ṬŌNTLOHEI 8
8
1Khana Saul um antathat kha leikahnōm.
Saul in Bekrup Asuk manrim
Khava ning tak a inphut Jerusalema ka-om Bekrup-hei chunga êngset a tlo manrimna inphut jo. Sonlehei teilo takkasen rakip kha Judea leh Samaria pumpuia inthekchek jo hei. 2Malung kahluttak a Pathen ka-ôi pase ṭhahrep in Stephen kha anleihrea, ṭajai sui pum a aralum anleide.
3Tâk-kha Saul khan Bekrup suk manhmangna sik a rahnak a inṭanghmun aleilo, inn-inna kahlut a, takkasen intipou kha nuhmei leh pase aleikeisō heia kurkhum a aleikhum hei.#Ṭōn 22.4,5; 26.9-11
Samaria Ṭong kaṭha Hrilena
4Takkasen a’nthekchek rakip hei khan anselena rakip a ṭong kha anleiphông. 5Samaria khōpui pena Philip kasea khana ka-om mihei hneng Messiah chungchâng ṭong hi aleimanthei hei. 6Mipuihei khan Philip tahri kha malung kahluttak a anleirangei, khana aṭōn inlak tlohei kha anleihmu. 7Mi katamtak heia inphut rahnak a ông pum a ṭai leikasōk hei, khana lang kangōi leh ke inkhôi leikadam hei. 8Khang’khan khava khōpuia khan inpâkna kalentak leika-om jo.
9Dôi kachoi, arahming Simon intipa’n pha ṭhahrep kha adôi vâng khava Samaria mihei kha amandet-hla hei, khana tlotorna kaneitak inkhat a le’nhri, 10khana khava khōpui shunga ka-om kasin-kalen, mi rakip in anleikatōma anlei-um. “Ama hichu ‘Ratha kahratpen’ inti Pathen ratha kha kae,” anleiti. 11Khava adôi vâng khan pha khaseng kha anhmit aleiphe pek heia anmalung amanhmak pek hei jâra khan aṭong anleijui. 12Achang ravâng Pathen Rengram ṭong leh Jesu Christa chungchânga Philip ṭonghri anthei pha antaksena nuhmei um, pase um tui hlutna anleitlo jo. 13Simon amatak inum ataksen jo; tuihlut atlosōa khan Philip kha a’nthlop puia aṭōn inlak tlohei ahmu pha aleidet-hla hêr jo.
14Jerusalema ka-om Sonle he’n Pathen ṭong hi Samaria ka-om mihe’n anrahlâng jo ti ṭong anthei pha, Peter leh John anleitir hei. 15Anmani antlung pha, takkasen he’n Rathla Intheng anchenna sik a anleiderpek hei. 16Ajârchu anmani tûte inkhat chunga Rathla Intheng kha lajōng chumak; anmani kha Rōngpu Jesu rahminga tuimanhlut rōk alakachen hei kae. 17Khava sōa Peter leh John in anchunga ankut andapek hei pha, Rathla Intheng anleichen jo.
18Takkasenhei chunga sonle he’n ankut anda pha Rathla Intheng ajōng inpek hei kha Simon in ahmu pha, Peter leh John kha sêr aleipek heia, 19“Tu mo inkhat chunga kakut kabōk pha leh Rathla Intheng anchen theina sik hiva nanratha neina hi ke’m apek ruh” aleiti hei.
20Tâk-kha Peter in aleimasôn, “Pathen kutchoi hi sêr vânga rachôk thei sik a namandon jâra nasêr leh nang hmeikhura hlutsap ruh. 21Pathen hmit-hmua namalung rôn dikmak, khava jâra kanṭōn chunga hin nakin heite om mak khana chen’um neimak che. 22Hinghiva akanimak ṭōnmantluk naneina chunga insir roh, khana hinghiva mandonna naneina inphut arangei mandamna sik che Rōngpu hneng inder roh. 23Ajârchu nashunga thangsetna tûr kasiptak khana setna sōk che kae ti hi kamanhret che.”
