Mak 8
8
Jisas nase'asa gwa'aimi epes 4,000-peleis
(Mt 15:32-39)
1Anona nemaf amam nematawa hiesi sandakolas wapoti' sa'i seme' basef Jisasi. Ea' esis gwa'aimi a'as. Na'ama Jisas nofala alupumi ananimi mafi'i na'ipam na'i, 2-3“Ae' ati esis amam nematawa isima uwahipis. Esis sape salome nimeguf wanom gwa'aimi a'as nolomahas endilisi. I'i ae' esapa'as sefe' etin utagw wambel asasima, siti noga atona sowa so'oh sofe' eaf. Enis safi'i laogoma.”
4Ea' alupumi ananimi magwamana basef ma'i, “Anae' wafiguma epes a'agoma. Atuwasi afa' ofa'ai bret eti weaso' amam nematawa isima hiesi sea'am? Afa' bret ina hiana, owa'.”
5Ea' Jisas nahali'am na'i, “Dei' ipe' bret ma'una na'oh?”
Amam ma'i, “7-peleina na'omafa.”
6Ea' na'ipa esis amam nematawa sape etap, Anan nafela bret 7-peleina, nanifela God nawalona naso'am alupumi ananimi ma mase'asam esis amam nematawa hiesi. Amam mase'as hi'alas dende'. 7Ea' anom agof sa'umi hi'imi wapoti' ma'oh. Ea' Anan nafelam nanifela God, naso'amam mese'as wapoti'. 8Ea' esis sa'am, dondo' elihis. Ea' alupumi ananimi matatama tukwakwanimi ma'ihi makolasam maolo'wam holalef lu'wami 7-peleim. 9Amam nematawa sa' gwa'aimi amama sataga hies seamba amam atom mataga 4,000-peleim. Ea' Jisas nasapa'as safe' 10ea' mehip Anan nalata bot naloma alupumi ananimi mafe' anona etap lu'unai Dalmanuta.
Amam Farisi ma'i miti anona pepel si'i God atona nanda'anai
(Mt 16:1-4; Lu 12:54-56)
11Ea' amam Farisi mafi'i ma'i basef mandahihianamam maloma Jisas. Amam ma'i mogwambana ma muti anona ikwaf la'ifinai. Na'ama ma'ipana ma'i anan nonda' anona ikwaf la'ifinai si'i God nape heveni nanda'anai. Amam ma'i anan nihi'ambamama anan nape pepel Godi ma dei' nanda' amamaga amama. 12Ea' Jisas name' ambal ananinai nemanina ea' na'i, “Dei' maina ipe' amam nematawa dei' pape etap anae' pa'i piti anona ikwaf la'finai? Ae' owa'etina enda'ana pitolona, owa'.”
13Ea' nakwaha amam notanima nalata bot nafe' fisana.
Basef womun etina yis Farisi maloma yis Heroti ma'i basef baso'maimi amamumi
(Mt 16:5-12)
14Amam alupumi Jisasi ukup mase'ama mofa' bret hianai nolomam. Amam mofa' atotona nala bot 15Ea' Jisas naumbalom na'ipam na'i, “Ipe' pindumafuma andeande' ma yis amama amam Farisi maloma yis Heroti.”
16Ea' mame' Anan na'iam na'ama, manda'ipama ma'i, “Afa' ukup mase'afa bret na'ihi dei' na'ipafa na'ama.”
17Ea' Jisas nogawa basef amamumi na'ipam na'i, “Dei' maina ipe' pa'i, ‘Ipe' bret a'epa?’ A'i ipe' ukup mase'epa, owa' ata' pegawa? 18Ipe' naep mati, ea' ipe' owa' ata' piti anom amamaga. Ea' aligah mapeipa, ea' ipe' ine' peme' basef, owa'. Ukup mase'epa. 19Nimbewa' awala bret 5-peleina ma epes isima 5,000-peleis, ama tukwakwanimi ma'ihi pakolasom paolo'wam holalef ma'um si'im?”
Ea' amam ma'i, “12-peleim.”
20“Ea' nimbewa' awala bret 7-peleina ma tukwakwanimi ma'ihi patatamam paolo'wam holalef ma'um si'im?”
Ea' amam ma'i, “7-peleim.”
21Ea' Anan na'ipam na'i, “Ipe' dei' ina pegawa, ata' owa'.”
Jisas nanda' anona aman naep mase'anai Betsaida ambo'ona
22Amam mafe' mataga Betsaida, sao'wamanai anona aman naep mase'anai nafi'mai Jisas ea' sa'ipana mehipa nesa lagel ananinai nonda'ana bo'ona. 23Ea' nahapila lagel anan naep mase'anai, nofa'ana nakwaha wambel nawis ande' nisi'wafa naep ananimi, nasa lagela anan nahali'ana na'i, “Ine' nati ambasif o ata' owa'?”
