Дила 5
5
Э Анания тай э Сапфира
1Екх мануш, савэско нав Анания, екхетханэ пэ ромняса э Сапфираса, бикиндяс по мангин 2тай паи э ловэнго мукляс пумэнги. Лэски ромни джянэлас адалэстар. Ай со ачило, ов андяс тай тхэдяс ко пинрэ ки апостоленги. 3О Пётар пхэнляс лэски:
— Анания, соски муклян э Сатанас андэ тэ илэстэ, пхэнлян начячипэ э Шужэ Духоски тай гаравдян туки андар ловэ ки ливадяки? 4Вай э пху джи одолэски, сар ту ла бикиндян, сас тинри, тай о ловэ, савэ лаки лилян, си тинрэ. Соски ту тюшундын асавко? Ту пхэнлян начячипэ на э манушэнги, ами э Дэвлэски.
5Сар о Анания шунляс адала зборэс, ов пэло, диняс по тынышы. Алаи, кон шунляс адалэстар, лачес трашанилэ. 6Пашылэ тэрнэ мануша, пакярдэ лэско тэни, никалдэ тай пароскердэ.
7Тринэ сагатендар али лэски ромни. Ой ништо на джянэлас, со уло. 8О Пётар пхучляс ла:
— Пхэн манги, тумэ тэ ромэса асавки кими бикиндянус э ливади?
— Ва, — пхэнляс ой, — асавки.
9О Пётар пхэнляс лаки:
— Со адава тумэ зборисаилянус тэ зумавэн о Духос э Сагбуско? Ту шунэс, кай пхерэн паш удар? Адава авэн одола, савэ пароскердэ тэ ромэс. Он ли тут кан никалэн.
10Тай одова сагати ой пэли лэски пинрэндэ тай диняс по тынышы. Тэрнэ мануша алэ, дикхлэ ла муля, никалдэ ла тай пароскердэ ла паш ко ром. 11Алаен э кхангерен тай алаи э манушэн, кон адалэстар шунляс, лиляс бари траш.
О сикаиматэс тай о чюдэс
12Андар васта ки апостоленги андэ дюняс кердёлас бут сикаиматэс тай чюдэс. Алаи о пакялэ кидэнаспэс екхетханэ андэ колоннада ки Саламонески. 13Тай авэра мануша трашанас тэ овэн паш лэндэ, ай о дюняс лэн бут гинэлас. 14Одолэн, кай пакян э Сагбуски, овэнас май бут тай бут, ли э муршэн, ли э джювлен. 15О мануша никалэнас аври э насвалэн, тхэнас лэн опэр насилкес тай матразя, хоч о тени э Пётарэско тэ пэрэл опэр лэндэ, кана ов кан накхел пашал. 16Тай андар диза, кай сас паш ко Иерусалими, авэнас бут дюняс. Он анэнас э насвалэн тай одолэн, андэ савэндэ сас бишужэ духя, тай алаи аиндиенас.
О родипэ э апостоленго
17О баро попази тай алаи лэски мануша, савэ сас андар джемэяти ки саддукиенго, сас пхэрдэ кизгандилима. 18Он лилэ э апостолен тай пханлэ лэн андэ дюняски пханли. 19Ай рати о миляики э Сагбуско пхутэрдяс э бар э пханляки тай никалдяс лэн.
20— Джян, тэрдён андэ храми, — пхэнляс ов, — тай пхэнэн э манушэнги алаи адалэ нэвэ бэшымастар.
21Он шунлэ, алэ эртэс сабахтан андэ храми тай лилэ тэ сиклярэн.
Кана ало о баро попази тай лэски мануша, он динэ икос о Синедриони тай алаи э барэ манушэн э Израилескерэн тай бичялдэ ки пханли пал апостоля. 22Ай кана о иргатя алэ андэ пханли, он на аракхлэ лэн отхэ. Он алэ палэ тай пхукавдэ:
23— Амэ дикхлям, кай э пханляки бар лачес пханли, ай ки бар сас тэрдэ салдатя. Ай кана амэ диням андэ, амэ никхас отхэ на аракхлям.
