Vilinga 2
2
Kuija kua Cimbembesi Uakulela
1Omo litangua lia Pentekosita liahete, vaka kutsiliela voshe vakungulukile mu njivo imolika. 2Hajevene muilu muahumine cililimo ngue kupekumuka kua mpunzi yakama, kaha yashulisile njivo yoshe muje muvatumamene. 3Vamuene vije viafuile ngue milengi ya tuhia vije vialihangunukile kaha imo na imo yakele hali umo na umo uavo. 4Voshe vashulile na Cimbembesi Uakulela kaha vaputukile kuhandeka mu vindaka vieka, nge muje Cimbembesi cavalingile linga vahandekemo.
5Mu Yelusalema muakele Vayunda vaka kuivuila Njambi liova vaje vahumine ku mafuti oshe ahano ha mavu. 6Omo vovuile kalua kaje, civunga cakama cakungulukile. Voshe valikomokelele omuo muntu uoshe uovuile vaje vaka kutsiliela vahandeka mu vindaka viavo. 7Voshe valikomokelele cikuma nakuhandeka nguavo, “Nkuma ava vali nakuhandeka ngeci keti voshe Vangalileya ndi? 8Cija vati honi tuvavoshe tuvevua umo na umo mu muyati uetu vavenia? 9Vamo vetu vahuma ku Palitiya, Mendiya na ku Elame, vakuavo ku Mesopotamia, Yundeya na ku Kapandosiya, vakuavo ku Pontiyasi na ku vinganda vimo via Valoma via mu Asiya, 10vamo ku Filingiya na ku Pampiliya, vakuavo ku Ingito na ku mitambela ya Limbiya kuyehi na Silene, vamo vangenzi vahuma ku nganda ya Loma 11(Vayunda na ava keti Vayunda vuno honi lika vakakava futisi ya Vayunda), vamo vetu vahuma ku Kelete na ku Alambiya yetu tuvavoshe tulinakuvevua vahandeka vikomoueso via Njambi mu miyati yetu.” 12Kaha voshe valikomokelele nakukala na citanga, kaha valihozuele umo na mukuavo nguavo, “Eci cilumbunuka vika?” 13Vuno honi vamo vavo vashendumuine vaka kutsiliela nakuhandeka nguavo, “Vantu ava vanapende viniu!”
Muzimbu ua Petulu
14Vuno honi Petulu uemanene na vakuavo tunganda likumi na umo, uahandekele na lizi liakama ku civunga cije nguendi, “Vamala vaku Yundeya neni voshe muakala mu Yelusalema, tantekeyeni eci cuma, kaha ivuilileni muacili kuli evi njihandeka. 15Cilivene, vantu ava kuvapendele nge mumuli nakuyonguelamo, ino inapu ntsimbu ya mucitanu na viuana ku cimene. 16Vuno honi evi vikevio viahandekele kananguizi ua Njambi Njuele nguendi.
17Njambi ahandeka nguendi, ‘Eci cikeco njikalinga mu matangua amamanusuililo
njiketila Cimbembesi cange hali muntu na muntu.
Vana veni va vamala na ava va vampuevo vakambulula vunanguizi,
na vakuenje veni vakamona vimona,
na vakulukazi veni vakalota vinjozi.
18Mu matangua aje njiketila Cimbembesi cange,
cipue hali vangamba vange, va vamala na ava va vampuevo
kaha vakambulula vunanguizi.
19Njikalinga vikomoueso muilu
na vitantekeyeso hano ha mavu,
kukakala maninga, na tuhia, na vuisi vuakama.
20Litangua likazivala vuiii,
na ngonde ikavenga ngengu ngue maninga,
ntsimbu kanda litangua liakama lia vumpau vua Muene lihete.
21Kaha uoshe akasana lizina lia Muene akovoka.’
22Yeni vamala vaku Isaleli! “Ivuilileni ku mezi aua, Yesu uaku Nazaleta uapuile yala uje nzili yendi yakama yavu Njambi yasholuele muacili kuli yeni vikomoueso na vitantekeyeso vije vialingile Njambi kuhitila muli ikeye hhakati keni, nge muje yeni vavenia mualitantekeyela. 23Njambi mu kutantekeya cendi na mu viyongola viendi via laja ngeci Yesu vaka muhana ku mavoko eni, kaha yeni muamutsihile hakutava vaka vupi linga vamushukike ha cilindakano. 24Vuno honi Njambi uamusanguile ku vatsi, uamupatuile ku nzili ya kutsa, omuo kucatavele linga kutsa cimupuise cinzinda. 25Omuo Ndaviti uahandekele hali ikeye nguendi,
‘Muene kulutue luange ntsimbu yoshe,
omuo ali ku livoko liange lia cilio kaha kunjikajaja.
