Luk 6
6
Jisɔs mɔ ɔra ƆKƆKƆ reyi kɛfuɛkpa
(Mat 12:1-8; Mak 2:23-28)
1Reyi kɛfuɛkpa dinɛ, Jisɔs ɔra osiŋa ra kɛkɔ ka igu chinɛ nchi igu ibɔ tɨm. Atɔra Jisɔs wa bɨnɛ wa fala rifɨlɔ rigu, wa kɨlo fura yɛ wa bɨnɛ ɛjiɛlɛ. 2Gbɔ Farɛsi adudu wa bɨbɔ bɛ na, “Kɛra nnan awun risia bumbu wobi chɛŋɛ ra ibina Reyi Kɛfuɛkpa?”
3Jisɔs ofini bɛ na, “Awun ribɨri yin bumbu Defid akɨla ani mba wara ramɔ wa sii ndi mŋbɔ miduŋɔ bɛ? 4Ɔnɔlɔ rikalɔ ra ɛtɔ Ɛbɨrɔkpabi, ɔjɛ rɛta kɔjɛ ndi wa tɨmɔ Ɛbɨrɔkpabi, ndi ibina ikani na Asia kɔya ababɛ wa jɛ, mɨnɛ ɔnyɛ ani mba wara ramɔ.” 5Jisɔs ɔkani bɛ na, “Wɔna Oni mɔ ɔra ƆKƆKƆ Reyi kɛfuɛkpa.”
Jisɔs ɔraŋɔ atɔramɔ asaŋɛsaŋɛ juu ra afaa
(Mat 10:1-4; Mak 3:13-19)
6Reyi kɛfuɛkpa redudu, Jisɔs odulɔ rikalɔ ra Ɛtɔa nyɔm a Jus ɔka kɔgɛ. Mɨnɛ odumini wunɛ ɔrafɛ nwu kɔbɔ kodumɔ kɔkɛn kɔ baba. 7Mɨnɛ Akɔga Ibina arigɛ Farɛsi wara wa yɛra ebiebi, wa chɛ abɔ Jisɔs kɨn ɔnyɛ mɔ ɛgbanɛlɛ reyi kɛfuɛkpa, fɛɛ abɛ wa fɔnɔ bumbu wa nɨŋɔ nyɛ mɔ kobi. 8Gbɔ Jisɔs ɔgbɛra nkatir abɛ, kadi ɔkani odumini nwu kɔbɔ kɔbaba na, “Tɨmɔnɛ barɔbar matii ma oniranwunɛ.” Ɔtɨmɔnɛ ɔbarɔ.
9Kadi Jisɔs ɔkani bɛ na, “Mbɨbo wun, Maa mbum bɛ ibina iyɨl ikani na resi reyi kɛfuɛkpa, resi koli din resi kebia, rɛ nani rokpin din re binebinɛ?”
10Ɔyɛrɔ bɛ fɛb ɔfagɛlɛ, ɔkani odumini nwɛn na, “Nawɛ kɔbɔ koku.” Osi ɛduayi, mɨnɛ kɔbɔ nkɛn komulɛnɛ kotumɛ irigirigɔ amɔm nkulɛkɨlɛ. 11Gbɔ Farɛsi akɨla Akɔga Ibina etimɔ ɛrabɛ ebiebi, wa bɨnɛ wa kɨma wa baŋa bumbu wa nɨŋo si Jisɔs.
Jisɔs ɔraŋɔ Atɔramɔ juu ra afaa
12Reyi dinɛ, Jisɔs odulɔ mbira kekul ɔka rɔ nyɔm, otumɛ ra nyɔm jɔ adi fɛb ɔnyaŋa Ɛbɨrɔkpabi. 13Reyi rɛkɨlɔ chɛlɛ oyinɔ atɔramɔ, ɔraŋɔ juu rafaa (12) ra kɛdɔŋ kɛbɛ, oyinɔ bɛ ridɨnɔ na atɔramɔ asaŋɛsaŋɛ. 14Saimɔn amɔ ɔso yin Pita, akɨla ɔmalɔ ɔwɛn Andɨru, Jems, Jɔn, Filip akɨla Batɨlomiu. 15Matiu, Tɔmɔs, Jems wɔna Alfiɔs, Saimɔn nwu wa yinɔ Silɔt. 16Judas wɔna Jems, akɨla Judas Iskariɔt, nwu okulɛ Jisɔs.
