တစ်ဖန် ထာဝရဘုရားက ယောဘအား “ယခု ယောက်ျားပီသစွာ ခါးကိုစည်းထားလော့။ ငါမေးသောမေးခွန်းများကို ဖြေလော့။ သင်သည် ငါ၏စီရင်ထုံးဖွဲ့ချက်ကို ပယ်ဖျက်မည်လော။ သင့်ကိုယ်သင် ဖြောင့်မတ်ကြောင်းပြသရန် ငါ့ကို အပြစ်တင်မည်လော။ ငါဘုရားသခင်၏လက်ရုံးမျိုး သင်၌ရှိသလော။ မိုးချုန်းသံကဲ့သို့သောအသံမျိုး သင်၌ရှိသလော။ ထိုသို့ဖြစ်လျှင် သင့်ကိုယ်ကို ဂုဏ်များ၊ ထည်ဝါမှုများနှင့် တန်ဆာဆင်လိုက်ပါ။ ကျက်သရေမင်္ဂလာများနှင့် ဆင်ယင်လိုက်ပါ။ သင်၏ဒေါသအိုးကို ဖောက်ခွဲလိုက်ပြီး မောက်မာသောသူအပေါင်းတို့ကို မာန်စွယ်ချိုးကြည့်လိုက်ပါ။ မောက်မာသောသူတို့ကို နှိမ့်ချကြည့်လိုက်ပါ။ လူယုတ်မာတို့ကို သူတို့ရှိသောနေရာတွင်ပင် နင်းချေလိုက်ပါ။ သူတို့ကို မြေမှုန့်ထဲမှာ အတူမြှုပ်ပစ်လိုက်ပါ။ မှောင်မိုက်ထဲ၌ သူတို့မျက်နှာကို စည်းထားလိုက်ပါ။ ထိုသို့ပြုနိုင်လျှင် သင့်လက်ရုံးသည် သင့်ကို ကာကွယ်နိုင်ပါသည်တကားဟု ငါအသိအမှတ်ပြုမည်။ ဗေဟမုတ်ကို ကြည့်လော့။ သင့်ကိုငါဖန်ဆင်းသကဲ့သို့ သူ့ကိုလည်း ငါဖန်ဆင်းခဲ့၏။ သူသည် နွားကဲ့သို့ မြက်ကိုစား၏။ သူ့ခွန်အားသည် သူ့ခါး၌ရှိ၍ သူ့စွမ်းအားသည် သူ့ဝမ်းဗိုက်ကြွက်သားများ၌ ရှိ၏။ သူ့အမြီးသည် သစ်ကတိုးပင်ကဲ့သို့ မာကျော၏။ သူ့ပေါင်ကြောတို့သည်လည်း လိမ်ခွေယှက်ဖြာလျက် ရှိ၏။ သူ့အရိုးတို့သည် ကြေးဝါချောင်းများနှင့်တူ၏။ ခြေချောင်းလက်ချောင်းတို့သည်လည်း သံချောင်းနှင့်တူ၏။ သူသည် ဘုရားသခင်၏အဦးဆုံးဖန်ဆင်းခံလက်ရာ ဖြစ်၏။ သူ့ကိုဖန်ဆင်းထားသောအရှင်သာလျှင် ဓားဖြင့် သူ့ထံချဉ်းကပ်နိုင်၏။ အကယ်စင်စစ် သူ့အဖို့ အစားအစာကို တောရိုင်းတိရစ္ဆာန်အပေါင်းတို့ကျက်စားရာ တောင်တန်းတို့မှ ရ၏။ ကြာပင်အောက်မှာ၊ စိမ့်စမ်းတောရှိ ကျူပင်အကွယ်မှာ ဝပ်နေတတ်၏။ ကြာပင်သည် သူ့ကို အရိပ်မိုးပေး၏။ ချောင်းနံဘေးရှိမိုးမခပင်များသည် သူ့ကိုဝိုင်းရံထား၏။ မြစ်ရေကြီးသော်လည်း သူသည် ထိတ်လန့်ခြင်းမရှိ။ ဂျော်ဒန်မြစ်ရေသည် သူ့နှုတ်သီးကို အရှိန်နှင့်တိုက်သွားလျှင်ပင် သူမမှုပါ။ သူ့ကို ပေါ်ပေါ်ထင်ထင်ဖမ်းနိုင်မည်လော။ သူ့ကိုထောင်ဖမ်းပြီး နဖားကြိုး တပ်နိုင်မည်လော။
ယောဘဝတ္ထု 40 ကိုဖတ်ပါ။
နားထောင်ပါ။ ယောဘဝတ္ထု 40
မျှဝေရန်
ဗားရှင်းအားလုံးနှိုင်းယှဉ်ပါ: ယောဘဝတ္ထု 40:6-24
အခန်းငယ်များကို သိမ်းဆည်းပါ၊ လိုင်းမဲ့ဖတ်ပါ၊ သင်ကြားမှုအပိုင်းများကို ကြည့်ရှုခြင်းနှင့် အခြားအရာများ။
ပင်မစာမျက်နှာ
ကျမ်းစာ
အစီအစဉ်
ဗီဒီယို
Bible App
Bible App for Kids
