Dzɔ̌n 4
4
Yɛso ghèe zən ù Sàmalìa
1A fə̀ bughoo Yɛso kele sə kɔʼ enyəa ghî a Falàsîi a maā shwaʼ wən wo zuw enyəa, “Yɛso nǎam nìi ndùw kô tsə̀təndə̄ghā, fughuu ndùw ghee â mùghù ŋ Kə̀zə̀ mò, tsə̀ghàtàʼà Dzɔ̌n.” 2(Mò à fə̀ buʼ yo dzə̂ ghue u ghùe Yɛso, à fə̀ lo tsə̀təndə̄ghā tə wə̄n tə̀ li to tə fə̀ fughu ghî ghò â mùghù ŋ Kə̀zə̀ mò), 3Yɛso n zə̀ghàa tsùghu Dzùdîa nùghù ndùw enyəa e ndûuw èbàm aŋ Galèlîi. 4Ù ŋ kì aletsə̀ghàa nyəā ndûw dzì an naʼ e Sàmalìa.
5 #
Dzs 33:19; Dzu 24:32 Ù fi bughò sə̀ wò nù aŋ kɔn wə enaʼ u li wo an Sàmalìa, ghe fə̀ tɔŋlo enyəa à lò Sikà, mo kɔn u te u kuʼù lǒ ghèe luʼū kəla Yàkɔ̂b fə̀ fughu â wɛ̀, tɔɔŋ Dzùghùsî. 6Bûʼ kə mmùghu kə Yàkɔ̂b kə̌ fə̀ lo tsəgha fughu, Yɛso n doʼò tsùghù fughu a vʉ̀a bùʼ kə te ko, ghəa ù fə̀ sò lo mò ù m bughu an dzì zəla ù fə̀ bwîi wo. À fə̀ lo tǒ an zuuw è kɔʼɔ teme zo.
7Zən ù Sàmalìa ù lì m bùghò mùghù n sěe mǒ fughu alo kəbùʼ, Yɛso n dzɛ̀ â wə̄n enyəa, “Fughu wò mugho â mùghù m mʉ̌a mò.” 8[À fə̀ lo mò tsə̀təndə̄ghā tə wə̄n tə ŋ kwə̄n enaʼ, alekwəlā zūe ufʉghàzəa.] 9#Ezl 4:1-5; Nɛ̀h 4:1, 2 Zən ù Sàmalìa ù te n dzɛ̀ â Yɛso enyəa, “Ghùw ù Dzùdîa tò ghû, lò ênzə̂n alenɔɔ wo mugho â mùghù mò a, mò Ǹ lo zən ù Sàmalìa a?” (Tɔŋlo enyəa Dzûu tə̀ zəa faa yo ghèe ghê ghì a Sàmalìa ghò). 10Yɛso m bɛ̀lɛ̀ tsughu wə̄n enyəa, “Abugho ghù mò kwo fughu kə Kəzə̀ kò, kwo sugho ghùw wəla ù dzàa wô â ghù enyəa, ‘Fughu wò mugho â mùghù m mʉ̌a mò.’ To ghù mo nɔe tsughu, ù fughuu wô ghù â mùghù mə̀là m fughuu mughù zò.” 11Nughò vʉ m bvʉ â wə̄n enyəa, “Mughùbè, ghù ki yo tom kə mmùghu ko, bûʼ kə mmùghu chia kə dâa sugho, ghù sò mùghù mə̀là ŋ ki mughù zò è kuūwn nîi wô a ghɛ̀? 12À lò enyəa ghù tsò tsə̀ghà sə̀ bəghàbəgha Yàkɔ̂b wəla ù fə̀ fughu ghaʼ â bùʼ kə mmùghu kə te ko a, wə̄n wəla ù fə̀ mʉa mùghù mò a te ghèe ghê wɛ a wə̄n gho à nyòm tə wə̄n to a?” 13Yɛso n dzɛ̀ â wə̄n enyəa, “Ghùw wəla ù mʉā mùghù mən mò, fəŋ è m̀mùghu lo naam zuʼso kpeʼe nǔ wə̄n, 14ghəla ghe lo kuūwn mʉā mùghù mə̀là Ǹ lo fughu â ghee, fə̀ŋ è m̀mùghu kê ghee kôom zùʼso kòʼ yò. Mùghù mə̀là Ǹ lo fughuu, n lo doʼò tsughu fədzughù a zəŋò ghee, fə tûuŋ səā kɔʼɔ̄, fughu sùghò ghee â mùghù è doʼn təla zo.” 15Nughò ù te n dzɛ̀ â wə̄n enyəa, “Mughùbè, fughu wò mugho â mùghù mə̄n mò, fə̀ŋ è m̀mùghu lô kpaʼā dôʼnlo mò è kòom zùʼso yò mugho, ŋkāa tò Ǹ zʉ̂nlò alebughōo fɛ zʉeezʉee enyəa M̀ bughò sèe m̀mughū.”
