Mak 5
5
Jisas natofa ambagof awami hiami mape anona aman
(Mt 8:28-34; Lu 8:26-39)
1Ea' Jisas nao'wa alupumi nafe' nataga anagon wa'ol walemb batupa'manai anama etap esis Gerasa sapoma. 2-3Anan nakwaha bot nisila'i, mehip anona aman ambagof awami mapeinai nafi'mai Anan. Aman anama nape na'oh la'ela'ef hi'agilif sawa epes saga'i sapoma nafi'i. 4Esis sali' sombalo'ana sumafiana, sanda' seni hankap sowa'ana lagof bo'wagah la'ela'ef. Owa'etin. Anan nahape'am etin. Ina enin epen la'ifina nembalo'ana la'ifina nope, owa'. Ea' sen wapoti' ina la'ifina, owa'. 5La'ela'ef owamb alip nape nafe' hi'agilif halafutagw, nafe' na'i mehip nafe'. Nafela otamba hi'elimi natotopa' alop ananinai.
6Anan ata' nati Jisas nafi'i laogon, nasagih nafi'i nindiwa nembawa notawamana. 7-8Ea' Jisas nogawa aman anama ambagof awami mapeinai. Ea' na'ipam na'i, “Ipe' ambagof aopei, ipe' pekwahona pefe'.”
Na'ama anan noga' na'i mehip na'i “Jisas, ine' nogalomana Dembinai God nape ilif endilisi, ine' na'i nenda' maina ae'? Ae' a'ipina endilisi gani ilifa agel Godi, ine' owa' nese'e nimanimi ae'.”
9Ea' Jisas nahali'ana na'i, “Agel ine'inai emi?”
Ea' anan na'i, “Afa' ambagof aofai hiafai. Dei' agel afa'inai ambagof hiami.”
10Ea' nahali' Jisas mehip na'i, “Ina netofafa ofe' anona etap laugoma, owa'.”
11Ea' anom bogof hiami maitu ma' gwa'aimi anona domota felefele'. 12Ea' ambagof amama mofala Jisas ma'ipana mehip ma'i, “Ine' netofafa ofe' uwisa bogof mamuma.”
13Ea' Jisas na'i a'e mam, makwaha aman anama mawisi mafe' mawisa bogof. Ea' bogof mamuma hiami 2,000-peleim masagih mafe' mehip mowala anagon awagoma tata mowala embel walemb batupa'manai ma' embel afum hi'alam. 14Ea' amam mumafimi masagih mafe' ma'ipasa basef amama wambel anama lu'unai amam nematawa hiesi. Ea' ma'ipas sape aof wapoti' ma amamaga amama amam matulumi. 15Ea' safi'mai Jisas sati aman anama fowa' ambagof awami mapeinai, dei' ambo'ona nomonas bu'wami mapeina andeande' nowaho' lowaf nape. Amam nematawa hiesi satolona ea' esis umbamahas. 16Ea' esis sati amamaga amama sa'ipas ma amamaga amama mataga aman anama fowa' ambagof awami mapeinai. Ea' sa'ipas amamaga matagama bogof wapoti'. 17Ea' esis hiesi sa'ipa Jisas mehip sa'i nokwaha etap anama asasima nefe' anagon. 18Ea' Jisas nalata bot, aman anama fowa' ambagof awami mapeinai nahali'ana mehip na'i, “Ae' a'i efe' elomena.”
19Ea' Jisas ina na'i, owa'. Ea' na'ipana na'i, “Ine' nefe'ma esis wambota atona ine'inai ni'ipasa amama Dembinai nanda'minami nati uwahipina ma nanda'ena bow'ena.”
20Ea' aman anama nafe' nawalapa basef amama na'ipasam wambel 10-peleina Dekapolisa amamaga Jisas nanda'manami. Ea' esis amam nematawa gegelalasis kwapete'as ukup matamea mafe'.
Jisas nafela nogamana Jairusi kohafel kwape bo'okw wapoti' ea' nanda' ano'w nemata'w ambo'okw
(Mt 9:18-26; Lu 8:40-56)
21Jisas nofa' bot notanima nambo walemb batupa'manai anama nafe' fisana gani wa'ol, ea' amam nematawa hiesi safi'i sape satagamana. Anan nape felefele'ma akata, 22anona aman Jairus numafi ipat esis Juda sa'i basef sapeinai nafi'i. Anan nati Jisas ea' nindiwa nembawa notawamana, felefele'ma bo'wagah ananimi. 23Ea' na'ipana mehip na'i, “Nogame ae'akwi felefele' kwa'i koga'. Ae' a'i ine' nefe' newamona lagel ine'inai akwa'w ambal notanimai nuwisa'w kohafel kopan.”
