Lûk 22
22
Dzudàs bǒo tsughu alenyə utsəm an tuw kə Yɛso
(Mat 26:15; Mat 26:14-16; Mâk 14:12; Mâk 14:10-11; Dzn 11:45-53)
1 #
Ksm 12:1-27
Zə kəla ghe zəā tsəghà bɛ kə̀là mbvùŋ buw a te, kəla ghe tɔŋlo enyəa à lò Ezəŋsō naŋā, kə n suu wò, 2à n lo mo tuw u təfɔ̀e ghèe ghê dèekə̀làŋ a kə̀ŋo dzì alewī Yɛso, sò kǔuwn tsəŋo ghaʼa àghì alewī wə̄n an ndɛ. 3Vʉatsə̄a ghə n daŋso tsom kɔʼ Dzudàs, tɔɔŋ Eskàlìot, wəla ù fə̀ lô sugho tsə̀ndə̄ghā an tsə̀təndə̄ghā tə Yɛso ten èghəm à ghè tò tə bə̀ghà. 4Dzudàs fi ndûw nyə̀ nû tsəm u Yɛso wò ghèe ghê tuw u təfɔ̀e wò àsùghò ghì à ne a təgbè ghò am be kə̀ ne ko. 5Ghe n lə̀ghà ndùw yòsò e wə̄n enyə, boo naŋa tsughu sùghò enyəa ghe ki aletsə̄ wə̄n. 6Dzudàs mo è boo, kàʼ ndùw alekə̄ŋ dzì alefèe fughu Yɛso â ghee an nə̀ghà zəla ndə̀m è àghì sò buw.
Yɛso zə̌ Zə kə̀ Zəŋso naaŋ ko ghèe ghê Tsə̀təndə̄ghā tə wə̄n to
(Mat 26:17-25; Mâk 14:12-21; Dzn 13:21-30)
7Tsuʼ u zə kə kəbɛ kəla mbvùŋ buw a te n daŋso kəŋo è wo, tsuʼ wəla ghe ki alegbò ndzì è zə kə Ezəŋsō naŋā a te. 8Yɛso n tum tsughu Pità ghèe Dzɔ̌n â ghee enyəa, “Ndǔw ghəəŋ tsughu nlò fəghàzəa kə kəzə kə̀ Ezəŋsō naŋa ko, a lô zəā.” 9Ghe m bvʉ â wə̄n enyəa, “Ghù mò dzɛ̀ enyəa to a mô ndûw ghəəŋ ghɛ ghəa ghə̀n à?” 10Ù m bɛ̀lɛ̀ ndùw ghee enyəa, “Kòʼô, ghəa ghɛ̀ nyəā nduw enaʼ, ghɛ̀ sô kpěen dùw ghɛ̀ à ghê ghùw mò ù bòʼò kelê tom kə mmùghu; ghɛ̀ so nughu ndǔw nlò a bàâ wə̄n, ghɛ̀ nduw am be kəla ù sò nyəā nduw a te. 11Ghɛ̀ dzɛ â mughùndùghù ù te enyəa, ‘Wàdè bvʉ̀ wò a ghù enyəa, Dzughu e ndughu zəla ghàʼ à ghê tsə̀təndə̄ghā taŋā tə sô bùghò zə̌a Zə̄ kə Zəŋsō naaŋ ko a te zɛ̂ɛ?’ 12Ù sò daŋso dêe ndûw ghɛ̀ â dzughu e ndughu è ne zo edzūŋ an ndùghù è kɔ̀ʼɔ daŋso mo fʉgha u lo tən fughu; biaan naŋa tsughu nlò a fughu.” 13Ghe m bɔ̄ɔm ndùw kòʼ kpěen ndùw ko àghəa aŋghəa ù mò dzɛ̂ â ghee; ghe m biaan naŋa tsughu sùghò ghəa a zə kə Ezəŋsō naŋa fughu. 14A m bùghò nəgha e kpe, Yɛso n tsùghù dòʼò tsùghù ezə ghèe ghê tum tə wə̄n to. 15Ù n dzɛ̀ â ghee enyəa, “Mùgho mò ŋgee diī keē alezəā gûŋsò kɔʼ zə kə Ezəŋsō naŋā kən sɛ̀, Ǹ lo fanlo. 