Matiye 6
6
Ɓɛ̀ nìkherà sĩinírɔ́ bòo
1«Mì pɛ mite bòo! Mí ɓen mí bè mì Dɔfĩn wṹn, ɛ̀ mì bí wóo zɛ̃́ní míte ɛ̀ ɓɛ̀ nìnbirìe ɓɛ́kùi ɛ̀ mi wɛ̀. Kɛ́ dàa bòo mí, ɛ́ mí yá yí sàanín mì Yàá Dɔfĩn lɛ wi hɔ hóohũn viì wɛ̀. 2Ɛ́ kɔ́ ɓen kɔ hɛ̃ nìkherà àá bòo, ɛ̀ kɔ̀ bí yen hɔ̀ ǹ nɛ ɓɛ nìnbirìe ɓɛ́kùi ɛ̀ ɲí, kɛ̀a bòo lɛ ɛ́ ɓɛ́ nìhĩ́dériè ɛ́ dàa wóò wé hɔ́ ɓɛ́ ńkóoɓánlɔ̀n zĩhĩ́ɛ hũn àá hɔ́ fɔ́hĩ́ hũn. Ɓɛ̀ wóò wé hɔ́ bòo lɛ ɛ́ wé ɛ̀ ɓɛ̀ nìnbirìe ɛ̀ ɓàaní ɓà ǹ. Ɛ́ nin bie hɔ lɛ́ miɛ ǹ àá bɔ̀bín nɛ ɓɛ iè pe wo yú ɓɛ́ sàanín vɔ́. 3Kɛ́ kɔ́ ɓen kɔ hɛ̃ nìkherà àá bòo, ɛ̀ kɔ̀ bí lɛ́ nɛ kɔ ńmiinín núnú ɛ̀ dũń hɔ́ bòo lɛ ɛ́ kɔ́ ńdóonín ɛ́ wé wɛ̀. 4Ɛ́ kɔ́ wóo tànkɔ̀ní kɔ́ hɛ̃mù bòo ɛ̀ lɛ́, ɛ́ mì Yàá lɛ loo hɔ bòo lɛ tànkɔ̀niɛ ɛ́ lɛ́ pehɔ̀ sàanín kɔ ǹ.»
Dɔfĩn hɛ̃nnɛ̀ bòo
Lik 11.2-4
5«Mí ɓen mii hɛ̃un Dɔfĩn, ɛ̀ mì bí wóo wé kɛ̀a ie ɓɛ nìhĩ́dériè wɛ̀. Ɓɛ̀pe ɛ́ wɛ bòo lɛ wóò vɛ dìń ɛ̀ ɓɛ̀ hɛ̃un ɓɛ́ ńkóoɓánlɔ̀n zĩhĩ́ɛ hũn àá hɔ́ wṹuhɛ̃ ɲihĩ́ɛ ɛ̀ dàá zɛ̃́ní ɓɛ́te ɓɛ̀ nìnbirìe ǹ. Ɛ́ nin bie lɛ́ miɛ ǹ àá bɔ̀bín nɛ ɓɛ yú ɓɛ sàanín vɔ́. 6Kɛ́ Kɔ́pe, kɔ́ ɓen kɔ hɛ̃un Dɔfĩn, ɛ̀ kɔ̀ vɛ zɔ kɔ zũ-bɔ́nú hũn, ɛ̀ kɔ̀ híɛ kɔ́ zĩínù ɲunù, ɛ̀ kɔ̀ tànkɔ̀ní hɛ̃un mì Yàá Dɔfĩn, ápe mì Yàá Dɔfĩn lɛ loo hɔ bòo lɛ tànkɔ̀niɛ ɛ́ ɓén lɛ́ sàanín kɔ̀ ǹ.
