ṬŌNTLOHEI 12
12
Suk manrim Chetna
1Khava lai khan Reng Herod inum Bekrup mi ṭhahrep chunga suk manrimna ṭōn kha aleitlo manphut a kae. 2John sōpuipa James kha chemjâm vâng aleithat a kae. 3Khava atlo khan Jehudihei amantlai hei ti ahmu sōt pha, abân tlo manjōmna inkhat a Peter kha aleisur jo. (Hivahi Che philo Buhlom Revei laitak a akasōk kae). 4Peter kha sur achang jo pha, sepei 4 sâma rup 4 tahngâk kurkhum a aleikhum. Herod khan Rakan Kût a’nchaisō leh mipui ângshunga keisōa aṭong tan sik tia aleimantluk kae.#Sōk 12.1-27 5Khava jâra Peter kha kurkhum a akhuma aleida, tâk Bekrup mihe’n ama sik a malung kahluttak a Pathen hneng derna anleinei.
Kurkhum a inphut Peter Masōna
6Herod in Peter kha mipui ângshunga ṭhōisōt sik tia atep ning amak hma jân a khan, Peter kha akahngâk sepei 2 hei kâra leikaje. Ama kha thirhrui 2 vâng anleikhit, khana kur kot kha’m sepei he’n kaṭhatak a anleihngâk. 7Manhret manloa Rōngpu ngeva jōng kangira, kurshung kha vâr in ara-âng jo. Ngeva khan Peter dâr kha akanok a aleimathō, “Inrang roh! Thōi roh!” aleiti. Khava laitak a khan a’nkhitna thirkehrui hei kha akut a inphut insōt a katla jo. 8Khava pha ngeva khan, “Nakhōnkir inkir ina, nakekōk inchōng roh,” atipek. Aleihri pek kapōa Peter in atloa, ngeva khan avea, “Nazakkō inse kha inkō ina kakahnung heijui roh,” aleiti. 9Anleikhumna kura inphut Peter in ajuisōt jo, kha’num ngeva tatlo kha takkhet a akasōk kae ti chu manhret mak; hmangtalâr ahmua aleimandon. 10Anmani’n akahngâk hma-inkeihei kha anhei rakansōt jo, khang’khan abân 2 tlukna’m anhei rakansōt nôk, achaina pena chu khōpui jōnna thir sōngkot kung kha heikatlung jo hei. Anmani sik a sōngkot kha abinga he’nhlânga, heikasōk jo hei. Hlampui inkhat anheitlâk, manhret manloa ngeva khan Peter kha aleidahlon jo.
11Khantō khan Peter in ṭōn kasōk kha atak-khet achang kha aleimanhret jo. Khava pha ama’n, “Tûnchu takkhet a achang hi kamanhret jo! Herod ratha neina inphut leh Jehudi he’n tlosōt sik a antarei khana inphut anikasen sik Rōngpu’n angeva ajōngtir pek eng kae,” ati.
12Aomdân kha amanhret a, John Mark nu, Mary innting kase jo, khava hmun khan mi katamtak inkhôm heia derna anneia leika-om hei. 13Peter in vâng intong kot khâr kha aleiraki, khana Rhoda inti sōk nuhngâk kha a’nsôn sik a leikase. 14Peter karesō achang kha amanhret pha inpâk reia kot mahlângloa katlân inlea, kot kunga Peter angir kha ava manthei hei. 15Anmani’n, “Invet jo che!” anleiti. Tâk-kha amanu’n akadiktak kae aleiti. Khava pha anmani’n, “Ama rathla mo kachang sik,” tia anleimasôn nôk.
16Khanga anti shunga kha’num Peter inchu kot kha aleiraki kakeng. Achai-chaina chu kot anva mahlanga, anhmu joa inlak ansak jo! 17Anrasa adaina sik akut vâng ajâp heia khana kurkhum a inphut heikhong mo Rōngpu’n aheiṭhōisōt ti kha aleihri manchên pek hei. “Hivahi James leh takkasen alakseng um manthei hei ruh,” tia ahri pek hei; khava sōa ama chu hmunhlop tinga sik a adahlon jo hei.
18Jîngkhō ajōngvâr pha Peter chunga omchen leikasōk khan akahngâk hei kâra inhmakna inhnaktak amasō jo. 19Anva jōngna sik Herod in ṭong pekna aleinei hei, tâk hmuchu hmuphâk mak jo hei. Khava jâra akahngâk-hei kha ṭongderna anei heia khana thatna sik heia ṭong pekna anei jo hei.
Hivasōa Herod in Judea kha adahlona, Caesarea hmun a phat ṭhahrep aleimanhmanga kae.
Herod Thi
20Herod kha Tyre leh Sidona ka-om mipuihei chunga ahnuk leikana hêr, khava jâra ama inhmupui sik kha arup a leikase hei. Ahma inkeitak a, reng khōpui kahngâk a nganse, Blasta intipa khan abômna sik heia anleijôr manhnōma kae. Khava sōa Herod hneng kahlut heia intōk inchamna sik ngekna anleinei, ajârchu anrama sâk leh in hi rengpa ram a inphut antahmu kae.
21Kadeisōt kani inkhat ning Herod khan areng lûrpōn kha a’nsia, alen in-ongna chunga mipuihei hneng ṭong aleihri. 22Mipuihei khan, “Akaṭongpa so mihring changmak, pathen kae!” tia leika-ông hei. 23Herod khan Pathen kajana leh lulenna apek mak jâra, khavatak a Rōngpu ngeva’n avōk mathlûk a khang’khan rahlung in asâk a kathi jo.
24Khava shung heia khan Pathen ṭong kha inzersōt a kakhang joa kae.
25Barnabas leh Saul khan ankhōhme chōn ṭōn kha anheitora, John Mark anheiṭhōia Jerusalema inphut he’nle jo hei.
လက်ရှိရွေးချယ်ထားမှု
ṬŌNTLOHEI 12: KOMRBSI
အရောင်မှတ်ချက်
မျှဝေရန်
ကူးယူ
မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.