16Tɔŋlo enyəa ghəa Ǹ dzâa wô fɛ â ghɛ̀, Ŋ̀ kôom zə̀ yo à gɔ̀ʼɔ̀ ko mo Fɔ̂e u Kəzə̀ wə̀ m bəla kə nî.” 17Ù n daŋso nì kɔ̌ʼ wùa è nlʉ̀; a m bùghò ù fughu tsughu zɔ̀ɔŋ kò â Zə̀ kò, ù n dzɛ̀ tsùghù enyəa, “Nǐ nlò, ghɛ̀ muʼn tsəgha nduw aŋ ghùe zɛʼɛ̄; 18nu Ǹ dzɛ̂ â ghɛ̀ enyəa, alekaʼā nughù tsughu êzə̄ŋ, Ŋ̀ kê kòom mʉ̀ yo lʉ̀ mən mò, à kè gɔ̀ʼɔ̀ ko mò Fɔ̂e u Kəzə̀ wə̀ m bùghò.” 19Ù n daŋso nì kɔ̀ʼ sùghò kə̀bɛ; a m bùghò ù fughu tsughu sugho zɔ̀ɔŋ kò â Zə̀ kò, ù m bòʼ è tsughu fùghù ndùw â ghee dzàa tsùghu enyəa, “Zən lò gwən e ughùe zaŋā M̀ fughuu wo â ghɛ̀, ghɛ̀ è ghəəŋ tsəgha enyə, alemoʼn tsughuu mugho.” 20#Dzl 31:31-34Ù ŋ kòom nì kpèʼe kɔ̀ʼ sùghò wùa è nlʉ̀ an dziī è mɔ̀ʼɔ aŋghəa ghe zə kɔʼ kûun tò, dzâa tsùghuu enyəa, “Wùa è nlʉ̀ zəla Ŋ̀ kwə̂n fughu tsughu fɛ â ghɛ̀, à lǒ kàa m fughu mò â ghɛ̀; aŋ kàŋ taŋa. 21#Sms 41:9 Kòʼô, ghùw wəla ù sə̀ fêen fughuu mugho ù lò fɛ, ghàʼàwə̄n fɛ dzeŋe zəa ko a dzə̀m. 22Wɛ ù Ghùw kwə̀la səa ko nù aŋghəa e doʼò boōn dzə êzə̀. Ghùw wəla ù fèe fughu wə̄n kuuwn lò an tsù.” 23Ghe n daŋso kāʼ tsughu alebvʉ̄nlō aŋ ghùe e ghee alekele ghùw wəla ù lò alefòʼ ŋgòʼ è èghə̀a tò zən. 24#Mat 18:1; Mâk 9:34; Lûk 9:46 Ghe ŋ kàʼ tsùghù sùghò alepfʉ edzughu aŋ ghùe e ghee alekele ghùw wəla ù tsə̀ghà sə ghee a dzə̀m. 25Yɛso n daŋso dzɛ̀ tsùghù enyəa, “Dwə̀ŋ u tənàʼà u kɔʼ nyaʼa an tuw u aghì a ghee; ghe yia a ləghaa enyəa ghî ghə̀ è lɛɛn wo ghee tò ghî ghəla ghe yôsò ghî ghò. 26#Mat 23:11; Mâk 9:35#Mat 20:25-27; Mâk 10:42-44 Â ghɛ̀, e kuuwn yò dzə̂ êzə̀, ghùw wəla ù tsə̀ghà sə an saʼ kɛʼɛ̄ lāam ki aledòʼò tsughu tǒ wɛ̂ɛtùghu, tuw kɛʼɛ kə kuūwn doʼò tsughu tǒ fəkɔ̂ɔ. 27#Dzn 13:12-15À tsə̀gha ghùw wəla ù dòʼ am bəla è zəa zo ŋkāa ghùw wəla ù lò kɔ̂ɔ fəla fə tsəghàsò fʉghàzəa wo a? À mgbàŋ yǒ wəla ù dǒʼ zəa a? M̀ fɛ kuuwn lò am bvʉa zɛʼɛ̄ tǒ fəkɔ̂ɔ. 28Ghɛ̀ lo ghî ghə̀là ghɛ̀ kɔlɔ̄ kɔʼ wô fə̂ŋ tǒ sɛ̀ am fə̄m kaŋā. 29M̀ fɛ fùghù wò ghɛ̀ â fɔ̀e wò to Bəghà fə̀ fughu â mùghò, 30#Mat 19:28enyəa sɛ̀ e ke e dzeŋe zəa, mʉa sùghò nlʉ̀ am Fɔ̀e waŋa, dòʼ an ndàŋ tə udwə̀ŋ, saʼâ nàʼà tə Ezə̀lɛ̂ tə̀n èghəm à ghè tò tə bə̀ghà.”