24Кана о баро опэр храмески салдатя тай о барэ попазя шунлэ лэн, он лачес шаштылар тай на джянэнас, сар адава тэ галён. 25Дэчи кон-то ало тай пхэнляс лэнги:
— Аки, дикхен, мануша, савэн тумэ пханлянус андэ пханли, тэрдэ андэ храми тай сиклярэн э дюняс.
26Дэчи о баро опэр салдатя гело э иргатенца тай андяс э апостолен. Он би зорако лилэ лэн, вай трашанас, кай о дюняс кан марэл лэн барэнца.
27Э апостолен андэ тай тхэдэ ангал Синедриони. О баро попази пхэнляс лэнги:
28— Амэ тумэнги холяса пхэнлям тэ на сиклярэл адалэ навэстар, ай тумэ алаи о Иерусалими пхэрдянус тумарэ сикляримаса тали дошалэн керэн амэн, кай муло Адава Мануш.
29О Пётар тай авэра апостоля пхэнлэ:
— Амэ камэл бут тэ шунас э Дэвлэс, ниш э манушэн! 30О Дэл амарэ дадэнго дживиндярдяс э Исусес, Савэс тумэ илдынус опэр хачи тай мудардянус. 31Ай о Дэл ваздиняс Лэс тай бэшавдяс катар прави васт Пэстар сар Барэс тай Кутардимарес, о Израиль тэ ачявэл пэ бэзя тай о Дэл тэ апувикерэл лэн. 32Амэ адава алаи дикхлям. Тай екхетханэ амэнца о Шужо Духос, Савэс о Дэл диняс одолэн, кон шунэл Лэс.
33Кана одола, кон эсас отхэ, шунлэ адава, он холясаилэ тай манглэ тэ мударэн лэн. 34Тай дэчи ущино екх андар Синедриони, фарисеи, кай бучёлас Гамалиил, о сикляримари э Тхэдимаско, гиндо алаи э дюняса. Ов пхэнляс тэ гелэн э апостолен савэ-то вахытески. 35Дэчи ов пхэнляс:
— Израильтяня, лачес тюшундиен одолэстар, со тумэ кидэнтумэн тэ керэн адалэ манушэнца. 36На чёктан ало атхэ о Февда, кердяс пэс саво-то намлыс. Пал лэстэ гело паш ко штаршэл мануша, ай кана ов сас мудардо, дэчи алаи, кон джялас пал лэстэ, нашлэ кон кай, тай алаи быты би ништоско. 37Пал лэстэ сас о галилеяни о Иуда. Ов ало о вахыти, кана сас о яздипэ, тай гелдяс э дюняс пал пэстэ. Ли ов муло, тай лэски мануша нашлэ, кон кай. 38Оничин анкха пхэнав тумэнги: ма астарэн адалэ манушэн. Мукен лэн. Тэ си одоя дила, со манген он тэ керэн, манушыкани, ой кан пэрэл. 39Тэ си ой катар Дэл, тумэ нащи лэн кан тэрдярэн, ами тумэ кан овэн душманя э Дэвлэски.
Он пакянилэ лэски зборэнги. 40Он андэ э апостолен тай пхэнлэ лэн тэ марэн. Вай он генэ екхвар пхэнлэ лэнги тэ на пхэнэн катар нав ки Исусеско тай муклэ лэн. 41О апостоля гелэ андар Синедриони лошанэ одолэски, кай лэнца уло асавко ладжяво андар нав ки Исусеско. 42Тай кажын дес андэ храми тай андэ кхера он на тэрдёнас тэ сиклярэн тай тэ пхукавэн о Лошано Габэри катар Исус Христос.
လက္ရွိေရြးခ်ယ္ထားမွု
Дила 5: КРБ
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2021 Bible Translators of Ukraine
© 2021 Pioneer Bible Translators
This work is licensed under the Creative Commons Attribution Non-commercial No-Derivatives 4.0 license. http://creativecommons.org/licenses/by-nc-nd/4.0/