ဆာလံကျမ်း 84

ဘုရားသခင်၏အိမ်တော်ကို မှန်းဆတမ်းတခြင်း

ဂီတမှူးအတွက်၊ “ဂီတိ” သံစဉ်၊ ကောရသားတို့၏ဆာလံ

1ကောင်းကင်ဗိုလ်ခြေအရှင်ထာဝရဘုရား၊

ကိုယ်တော်ကိန်းဝပ်တော်မူရာတဲတော်သည် နှစ်သက်ဖွယ်ကောင်းလှပါ၏။

2အကျွန်ုပ်၏စိတ်ဝိညာဉ်သည် ထာဝရဘုရား၏တံတိုင်းတော်များကို

လွမ်းဆွတ်၍ မူးမေ့မတတ်ဖြစ်ပါ၏။

အကျွန်ုပ်၏စိတ်နှလုံးနှင့် အကျွန်ုပ်၏ကိုယ်ခန္ဓာသည်

အသက်ရှင်သောဘုရားသခင်ထံ ရွှင်လန်းစွာသီချင်းဆိုပါ၏။

3အို ကောင်းကင်ဗိုလ်ခြေအရှင်ထာဝရဘုရား၊ အကျွန်ုပ်၏ရှင်ဘုရင်၊ အကျွန်ုပ်၏ဘုရားသခင်၊

ကိုယ်တော်၏ယဇ်ပလ္လင်အနီးတွင် စာငှက်ပင်လျှင် နေစရာအရပ်ကိုလည်းကောင်း၊

ပျံလွှားငှက်ပင်လျှင် မိမိသားငယ်မွေးရန် မိမိအသိုက်ကိုလည်းကောင်း တွေ့ရှိကြပါ၏။

4ကိုယ်တော်၏အိမ်တော်၌ နေထိုင်သောသူတို့သည် မင်္ဂလာရှိကြပါ၏။

သူတို့သည် ကိုယ်တော်ကို အစဉ်မပြတ်ချီးမွမ်းလျက်နေကြပါလိမ့်မည်။(စေလာ#84:4 အဓိပ္ပာယ်မသေချာသောဟေဗြဲစကားလုံး။ ဖြစ်နိုင်သောအဓိပ္ပာယ်များမှာ 1)တေးကဗျာတို့ကိုရွတ်ဖတ်သီဆိုရာ၌ သုံးသောသင်္ကေတ။ 2)အသံတိတ်ရပ်နားစေရန်သင်္ကေတ။ 3)ဝတ်ပြုကိုးကွယ်သူတို့အား ပျပ်ဝပ်ရှိခိုးကြစေရန် သင်္ကေတ။ 4)ဝတ်ပြုကိုးကွယ်သူတို့အား အတူတကွရွတ်ဆိုစေရန်သင်္ကေတ။ 5)ထာဝရ ဟုအဓိပ္ပာယ်ရသောစကားလုံး။)

5ကိုယ်တော်၌ အားယူသောသူ၊

ဇိအုန်သို့သွားရာလမ်းကို နှလုံးသွင်းသောသူတို့သည် မင်္ဂလာရှိကြ၏။

6သူတို့သည် ဗာကာချိုင့်ဝှမ်း#84:6 သို့မဟုတ် “ငိုကြွေးခြင်းချိုင့်ဝှမ်း”။ကို ဖြတ်သွားကြရသော်လည်း

၎င်းကို စမ်းရေထွက်ရာအရပ်ဖြစ်စေပါ၏။

မိုးဦးသည်လည်း ထိုနေရာကို ကောင်းချီးမင်္ဂလာများနှင့် ဖုံးလွှမ်းပေးပါ၏။

7သူတို့သည် ခွန်အားတိုးသည်ထက်တိုးလာလျက်၊ သွားကြလျက်

ဇိအုန်၌ရှိတော်မူသောဘုရားသခင်ကို ဖူးမြင်ရကြပါလိမ့်မည်။

8ကောင်းကင်ဗိုလ်ခြေအရှင်ဘုရားသခင်ထာဝရဘုရား၊

အကျွန်ုပ်၏ဆုတောင်းချက်ကို နားညောင်းတော်မူပါ။

အို ယာကုပ်၏ဘုရားသခင်၊ စူးစိုက်နားထောင်တော်မူပါ။(စေလာ#84:8 အဓိပ္ပာယ်မသေချာသောဟေဗြဲစကားလုံး။ ဖြစ်နိုင်သောအဓိပ္ပာယ်များမှာ 1)တေးကဗျာတို့ကိုရွတ်ဖတ်သီဆိုရာ၌ သုံးသောသင်္ကေတ။ 2)အသံတိတ်ရပ်နားစေရန်သင်္ကေတ။ 3)ဝတ်ပြုကိုးကွယ်သူတို့အား ပျပ်ဝပ်ရှိခိုးကြစေရန် သင်္ကေတ။ 4)ဝတ်ပြုကိုးကွယ်သူတို့အား အတူတကွရွတ်ဆိုစေရန်သင်္ကေတ။ 5)ထာဝရ ဟုအဓိပ္ပာယ်ရသောစကားလုံး။)

9အို ဘုရားသခင်၊ အကျွန်ုပ်တို့၏ဒိုင်းလွှားကိုကြည့်ရှုတော်မူပါ။

ကိုယ်တော်ဘိသိက်ပေးထားသောသူ၏မျက်နှာကို စေ့စေ့ကြည့်တော်မူပါ။

10အကယ်စင်စစ် ကိုယ်တော်၏တံတိုင်းတော်များအတွင်း၌ တစ်ရက်နေရခြင်းသည်

အခြားသောအရပ်၌ ရက်တစ်ထောင်နေရခြင်းထက် ပို၍ကောင်းပါ၏။

ဆိုးယုတ်သောသူ၏တဲတွင်နေရခြင်းထက် အကျွန်ုပ်ဘုရားသခင်၏အိမ်တော်၌

တံခါးစောင့်ဖြစ်ရခြင်းကို အကျွန်ုပ်ပို၍နှစ်သက်ပါ၏။

11အကြောင်းမူကား ဘုရားသခင်ထာဝရဘုရားသည် နေလည်းဖြစ်တော်မူ၏။

ဒိုင်းလွှားလည်းဖြစ်တော်မူ၏။ ထာဝရဘုရားသည် ကျေးဇူးတော်နှင့်ဘုန်းအသရေတော်ကို

ပေးတော်မူ၏။ အပြစ်တင်စရာမရှိအောင် အသက်ရှင်လျှောက်လှမ်းသောသူတို့အား

ကောင်းမြတ်သောအရာကို မပေးဘဲနေတော်မူမည်မဟုတ်။

12ကောင်းကင်ဗိုလ်ခြေအရှင်ထာဝရဘုရား၊

ကိုယ်တော်ကို ယုံကြည်ကိုးစားသောသူသည် မင်္ဂလာရှိပါ၏။

လက်ရှိရွေးချယ်ထားမှု

ဆာလံကျမ်း 84: MSBU

အရောင်မှတ်ချက်

မျှဝေရန်

ကူးယူ

မိမိစက်ကိရိယာအားလုံးတွင် မိမိအရောင်ချယ်သောအရာများကို သိမ်းဆည်းထားလိုပါသလား။ စာရင်းသွင်းပါ (သို့) အကောင့်ဝင်လိုက်ပါ

မြန်မာ့စံမီသမ္မာကျမ်း အကြောင်းကို ပို၍ သင်ယူပါ။

ဆာလံကျမ်း 84