Juan 7
7
Wawqinkunapis Jesúsman mana criyiyanqan
1Tsaypitanam Galileachö kaykaq markakunapa Jesús purirqan. Israel autoridäkuna wanutsiyta munayaptinmi Judea provinciaman aywayta munarqantsu.
2Israel runakunapa Ramäda fiestanpä#Lev. 23.34; Deut. 16.13. juk ishkay junaqkunallana faltaykaptinmi 3wawqinkuna Jesústa niyarqan: <<Milagru ruranqaykita discïpuluykikuna rikayänanpä Judeaman ayway. 4Reqishqa kayta munarqa manam kayllachötsu milagruta rurankiman, sinöqa llapan runakuna rikayänanpä ruray>>.
5Jesúspa wawqinkuna payman mana criyirmi tsaynö niyarqan.
6Tsaymi wawqinkunata Jesús nirqan: <<Noqa aywanäpä manam hörä chämunrätsu. Peru qamkunam sïqa imay hörapis aywayankiman. 7Qamkunataqa runakuna manam chikiyäshunkitsu. Peru noqatam sïqa jutsayuq kayanqanta niptï chikiyäman. 8Tsay fiestamanqa qamkunalla aywayay. Noqa aywanäpä manam hörä chämunrätsu>>.
9Tsaynö nirmi Galileachö Jesús quëdarqan.
Ramäda fiestaman Jesús aywanqan
10 Ramäda fiestaman wawqinkuna aywaskiyaptinnam Jesúspis pakakuyllapa aywarqan. 11Fiestachö Jesústa ashirpis mana tarirmi Israel autoridäkuna niyarqan: <<¿Maychörä tsay runa kaykan?>>
12Jerusalénchö qorikaq wakin runakunam niyarqan: <<Jesúsqa alli runam>>.
Wakinnam niyarqan: <<Llutantam yachatsikun>>.
13Israel autoridäkunata mantsarmi kikinkunapura tsaynö parlayarqan.
14Pullan fiestachö kaykäyaptinnam templupa patiunman yaykur Jesús yachatsir qallaykurqan. 15Yachatsinqanta musyaskirmi Israel runakuna espantakur niyarqan: <<Ley yachatsikuqkunawanpis mana puriykarqa ¿imanöpatä kay runa tsayläya yachaykun?>>
16Jesúsnam nirqan: <<Yachatsinqäqa manam yarpaylläpitatsu, sinöqa mandamaqnï Tayta Diospitam. 17Pipis Tayta Dios munanqanta rurayta munarqa yachatsinqäkuna Diospita kanqanta o yarpaylläpita kanqantam tantiyanman.
18<<Kikinpa yarpayllanpita yachatsiqkunaqa alabashqa kayta munallarmi yachatsiyan. Peru noqam sïqa mandamaqnï Tayta Dios alabashqa kananpä rasun kaqllata yachatsï. 19Qamkunaqa Moisés qellqanqan leykunata chaskirpis manam mayqaykipis cumpliyankitsu. ¿Imanirtä wanutsimayta munaykäyanki?>>
20Runakunanam niyarqan: <<¿Pitä wanutsiyta munaykäshunki? ¡Qamtaqa supaymi löcuyaykätsishunki!>>
21Jesúsnam nirqan: <<Jamay junaqchö milagruta ruranqäpitam#Juan 5.1-9. qamkunaqa rabyashqa kaykäyanki. 22Tantiyakuyay. Ollqu wamrata señalanapämi Moisés yachatsirqan.#Lev. 12.3. (Moisés yachatsiptinpis tsay costumbri Abrahampitam karqan.)#Gén. 17.10. Moisés qellqanqankunata cumplir ¿manaku jamay junaq kaptinpis ollqu wamrata señalayanki? 23Ollqu wamraykikunata jamay junaq kaykaptinpis señalaykarqa ¿imanirtä rabyashqa kaykäyanki qeshyaq runata jamay junaqchö allïtsinqäpita?#Juan 5.9-10, 16. 24Shumaq mana tantiyarqa llutanta ama parlayaytsu. Shumaq tantiyaykurrä parlayay>>.
Maypita kanqantapis Jesús willanqan
25Tsaymi Jerusalénchö täraq wakin runakuna niyarqan: <<¿Manaku kay runataqa wanutsiyänanpä ashiykäyan? 26Llapanpa puntanchö yachatsiptinpis ¿imanirtä ni pipis imatapis nintsu? ¿Tayta Dios mandamunqan Cristo kanqantatsurä mandakuqkunapis yarpaykäyan? 27Peru noqantsikqa may markapita kanqantapis musyantsikmi. Tayta Dios mandamunqan Cristo shamuptinqa maypita kanqantapis manam pipis musyanqatsu>>.
28Tsaynö parlayanqanta musyarmi templupa patiunchö yachaykätsir jinchipa Jesús nirqan: <<Pï kanqäta reqiyämaptikipis y maypita shamunqäta musyayaptikipis manam kikïpa munaylläpitatsu shamurqü, sinöqa Tayta Dios mandamaptinmi shamurqü. Paytaqa manam reqiyankitsu. 29Pay mandamashqa kaptinmi noqaqa reqï>>.
