ṬŌNTLOHEI 4
4
Intûpna hma Peter leh John
1Peter leh John in mipuihei hneng khanga ṭong anhrilai, Bek-inn kahngâk a ngansepa, ṭōnkarônpa leh thempu ṭhahrep leh Sadducee ṭhahrep heikatlung hei. 2Sonle 2 hei khan Jesu kha thina’nphut kaṭhōisōt jo tia mi hnenga anmantheina khan akathisa hi kahring nôk sik ti kha amanchên jo jâra anhnuk leikana. 3Khava jâra anleisur hei tâk apha kha asôtdet jo jâra jîng kani katlunga sik kurkhum a anleikhum hei. 4Tâk-kha anṭonghri kathei mi hingja’n antaksena mihring 5,000 kapō leikapungsa hei.
5Ajîng kania Jehudi hlamkakeihei, upahei khana Dân ojahei kha Jerusalema le’ntûp hei. 6Anmani Thempu Kalen Annas leh Caiaphas, John, Alexander, khana alak Thempu Kalen innshung mihei leh le’nhmu hei. 7Anmani’n Sonlehei kha anhma anman ngir heia, “Heikhong mo hivahi nantatlo? Heiratha hratna mo nantachen khana tu rahming mo nantahmang?” tia anleider hei.
8Rathla Intheng kasip phet a Peter in aleimasôn hei, “Eh mipui hlamkakeihei leh upahei, 9tuning hin hiva ke-kangōipa chunga ṭōn kaṭha a’ntlo leh adamna chen chungchânga ṭong nantader ung achang jo’nchu, 10nankhenga manhret ruh, khana Israel mipui rakip inum manhret ruh, ajârchu hiva nanhma akangirpa hi, nantalei makhei hlon jo tâk thia inphut Pathen in akei mathōi, Nazareth Jesu Christa rahming ratha hratna vânga akadam seng jo kae. 11Ṭong intheng taleihri kha Jesu ama hi kae:#Hl 118.22
‘Inn kasak nangni’n nantalei madu mak hlung kha apui karônpen hongkachang jo.’
12Ama inphut rōk hukmanhringna nihmu sik; ajârchu vânhnōi pumpuia ani kahuksōt tor Pathen tapek hichu ama teilo alak him-him om mak.”
13Themna-singna kaneimak anchang ravâng Peter leh John in khang hrep a inngamna antanei kha Sehmang-pachong he’n anmanhret pha anlei mandonhla hêr hei. Khantō khan Jesu leh ale’nloisōm anchang kha anhei mandonsōt jo. 14Tâk-kha heite chu leihri tor mak jo hei, ajârchu Peter leh John hnenga khan antamandampa angir kha anhmua kae. 15Khava jâra Sehmang-pachonghei intûpna innden kha pha bongkhat lim andahlonna sik ṭong anpek hei, khava sōa anbibinga ṭong le’nbektō heia kae. 16Anmani indertō hei, “Hiva mihei hi heimo nimanlo sik hei? Ajârchu anmani’n ṭōn inralak antatlosōt hi Jerusalema ka-om mi rakip in anmanhret jo, khana eini’um hivahi changmak chu titor mak jo me. 17Achang inum hiva ṭong hi mihei hneng abân a’nthangsa makna sik, tuna inphut chu tûte hneng Jesu rahminga ṭonghrina annei makna sik maṭhit hei rih,” anti jo.
18Khava jâra anbek male heia, hei-hei achang inum Jesu rahming inti him-hima ṭonghrina leh mantheina antanei mak sik a anleihri pek jo hei. 19Tâk-kha Peter leh John in anmasôn hei, “Nangni ṭong kantajui sik a-emak leh Pathen ṭong kantajui sik khahei kâra khō jôk mo Pathen hmit-hmua akadik nanbinga ṭong intan ruh. 20Ajârchu kantahmu leh kantathei hei kha hrilothei changmak ung.” 21Khava pha Sehmang-pachonghei khan alerchet a maṭhitna anneisa heia anleimasō jo hei. Ajârchu omchen kasōk chungchânga khan mi rakip in Pathen anleimanpâk jâra karâkna pek sik hei kha akabei changmak ti kha anleihmusōt a kae. 22Hiva ṭōn-inlak a’ntloa akadampa kha kum 40 a’nhlei jo mi kae.
Malung ngamna sik a Akataksenhei Derna
23Peter leh John kha anmasōlim hei pha, inrangtak a anloihei hneng inle jo hei, khana thempu kalenhei leh Sehmang-pachonghei tahri kha anloihei hneng anvahri pek jo hei. 24Takkasen he’n khavakha anthei pha, ankhenga inkhôm heia Pathen hneng anleider: “Eh marvân ralei leh tui-ôngpui khana ashunga rakip hei Akapu leh Akasyempa!#Sōk 20.11; Neh 9.6; Hl 146.6 25Kanpu sōn, David beia inphut Rathla Intheng vâng hing’hin nalei manhrisōt:#Hl 2.1,2
‘Heisik a mo Jât-hlop hei anhnuk aleikana;
heisik a mo akahnem mak ṭōn mipui he’n antamantluk?
26Rōngpu leh ama Messiah kadōia,
raleichung renghei anbinga intluk hei,
khana vaikarônhei le’nhmutō hei.’
27Atakbak a nang in Messiah namatungsōt, Nasōk intheng, Jesu kadōia Herod leh Pontius Pilate in Jât-hlop hei leh Israel mipuihei kha hiva khōpuia anle’ntûp pui hei.#Lk 23.7-11; Mt 27.1,2; Mk 15.1; Lk 23.1; Jn 18.28,29 28Naratha neina vânga tlosōt sik a naleimantluk ṭōn rakip kha tlosōtna sik a le’nkhôm hei. 29Tûnhin Rōngpu, keini anmaṭhitna ung hi amanhret pek roh, khana nasōk keini’n naṭong hi kangamtak a kanhri torna sik ahnōm pek roh. 30Nasōk Intheng Jesu rahminga det-hla leh ṭōn-inlak kantlo theina sik ahnōm pek ina, mi indam sik a nakut kha aheizer pek roh.”
31Anderna nei kha anchaichai leh an-intûpna hmun kha hong innok jo. Khang’khan Rathla Intheng kasip phet jo heia, Pathen ṭong kha kangamtak a anleiphông manphut jo.
Takkasen he’n Annei Rakip Antachensōm
32Takkasen rup-hei kha mandonna leh malunga inkhat rōk leikachang hei. Tûte inkhat inum anei kha atâ rōk sik kae tia leihri mak hei. Tâk-kha antanei rakip kha khat leh khat le’nsem sōm hei.#Ṭōn 2.44,45 33Rōngpu Jesu thōi nôkna sâkhi kha ratha kaneitak a Sonle he’n anleipek, khana ankhenga chunga Pathen in mahâmṭhat katamtak aleibun mathlâk pek hei. 34Anrup shunga akatlasam tûte leiom mak. Ankâra inn leh hlei kanei he’n anjōra, aman antahmu sêr hei kha, 35sonlehei kut a anleipek manhlut; khana khava sêr hei kha ama ama khôkna dungjuia ankhenga le’nsem ri hei.
36Khang’khan Cyprus hmun a a’nte Levi phunga Joseph, Sonle he’nchu Barnabas (tina chu, “Mathokna kapepa”) khan 37ahlei ajōra, khava sêr kha, sonlehei kut a aleipek manhlut a kae.
လက်ရှိရွေးချယ်ထားမှု
ṬŌNTLOHEI 4: KOMRBSI
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.