24Ea' Jisas nalomana mafe'. Ea' amam nematawa hiesi safe' sagi'mam sanda' gwagwasi'ma etin saitu sindiwapana.
25Ea' ano'w nemata'w kwape kwalomas, awes lu'unai nanda'akwi kwape gamba la'ela'ef afagof 12-peleim. 26Akwa'w kwafe'ma dokta hiesi sase'akw nimanimi, ea' kwakwaha otamba akwa'umi hi'alama dokta isima hiesi ma senda'akw bo'okw, owa'etin. Awasi'w kwape na'ama la'ela'ef. 27Ea' kwame' basefa Jisas nafela enis epes awes nanda'asi ambo'wes. Ea' kwaloma amam nematawa hiesi kwafi'i alafuga Jisasi kwahapila lowaf ananinai. 28Dei' main, akwa'w okom na'i, “Ae' esa lagela lowaf ananinai, ae' bo'awe.”
29Kwahapila lowaf ananinai etin mehip esimbel pele'atam ea' kwame' alop akwa'unai nataga bo'ona. 30Dei' atef Jisas name' alop ananinai kwofalina, name' anona pepel ananinai nakwahona nafe'ma nanda' enin epen bo'wen. Na'ama nandamboma la'afena esis hiesi na'i, “Emi nasa lagela Ae'?”
31Ea' alupumi ananimi ma'ipana ma'i, “Ine' natilis o owa' amam nematawa isima hiesi saitu sanda' gwagwasi'ma etin salomafa? Dei' maina ine' ata' na'i, ‘Emi nasa lagela ae'?’ ”
32Ea' Jisas nandamboma natologon na'i niti epen inima nahapilani. 33Ea' nemata'w akwama kogawa amamaga amama matagama'wi, ambo'okw ea' umbamaha'w kwapete'akw. Ea' kwafi'i kwindiwa nembawa kotawa felefele'ma Anan, kwawalapa amamaga kwa'iam alihim.
34Ea' Jisas na'ipakw na'i, “Nemata'w, ine' nembale'efa ae' la'ifiwei. Amama atom dei' anda'ena bo'wena. Ine' fo'o, opaf ine'inai nope awanena. Esimbel ine'imi fataom, dei' awes ine'inai ahi'alana.”
35Jisas ata' na'ipakw etin, nati anom amam makwaha ipat Jairusi mafi'i ma'ipa Jairus ma'i, “Nogamena ine'ikwi kwaga' ea'. Amama atom dei' ina nenda' Dembinai Tisa nofo'o ekep pehana, owa', hapainai.”
36Ea' Jisas ina nembe' aligah name'amam basef amama amamumi, owa'. Ea' na'ipa Jairus na'i, “Ina umbamehena, owa'. Nembale'efa Ae' la'ifiwei.”
37Ea' Anan ina na'i a'e ma amam nematawa hiesi solomana siowis ipat anama, owa'. Anan nao'wa Pita Jems naloma owalomana Jon amam atom mawis malomana. 38Mafe' mataga ipat Jairusi, Jisas nati esis salef mehip sa'i sapoma'w kwapete'as.
39Ea' nawis nomon na'ipas na'i, “Dei' maina ipe' palef patapea kwapete'epa? Akwa'w ina kwaga' endilisi, owa'. Kwa'oh etin.”
40Ea' esis sanda' iafana kwapete'as ama na'iam na'ama. Ea' nagalo'ma esis sawisi ande'. Anan nao'wa ahaloma'w naloma mama'wakw saloma alupumi ananimi mape malomanai, esis etis safe' sawis nomon awani inima naga' na'oma. 41Ea' nahapila lagel akwa'unai na'ipakw na'i, “Talita kumi.” Ape' mamboma basef amama ma'i, “Nemata'w sa'ukwi, ae' a'ipina, ine' dei' hafel.”
42Ea' mehip nemata'w akwama afagof 12-peleim mahape'akwi kohafel kwafe' esis satolo'w, sohafel gegelalasis kwapete'as.
43Ea' Jisas na'ipas mehipa siela basef ananimi na'i, “Ipe' ina pi'ipa enin epena amamaga amama, owa'.”
Ea' na'ipa esisa sese'akwa anom gwa'aimi kogwa'am.
လက္ရွိေရြးခ်ယ္ထားမွု
Mak 5: aojF
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2013, Wycliffe Bible Translators, Inc. All rights reserved.