Ɛmɔlɛmɔlɛ arigɛ itu
(Mat 4:23-25)
17Jisɔs ɔrɛ kekul ɔwɔ ra atɔramɔ kɛdɔŋ, ɔbarɔ ra kumka rɔchɛ rɔra baal. Rɛkau ra atɔramɔ esii, akɨla rɛkau ra ani esii rɛra afɛ, mba wasi Judia akɨla Jɛrusɛlɛm, akɨla rifaŋɔ mayaa madɛnɔ mma makula Taya akɨla Sidɔn. 18Wa wɔ wawa dim mɔ, mɨnɛ wa tama ɛgbanɛlɛ rifɛn ribɛ, mɨnɛ mba wa fɔnɔ obia roifɛ wa tama ɛgbanɛlɛ. 19Oniranwunɛ ɔra obuma ɔkpɨmɔ Jisɔs, kum nsɨm ɛgbanɛlɛ ɔra ɔjaga mɔ ra ɛkpaju ɔgbana bɛ fɛb.
20Jisɔs ɔfagɛlɛ ɔnɨŋɔ atɔramɔ ɔlamɔ na,
“Ɛmɔlɛmɔlɛ ɛfɔno wun mba rira rikpag,
kum rɛkɨm ra Ɛbɨrɔkpabi rɛfɔno wun.
21Ɛmɔlɛmɔlɛ ɛfɔno wun mba mŋbɔ miduŋa wun faŋandi,
kum kɨn rijɛ riyɨlɛ.
Ɛmɔlɛmɔlɛ ɛfɔno wun mba risua faŋandi,
kum kɨn ri mamɛ.
22Ɛmɔlɛmɔlɛ ɛfɔno wun,
ndi ri kpugɔ ani,
wa saŋo wun rɛkau rɛbɛ.
Mɨnɛ wa yira wun amɔm obia ani,
wa binɛ radɨnɔ rawun rɛfɔ ra Wɔna Oni.
23“Awun rikanɔ ra reyi adifɛ, rifɛwɔ ra kɛdɔmetimɔ, kum nsɔl owun ra kayu ogbugagbuga. Kum irigirigɔ dɛ mitɛ abɛ wa sii, wanyɛ alamaramu ra Ɛbɨrɔkpabi.
24“Gbɔ kobiwɔ kɔnyɛ wun mba ri faŋɔfaŋ,
kum ritama kɛrɔetimɔ kewun faŋandi!
25Kobiwɔ kɔnye wun mba ribɔ yɨlɛ faŋandi,
kum mŋbɔ kɨn mi duŋo wun.
Kobiwɔ kɔnye wun mba rimama faŋandi,
kum kɨn ri tumɛ ra sugum mɨnɛ kɨn ri sɔ.
26Kobiwɔ kɔnye wun,
ndi ani fɛb wa lama koli wa baŋa wun,
kum ɛduayi dɛ bɨritɛ abɛ wa lamɔ wanyɛ awia ija alamaramu ra Ɛbɨrɔkpabi.
