Génesis 9
9
Noéta Tayta Dios awninqan
1Tsaypitanam Noéta y tsurinkunata bendisar Tayta Dios nirqan: <<Mirayay kay patsaman juntayanqaykiyaq.#Gén. 1.28. 2Llapan casta ashmakuna, päriqkuna, qarachaypa, lätaypa puriqkuna y lamarchö kawaqkunapis mantsayäshunkim. Tsay ashmakunaqa llapanmi qamkunapa podernikichö kanqa. 3Llapan casta ashmakuna, mikuykuna y verdürakunapis mikuyänaykipämi kaykan. 4Peru ama mikuyankitsu yawaryuq aytsata. Yawarninchömi kawaynin kaykan.#Lev. 7.26-27; 17.10-14; 19.26; Deut. 12.16, 23; 15.23.
5<<Runa mayinta wanutsiq kaqqa wanutsishqam kanqa. Tsaynöllam runata wanutsiq kaq ashmapis wanutsishqa kanqa. 6Kikï niraqtam runata kamarqü.#Gén. 1.26. Tsaymi pipis runa mayinta wanutsiptinqa kikintapis tsaynölla wanutsiyanqa.#Éxo. 20.13.
7<<Qamkunapis atskaman mirayay. Tsaynölla qampita miraqkunapis kay patsaman juntayanqanyaq mirayätsun>>.
8Tsaypitanam Noéta y tsurinkunata Tayta Dios nirqan: 9<<Diluviuwan yapay mana ushakätsinäpämi qamkunawan y qamkunapita miraqkunawan pactuta ruraykä. 10Tsaynöllam pactüta ruraykä arcapita yarquq llapan casta päriqkunawan, wätana kaq y mana wätana kaq ashmakunawan y maytsaychö ashmakunawanpis. 11Kay pactuta cumplirmi diluviuwan imaypis ushakätsishänatsu kay patsata, runakunata ni ashmakunatapis. Kay diluviu kanqannöqa manam imaypis kanqanatsu.
12<<Llapan casta ashmakunawan y llapan runakunawan pactuta ruranqäta imaypis yarpänäpämi 13pukutaychö turmanyuyta rikakätsimushä. Tsay turmanyuymi imaypis señal kanqa kay patsawan pactuta ruranqäta yarpänäpä. 14Tsaymi patsa jananpa pukutay shamuptin turmanyuyta rikakätsimushä. 15Tsay turmanyuy yuriptinmi yarpäshä qamkunawan y kay patsachö kaq llapan casta ashmakunawan pactuta ruranqäta. Mananam kay patsata yakuwan imaypis ushakätsishänatsu. 16Pukutaychö turmanyuy rikakämuptinmi yarpäshä llapan runakunawan y ashmakunawanpis pactuta ruranqäta. Tsay pactutaqa imaypis cumplishämi. 17Tsaymi turmanyuyta señalpä churarqü qamkunawan y ashmakunawan pactuta ruranqäta yarpänäpä>>.
Tsaynömi Noéwan Tayta Dios parlarqan.
Tsurinkuna imanö kayänanpä kanqanta Noé ninqan
18Noépa tsurinkunam kayarqan Sem, Cam y Jafet. Tsay kimsan tsurinkunawanmi arcapita Noé yarqayämurqan. Cam karqan Canaánpa papäninmi. 19Noépa kimsan tsurinkunapitam kay patsachö llapan runakuna mirayashqa.
20Noéqa alli chakrata kichaskirmi üvata plantarqan. 21Üva poquskiptinnam vïnuta upurkur macharqan. Machaskirnam qallapächulla toldun rurinchö jitaraykarqan. 22Papänin qallapächulla jitaraykaqta rikaykurmi Canaánpa taytan Cam ishkay kaq wawqinkunata willaq aywarqan. 23Tsaymi Semwan Jafet jinan höra cäpata aqshukurkur papänin kaqman qepallapa yaykur tsapaykuyarqan. Tsaynö tsapayarqan papänin qallapächulla kaykaqta mana rikayänanpämi.
24Kachakashqana rikchaskamurmi Noé musyarqan qepa kaq tsurin wawqinkunata willanqanta. 25Tsaymi nirqan:
<<¡Canaán maldicionädu katsun!
¡Payqa wawqinkunapa sirviqnillanmi kanqa!>>
26Tsaypitanam yapay nirqan:
<<Semtaqa Tayta Dios llapanchöpis yanapaykullätsun.
Tsaynölla Sempita miraqkunapa sirviqninkuna kayätsun Canaánpita miraqkuna.
27Jafetta Tayta Dios yanapaykullätsun atskaman mirananpä.
Sempita miraqkunawanpis juntu täyätsun.
Tsaynölla Jafetpita miraqkunapa sirviqnin kayätsun Canaánpita miraqkuna>>.
28Diluviu kanqanpita Noé kawarqan kimsa pachak pitsqa chunka (350) wata masrämi. 29Noé wanurqan isqun pachak pitsqa chunka (950) watayuq kaykarmi.
လက္ရွိေရြးခ်ယ္ထားမွု
Génesis 9: qxo
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2002, 2008, Wycliffe Bible Translators, Inc. All rights reserved.