Yɛso dzɛ̀ zìi wò enyəa Pità sə̀ tǔu màʼn ghee Yeso
(Mat 26:31-35; Mâk 14:27-31; Dzn 13:36-38)
31Yɛso n dzàŋ tɔ̀ŋɔ tsughu Pità enyəa, “Sǎemòn, Sǎemòn, zuw ghɛ à, Satàn n daʼa kə nɔe â Zə̀ kò enyəa e tsâʼà səā wô ghɛ̀, 32Sǎemòn, mùghò ŋ kuuwn gɔ̀ŋlò an tuw kə̂a enyəa boo zəghà è lô dɔ̂ɔm tsughuu bvʉ̂a tsughuu. Abugho ghù teē wô ebàm an tsə̀n tə̀ghà, tughuso tsùghù sùghò waazughù ghò.” 33Sǎemòn m fùghù ndùw fə̀n kə edzughu â wə̄n enyəa, “Mughùbè, mùghò m boo alekɔʼ ndùghùtsāʼ ghàʼ à ghù àsùghò alebùʼù kpuūw daŋso bugho à lò ko evʉ.” 34Yɛso n dzɛ̀ enyəa, “Ǹ so Ǹ dzâa wô â ghǔ a Pità, â nùumbvʉ̄ aletɔ̄ŋ an tsuʼ u nɛ wən, à sò lǒ mò ghǔ m mùghò tue màʼà sə nəgha to tə təgha.” 35#Mat 10:9, 10; Mâk 6:8, 9; Lûk 9:3; 10:4Ù fi daŋso dzɛ̀ nù â ghee a dzə̀m enyəa, “Fɛ a mùgho fə̀ tum sə ghɛ kwêekwe mò ghɛ̀ bûʼ kì bən sugho yo kua wo, mbə̀ghà ŋkāa təgûw à, ghɛ̌ fə̀ kpaʼ nduw lāʼ nû fəgha ko fughu a?” Ghe mô e tue enyəa, “Ɛ̂ŋgaŋ!” 36Ù fi dzɛ̂ nù â ghee enyəa, “Êzə̄ŋ, abugho ghùw ki mbə̀ghà fə ukʉa fo àsùghò mbə̀ghà, ù nìi kɔʼ. Abugho ghùw ki sughò yô nyə fo, ù fèe tsughu sàŋ è wə̄n, ù zue. 37#Èzy 53:12Ǹ so Ǹ dzâa wô â ghɛ̀ enyəa nəgha zə m kpē â Shwaʼ u Kəzə̀ wəla ghe fə̀ tɔm naŋa alenì kə̀bəla alo kətə̀ŋ kùu wò mùghò, mbuu ghe mò taŋ wə̄n aŋ kɔ̀n kə aghì à biigh gho; tɔŋlo enyəa fəgha kela ghe fə̀ tɔm bòʼ mùghò, kə ki alesə̄.” 38Tsə̀təndə̄ghā tə wə̄n tə mo enyəa, “Mughùbè, ghàʼ ki nu nyə mò fɛ m bə̀ghà.” Ù n daŋso dzɛ̀ tsughu â ghee enyəa, “Zə̀gha màʼa ndùw nlò êzə̀.”
Yɛso kɔʼ gɔ̀ŋlò aŋ kwàʼ u tə̀ Olèf
(Mat 26:36-46; Mâk 14:32-42)
39Ù n daŋso sə̀ wò fughu, bùghò tsə̀ghà kɔ̀ʼ ndùw aŋ kwàʼ u tə̀ Olèf, ghəa ù fə̀ kiī kɔʼɔ̄ tsəgha; ghèe ghê tsə̀təndə̄ghā tə wə̄n to, kaʼkəkaʼ. 40A m bùghò ghe kɔʼ tɛ̂ tsughu fughu, Yɛso n dzɛ̀ tsùghù â ghee enyəa, “E gɔɔ̄ŋ nduw nlò enyəa ghəa è li e lô tsoō ghɛ, ghɛ̀ ghəəŋ ghəa è biigh zo.” 41Ù n zə̀ghà tsùghu ghee, nyà zə̀m ndùw ènyə tò kwe u etīa u ghûw, nyaʼa è tsughu, kàʼ ndùw alegɔ̀ŋlò enyəa, 42“Tsele, abugho ghù tsə̌m, bòʼo nùghu mbùŋ kən aŋ ghùu mùghò; à kǔuwn yǒ an daʼa kaŋā, à lǒ an daʼa kə̂a.” 43#22:43 Mwàʼsò ù li u ki yo ghəla e 43 zò àsùghò e 44 zò. [Tsə̀ndə̄ghā è Kə̀zə̀ m gbə̀n sə wò fughu a vʉ̀a wə̄n, dzə̀n tsughu wə̄n â sə̀ŋ zò. 44Ù n tughuso kè tə̀ gɔɔ̄ŋ to à sə̀ mò alo kətuw, zuʼso ŋ wə̄n mə̀ n tsomlo enyə a ghueetsə̄ tò tuʼ u təkàŋ.] 45A m bùghò ù sò gɔ̂ɔŋ mɛʼɛ̀ tsughu, ù n nùghù è kɔʼ bùghò kòʼ wò mò tsə̀təndə̄ghā tə wə̄n tə m bvʉ̀ mgbii to, ghe màʼa fə̀ lo mo ghe ŋge bughu aŋ ghùu ghəa gho a fəmso ghee. 46Ù n dzɛ̀ â ghee enyəa, “Ghɛ̀ bwîi kwò? Nùghu gɔ̀ŋlo nlò, enyəa e kwo fəgha kə lô tsoō ghɛ enyəa ghɛ̀ ghəəŋ tsughu ghəa è biigh zo.”