24Simon in Peter leh John hneng, “Hiva nanta hri rakip hei hi kachunga inkhatbek atlung makna sik, lungsettak a Rōngpu hneng aderpek ruh,” aleiti.
25Rōngpu ṭong anphônga sâkhi anpeksō pha, Peter leh John kha Jerusalemting inle nôk jo hei. Anhlam jōnna Samaria khō katamtak a ṭong kaṭha anleiphông.
Philip leh Ethiopia Ṭōnpui Karônpa
26Rōngpu ngeva’n Philip hneng, “Intluk inna Jerusalema inphut Gaza jōnna hlam, thlang intongting son (Hiva hlam hi tûnlai chu senamak jo hei) se roh,” ati. 27-28Khang’khan Philip kha intluk a leikase. Khava lai khan Ethiopia rengnu nei katintahei kâra ṭōnpui karônpen, Ethiopia ṭōnkarônpa kha a-inn kajōna leikase. Ama kha Jerusalema Pathen inmuk a vakasea ashakor gâria innhlam ahe’nle jo kae. Agâri a’ntôr pum a Isaiah Sânkathem lekha kha aleitei. 29Rathla Intheng in Philip hneng, “Se ina, gâri so vahnai roh,” ati. 30Philip um katlâna avahnaia Isaiah lekha a inphut aleitei kha aleithei. Ama’num, “Nateisōt ṭong kha namanhret nâk mo?” tia aleider.
31Ṭōnpui karônpa khan, “Tu mo inkhat in hri manchênna aneipek mak eng inchu heikhong mo kamanhret thei sik?” tia aleimasôn. Khang’khan Philip kha agâri chunga ajōng chōngna sik a aleibek. 32Khava aleitei ṭong intheng hmun kha hivahi kae:#Is 53.7-8
“That sik a a’nkei kemōng kapōa,
ahme anvo pek lai a’nhrâmtet mak kemōng kapōa,
ṭong beikhatte leisō mak.
33Ama hnōisetak a anleitlo, khana achunga ṭongdik leitan mak hei.
Ama khang hrui chungchâng kha tûte’n hritheimak ning,
ajârchu raleichunga ahringkhō inchaina kha hong katlung jo.”
34Ṭōnpui karônpa khan Philip hneng ader, “Sânkathempa khan hivahi tu mo ahrina, ahri pek roh? Ama a’nhrina mo, a-emak leh milak ahrina mo?” 35Khava sōa Philip kaṭong inphut jo; khava aleitei ṭong intheng hmun a inphut, Jesu chungchânga ṭong kaṭha kha aleihri pek jo. 36Anmani khanga ansesuk pum a, tui omna hmun inkhat anphak pha, ṭōnpui karônpa khan, “Hin tui ka-om jo, tuihlut kachenthei makna sik heimo alaka-om?” 37Khava pha Philip in, “Namalung pumpuia nataksen inchu, kachang thei che” aleitipek. Khana ama’n, “Jesu Christa hi Pathen sapa khet kae ti hi kataksen” tia aleimasôn.
38Ṭōnpui karônpa khan shakor gâri inhngana sik ṭong apek a, Philip leh an-inhnibât a tui shunga kaṭum inhlut heia, Philip in tui manhlutna aleitlo jo. 39Tuia inphut anheisōk pha a chu, Rōngpu Rathla’n Philip kha aleiṭhōisōt jo. Ṭōnpui karônpa khan avea leihmu nôk mak jo, tâk inpâktak a, ahlam hro kha abân aleimanjoma kae. 40Philip khan Azotas hmun a a-om jo kha amanhretsōt jo. Khang’khan Caesarea ting ajō’nthang joa ahlam hro khōpui rakip a Ṭongrôn Kaṭha kha aleiphônga kae.
လက်ရှိရွေးချယ်ထားမှု
ṬŌNTLOHEI 8: KOMRBSI
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.