas.
24He pales, kana gēle pal savore Pizidia, pēle andri Pamfilia.
25He pales, kana sikl’ārde o Lav andri Perga, gēle tēle andri Atalia.
26Odotar gēle pal o pāñi andri Antioxia, kaj jon l’ile mre Devleskri zor vaš e būt’i havi kerde.
27Kana avle, he kedine jekhethāne savori Kangeri, vakerenas pāle savoro, so lentsa mro Devel kerelas, he har phrād’as o pat’avibnaskro vudār e gāǧenge.
28Odoj bešle but e Sikl’ārdentsa.
လက်ရှိရွေးချယ်ထားမှု
Keriben 14: MOR1936
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
First published by the British and Foreign Bible Society in 1936.