ယောဟန် 21မှ လူကြိုက်နှစ်သက်သော ကျမ်းပိုဒ်များ။

မျှဝေရန်

နံနက်စာ​စားသောက်ကြ​ပြီးနောက် ယေရှု​က “ယောဟန်​၏​သား​ရှိမုန်… အခြား​တပည့်တော်များ ငါ့​ကို ချစ်သည်​ထက် သင်​သည် ငါ့​ကို ပို​၍ ချစ်သလော” ဟု ရှိမုန်​ပေတရု​ကို မေးတော်မူ၏။ ပေတရု​က “ချစ်ပါ၏ သခင်။ အကျွန်ုပ်​သည် သခင့်​ကို ချစ်ကြောင်း သခင်​သိပါ၏” ဟု လျှောက်၏။ ယေရှု​က “သို့ဖြစ်လျှင် ငါ့​သိုးတို့​ကို ကျွေးမွေးလော့” ဟု မိန့်တော်မူ၏။ ယေရှု​က “ယောဟန်​၏​သား​ရှိမုန်… သင်​သည် ငါ့​ကို ချစ်သလော” ဟူ၍ ဒုတိယ​အကြိမ် ပြန်​၍​မေးတော်မူ၏။ ပေတရု​က “ချစ်ပါ၏ သခင်။ အကျွန်ုပ်​သည် သခင့်​ကို ချစ်ကြောင်း သခင်​သိပါ၏” ဟု လျှောက်၏။ ယေရှု​က “သို့ဖြစ်လျှင် ငါ့​သိုးတို့​ကို ထိန်းကျောင်းလော့” ဟု မိန့်တော်မူ၏။ ယေရှု​က “ယောဟန်​၏​သား​ရှိမုန်… သင်​သည် ငါ့​ကို ချစ်သလော” ဟု တတိယ​အကြိမ် မေးတော်မူ၏။ ဤသို့ “သင်​သည် ငါ့​ကို ချစ်သလော” ဟု သုံးကြိမ်​တိုင်တိုင် မေးတော်မူ​သဖြင့် ပေတရု​သည် စိတ်ထိခိုက်​၍ “သခင်… သခင်​သည် အရာ​အားလုံး​ကို သိတော်မူ၏။ အကျွန်ုပ်​သခင့်​ကို ချစ်ကြောင်း သခင်​သိပါ၏” ဟု လျှောက်၏။ ယေရှု​က “သို့ဖြစ်လျှင် ငါ့​သိုးတို့​ကို ကျွေးမွေးလော့။

သင့်​အား ငါ​အမှန်​ဆို၏။ သင်​သည် ငယ်ရွယ်​စဉ် အချိန်​တွင် သင်​အလိုရှိသည့်​အတိုင်း လုပ်နိုင်၏။ ကိုယ်တိုင်ကိုယ်ကျ ဝတ်ဆင်​၍ သင်​သွား​လိုရာ အရပ်​သို့ သွားတတ်၏။ သို့သော် သင်​သည် အိုမင်းလာချိန်​တွင် သင်​၏​လက်တို့​ကို ဆန့်​၍ အခြား​သူ​က သင့်​ကို ဝတ်ဆင်ပေး​ကာ သင်​မသွားလိုသည့် အရပ်​သို့ သင့်​ကို ခေါ်ဆောင်သွားမည်” ဟု မိန့်တော်မူ၏။

ယေရှု​က “သင်တို့​၏ ပိုက်ကွန်​ကို လှေ​၏ လက်ယာ​ဘက်သို့ ပစ်ချလော့။ ငါး​များစွာ မိ​လိမ့်မည်” ဟု မိန့်တော်မူ၏။ သူတို့​သည် ယေရှု​မိန့်တော်မူသည့်​အတိုင်း ပိုက်ကွန်​ကို ပစ်ကြ​ရာ ငါး​များစွာ ဖမ်းမိ​သောကြောင့် ပိုက်ကွန်​ကိုပင် မဆွဲတင်နိုင်ကြချေ။

ရှိမုန်​ပေတရု​က “ငါးဖမ်း​သွားမည်” ဟု ဆို​လျှင် သူတို့​က “ငါတို့​လည်း လိုက်မည်” ဟု ဆိုကြ၏။ ဤသို့ဖြင့် သူတို့​အားလုံး​သည် လှေ​ဖြင့် ငါးဖမ်း​ထွက်ကြ၏။ သို့သော် တစ်ညလုံး ငါး​တစ်ကောင်​မျှ မမိကြ။