Matiye 3
3
Zãn Batiisi bòo lɛ á ɛ́ buie
Mar 1.1-8; Lik 3.1-18; Zãn 1.19-28
1Ɛ́ pehɔ̀ yìi hũn, á Zãn Batiisi ɛ́ síɛ hĩ́nà lè Zudee ńɲiherà hũn, ɛ́ lè Dɔfĩn bienù ɛ̀ buie, kɛ́ à bie ɛ́ nɛ#3.1 Zãn Batiisi iè ɔ̀pe Zãn lɛ wóò líikɛ ɓɛ nìnbirìe hɔ̀ ɲumu hũn. làa: 2«Mì zɛ̀ní mí tĩɛ̀ ɛ̀ mì fùansí hɔ́ bɔ̀koohɛ̃ wénlɔ́ ǹ, iè hɔ̀ lɛ ɛ́ lé Dɔfĩn bɛ́záanú ɛ́ ɓɛrɛ lúwi.» 3À Zãn Batiisi iè ɔ̀pe lɛ á Dɔfĩn bɔ̀háanírɔ Ezayi ɛ́ hàarí bie bòo ɛ́ nɛ làa:
«Nùún dɔ̀ tɛmu ɛ́ tɛ̀ lè ńɲiherà hũn ɛ́ nɛ làa:
Mì wóokɛ á Ɲunsɔ wṹn,
Mì niiníkɛ piè wṹ-cĩ́ni.»
4Á Zãn pɔnkɔ̀rɔ́ lɛ á hàarí zɔn ɛ́ hàarí wɔ́ àá ɲúkũ̀mí dũuni, ɛ̀ piè khìrí lɛ á hàarí can mí kuò hũn ɛ́ hàarí iè sɛ̃́hṹ khìrí, ɛ̀ piè díe ɛ́ hàarí iè ńhɛ̃mɛ̀ àá kũuhɛ̃ tɔ̀rɔ́. 5Ɛ́ nìnbí-kuì ɛ́ hàarí ɛ́ ɓen àá piè viì: hɔ̀ Zerizalɛɛmu lóo nìɛ àá hɔ́ Zudee pɛ̃̀hɛ̃ nìɛ àá ɓɛ́pe nìɛ lɛ ɛ́ wi le vṹn lɛ ɛ́ ɓɛ́ wóo nɛ Zurudɛ̃n ɲunù. 6Ɓɛ̀ hàarí wóò ɓen bie ɓɛ́ bɔ̀koohɛ̃ bòo ɓɛ̀ nìzã̀amáa yìe hũn, à Zãn ɛ̀ khíi líiníkɛ ɓɛ hɔ̀ Zurudɛ̃n ɲumu hũn.
7Ápe Zãn ɛ́ mi húi ɛ̀ ɓɛ̀ Farizĩɛɓɛ àá ɓɛ́ Sadusĩɛɓɛ nìnbí-kuì ɛ́ ɓen àá piè viì, à líiníkɛ ɓɛ hɔ̀ ɲumu hũn. Á zɔn bie lɛ́ ɓà ǹ nɛ làa: «Mìpe ńkĩnlɛ̀a nìɛ lɛ! À iè wie te miɛ bɔ́ nɛ mí dɛ̀ ɛ́ zè ɛ̀ mì ɛ́ kɛ́ lé Dɔfĩn tĩcĩ̀nín lɛ vaá-ɓen? 8Ɛ́ mí lɛ́ nɛ mi bɔ̀werà ɛ̀ zɛ̃́ní kɛ́ mí zɛ̀niɛ mì tĩɛ̀. 9Ɛ̀ mì bí wóo bie nɛ hɔ lɛ á Abarahaamu iè mì zĩkĩ́n, ɛ́ hɔ́ wo ɓaa wɛ̀. Ɛ́ nin khɛ́ hɔ́ lɛ́ miɛ ǹ nɛ Dɔfĩn dɛ̀ ɛ́ lɛ́ ɛ́ hɔ́pe sɛ̃̀nlɛ̀a lɛ ɛ́ mí loo ɛ́ wé Abarahaamu hũn nìɛ. 10Lè pupuiè ɛ́ sɛ́sɛ́a vɔ́, ɛ́ mii ɓúukɛ hɔ vɛ̃̀hɛ̃ ɛ̀ síɛ vɛ líi pehɔ̀ nɛhĩ́ ǹ. Ɛ́ vɛ̃̀hṹ yée vɛ̃̀hṹ lɛ yáà hɛ biè lɛ sãa ɛ́ ɓén ɓúu ɛ́ khíi tɛ́ dé hɔ́ dṹn hũn. 11Ǹpe ɛ́ mì líiníkɛ hɔ ɲumu hũn ɛ̀ dàá zɛ̃́ní kɛ́ mí tĩɛ̀ ɛ́ zɛ̃̀niɛ. Kɛ́ ádɔ̀ ɛ́ vaá-ɓen niǹ máahṹ, ɓàasɔ ɛ́ pànkɛ́ wi pɔ mi. Ɛ̀ niǹ ɲún yɛ̀rɛ́ kɛ fĩ́i ɛ̀ ǹ síɛ hankɛ piè naahĩ́. Ápe ɛ́ te miɛ ɓén tíiní àá Mɛkɛ̃n-Sãanu, à ɛ́ líiníkɛ miɛ hɔ̀ dṹn hũn#3.11 Vɛ kɛ̀rán Bɔw 2.1-13. 12À dàa mí bòo viɛlán mí núnú hũn, à ɓén tàa mí toohɔ́ à ɛ́ víɛ mí bòo, à ɛ́ khui hɔ bɔ̀díe ɛ̀ vɛ kóo mí nɛ́nlé hũn, ɛ̀ hɔ̀ ńɲɛ́nkɛ̃́hĩ́ á khui ɛ́ vɛ cĩ̀ní hɔ́ dṹn lɛ yáà hí hũn.»
Yiezu ńlíiníɲumu bòo
Mar 1.9-11; Lik 3.21-22; Zãn 1.32-34
13Ɛ́ Yiezu ɛ́ van lɔ́ hɔ́ Kalile pɛ̃̀hɛ̃ hũn ɛ́ ɓɛrɛ lè Zurudɛ̃n vṹn ɲunù, ɛ́ ɓen yú-o Zãn ɛ́ nɛ a líiní mí hɔ̀ ɲumu hũn. 14Ɛ́ Zãn ɛ́ pɛ̃́ à ɛ́ nɛ làa: «Hɔ̀ iè kɔ̀pe temu sãawi ɛ̀ kɔ̀ líiní mi hɔ̀ ɲumu hũn ɛ́ kɔ́ pɛ̃́ ɛ̀ kɔ̀ bĩniɛ ɓɛrɛ nɛ ǹpe teń kɔ líiní hɔ́ ɲumu hũn?» 15Ɛ́ Yiezu ɛ́ zɔn kɔ̃́niɛ ɔ̀ nɛ làa: «Kɛ̀a sáalɛ, ɛ́ kɔ́ fùansí nɛ hɔ wé kɛ̀amu. Iè hɔ̀ lɛ ɛ́ ké sãawi ɛ̀ kè wé kɛ̀amu, ɛ̀ Dɔfĩn bòo lɛ ɛ́ hɔ́ wɛ míkùi ɛ̀ dàá ɲunù ɛ̀ tí.» Ɛ́ Zãn den wo tɛ̀ nɛ mii líiní-ɛ hɔ̀ ɲumu hũn. 16Ɛ́ hɔ́ lɛ á Zãn ɛ́ líiniɛ ɔ̀ Yiezu vɔ́, Ɛ́ Yiezu yòó lɔ́ hɔ́ ɲumu hũn. Ɛ́ mí laà hũn, ɛ́ hɔ́ hóohũn yòó hɛ́rɛ, á mɔn lè Mɛkɛ̃n-Sãanu kɛ́ Lé yòó lɔ́ hɔ́pe hóohũn ɛ́ síɛ piè lɔ̀n kɛ̀a ńmɛǹɓóohṹ bòo sí. 17Ɛ́ hɔ́ tɛmu dɔ̀ ɛ́ yòó tɛ̀ hɔ̀ hóohũn ɛ́ nɛ «Àlɛ iè niǹ Zuú lɛ ɛ́ ń wɛ àá niǹ tĩì míkùi, ń wɛ niǹte cɛ̃̀un piè bòo hũn.»
လက္ရွိေရြးခ်ယ္ထားမွု
Matiye 3: bwj
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2023 L’Association Nationale pour la Traduction de la Bible et l’Alphabétisation