MWAMBĨLĨLYO 21

Kũsyawa kwa Isaka

1Na Yeova amũkĩa Sala tondũ waisye, na Yeova amwĩka Sala tondũ waneenie. #Mwa 17.19; 18.10; 1 Sam 2.21. 2Na Sala aya ĩvu, na amũsyaĩa Avalaamu mwana ũkũunĩ wake, ĩvinda yĩtw’e yĩla watavĩw’e nĩ Ngai. #Mwa 17.21; Aevl 11.11. 3Na Avalaamu eeta syĩtwa ya mwana wake ũla wasyaiwe, ũla Sala wamũsyaĩe, Isaka. #Mwa 17.19. 4Na Avalaamu amwaĩka Isaka mwana wake e wa matukũ nyanya, o tondũ Ngai wamwĩaĩe. #Mwa 17.10–12; Meko 7.8. 5Na Avalaamu aĩ wa myaka ĩana, yĩla wasyaĩwe mwana wake Isaka. #Mwa 17.17. 6Na Sala asya, Ngai nũtumie nĩtheka; kĩla ũmwe wĩĩw’aa akathekaa vamwe nakwa. #Isa 54.1; Lk 1.14,58. 7Nake asya, Nũũ ũla waĩ atavya Avalaamu, atĩ Sala nũkongya syana? Nũndũ nĩnamũsyaĩa mwana ũkũunĩ wake.

Kũlũngw’a kwa Akali na Isumaeli

8Na mwana eana, na aaĩw’a: na Avalaamu avoka mboka nene mũthenya ũla Isaka waaĩw’e. 9Na Sala oona mwana wa Akali, Mũmisili, ũla wamũsyaĩe Avalaamu, aivũa ngũĩ. #Mwa 16.1,15; Aka 4.29. 10Kwondũ wa ũu amwĩa Avalaamu, Lũngya mũthũkũmi ũũ, mwĩĩtu, na mwana wake: nũndũ mwana wa mũthũkũmi ũũ, mwĩĩtu, ndakethĩwa e mũtiĩwa vamwe na mwana wakwa, o ũũ Isaka. #Aka 4.30. 11Na ũndũ ũsu waĩ ũthũku mũno methonĩ ma Avalaamu kwondũ wa mwana wake. 12Na Ngai amwĩa Avalaamu, Ndũkethĩwe wĩ ũthũku methonĩ maku nũndũ wa mwana, na nũndũ wa mũthũkũmi waku, mwĩĩtu; nthĩnĩ wa w’onthe ũla Sala ũnũũkũtavya, wĩthukĩĩsye wasya wake; nũndũ ũsyao waku ũkeetwa nthĩnĩ wa Isaka. #Alo 9.7; Aevl 11.18. 13O na mwana wa mũthũkũmi, mwĩĩtu, ngamũtw’ĩkĩthya mbaĩ, nũndũ nake nĩ ũsyao waku. #Mwa 16.10. 14Na Avalaamu ookĩla kĩoko tene, na oosa kĩmũtũ na kathatwa ka manzĩ, na amũnenga Akali, amwaĩkya kĩtuonĩ kyake, na amũnenga mwana, na amwĩa athi: nake athi, na anganga weũnĩ wa Mbeeli‐sieva. 15Na manzĩ mathela kathatwanĩ, na aia mwana ungu wa kakuthu kamwe. 16Nake aenda, na ekala nthĩ amwelekele e kũasa, ta yĩkwa ya ũta: nũndũ asya, Ndikone kĩkw’ũ kya mwana. Na ekala amwelekele, na ookĩlya wasya wake, na aĩa. 17Na Ngai eew’a wasya wa kĩvĩsĩ; na mũlaĩka wa Ngai amwĩta Akali e ĩtunĩ, na amũkũlya, Wĩ na ũndũ mwaũ, Akali? Ndũkakĩe; nũndũ Ngai nĩwew’a wasya wa kĩvĩsĩ vala kĩĩ. 18Ũkĩla wũkĩlye kĩvĩsĩ, na ũkĩkĩkwata kw’okonĩ kwaku; nũndũ ngakĩtw’ĩkĩthya mbaĩ nene. #Mwa 21.13. 19Na Ngai amũsalukya metho make, na oona kĩthima kya manzĩ; na athi, na ausũsya kathatwa manzĩ, na akĩnenga kĩvĩsĩ kĩnyw’e. #Mot 22.31; 2 Asu 6.17; Lk 24.16. 20Na Ngai aĩ vamwe na kĩvĩsĩ, nakyo kyeana; na kyekalaa kũu weũnĩ, na kĩkĩana, kyatw’ĩka mũndũ wa ũta. #Mwa 16.12. 21Na atũaa ũiĩnĩ wa Valani: na inyia wake amumĩsye mũka nthĩ ya Misili.