26Nankuma mutima uange uvuahelela,
na mezi ange anashulu na nzolela.
Kaha muvila uange ukahuima mu lutsilielo.
27Omuo kukanjiseze mu vukalo vua vatsi,
cipue kutava muka kulela uove linga apolele mu cihilo.
28Unanjitantekeyesa vingila vituala ku muono,
ukanjishulisa na nzolela mukukala muyehi nove.’
29“Vakuetu, njihandeka kuli yeni nakusimpa hali kukuluila yetu Ndaviti uje uatsile na kumutsinda, na cihilo cendi hanga tucili naco na lelo lino. 30Ndaviti uapuile kananguizi ua Njambi, kaha uatantekeyele nguendi Njambi uamukulahesele na kulisinga nguendi akapuisa umo ua vatekuluila vendi kukala ha litanda lia vumuene. 31Ndaviti ha kumona vije vikalingika kulutue, uahandekele ha kusanguka kua Kilistu omo uahandekele nguendi,
‘Ikeye kuvamusezele mu vukalo vua vatsi,
muvila uendi kuuapolelele mu cihilo.’
32Njambi nasangula ou Yesu ku vatsi, kaha yetu voshe tunapu vakaleho va viuma evi. 33Ikeye hakumujundula kuya ku livoko lia cilio lia Njambi, nakutambula Cimbembesi Uakulela kuli Ishe cije camu kulahesele, kaha netilahoni vije vimuli nakumona na kuivua hali yetu. 34Omuo keti Ndaviti uje ualondele muilu, vuno honi ikeye uahandekele nguendi,
‘Muene uahandekele kuli Muene yange nguendi,
Tumama ku livoko liange lia cilio
35noho cikapuisa vitozi vove vuliatelo vuave.’
36“Nankuma vantu voshe va Isaleli vanapande kutantekeya muacili ngeci ou ikeye Yesu, uje imuashukikile ha cilindakano ikeye Njambi yanapuisa Muene na Kilistu.”
37Omo vantu vovuile evi, cavakuate ku mitima yavo kaha vahandekele kuli Petulu na kuli tunganda vakuavo nguavo, “Eni vakuetu, tuapande kulinga vati?”
38Petulu uahandekele kuli vakevo nguendi, “Muntu na muntu napande kutenguluka ku vipi viendi nakumumbuitika mu lizina lia Yesu Kilistu linga vamisambese ku vipi vieni, kaha mukatambula vuana vua Cimbembesi Uakulela. 39Omuo cikulaheso ca Njambi cinapu ceni na vana veni, na kuli voshe vaje vali kulahako, vaje voshe vakasana Muene Njambi yetu veje kuli ikeye.”
40Petulu uahandekele kuli vakevo na mezi eka akuvanangula nakuvalambelela nguendi, “Lioheleni yeni vavenia ku miyati eyi ya vilinga via vipi.” 41Vaje voshe vatambuile muzimbu ua Petulu vavambuitikile, kaha ha litangua lije kualivuezelelele vantu vakupua makulukazi atatu (3, 0 0 0). 42Vakakateyele ku vilongesa via tunganda na mukukunguluka hamo, na mukutavula mbolo na mukulombela.
Vuyoye vua Vaka kutsiliela
43Vikomoueso na vitantekeyeso viavingi vivalingile tunganda viovuisile vantu voshe liova. 44Vaka kutsiliela voshe vakele hamo mukulitombola, kaha valipangelele vufuko vuavo voshe. 45Valandesele viuma viavo na vufuko vuavo, kaha valipangezelele vimbongo hhakati kavo, kuya muje muanazenekela muntu. 46Ha litangua na litangua valikunguluile mu Njivo ya Njambi, vakele nakutavula mbolo mu vinjivo viavo na kulia viakulia viavo mukuvuahelela na mitima ya kulikehesa, 47nakushangazala Njambi, nakuvazanga ku vantu voshe. Ha litangua na litangua Muene uavuezeleleleko ku civunga cavo vaje vantu vakele nakuovoka.
လက္ရွိေရြးခ်ယ္ထားမွု
Vilinga 2: nkn
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