Ghe kwu Yɛso
(Mat 26:47-56; Mâk 14:43-50; Dzn 18:3-11)
47Yɛso kà bùʼ mìasò ghəa à kəaa gho, nɔ̂e kə aghì kə n səŋo tēmē wò, mò à bù wò ghùw wəla ghe fə̀ tɔŋlo enyəa à lò Dzudàs, tsə̀ndə̄ghā an tsə̀təndə̄ghā tì èghəm à ghè tò tə bə̀ghà. Dzudàs ŋ kuʼso kə̄əŋ wò ko fì alemaāŋkelē wô Yɛso. 48Yɛso n nùghù bvʉ tsughu â wə̄n enyəa, “Mo a Dzudàs, ghù Wɛ ù Ghùw so e fêe fughu aŋ ghùe è maaŋ zo a?” 49A m bùghò tsə̀təndə̄ghā tə wə̄n tə kôʼ tɔ tsughu ghəa zəla e so e sə, ghe m bvʉ â wə̄n enyəa, “Mughùbè, ghàʼ sughùnlò alo nnyə a?” 50Tsə̀ndə̄ghā e mɔ̀ʼ n daŋso shùaa ndùw fə̀nyə a zəŋò kɔ̀ kə Fɔ̀e è ne fo fə mɔ̀ʼ, chwɛ̀ màʼà ndùw tuūŋ kə wə̄n kə kwe ù təma wo. 51Yɛso m fwə̀n è ke, dzɛ̀ â ghee enyəa, “E kwo ko ghùw è kôom fôʼ.” Ù n daŋso mɔ̀m ndùw tuūŋ kə tûwbʉ̀ghà vʉ̀, kə mo è ke. 52Yɛso n daŋso dzɛ̀ â ghì yia ghe fə̀ gboō kaāŋ wo wə̄n, tɔɔŋ tuw u təfɔ̀e, àsùghò gbè tə be kə̀ ne ko, à tsoʼ to enyəa, “Ghɛ̀ ènyə bòʼò sə̀ wò à nyə mò à mbàŋ tò, mò ghɛ̀ tsoo bòʼò kə̀ŋo ghùw ù tsɔ̀ŋɔ ŋkāa a? 53#Lûk 19:47; 21:37Sɛ̌ fə̀ mgbaŋa dôʼn zeē tsəgha ko am be kə̀ ne ko ntsuʼu n dzə̀m, ghɛ̀ ŋ kè kwu mugho. Zən fɛ̄ kuuwn lò nəgha zɛʼɛ̄, nəgha e kədaʼa e waatsūʼ.”