24Ea' aman anama natologon na'i, “Ae' ati enis epes ea' atilis si'i lawah mafe'.”
25Ea' Jisas nasa lagel wapoti', naep ananimi dei' mataga bo'om, natologon andeande'.
26Ea' Jisas nasapa'ana nafe' ipat ananinai na'ipana na'i, “Ine' owa' nefe' niwis wambel ni'ipasa ae' anda'ena ambo'wena, owa'. Ine' nefe' usi'ina ipat ine'inai.”
Pita na'i Jisas anan aman anama God nandandepana nasapa'ana nafi'i esis sa'i Krais
(Mt 16:13-20; Lu 9:18-21)
27Ea' Jisas nohafel naloma alupumi ananimi mafe' felefele'ma wambel hiagoma Sisaria Filipai. Amam mafe'ma eaf, nahali'am na'i, “Esis amam nematawa sa'i ae' aman emi egafuwi?”
28Ea' amam ma'ipana ma'i, “Enis sa'i ine' Jon aman napisi'as embeli. Ea' enis sa'i ine' Elaija. Ea' enis sa'i ine' enina profet, fowa'inai.”
29Ea' nahali'am na'i, “Dei' ipe' pa'i ae' emi egafuwi?”
Ea' Pita nagwamana na'ipana na'i, “Ine' Krais, God nandandepena nasapa'ena nafi'i.”
30Ea' na'ipama basef la'ifimi na'i, “Ipe' ina pewalapa ae' pi'ipa enis pi'i ae' Krais, owa'.”
Jisas na'ipasa nofa' nimanimi ma noga' nohafel wapoti'
(Mt 16:21-28; Lu 9:22-27)
31Ea' Jisas nasefela basef ananimi nawalipam na'i, “Ae' ataga epen endilisiwei, nambimb agufumi Judai mose'e nimanimi lu'wami. Amam moloma amam pris dambami moloma amam dambami mawalipasa mi'uli Godi. Nambimb mondaiwa'me mose'e alafugah mohe ega' ma nimeguf biam ea', meafe'ma wanomi ehafel wapoti'.”
32Anan nawalapa basef amama alihima amam. Ea' Pita nofa'ana nelefata nasa gemba ea' na'ipana basef la'ifimi ma basef amama Jisas na'ipasami. 33Ea' Jisas nandamboma nati alupumi ananimi, nanda' megahaha Pita na'i, “Ine' si'i Satan. Dei' main, ine' owa' okom nopoma okom Godi. Ukom ine'inai si'i ukup epes sape etapi etis. Si'amae nefe' alafuga ae'anai.”
34Ea' Jisas nofalai esis amam nematawa hiesi safi'mai Anan saloma alupumi ananimi na'ipas na'i, “I'i emi egafis si'i sila Ae', esis ata' seho'ofa ukup asasimi atom mowala, sefe' owin ama God ea' ina umbamahasa enis epes sohas soga', owa'. Ae' efa' nimanimi ma anda' maol Godi nambimb sehe ega' lawag usi'inai tu'wanainai. Epes isima senda'am na'ama etin si'i Ae' ma sigi'ma ae'. I'i owa', owa'etin. 35Emi egafis ukup mopoma ambagof asasimi atom, si'i sihapilam tatala'im, anona nemaf ambagof asasimi higililam. Ea' emi egafis ukup mopoma ae' eloma basef bu'wami Godi ma sesambala ambagof asasimi etap anae', anona nemaf God nofa'as sotanimani sopan andeande' la'ela'ef hihif. 36Emi egafis senda' maol naninani sofa' gwa'aimi wiga amamaga hiami etapami atom hegilialami, esis wapoti' hegililas solomam. Dei' amamaga amama anona nemaf migiambamas mi'imama? Owa'etin. 37Epes isima anona nemaf sofa' amamaga maima seatala ambagof asasimi ma sitanima sowambilami wapoti'? Owa'etin. 38Ae' ataga epen endilisiwei. Amam nematawa dei'isi sanda' waf aonai sakwaha sombale'efa God. Emi egafis ambagof aoma ae' sondafa'me eloma basef ae'ami, anona nemaf ae' wapoti' ambal aona epes isima endafa'mas nemaf anama ae' ifi'i eloma amamaga bu'wami la'ifimi mafifili Ahalomei elomai amam ensel bu'wami Godi wapoti'.”
လက္ရွိေရြးခ်ယ္ထားမွု
Mak 8: aojF
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2013, Wycliffe Bible Translators, Inc. All rights reserved.