Matyo 5
5
Jesu na wa̰y ɓla tɨ nan sul
Luk 6.12-13, 20
1Gorne Jesu ləg bi ne gɨna, ər ɗɔl ər ti tɨ nan sul la ər bi tɨ wa̰y edɨ hina tɨ ər ndɔ, 2la ər ɗolɔ tɨ gɨ a mum ne ɓla:
3«Ndula laar gɨ bi ton ləg ndɔ ka na wa̰y lo,
kəysul Ndɨla na waan tɨ a maan!
4Ndula laar gɨ bi ne cḛy
kəysul Ndɨla ɓə a hul ɗina!
5Ndula laar gɨ bi ne jaa teni,
kəysul a ɓə nəgri ne Ndɨla so gṵ tɨ naa tina!
6Ndula laar gɨ bi ton ndula la ndu yuni tɨ mum tugla ka-a,
kəysul Ndɨla ɓə gɨ a mum ne a hul taam naa!
7Ndula laar gɨ bi ton ləg a peer jindemni,
kəysul Ndɨla ɓə a jindemni ləg la!
8Ndula laar gɨ bi ton a hul buy tɨ Ndɨla kwi,
kəysul a wo Ndɨla ləg!
9Ndula laar gɨ bi ton taam lapya
kəysul a ɓə a soon Ndɨla ɓimi!
10Ndula laar gɨ bi ton a ka-a jindemni, kəysul a ka wa̰y tugla tɨ Ndɨla kwi,
kəysul Ndɨla waan tɨ a maan!
11Ndula laar tɨ i maan gorne a ɓurum i la, a wur i jindemni la, a ja jaa ɓijim lɔ dɨbla tɨ i sul kəysul yḭ ko ən hul. 12Yḭ ka ndula laar la yḭ ti tɨ laar ɗəng hul la, kəysul i wa̰y tɨ daa sul ɓə tɨm ɗəng tɨ ndɨlasul. Kəysul tɨ i kwi toni kaw a wur nebi-a jindemni kuna ne la.»
Ɓɔ tɨ nəgri sul la un ndeeri tɨ dunya̰ la
Mrk 9.50; Luk 14.34-35
13«Yḭ tɨ ɓɔ tɨ nəgri sul. Jo gorne ɓɔ lor lo gɨna, kəyjo wo ɓə na ər kar ta ər ɓə duga lura cam a? Ər wag wa̰y lo lɛ, ti tɨ ɗoli tɨ bayri nɨ bi ɓə nangni jo ngoy.»
14«Yḭ tɨ un ndeeri tɨ bi tɨ dunya̰ maan. Lɔr ɗəng ne ti tɨ nan sul tɨ ndal lɛm ndula waal lo. 15Gorne wo kay lampa laa, duga ər kubgɨ sul na kwari cam a? A wur tɨ sɔgɨ ndɔ tɨ ndal nɨ ndeeri mum gun ne tɨ li hul. 16Kuna ne, i wa̰y tɨ kar ka ndeeri tɨ bi kwi ka a ləg gɨna, a ɓə i ba ne wo tɨ ndɨlasul pi teen.»
Wa̰y ɓla tuna gṵ hul sul
17«Yḭ ka ilgɨ ɓə ən hina gṵ hul ne a kya̰ tɨ maktub hul la, nebi-a na jaa ne a ja yuga lo, lɛ tɨ a mu humna jo. 18Kəysul, tɨ kuri, ən ja gɨ i tɨ bayri, toni barita ndɨlasul la, nəgri sul ne ɓə ɗira, wo ɓə lɛm jaa ji ɓa̰ in jul tɨ Ndɨla na gṵ hul lo marway tɨ mum mu tɨ tong. 19Nejo, wo ne ɓaw Ndɨla na gṵ hul gun lɛ ər nɨm ne ɓa̰ in tɨ peer daan la ər ɓla gɨ ər peer nɨ a ka kuna ər no̰ gɨna, ər ɓə bi lɔ tong tɨ Ndɨla waan hul. Lɛ wo ne ka Ndɨla gṵ hul na ul mu la ɓla gɨ peer ka a ka kuna ər no̰, ər ɓə tɨm wo ɗəng tɨ Ndɨla waan hul. 20Kəysul ən ja gɨ i, jo gorne yḭ oy gɨ Ndɨla gṵ hul ura bi tɨ gṵ hul ɓla la Parisyḛ-a lo gɨna, yḭ ɓə wur tɨ Ndɨla waan tɨ ndal pi hul lo bad.»
Wa̰y ɓla tuna hul laa sul
21«Yḭ laa ɓə a ja gɨ i kəgɨ ɓə: “Ka wo humna lo, wo ne hun paa gɨna, a ɓə jaa tungni tɨ ər sul.” 22Lɛ yin, ən ja gɨ i: Wo ne ka hul laa tɨ ər ɓun sul gɨna, a ɓə jaa tungni tɨ ər sul. Wo ne ja gɨ ər ɓun ɓə: “Əm tɨ siri!” Juyb-a na bi nii ɓə jaa tungni tɨ ər sul, wo ne ja gɨ ər ɓun ɓə: “Əm tɨ wo hool!” A ɓə ər ɗula tɨ laa ne uy lo. 23Jo gorne əm hina na wa̰y tɨ gɨ Ndɨla naa tɨ un tɨ hima ɓina, lɛ əm ho̰ni jani ɓə əm ɓun na jaa na əm gɨna, 24nɨm əm wa̰y tɨ gɨ Ndɨla naa tɨ un tɨ hima ɓina le, si əm kaaw əm jaa na əm ɓun barita əm duga əm hina əm naa əm wa̰y gɨ Ndɨla naa.