7Mí ɓen mii hɛ̃un Dɔfĩn, ɛ̀ mì bí wóo dìń tĩ̀iní hɔ́ biehĩ́ bɔ̀kuì kɛ̀a iè ɓɛ nìnbirìe lɛ ɛ́ yí bè Dɔfĩn wṹn wɛ̀. Ɓɛ̀pe ɛ́ wóò líi ɛ̀ ɓɛ̀ nɛ ɓɛ́ ɓen ben-kuì ɛ̀ bie ɛ́ Dɔfĩn ɛ́ den ɛ́ lɛ́ hɔ́ bòo lɛ ɛ́ ɓɛ́ ɛ́ cɛ̀ ɓà ǹ. 8Mì bí wóo wé kɛ̀a ɓɛpe wɛ̀, iè hɔ̀ lɛ ɛ́ mì Yàá Dɔfĩn ɛ́ sɛ̃̀nɛ́hã̀ dũ hɔ bòo lɛ ɛ́ bòo hie miɛ ǹ kɛ́ mí yɛ̀rɛ́ ɲɛùn yí hɛ̃un hɔ̀ piè viì wɛ̀. 9Ɛ́ mí ɓen mii hɛ̃un Dɔfĩn, ɛ̀ lɛ iè hɔ̀ bòo lɛ ɛ́ mí sãawi ɛ̀ mì wóo bie:
“Kìe Yàá lɛ yòó wi hɔ hóohũn,
Lɛ́ nɛ ɓɛ nìnbirìe ɛ̀ dũń kɛ́ kɔ́ iè Dɔfĩn lɛ ɛ́ ce.
10Lɛ́ nɛ kɔ bɛ́záanú ɛ̀ ɓen síɛ;
Lɛ́ nɛ kɔ tĩì bòo ɛ̀ wé lé sṹsùnù,
Kɛ̀a bòo lɛ ɛ́ hɔ́ dàa yòó van ɛ́ wé hɔ́ hóohũn.
11Lɛ́ ké sítĩnlɔ́ àá sítĩnlɔ́ ɲunù dínlɔ́ kiè ǹ hɔ̀pe zoòni lɛ.
12Dé ké bɔ̀koohɛ̃ sɛ́wɛ́ri ɛ̀ lɛ́ kiè ǹ,
kɛ̀a bòo lɛ ɛ́ ké dàa ɓiɛ̀ ɛ́ wóò dé sɛ́wɛ́ri ɛ̀ lɛ́ ɓɛ́lɛ ɛ́ wɔ́ khɔn àá kie.
13Bí fùansí kiè ǹ hɔ̀ hàanírɔ́ hũn,
kɛ́ kɔ́ leń kie ɛ̀ lí-e Sitũanɛ núnú hũn.
[Iè hɔ̀ lɛ ɛ́ kɔ́pe iè pe ɛ́ lé bɛ́záanú àá hɔ̀ pànkɛ́ àá hɔ́ ɓàarɔ́ ɛ́ bòo sɛ̃̀ nin lɔ́líe lɛ yá vé hũn. Amiina.]”
14Kɛ́ mí ɓen ɛ́ wóò dé sɛ́wɛ́ri ɛ̀ lɛ́ ɓɛ́ lɛ ɛ́ wɔ́ khɔn àá miɛ, ɛ́ mì Yàá lɛ yòó wi hɔ hóohũn ɛ́ ɓiɛ̀ ɛ́ dé sɛ́wɛ́ri ɛ́ lɛ́ miɛ ǹ mì bɔ̀koohɛ̃ bòo hũn. 15Kɛ́ mí ɓen ɛ́ yáà dé sɛ́wɛ́ri ɛ̀ lɛ́ ɓɛ́ lɛ ɛ́ wɔ́ khɔn àá miɛ, ɛ́ mì Yàá Dɔfĩn ɛ́ ɓiɛ̀ yá dé sɛ́wɛ́ri ɛ́ lɛ́ miɛ ǹ wɛ̀.»
Lè ɲunù lìnlɔ́ bòo
16«Mí ɓen ɛ́ lù mì ɲihĩ́ɛ ɛ̀ mì bí wóo yáakɛ mí híɛhɛ̃ kɛ́a bòo lɛ ɛ́ ɓɛ́ nìhĩ́dériè ɛ́ dàa wóò wé hɔ́ wɛ̀. Ɓɛ̀ wóò maaníkɛ ɓɛ́ híɛhɛ̃ ɛ̀ dàá zɛ̃́ní kɛ́ ɓɛ́ lù ɓɛ́ ɲihĩ́ɛ. Nin bie hɔ lɛ́ miɛ ǹ àá bɔ̀bín nɛ ɓɛ ɛ́ yú ɓɛ́ sàanín vɔ́. 17Kɛ́ kɔ́pe, kɔ́ ɓen lù kɔ̀ ɲunù, ɛ̀ kɔ̀ tiɛ kɔ́ yìe, ɛ̀ kɔ̀ zínkɛ kɔ ɲún, 18ɛ̀ ɓɛ̀ nìnbirìe ɛ̀ dàá bí dũń kɛ́ kɔ́ lù kɔ̀ ɲunù, kɛ́ mì Yàá Dɔfĩn lɛ wi le viì lɛ tànkɔ̀niɛ hũn ɛ́ ɓen bòo mí. Ɛ́ mì Yàá lɛ loo hɔ bòo lɛ tànkɔ̀niɛ ɛ́ ɓén lɛ́ sàanín kɔ̀ ǹ.»
