ရှင်ယောဟန်ခရစ်ဝင် 6:15-21

လူ​တို့​သည်​လာ​၍ မိမိ​ကို​အတင်း​ခေါ်ဆောင်​သွား​ပြီး မင်းမြှောက်​ရန် ကြံရွယ်​နေ​ကြ​သည်​ကို ယေရှု​သိ​တော်မူ​သဖြင့် တစ်ဖန် တောင်​ပေါ်သို့ တစ်ကိုယ်တည်း​ထွက်သွား​တော်မူ​၏။ ညနေချမ်း​အချိန်​ရောက်​သောအခါ တပည့်​တော်​တို့​သည် ပင်လယ်​သို့​ဆင်း​သွား​၍ လှေ​ပေါ်​တက်​ပြီးလျှင် ပင်လယ်​တစ်ဖက်ကမ်း​ရှိ ကပေရနောင်​မြို့​သို့ ကူးသွား​ကြ​၏။ မိုးချုပ်​ပြီ​ဖြစ်​သော်လည်း ယေရှု​သည် သူ​တို့​ထံသို့​မ​ရောက်လာ​သေး။ ပင်လယ်​၌​လည်း လေပြင်း​တိုက်​လျက်​နေ​သဖြင့် လှိုင်းတံပိုး​များ​ထ​လာ​၏။ သုံး​လေး​မိုင်​ခန့်​လှော်ခတ်​ပြီး​သောအခါ ပင်လယ်​ပေါ်တွင် ယေရှု​လမ်းလျှောက်​လျက် လှေ​အနီး​သို့​ချဉ်းကပ်​လာ​သည်​ကို တပည့်​တော်​တို့​မြင်​၍ ကြောက်ရွံ့​ကြ​၏။ သို့သော် ကိုယ်တော်​က“မ​ကြောက်​ကြ​နှင့်၊ ငါ​ပင်​ဖြစ်​သည်”​ဟု မိန့်​တော်မူ​၏။ ထိုအခါ တပည့်​တော်​တို့​သည် အားရ​ဝမ်းမြောက်​လျက် ကိုယ်တော်​ကို လှေ​ပေါ်သို့​ခေါ်ဖိတ်​လက်ခံ​ကြ​ရာ လှေ​သည် သူ​တို့​သွား​ရန်​ရည်ရွယ်​ထား​သည့်​အရပ်​သို့ ချက်ချင်း​ရောက်​လေ​၏။