ရှင်မဿဲခရစ်ဝင် 13:44-53

ကောင်းကင်​နိုင်ငံ​တော်​သည် လယ်​၌​ဝှက်​ထား​သော ဥစ္စာ​ဘဏ္ဍာ​နှင့်​တူ​၏။ လူ​တစ်​ဦး​သည် ၎င်း​ကို​တွေ့​သောအခါ ပြန်လည်​ဝှက်​ထား​ပြီးလျှင် ဝမ်းမြောက်​စွာ​ဖြင့်​သွား​၍ သူ​၌​ရှိ​သော​အရာ​အားလုံး​ကို​ရောင်း​လျက် ထို​လယ်​ကို​ဝယ်​လေ​၏။ တစ်ဖန် ကောင်းကင်​နိုင်ငံ​တော်​သည် ကောင်း​သော​ပုလဲ​ကို​ရှာဖွေ​နေ​သော ကုန်သည်​နှင့်​တူ​၏။ သူ​သည် အလွန်​အဖိုးတန်​သော​ပုလဲ​တစ်​လုံး​ကို​တွေ့​သောအခါ သွား​၍ သူ​၌​ရှိ​သမျှ​တို့​ကို​ရောင်း​ပြီးလျှင် ထို​ပုလဲ​ကို​ဝယ်​လေ​၏။ တစ်ဖန် ကောင်းကင်​နိုင်ငံ​တော်​သည် ပင်လယ်​ထဲ၌​ချ​၍ ငါး​အမျိုးစုံ​ကို​ဖမ်းမိ​သော ပိုက်ကွန်​နှင့်​တူ​၏။ ငါး​နှင့်​ပြည့်​သောအခါ ထို​ပိုက်ကွန်​ကို ကမ်း​ပေါ်သို့​ဆွဲတင်​ကာ ထိုင်​လျက် ကောင်း​သော​ငါး​များ​ကို ခြင်းတောင်း​ထဲသို့​ခွဲထည့်​၍ မကောင်း​သော​ငါး​များ​ကို အပြင်​သို့​ပစ်​လိုက်​ကြ​၏။ ကပ်ကမ္ဘာ​ကုန်ဆုံး​ချိန်​၌ ထိုနည်းတူ​ဖြစ်​လိမ့်မည်။ ကောင်းကင်တမန်​များ​သည်​လာ​၍ ဆိုးညစ်​သော​သူ​တို့​ကို ဖြောင့်မတ်​သော​သူ​တို့​ထဲမှ သီးခြား​ခွဲထား​ကာ မီးပြင်းဖို​ထဲသို့ ပစ်ချ​ကြ​လိမ့်မည်။ ထို​နေရာ​၌ ငိုကြွေး​ခြင်း​နှင့်​အံကြိတ်​ခြင်း​ရှိ​လိမ့်မည်။ ဤ​အရာ​အားလုံး​ကို သင်​တို့​နားလည်​ကြ​သလော”​ဟု မေး​တော်မူ​၏။ တပည့်​တော်​တို့​က “နားလည်​ပါ​၏”​ဟု ပြန်လျှောက်​ကြ​၏။ ကိုယ်တော်​က​လည်း“သို့ဖြစ်၍ ကောင်းကင်​နိုင်ငံ​တော်​၏​တပည့်​ဖြစ်​လာ​သော ကျမ်းပြု​ဆရာ​တိုင်း​သည် မိမိ​၏​ဘဏ္ဍာတိုက်​ထဲမှ ဥစ္စာ​ဘဏ္ဍာ​အသစ်​နှင့်​အဟောင်း​တို့​ကို ထုတ်ယူ​သော​အိမ်ရှင်​နှင့်​တူ​၏”​ဟု မိန့်​တော်မူ​၏။ ယေရှု​သည် ဤ​ပုံ​ဥပမာ​များ​ကို မြွက်ဆို​တော်မူ​ပြီး​သောအခါ ထို​အရပ်​မှ ထွက်ခွာ​တော်မူ​၏။

​ရှင်မဿဲခရစ်ဝင် 13:44-53 နှင့်ပတ်သက်သည့် အခမဲ့ ဖတ်ရှုခြင်းအစီအစဉ်နှင့် ဝိညာဉ်ရေးရာအချက်အလက်များ။