Hóohũn yírɛ́ bòo
Lik 12.33-34
19«Mì bí wóo cɛ̀ yírɛ́ ɛ̀ kóo ɓánlɔ̀n bìsí mí bòo hũn lépe dímíɲɛ́ sɔ lɛ hũn wɛ̀. Hɔ̀ iè yán ɛ́ ɓɛ́ bɛ̃̀nlɔ́ àá ɓɛ́ ńcɛ̃́bṹa lɛ wóò yáakɛ hɔ bòo ɛ́ wi hũn, ɛ̀ hɔ̀ lò iè yán ɛ́ ɓɛ́ kɛ̃̀múa ɛ́ wóò háakɛ hɔ zĩínù ɲihĩ́ɛ ɛ̀ dàá zɔ kɛ̃̀mɛ́kɛ hɔ́ bòo. 20Kɛ́ mí cɛ̀ hɔ̀ yírɛ́ ɛ̀ kóo ɓánlɔ̀n bìsí mí bòo hũn hɔ̀ hóohũn, hɔ̀ iè yán ɛ́ ɓɛ́ bɛ̃̀nlɔ́ àá ɓɛ́ ńcɛ̃́bṹa lɛ wóò yáakɛ hɔ bòo ɛ́ mí hũn wɛ̀; ɛ̀ hɔ̀ lò iè yán ɛ́ ɓɛ́ kɛ̃̀múa ɛ́ yáà háakɛ hɔ zĩínù ɲihĩ́ɛ ɛ̀ dàá zɔ kɛ̃̀mɛ́kɛ hɔ bòo wɛ̀. 21Iè hɔ̀ lɛ ɛ́ lé viì lɛ ɛ́ kɔ́ yírɛ́ wi hũn iè pe ɛ́ kɔ́ tĩì ɓiɛ̀ wóò wé hũn.»
Hɔ̀ tɛkɛ̀a ńpiemu bòo
Lik 11.34-36
22«Lè yìi ɛ́ iè hɔ̀ tɛkɛ̀a pɛ̃̀ntĩ́ní. Kɛ́ kɔ́ yìi ɛ́ ɓen dɛ̃̀ sãa, ɛ́ kɔ́ tɛkɛ̀a míkùi ɛ́ kań ńpiemu hũn. 23Kɛ́ kɔ́ yìi ɛ́ ɓen yí dɛ̃̀ sãa, ɛ́ kɔ́ tɛkɛà míkùi ɛ́ kań síbínú hũn. Kɛ́ hɔ́ ńpiemu lɛ wi kɔ ǹ ɛ́ khũ̀a wɔ́ síbínú, ɛ́ hɔ́ síbínú sɔ ɛ́ wookɛ ɛ́ kań cɛ̃̀un lò!»
Dɔfĩn tàá màa
Lik 16.13
24«Nìnbírɔ ɛ́ yí dɛ̀ ɲúuhɛ̃ siè bìɛ ɲu tɔnlɔ́ ɛ́ yá páaní tɛ́ wɛ̀; iè hɔ̀ lɛ á ɓén hán ɔ́dɔ̀, à ɛ́ wɛní-ɛ dɔ̀. Tàá à ɓén cɛ ɓán àá ɔ́dɔ̀, à pĩ́-ɛ dɔ̀ bòo. Ɛ́ mí yí dɛ̀ Dɔfĩn àá màa tɔnlɔ́ ɛ́ yá páaní ɛ́ tɛ́ wɛ̀.»