Pità tùe màʼà Yɛso
(Mat 26:57-58, 69-75; Mâk 14:53-54, 66-72; Dzn 18:12-18, 25-27)
54Ghî yi n daŋso kwu kɔʼ Yɛso, nì ndùw wə̄n an ndughu alô Fɔ̀e è ne. Pità ŋ kuuwn dzùum ndùw ko ghee alo kədɛ̀. 55A m bùghò ghe dzeŋe tsughu doʼò tsughu, mo ghe m kpàa wən wo an tsə̀tèʼè fə kəbē, Pità n ndùw dòʼò nyə tsughu am bvʉ e ghee. 56Ghəa Pità sə̀ doʼ a vʉ̀a ùwə̀n, kɔ̂ɔ fə̀ zən fə̀ li fə fi kôʼ nù Pità, tɔ̀ʼ è fwe, nùghù dzɛ̀ tsùghù enyəa, “Ghùw wən mò lo sugho ghèe Yɛso.” 57Pità n tùe màʼà ghəa yì, dzɛ̀ enyəa, “Êwɛ̀, Ŋ̀ kwò dzə yo wə̄n.” 58Gha kə kâ sə, tûwbʉ̀ghà ù lì ŋ kòʼ kpèʼe tsùghù sùghò Pità, dzɛ̀ tsùghù enyəa, “Ghù wən lo sugho ghùw ù ghee.” Pità ŋ kuūwn bɛ̀lɛ̀ tsughu ko enyəa, “Tûw, Ǹ yo dzə ghùw ù ghee.” 59Â tàm zə èzuuw alekɔʼɔ̄ sə, tûwbʉ̀ghà ù lì n nùghù kaʼ è tsughu, mgbɛɛ tùghùsò dzàa ko enyəa, “Kùmkùm, ghùw wən mò lo ghèe Yɛso, tɔŋlo enyəa wə̄n lò sugho ghùw ù Galèlîi.” 60Pità ŋ kuuwn bɛ̀lɛ̀ tsùghu ko enyəa, “Tuw kə baa yo mugho aŋ ghəa yìa ghù kə̌aa fi a tûwbʉ̀ghà.” Nùumbvʉ n daŋso tɔŋɔ kɔʼɔ mo Pità nyǒʼn kə̀aa sə̌a wò ghəa yì. 61Mughu ù te ŋ kwə̄n sɔʼ lɛ̄ɛn ndùw Pità. Pità n tɛ̀ mòʼn wò shwaʼ u Mughu ù te wəla ù mò dzɛ̂ naŋā â wə̄n enyəa, “Â nùumbvʉ̄ alekɔʼɔ̄ tɔ̄ŋ nɛ, à sò lǒ mò ghǔ m mùghò tue màʼà tənəghā tə təgha.” 62Pità n daŋso zə̀ghàa tsùghù kəbe, sə̀ dì tsòʼn tsughu enyə a beē, nʉghànʉ̀ghà.
Ghe təma nduw â Yɛso, buu sùghò Wə̄n
(Mat 26:67-68; Mâk 14:65)
63Ghî ghəla ghe mò chîin Yɛso n daŋso kaʼ tsughu alesɔ̀ʼsò wə̄n, buu wə̄n. 64Ghe m bɔ̀n nàŋa tsùghù sə a wə̄n, bu tsughu wə̄n, ghe mò à wə̀n à, “Səŋ ghùw wəla ù bu ghû.” 65Ghe n tsoo sùuwn sùghò wə̄n fi an ndə̀mà tə aghəa tə̀ biigh to.
Yɛso an tia e sāʼ
(Mat 26:59-66; Mâk 14:55-64; Dzn 18:19-24)
66Ghəa tsuʼ u zuw teēn tsughu, noo mə̀ ènāʼ n te n nyə̄ dzeŋe tsughu aŋ kaŋsì ghèe ghê tuw u tə fɔ̀e wò àsùghò ghê dèekə̀làŋ. Ghe n nì wò Yɛso fughu a vʉ̀a ghee. 67Ghe mo â Yɛso enyəa, “Dzǎa wò â ghàʼ; à lò ghû wɛ ù Kə̀zə̀ ù tsùʼu a?” Yɛso m bɛ̀lɛ̀ tsùghù enyəa, “Abugho Ǹ dzɛ̂ wo â ghɛ̀ enyəa, Ǹ lo wə̄n, ghɛ̀ sô yò alebōo â mùghò. 68Abugho M̀ bûʼ bvʉ wô sugho â ghɛ̀, ghɛ̀ sô yò sughò alebɛ̀lɛ̀. 69Alekuūwn nîi nughù tsughu êzə̄ŋ, ghe sô Wɛ ù Ghùw doʼsò nǎaŋ tsughuu aŋ kwe ù təma u Zə̀ Kə̀ Ghaʼa Kən Kə̀ Dzə̀m.” 70Ghe n daŋso nùghù wǎʼn bvʉ tsughu enyəa, “Tò à fì lǒ enyəa ghù lǒ Wɛ ù Kə̀zə̀ a?”
Yɛso n dzɛ̀ â ghee enyəa, “Ghɛ̀ dzɛ̂ êsəŋò enyəa Ǹ lò wə̄n.” 71Ghe fi daŋso dzɛ̀ tsùghù nû enyəa, “A kôom lə̀ghaa kpeʼê sùghò kwò? Ghuūghùe e sɛ̀ zə̀ n zuw fəgha kə̀là ù dzɛ̌.”
လက္ရွိေရြးခ်ယ္ထားမွု
Lûk 22: agq
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