16Yɛso n dzɛ̀ â wə̄n enyəa, “Ndǔw tɔŋɔ wò num wʉ̂a, ghù abugho ghɛ̀ à wə̄n.” 17Nughò vʉ m bɛ̀lɛ̀ tsùghù wə̄n enyəa, “Ŋ̀ ki yo num.”
Yɛso n dzɛ̀ â wə̄n enyəa, “Ghù lò tsəghatsəgha aledzàa wò enyəa, ghù kì yo mūm. 18Tɔŋlo enyəa ghù maā kele num gho a tɛ̀, wəla ghù ki sugho ezə̀ŋ, â yǒ num wʉ̂a, ghəa zə̀a ghù dzɛ̀ tsughu, à lò êsəŋò!” 19Nughò vʉ n dzɛ̀ â Yɛso enyəa, “Mughùbe, Ŋ̀ kôʼ enyəa ghù lǒ ghùwshʉ̀ghà ù Kə̀zə̀. 20Ghê bə̀ghàbəgha fə̌ Zə̀ kə̀ kɔʼso tsəgha fɛ aŋ ukwàʼ, ghɛ̀ Dzûu tia tə kuuwn so enyəa, luʼū kə̀ kɔʼso kə Kəzə̀ kə lo ko an Yɛ̀lusalɛ̀m.” 21Yɛso n dzɛ̀ â wə̄n enyəa, “Êwɛ̀, zuw wò â mùghò, nəgha e bughòo nù ghɛ̀ kê kôom bugho fughu yo kɔʼso mò â Tsele ù te a fɛ aŋ ukwàʼ ŋkāa an Yɛ̀lusalɛ̀m. 22Ghɛ̀ fughuu ŋkɔʼso â fəgha kə̀là ghɛ̀ kwo yo, ghàʼ yia kɔʼso fəgha kə̀là ghàʼ kwo tən, tɔŋlo enyəa Zə̀ kə fə̀ to naŋa enyəa mbī lô tuw kə zəa am bàm e Tə̀dzûu. 23Nəghā e te e kpěe wò nù, zə m bùʼ kpè, ghî ghəla ghe kûu kɔʼso Zə̀ kò lo kɔʼso tsìghà Tsele ù te bòʼ ghùw wəla ù lo ghè wò an daʼa kə Zuʼ tə̀ Zɔlɔ to, tɔŋlo enyəa Tsele ù te kəŋô ŋgòʼ è àghì ghən gho alekɔʼso Wə̄n. 24Zə̀ kə̀ lo təzuʼ, ghî ghəla ghe kɔʼso wə̄n ki sugho alefughuu wə̄n â kɔʼso mò alo təzuʼ àsùghò alo èsəŋò.” 25Nughò ù te n dzɛ̀ â wə̄n enyəa, “Ŋ̀ kwo nû enyəa Bəghambī#4:25 Bəghambī:Ghùw wəla u bəghasə̄ mbī. bughòo nù (wəla ghe tɔŋlo enyəa à lò Kə̀lestò). Abugho ù bùgho, ù lo teso dzâa fughu wô ghàʼ â ghəa gho a dzə̀m.” 26Yɛso n dzɛ̀ â wə̄n enyəa, “À lo mugho wəla Ŋ̀ kə̀a wô ghəa gho â ghù.”