25«Jo əm na jaa na wo gɨna, əm kaaw əm jaa toni na ər tɨ ul sul barita əm an tɨ bi tɨ jaa tungni kwi. Bla lo gɨna, ər ɓə əm wur tɨ wo tɨ jaa tungni daa nɨ ər ɓə əm wur tɨ əli daa nɨ a ɓə əm ɗula tɨ dangay. 26Ən ja gɨ əm tɨ bayri, jo əm səng əm hula ɗad-ɗad lo gɨna, əm ɓə wag tɨ dangay ne hul lo.»
Wa̰y ɓla tuna juna sul
Mat 18.8-9; Mrk 9.43,47-48
27«Yḭ laa ɓə a ja gɨ i kəgɨ ɓə: “Ka juna kar lo” 28Lɛ yin ən ja gɨ i: Wo ne ləg ər paa na ii la ər ndɨnga ər, ka juna na ər tɨ ər nirimu teni. 29Jo tɨ əm ji taal tɨ lɨma jo ɗo əm tɨ ɓijim hul gɨna, əm jul ər teni. Kəysul əm ndula taal ɓudu na yunga golgo ura əm ndula gun na wur tɨ laa ne uy lo. 30Jo tɨ əm daa taal tɨ lɨma jo ɗo əm tɨ ɓijim hul gɨna, tḭ ər əm ɗo ər ɓag teni. Kəysul əm ndula taal ɓudu na yunga golgo ura əm ndula ya̰m gun na wur tɨ laa ne uy lo daan.»
31«Yḭ laa toni ɓə: “Wo ne kun ər ii gɨna naa gɨ ər maktub tɨ ii kun.” 32Lɛ yin, ən ja gɨ i: Jo wo kun ər ii jo gorne ii ne taam ɓər jak lo gɨna, ər ɗo ər tɨ juna hul, la wo ne ko ii ne ər paa kun ka juna la.»
Wa̰y ɓla tuna mu maar sul
33«Yḭ laa a ja toni gɨ i kəgɨ cam ɓə: “Ka əm gṵ yɛr tɨ əm mu maar sul lo lɛ, əm ka wa̰y ne əm maar əm mu tɨ kar tɨ Baali Ndɨla kwi.” 34Lɛ yin gɨna ən ja gɨ i tɨ bayri, yḭ ka i mu maar lo bad-bad. Yḭ ka i mu maar na ndɨlasul lo kəysul tɨ Ndɨla na goblə, 35Əm ka əm mu maar na nəgri sul lo, kəysul tɨ ər un tɨ ɗa̰y kay, əm ka əm mu maar na Jerusalɛm lo, kəysul tɨ wa̰ay ɗəng na lɔr. 36Ka əm mu maar na əm sul lo, kəysul əm lɛm əm sul ɓwḭ ɓudu bujum kar lo, la ɗoyri kar lo la. 37Jo əm ko əm mu m tɨ jaa sul gɨna, ka ti m, jo tɨ m-m gɨna, ka ti m-m la. Kəysul ne əm wo ɗula tɨ paa sul tɨ pla o̰ tɨ Sidan ndɔ.»
Wa̰y ɓla tuna ɓijim səng sul
38«Yḭ laa toni a ja gɨ i ɓə: “Jo wo jul əm ji gɨna, əm jul ər maan la. Jo wo jul əm ɗəngni a, əm jul ər maan la.” 39Lɛ yin ən ja gɨ i: Ka ɓijim səng gɨ wo lo. Jo wo ɗɨb əm tɨ əm tɛm taal tɨ lɨma gɨna, yiga gɨ ər taal tɨ gɨlay ka ər ɗɨb cam. 40Jo gorne wo si na əm tɨ un tɨ jaa tungni tɨ əm ngɔmi kula gɨna, nɨm gɨ ər əm sər ɗəng ka ər ko la. 41Jo wo par əm na dwari ɓə əm ka kelengɨ ɓudu gɨna, əm si na ər kelengɨ tɨ ndidi. 42Jo wo ɓiri əm wa̰y gɨna, əm naa gɨ ər, la jo wo hina ɓiri wa̰y tɨ əm daa gɨna, ka gɨ ər kway lo la.»
Paa tɨ pɛni kumkar
Luk 6.27-28,32-36
43«Yḭ laa toni a ja ɓə: “Yḭ ka i ɓungɨ kum lɛ yḭ koor i peer tɨ pɛni.” 44Lɛ yin, ən ja gɨ i: Yḭ ka i peer tɨ pɛni kum la yḭ soon Ndɨla gɨ bi tɨ i jindemni wur. 45Tɨ in jo yḭ ɓə tɨm ī Ba ne ti tɨ ndɨlasul na ɓimi. Kəysul ər wag ər lula tɨ bi tɨ ɓijim sul la bi tɨ ɓari sul la. Ər ka ndɨla nɨ yo̰y tɨ bi tugla sul la, tɨ bi tugla lo sul la. 46Jo yḭ ka bi ton ka i kum jo gɨna, kəy wa̰y tɨ daa sul jo yḭ ɓə tina a? Bi tɨ lambo tay ne tɨ bi tɨ ɓijim kar kaw a ka kuna paa ne lo a? 47Jo yḭ ka i ɓungɨ ngoy lapya gɨna, kəy wa̰y ne ura paa jo yḭ ka a? Bi tɨ Ndɨla una lo kaw a ka kuna paa ne la. 48I ti bi ndeeri kuna i Ba ne ti tɨ ndɨlasul tɨ wo ndeeri la.»
လက္ရွိေရြးခ်ယ္ထားမွု
Matyo 5: nie
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2023, ATALTRAB