Ũtianĩo katĩ wa Avalaamu na Avimeleki

22Na kweethĩwa ĩvinda yĩu, Avimeleki na Vikoli kavuteni wa nguthu yake maneena na Avalaamu, makĩmwĩa, Ngai e vamwe naku maũndũnĩ onthe ala wĩkaa: #Mwa 20.2; 26.1,26,28; Isa 8.10. 23na yu ĩndĩ ĩmbĩtĩe vaa na Ngai kana ndũkambĩka na ũkengani, o na mwana wakwa, o na mwĩsũkũũwa: ĩndĩ kwĩanana na ũseo ũla nakwĩkie, we ũkambĩka nyie, na nthĩ ĩla wĩkalĩte ũeni. #Mwa 20.14. 24Na Avalaamu asũngĩa, Nĩngwĩvĩta. 25Na Avalaamu amũkan’ya Avimeleki nũndũ wa kĩthima kya manzĩ, kĩla athũkũmi ma Avimeleki mavenanie. #Mwa 26.15–22. 26Na Avimeleki amwĩa, Ndyĩsĩ ũla wekie ũndũ ũũ: o na ndwaandavya, o na ndyaaĩw’a nyie, ate o ũmũnthĩ. 27Na Avalaamu oosa malondu na ng’ombe, na amũnenga Avimeleki; na me elĩ matianĩa ũtianĩo. #Mwa 26.28–31. 28Na Avalaamu aia tũmyati mũonza twa ĩĩthya twĩ tw’oka. 29Na Avimeleki amũkũlya Avalaamu, Nĩ twa kĩ tũmyati tũũ mũonza wiĩte tw’oka? 30Nake asũngĩa, Tũmyati tũũ mũonza ũtwose kw’okonĩ kwakwa, wĩthĩwe ũkũsĩ kwakwa, kana ninyie nĩnzĩte kĩthima kĩĩ. 31Kwondũ wa ũu eeta vandũ vau Mbeeli‐sieva; nũndũ nĩvo meevĩtĩe me elĩ. #Mwa 26.33. 32Na ĩndĩ matianĩa ũtianĩo vu Mbeeli‐sieva: na Avimeleki ookĩla, na Vikoli kavuteni wa nguthu yake, na masyoka nthĩ ya Avilisiti. 33Na Avalaamu avanda mũtĩ wa mweseli vau Mbeeli‐sieva, na eekaĩlĩla syĩtwa ya Yeova kũu, Ngai Wa Tene Na Tene. #Mwa 4.26; 12.8; Isa 40.28. 34Na Avalaamu ekala ũeni nthĩ ya Avilisiti matukũ maingĩ.

လက္ရွိေရြးခ်ယ္ထားမွု

MWAMBĨLĨLYO 21: Mbivlia

အေရာင္မွတ္ခ်က္

မၽွေဝရန္

ကူးယူ

မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ

https://shop.biblesociety-kenya.org/

www.biblesociety-kenya.org

God's word open for all

Mbivilia အေၾကာင္းကို ပို၍ သင္ယူပါ။

MWAMBĨLĨLYO 21