Matayi 15

Inyiho izya banyenya

(Mlko. 7.1-13)

1Po aba Falisayi na bamanyisi bamo aba Ndaghilo bakiza kwa Yesu ukufuma mu Yelusalemu nukumulalusya ukuti, 2“Nkimba choni chicho abamanyili bako bakunangannya inyiho zizyo abanyenya bitu bakatulekela. Batakusukusula akiza munyobe zyabo pakulya!”

3U Yesu akabamula akati, “Nkimba choni chicho mukunangannya amalamulo agha Chala nukukonka inyiho zyinyu? 4#Ukf. 20.12, 21.17; Ukk. 5.16; Lev. 20.9Pakuti u Chala akati, ‘Chindika ughuso nu nyoko,’ sona ‘Umuntu wesi yuyo akumughuna uwise nu nyina aghoghiwanje.’ 5Loli mukumanyizya ukuti, ‘Nanti umuntu akumubuzya uwise pamo unyina ukuti, “Uyu we kolobani,” kokuti umuntu yula atabaghiye pakumuchindika uwise.’#15.5 uwise: Amasimbo ghamo aghakale ghasimbite ukuti uwise Pamo unyina. 6Pakubomba bunubu mukughakana amalamulo agha Chala ukuti mukonke inyiho zyinyu. 7Mwe bazimbuli mwee! Naloli u Yesaya akanena ubwanaloli ukuyana na mumo akasimbila ukuti,

8 # Yes. 29.13 ‘Abantu banaba bakunchindika nu mulomo wene,

loli amoyo ghabo ghali kubutali nane.

9Naloli bakunyiputa,

loli ukwiputa kwabo kwabulo.

Pakuti bakumanyizya indaghilo izya bantu

ngati po zikufuma kwa Chala!’ ”

Ivintu vivyo vingamunyazya umuntu

(Mlko. 7.14-23)

10Po u Yesu akabitizya abantu bala nukubabuzya, “Ivwa kuno nukwivwisya akiza. 11Chite cho chicho chikwinjila mu mulomo uwa muntu chikumunyazya, loli chicho chikufuma mu mulomo wache cho chicho chikumunyazya.”

12Po abamanyili bache bakiza nukumulalusya ukuti, “Nkimba uzimenye ukuti aba Falisayi bavulaye mumoyo pavivyo unenite?”

13U Yesu akamula akati, “Imbeyu yosi yiyo Utata wane uwa kumwanya atakayibyala, yikwiza pakunyunkuliwa. 14#Luk. 6.39Baleke bene bulo, abafwamaso banaba, abalongozi aba bafwamaso. Nanti umufwamaso akulongozya umufwamaso uwamwabo, bosi babili bakuwila muchiliba.”

15U Pitala akanena ukuti, “Lingannya, nkimba ichili ichi chikung'anamula ichoni?”

16U Yesu akabalalusya akati, “Nkimba imitu yinyu yichili mikafu ukuchila abamwinyu? 17Nkimba mutakwivwisya? Chosi chicho chikwinjila mu mulomo uwa muntu chikwinjila mulwanda chicho pabumalilo chikutaghiwa kwisote. 18#Mat. 12.34Loli chosi chicho chikufuma mu mulomo chikufumila mumoyo, po ichi cho chicho chikumunyazya umuntu. 19Pakuti mumoyo uwa muntu, momumo mukufuma inyinong'ono imbibi, zizyo zikumulongolezya ukuti aghoghe, alowe nukubomba ubwamalaya; ubwiba, ubumyasi, sona ni yebo. 20Ivintu vinivi vyo vivyo vikumunyazya umuntu. Loli ukulya bo utasukusuye akiza munyobe zyinyu ukuyana na mumo bakunenela, vitakumunyazya umuntu.”

Ulwitiko ulwa mukolo

(Mlko. 7.24-30)

21U Yesu akepapo pabuzilo bula nukubuka muchigaba chicho chikaba papipi nu twaya utukulu nkani utwa Tile nu Sidoni. 22Umukolo yumo umu Kenani yuyo akikalagha muchigaba chilachila akiza kukwache nukulila ukuti, “Wee Mwene Mwana uwa Devedi! Umpelele ichisa! Umwana wane umulindu ali nu muzimu umubibi sona mubine nkani.”

23Loli u Yesu atakanenaghapo nachimochimo kukwache. Abamanyili bache bakiza kukwache nukumulaba ukuti, “Mubuzye abukaye, pakuti akutuzuma!”

24Po u Yesu akamula akati, “Intumiwe pakasi pa ng'ozi zizyo zisobelite, abantu bene aba Izilayeli.”

25Umukolo yula akiza nukwisumba munyayo izya Yesu nukuti, “Wee Mwene, unyavwe!”

26U Yesu akamula akati, “Chite chiza pakusenda ichakulya icha bana nukuzisumbila imbwa.”

27Umukolo yula akamula akati, “Momumo, Mwene, loli nimbwa zyope zikulya utubululusya tuto tukuwa pasi pitebulo ilya mwenecho.”

28Po u Yesu akamwamula akati, “Wee mukolo uwa lwitiko ulukulu! Vivyo ukulonda vikwiza pakubombiwa kukwako.” Sona akabalilo kanako umwana umulindu yula akapola.

U Yesu akubapozya abantu abinji

29U Yesu akepapo pabuzilo bula nukwenda mulubazu ulwa Nyanja iya Galileya. Akakwela pighamba nukwikala pasi palapala. 30Ichilundilo ichikulu icha bantu chikiza na bantu abalemazu, na bantu abafwamaso, na bantu babo bafuye ivinama, na bachinunu, sona na babine abinji, babo bakababika munyayo izya Yesu, po akabapozya. 31Abantu bakaswigha nkani pakwennya ukuti abachinunu bakunena, babo bafuye ivinama bakupola, abalemazu bakwenda, abafwamaso bakwennya, po bakamuchindika u Chala uwa mu Izilayeli.

U Yesu akulyesya abantu 5,000

(Mlko. 8.1-10)

32U Yesu akabitizya abamanyili bache nukubabuzya ukuti, “Indi ni chitima na bantu banaba pakuti babanga nane amasiku matatu, po ilelo bate ni chakulya. Intakulonda pakubabwezya ni zala, pakuti bangazilika muzila.”

33Abamanyili bakamulalusya bakati, “Tungachagha kwiyi ichakulya munkolongo muno ichakulyesya ichilundilo chosi icha bantu ichi?”

34U Yesu akalalusya akati, “Nkimba muli ni vibama vilinga?”

Bakamula bakati, “Vilipo seveni nu tuswi utunandi bulo.” 35U Yesu akalamula ichilundilo icha bantu chila ukuti chikale pasi. 36Po akasenda ivibama seveni nu tuswi tula nukumupalizya u Chala. Akamenyannya nukubapa abamanyili bache ukuti bachigabile ichilundilo chila. 37Abantu bosi bala bakalya nukwikuta. Po abamanyili bakasenda ividudunga seveni vivyo vikizula nu tubululusya utwakusyala. 38Ubwinji ubwa bantu babo bakalya bukaba 4,000, ukusita ukubelengelako abakolo na bana. 39Bo u Yesu ababwezya abantu, akakwela mubwato nukubuka muchigaba icha Magadani.

လက်ရှိရွေးချယ်ထားမှု

Matayi 15: LMBNT2016

အရောင်မှတ်ချက်

မျှဝေရန်

ကူးယူ