Mì dɛsĩ̀ Dɔfĩn
Lik 12.22-31
25«Ɛ́ sí iè hɔ̀pe ɛ́ ń dàa nɛ mi bí wóo hìeníkɛ mi kuò hɔ̀ dìnlɔ́ àá hɔ́ bɔ̀ɲuriè lɛ ɛ́ mí mɛ̀kóo ɛ́ wi nin ɛ̀ dàá yí kań le mɛkɛnì hũn wɛ̀; ɛ̀ mì lò bí wóo hìeníkɛ mi kuò hɔ̀ tĩ̀ɛ lɛ ɛ́ mí wóo mii zɔ bòo hũn wɛ̀. Iè hɔ̀ lɛ ɛ́ lé mɛkɛnì ɛ́ bòo hie pɔ hɔ́ dínlɔ́, ɛ̀ hɔ̀ tɛkɛ̀a ɛ́ lò bòo hie pɔ hɔ́ tĩ̀zɔriè lò! 26Mì húi ɓɛ́ ńɲíizàani: ɓɛ̀ yáà zì bòo ɛ̀ ɓɛ̀ yáà mìí bòo, ɛ̀ ɓɛ̀ lò yáà khui bɔ̀díe zɔ kóo hɔ́ náa hũn wɛ̀. Kɛ́ mì Yàá lɛ yòó wi hɔ hóohũn ɛ́ wóò díiní ɓɛ́. Ɛ́ mi biè sũǹ bòo yí tṹ ɓɛ́ ńɲíizàani? 27À iè wieni mì tĩ́ihṹ ɛ́ temu dɛ̀ mí mɛkɛ̃nì ɛ́ vɛ́ viɛní híɛhɔ́ fĩ́i àá mí kɔhìé?»
28«Ɛ́ hɔ́ wo iè ńɓùo ɛ́ mí dàa mì kòo ɛ̀ hìení hɔ̀ tĩ̀zɔriè bòo hũn? Mì húi hɔ́ mɛhɛ̃ ńmuunín bòo lɛ ɛ́ hɔ́ dàa wóò síɛ sɛ̀: hɔ̀ yáà tɛ́ tɔnlɔ́, ɛ̀ hɔ̀ yáà maà ńkúandí wɛ̀. 29Kɛ́ ń den nin bie lɛ́ miɛ ǹ, nɛ hɛ̀rí Salomɔn àá mí bòo dàarɔ́ míkùi ɛ́ pɛ́ yí zɔ tĩ̀ɛ lɛ sãa ɛ́ yú hɔpe ńmuunín sɔ dɔ̀ ǹ wɛ̀. 30Kɛ́ Dɔfĩn ɓen wóò lɛ́ ɛ̀ hɔ̀ mɛhɛ̃ ńɲíini ɛ̀ sãàní kɛ̀amu, hɔ̀pe ńɲíini lɛ ɛ́ wi yán zoòni kɛ́ yìrí ɛ̀ hɔ̀ dṹn ɛ́ ɓén cĩ̀ní hɔ́, ɛ̀ mì dũń sãàní kɛ́ Dɔfĩn ɓén húi mí bòo lò. Mì ńdɛsĩ̀nlɔ́ ɛ́ hɛ̀ mìniɛ! 31Ɛ́ mí bí wóo hìení mí kuò ɛ̀ mì bie nɛ: “Hɔ̀ iè ńɓùo ɛ́ ké wóo ke dí? Hɔ̀ iè ńɓùo ɛ́ ké wóo ke ɲu? Hɔ̀ iè ńɓùo tĩ̀ɛ ɛ́ ke wóo ke yí zɔ?” 32Ɓɛ̀ iè ɓɛ̀ nìnbirìe lɛ ɛ́ yí bè Dɔfĩn wṹn ɛ́ temu wóò cɛ ɓɛ́ kuò pehɔ̀ cànlɔ́ hũn. Kɛ́ mì Yàá Dɔfin lɛ yòó wi hɔ hóohũn ɛ́ dũ kɛ́ mí mɛ̀kóo ɛ́ wi hɔ̀ ǹ. 33Dɔfĩn bɛ́záanú àá hɔ́pe cã̀anírɔ́ iè pe ɛ́ mí cɛ mi kuò ɛ̀ cɛ̀ vé, ɛ́ hɔ́pe Dɔfĩn ɛ́ ɓiɛ̀ ɓén lɛ́ hɔ́pe sí kɛ́ míkùi miɛ ǹ ɛ́ sĩiní. 34Ɛ́ mí wo bí nɛ mi kuò ɛ̀ hè yìrí bòo hũn wɛ̀; iè hɔ̀ lɛ hɔ́ yìrí ɛ́ ɓén húi míte bòo míte ǹ. Dúrɔ sítĩnlɔ́ àá mí lɔ̀nbiè.»
လက္ရွိေရြးခ်ယ္ထားမွု
Matiye 6: bwj
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2023 L’Association Nationale pour la Traduction de la Bible et l’Alphabétisation