Fɔnɔ rɛda ra anianjɨŋ aba
(Mat 5:38-48; 7:12)
27“Gbɔ nkani wun mba ri luma ratuŋ: Ri fɔnɔ rɛda ra anianjɨŋ awun. Ri sii koli ri nyɛ ani mba ri kpuga bɛ. 28Ri mɔlɛ ani mba watua wun itu, mɨnɛ rirɔ nyɔm rinyɛ ani mba wa sia wun obia ratag. 29Oni ɔbɔ nye wun nsab ra kɔfɨb kunɛ, ri chimini nkulɛkɨlɛ mɨnɛ, abɔ ɔnɨŋɔ tama wu ɛbɔwɛ rɔfa, ka kpanɔ mɔ nyi rikalɔ.#6:29 nye wun nsab ra kɔfɨb kunɛ, ri chimini nkulɛkɨlɛ mɨnɛ, abɔ ɔnɨŋɔ tama wu ɛbɔwɛ rɔfa, ka kpanɔ mɔ nyi rikalɔ. Jisɔs otimɔ birɛ mbi olumɛ fɛɛ rɛ kɔgɛnɛ na ebi fuu na rɛ fɔlɛnɛ kɔfɔlɛ. Mbum rambunɛ mbu oni osii ɔnye wul, titi mbu kebia, rɛgbɛ Ɛbɨrɔkpabi ɛkɨbi kɛlam. Mɨnɛ abɔ resia koli, tum onia njɨŋ owu sii, ka fumɔ tum ɛjagɔ na adulɔ ɔfɨrɛtɨma asiŋɔ kɛmanchi ayɛɛ 30Oniranwunɛ nwu ɔkpɛmowu mbum nyɛ mɔ. Mɨnɛ oni ɔbɔ tama bumobu, ka bɨbɔ mɔ abɛ akɨla. 31Mbum rambunɛ mbu adugɔ na ani wa si wanye wu, sii irigirigɔ nyɛ bɛ ɛduayi.
32“Abɔ ri fɔnɔ rɛda ra ani rɛda awun ababɛ, maa rɛsamɛ dɛ ri fɔnɔ afɛ? Kum asia obia mɨnɛ wa fɔnɔ rɛda ra ani rɛdabɛ. 33Mɨnɛ abo si koli anyɛ ani mba wa sia wu koli, maa rɛsamɛ dɛ afɔnɔ afɛ? Kum asia obia mɨnɛ wa sia eduayifɛ. 34Abɔ fɔrɛ ani mba wa nɔ yɛ wa muni wu agbuga, maa rɛsamɛ dɛ afɔnɔ afɛ? Kum asia obia wa sia irigirigɔ wa nyaŋa asia obia, wa fɔna kerigɛjɛnɔ na wa muni bɛ irigirigɔ. 35Gbɔ fɔnɔ rɛda ra anianjɨŋ aba, mɨnɛ sii koli nyɛ bɛ. Fɔrɛ bɛ agbuga, gbɔ ka fɔnɔ kerigɛjɛnɔ ka emunimuni, mɨnɛ nsɔl owu kɨn ɔgbɔwa. Mɨnɛ kɨn atumɛ wɔna Ɛbɨrɔkpabi a Mbirambira. Kum ayɛ eliwɔ ɛnyɛ ani mba wara sama yɛ akɨla ani mba wa biwɔ etimɔ. 36Yugɔ ra mafɨbɔ kɛmanchi mitɛ owu oyuga ra mafɨbɔ.
Ka kɨbi kɛlam anyɛ ani
(Mat 7:1-5)
37“Ka kɨbi kɛlam anyɛ ani, mɨnɛ wara kɨba kɛlam wanye wu. Ka binɛ ani adudu, mɨnɛ ani wara bina wu, fɔrɛ ani adudu mɨnɛ kɨn wa fɔre wu. 38Nyɛɛ mɨnɛ kɨn wanye wu, ra bɨrika elumelumɛ, wa nyɛgɛnyɛgɛ, wa gbugogbug, ra ɛfawɛlɛ waro wu ra ɛla#6:38 ɛla Ra rɛmalɛ ra ania Ju, birɛ elumelumɛ esii wa luma ra ibɔwɛ nyi wa fɨlofi fɛɛ itama kɛkalɛ nchi nla kɛ bɨbala rɔchɛ.. Kum kɛmanchi alumɛ anyɛ, afɛ kɛmanchi wa nɨŋo lumɛ wanye wu.”
