ṬŌNTLOHEI 6
6
Mi Inthōpui 7 hei
1Pha ṭhahrep sōa, sonlehei anmija anhongtam jo leh inṭhōia, Greek ṭong kajôm Jehudihei leh ram shunga Jehudihei kâra inkhe-beitamna leikasōk. Ajârchu Greek ṭong kajôm Jehudihei khan anhmeithai hei kha nitina anta’nsem sêrchen pek sik hei kha adonpek mak jo hei tia thangtôm le’nlo hei. 2Khava pha Sonle 12 hei khan takkasen rakip anbek mantûp heia, “Sêr leh sum matu jârbek a Pathen ṭong phôngsōt sik kantadon mak sik hi keini sik a akadik changmak ning,” anti. 3“Khava jâra, sōpuihei, nankâra singna kanei leh Rathla Intheng kasip tia nantamanhret pase 7 lim he’ndeisōt ruh, hiva katinta sik a kanda sik hei. 4Khang’khan keini’nchu derna leh Pathen ṭong phôngsōtna pui katluktak a kanphât hei hi pek sōt jo rung,” anleiti.
5Anrup pumpui kha sonlehei ṭong heirônsōt chungchânga khan anmalung leikatlâia, taksenna leh Rathla Intheng kasip, Stephen khana Philip, Prochorus, Nicanor, Timon, Parmenas, khana amak hmadet a Jehudi bekṭonga aheikahlut, Antioch a inphut Jât-hlop mi, arahming Nicolaus intipa, anmani hei hi anleikadei hei. 6Anmani kha mipui he’n Sonlehei hneng anheiṭhōi heia, Sonle he’n anchunga ankut anbōk a derna anleinei khum jo hei.
7Khang’khan Pathen ṭong kha abân bâna inzer chet-chet jo. Jerusalema’m sonle kha kapungsa chet-chet jo hei, khana thempu katamtak inum khava taksenna kha anleirahlâng jo.
Stephen Antasur
8Pathen rathahrat leh mahâmṭhatna kasip phet Stephen in mipuihei kâra ṭōn inralak leh tlo inralak aleitlosōt jo. 9Tâk-kha ning leh hnōma Masōhei intûpna inn (anleibekna rahming) a ṭōnkarôn mi ṭhahrep hei leh Cyrene leh Alexandria Jehudihei inveina ama anleidek a kae. Anmani rōk changloa Cilicia leh Asia ram a inphut akahong Jehudi-lak he’num Stephen chunga dekna anleinei manphut joa kae. 10Tâk-kha Stephen kha Rathla’n singna apek achang jâra ṭong ahri pha leimakhe tor mak ri hei. 11Khava jâra mi ṭhahrep marûk a sêr anpek heia, “Moses leh Pathen kadōia ṭong ahri kanthei,” anlei manti hei. 12Khang’khan mipui, upahei, khana Dân ojahei kha akadik mak sâkhi ṭong vâng anleimathok jo hei. Stephen kha ansura Sehmang-pachong ângkunga anheiṭhōia kae. 13Ama chungchânga maleiseia masetna kapek sik mi ahlek anheiṭhōi heia, anmani’n: “Hiva mipa hin ni-Bek-inn intheng leh Moses Dân kadōia ahriṭhak. 14Khana hiva Nazareth Jesu hin Bek-inn aṭhetsō sik leh Moses inphut ahei inpek nidân rakip hi athleng pet sik a ahri kanthei,” tia anleihri! 15Khana a’n-ong Sehmang-pachong rakip in Stephen lang an-enna ahmaisō kha ngeva hmaisō a-ang kha anleihmua kae.
လက်ရှိရွေးချယ်ထားမှု
ṬŌNTLOHEI 6: KOMRBSI
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.