Génesis 12
12
Abramta Tayta Dios awninqan
1Juk junaqmi Abramta Tayta Dios nirqan: <<Markaykita y castaykita dëjaskir maychöpis tänaykipä rikatsinäpä kaqman aywakuy.#Hech. 7.2-3; Heb. 11.8.
2<<Qampita miraqkunatam alli rikashä atskaman mirar jatun nación kayänanpä.
Bendisaptïmi pïmaypis respitayäshunki.
Qam kaynikipam wakin runakunapis bendicionta chaskiyanqa.
3Bendisashuqnikikunatam bendisashä.
Maldisishuqnikikunatam maldisishä.
Qam raykurmi kay patsachö llapan casta runakunapis bendicionnïta chaskiyanqa>>.#Hech. 3.25; Gál. 3.8.
4 Tayta Dios tsaynö niptinmi sobrinun Lotwan Abram aywakurqan. Haránpita yarqunqan witsan Abram kaykarqan qanchis chunka pitsqa (75) watayuqnam. 5Canaánman aywakurmi warmin Saraita, sobrinun Lotta y Haránchö tarinqan llapan sirviqninkunata pusharqan. Tsaynöllam ashmankunata qatikurkur y llapan imaykankunatapis apakurkur aywakurqan.
Canaánman chaykurnam 6Siquem marka cercanyaq aywar Moripa sagrädu encina qeru ñöpanchö Abram täkurqan. Tsay partichöqa cananeo runakunam atskaq täyarqan. 7Tsaychö taykaptinmi Tayta Dios yuripuskir Abramta nirqan: <<Qampita miraqkunatam kay entëru jallqakunata y raqrakunata entregashä>>.#Hech. 7.5.
Tsaychö yuripunqanpitam altarta Abram pirqarqan Tayta Diosta mañakur adorananpä.
8Tsaypitanam rupay yarqamunan lädu Bet-el tsimpan jallqakunaman aywakurqan. Tsaychömi toldun shäritsir täkurqan. Tsaychöpis juk altarta pirqarkurmi Tayta Diosta mañakur adorarqan. Rupay ullunan läduchömi Bet-el marka karqan. Hai markanam kaykarqan rupay yarqamunan läduchö. 9Tsaypitapis cercaman cercaman witirmi Neguev kinraypa aywarqan.
Egiptuchö Abram täranqan
10Täranqan kaqchö pasaypa hambrüna kaptinmi Egipto nacionman Abram aywakurqan tsaychöna tänanpä. 11Egiptuman yaykuykarnam warmin Saraita nirqan: <<Qamqa kuyayllapä shumaq warmim kanki. 12Egipto runakunaqa warmï kanqaykita mayaykurmi wanuskatsimar apakuyäshunki. 13Mana wanutsiyämänanpä paykunata ninki panï kanqaykita>>.#Gén. 20.2; 26.7.
14Egiptuman Abram chaykuptinmi tsaychö täraq runakuna Saraita rikayarqan kuyayllapä kanqanta. 15Egiptuchö Faraónta mandar yanapaqkunapis Sarai kuyayllapä kanqantam rikayarqan. Tsaynö kuyayllapä kanqanta willayaptinmi Faraónqa pushatsirqan palaciunman. 16Saraita palaciunman apanqanpitam Abramta qararqan üshakunata, cabrakunata, wäkakunata, ashnukunata y camëllukunatapis. Tsaynöllam sirviqninkuna kayänanpä ollqutapis warmitapis qararqan.
17Tsaynö kaptinpis Saraita apanqanpitam Faraónta llapan castankunatawan mantsaypä qeshyawan Tayta Dios castigarqan. 18Tsaymi Abramta qayaykatsir Faraón nirqan: <<¿Imanirtä kaytaqa ruramarquyki? Sarai warmiki kaykaptin ¿imanirtä willamarqaykitsu? 19¿Imanirtä <panïmi> nimarqayki? Tsaynö nimaptiki warmïpä apaykarnaqa punurpis punuykümanchi karqan. Kananqa warmikita pushakurkur kaypita aywakuy>>.
20Tsaynö nirmi Faraónqa yanapaqninkunata mandarqan Egiptupita Abramta qarquyänanpä. Tsaymi Abram Egiptupita aywakurqan warminta y imaykankunatapis apakurkur.
လက္ရွိေရြးခ်ယ္ထားမွု
Génesis 12: qxo
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2002, 2008, Wycliffe Bible Translators, Inc. All rights reserved.