39Ɔkani bɛ rɛkanɔ ndifa mɨnɛ, “Ɔsɨla jɛnɔ kɨn ɔyɛ otiwɔ ɔsɨla jɛnɔ ɛtɨma-a? Abɛ afaafaa wara tualɛ ra rɛma-a? 40Atɔra oni wara gbuga wa siŋa oniretu ɔbɛ, gbɔ oniranwunɛ, wa bɔ kɔgɛ mɔ olili kɨn otumɛ amɔm ɔkɔgakɔga ɔwɛn.
41“Esinan achia egbigbɛd ɛtɛwɔ ra jɛnɔ ra ɔmalɔ owu, gbɔ ara chia ɔkɨmkɨm kɛkpa nchi kɛra ra jɛnɔ redi? 42Rɛfɔ nnan dɛ akana ɔmalɔ owu na, ‘Ɔmalɔ, lɔɔ mɛ nsaŋɔ wu ɛtɛwɔ ra jɛnɔ,’ ndi awu ɔkɔkɔ abɨriyɛ achɛ ɔkɨmkɨm kɛkpa keti nchi kɛra wu ra jɛnɔ? Awu oni ikparobug, rɨŋɛtɨma saŋɔ kɛkpa keti nchi kɛra wu ra jɛnɔ, fɛkadi achɛ olili asaŋɔ ɛtɛwɔ ra jɛnɔ ra ɔmalɔ owu.
Keti ra radɨnoti radɛn
(Mat 7:16-20; 12:33-35)
43“Bɨrika keti kɛda nchi ke wuga obia radɨnoti, mɨnɛ kebia keti kɛda nchi ke wuga bɨrika radɨnoti. 44Achɛŋa keti ranchinɛ ra radɨnoti radɛn. Ani wara taga misokud rikalɔ ra ɛkatɨmɛ, din radɨnoti ra fig rikalɔ ra oruriwa. 45Bɨrika oni ɔwɔŋa ra bɨrika birɛ mbi wɛra mɔ rikalɔ ra etimɔ. Mɨnɛ kebia ka oni kɛwɔŋa ra obia birɛ mbi wɛra mɔ rikalɔ ra etimɔ. Kum birɛ mbi we yugɔ ra etimɔ, abɛbɛ kama kalama.
Aria itɔ kɛgbɛrakɔtag arɨgɛ mba keful
(Mat 7:24-27)
46“Mambum bɛ wosia wun riyina mɛ ‘ƆKƆKƆ, ƆKƆKƆ,’ gbɔ rira sia bumbu nkani wun? 47Ani rambanɛ mba wawɔ wa yimɔ mɛ, wa dimɔ kɛlam kɛchɨm wa sichɛosi, ami kɨn kɔgɛlɛ bɛ bumbu wara. 48Wara amɔm oni nwu oria ɛtɔ, nwu ɔtɔɔ rɛma re tugamatugama, ɔtɛlɛ yɛ mbira rɛta. Kegbuŋ mani kɛkɨlɔ wɔ, kechiwɔ ɛtɔ ayi fafɛ, gbɔ kebi ya kegbugɔ yɛ, kum ori yɛ olili. 49Gbɔ oni nwu obo dim kɛlam kɛchɨm, gbɔ obi sichɛosi, ɔra amɔm oni nwu ori ɛtɔ mbira rɔchɛ ra ififɨr, obi tɔɔ rɛma retugama rɛjagɔ rata. Kegbuŋ mani kɛkɨlɔ wɔ kɛwa gbɨn ɛtɔ nyɛn, egbirɔ, ebinɛnɛ ebiebi.”
လက္ရွိေရြးခ်ယ္ထားမွု
Luk 6: Olulumo-Ikom
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
©️2024 Luke Initiative for Scripture Translation