30Tsaynö niptinmi autoridäkuna Jesústa prësu tsariyta munayarqan. Peru höran manarä kaptinmi tsariyarqantsu. 31Atskaq runakunam payman criyir niyarqan: <<Tayta Dios mandamunqan Cristo shamur kay runa milagruta ruranqanpita ¿mastatsurä ruranqa?>>
Fariseukuna Jesústa prësu tsariyämunanpä mandayanqan
32Jesúspä parlaykäyanqanta wiyaskirmi mandaq sacerdötikunawan fariseukuna Jesústa prësu tsariyämunanpä templu cuidaq wardiakunata mandayarqan. 33Manarä chäyaptinmi Jesús nirqan: <<Pöcu tiempullanam qamkunawan kashä. Mandamaqnï kaqmannam aywakushä. 34Noqa aywanqä kaqmanqa manam aywayta puëdiyankitsu. Ashiyämarpis manam tariyämankitsu>>.
35Jesús tsaynö niptinmi Israel autoridäkuna kikinpura parlar niyarqan: <<Mana tarinantsikpäqa ¿mayparä aywanqa? ¿Juklä nacionchö täraq marka mayintsikkunamantsurä yachatsiq aywanqa? Tsaychöqa capazmi griego runakunatapis yachatsinqa. 36¿Imanirtä <ashirpis manam tariyämankitsu> nimantsik? ¿Imanirtä <aywanqäman manam chayta puëdiyankitsu> nimantsik?>>
Kawatsikuq yakupä ninqan
37 Ramäda fiesta diya junaqmi#Lev. 23.36; Núm. 29.35. llapan runakuna wiyayänanpä Jesús jinchipa nirqan: <<Pipis yakunaq kaqqa noqaman shamur uputsun.#Juan 4.13-14. 38Tayta Diospa palabran ninqannömi noqaman criyikamuqkunapa shonqunpita kawatsikuq yaku mayunörä pashtamunqa>>.
39Tsaynö nirmi Jesús tantiyatsirqan payman criyikuqkuna Espíritu Santuta chaskiyänanpä kanqanta. Tsay witsanqa Espíritu Santu manarämi shamurqanrätsu. Gloriaman Jesús kutiskiptinrämi shamurqan.
Runakuna rakikäyanqan
40Jesús tsaynö ninqanta wiyaskirmi wakin runakuna niyarqan: <<Moisés ninqannö shamunanpä kaq profëtam payqa kaykan>>.#Deut. 18.15, 18.
41Wakin runakunam niyarqan: <<Payqa Tayta Dios mandamunqan Cristum>>.
Wakin kaqnam niyarqan: <<¿Imanöpatä Galileapitaqa Cristo shamunman? 42Tayta Diospa palabranmi nin rey David castapita Cristo kananpä kanqanta.#2Sam. 7.12-13; Sal. 89.3-4; 132.11-12. Tsaynöllam nin David täranqan Belénchö yurinanpä kanqanta>>.#Miq. 5.2.
43Tsaynö nirmi Jesús janan rakikäyarqan. 44Wakinkuna prësu tsariyta munarpis manam mayqanpis tsariyarqantsu.
Israel autoridäkuna mana criyiyanqan
45Tsaypitanam mandaq sacerdötikunawan fariseukuna kaykäyanqan kaqman templu cuidaq wardiakuna kutiyarqan. Chaykuyaptinnam niyarqan: <<¿Imanirtä Jesústa prësu apayämurquykitsu?>>
46Wardiakunanam niyarqan: <<¡Pay parlanqannöqa manam pipis parlantsu!>>
47Tsaynö niyaptinmi fariseukuna niyarqan: <<¿Qamkunatapis engañaskiyäshurquykiku? 48Tsay runataqa manam mayqan autoridäkunapis ni fariseukunapis criyiyantsu. 49Moisés qellqanqan leykunata mana yachaq runakunallam paytaqa criyiyan. ¡Tsay runakunaqa maldicionädum kayan!>>
50Tsaynö niyaptinmi Jesúsman aywaq fariseo runa Nicodemo#Juan 3.1-2. nirqan: 51<<Leynintsikkuna ninqannö pitapis juzganantsikpäqa kikin parlanqantarä puntata wiyashun y ruranqankunatarä shumaq musyashun>>.
52Tsaymi fariseukuna niyarqan: <<¿Qampis favornin shärinaykipä paypa marka mayinku kanki? Tayta Diospa palabranta shumaq liyiy. ¡Manam imaypis nimantsiktsu Galileapita profëta kanqanta!>>
53[Tsaypitanam wayinkunapana llapan kutikuyarqan.
လက္ရွိေရြးခ်ယ္ထားမွု
Juan 7: qxo
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2002, 2008, Wycliffe Bible Translators, Inc. All rights reserved.