27Tsə̀təndə̄ghā tə Yɛso tə̀ n nyoʼn bùghòo sùghò an nə̀gha e te zo. Kwə̀ən kə̀ ŋ kɔʼ ghee enyəa ù sò kə̂aa ghəa gho ghèe wìzən a, ghùw ù ghee ŋ kè kuūwn bvʉ̀ā tsughu â wìzən vʉ enyəa, “Ghù lə̀ghaa kə̀ kwò?” Ŋkāa â Yɛso enyəa, “Ghù ghəa gho ghɛ̀ à wə̄n kəā aŋ kwò?” 28Wìzən vʉ n naŋatàʼà tsùghù fəgha kə mmùghu kə wə̄n, daŋso nùghù kwə̀n ndùw ènàʼ. Ù n ndùw dzɛ̀ ndùw â ghì ghò enyəa, 29“Bùgho ndǔw kǒʼ nlǒ ghùw ù lì lo, ù dzɛ̀ mɛʼɛ̀ tsughu ghəa ghə̀n à dzə̀m Ǹ lo mò mùghò ŋ ghəəŋ kòʼ tsə̀ghà am mbī ènyə kpe! À sò yìa lǒ wə̄n Bəghambī ŋkāa à yò dzə wə̄n à?” 30Ghe n zə̀ghà sə tsughu enaʼ, nùghò ndùw enyəa ghe ndûw kôʼ wə̄n.
31Tsə̀təndə̄ghā tə Yɛso tə̀ ŋ kuuwn lò ko fughu alebūʼ Yɛso â ghu ko, enyəa, “Wàdè, nəəŋ zə̀ ndùw fəgha ko?” 32Ù ŋ kuuwn dzàa tsùghuu ko â ghee enyəa, “Ŋ̀ ki nû fʉ̀ghàzəa ù li wo mò ghɛ̀ kwo yò tuw ko a te.” 33Tsə̀təndə̄ghā tə fì nughù bvʉ̌ʉn tsughu nû aŋ ghùe e ghee enyəa, “Ghùw ù lì sô yia a bughò fughu nu wə̄n â fə̀ghàzəa ko a?” 34Yɛso n dzɛ̀ â ghee enyəa, “Fəgha kaŋa kə̀ zəa kə lo alefwàʼ fəgha kəla ghùw wəla ù tum wô mugho ləghaa enyəa M̀ fwâʼ ghè kò, àsùghò alefwàʼ à swɛlɛ̀ səā ndûw fwàʼ kə te ko. 35Ghɛ̀ mbaŋa dzàa yò enyəa abugho a tam tsughu fʉgha wo a, a n dòʼò tsughu ko tə̀ndzɔŋɔ tə chìakò fʉghàzəa u mò è kwən a? Ǹ so Ŋ̀ kuūwn dzâa wò â ghɛ̀ enyəa, lɛɛn kaaŋ ndùw nlò luʼū to, ghɛ̀ koʼ aŋghəa fʉghàzəa ù lo a te mo wə ghaam kpē alekwə̄n a. 36Ghe tsəa nǔ ghùw wəla ù dùmlo êzə̄ŋ, vʉ̀a ù zùuŋ fʉghàzəa (ghî ghò) wəla ù doʼn təla wo, enyəa ghùw ù tǎa ghèe ghùwdùmlo ke e dzeŋe duʼnlo. 37Nu à lo êsəŋò an shwaʼ wəla ghe dzâa enyəa, ‘Ghùw ù lì tsəma nù, ù lì vʉ̀a ù nɛ̌ɛ.’ 38Mùgho mò ghɛ̀ tum sə enyəa ghɛ̀ nduw duūm kele fʉgha zəa wo mò ghɛ̀ kâ a te fwâʼ. Ghî à li ghə m fwàʼ nàŋa, ghɛ̀ yia a bughò ko alebùghò dûmlò.”
39Ndə̀mà tə ghì a Sàmalìa tə̀ m boo fùghù ndùw â Yɛso an shwaʼ u wîzən vʉ̀a ù bùghò dzɛ̂ enyəa, “Ù dzɛ̀ tsùghù ghəa ghə̀là Ŋ̀ ghəə̄ŋ kôʼ tsəgha am mbī a dzə̀m ènyə kpe.” 40A m bùghò ghî a Sàmalìa à bughò kôʼ wo wə̄n êzə̀, ghe m buʼ tsughu kə ghu â wə̄n enyəa ù dòʼòdoʼò tsughu ghèe ghee. Ù n dòʼò tsùghu ghèe ghee alo ntsuʼu m bə̀ghà. 41Taŋ zə̀ àghì zəla ghe fə̀ boō fughu â Yɛso ŋ kòom fə̀ghaan dùw tsə̀ghà è tsughu bòʼ shwaʼ u wə̄n wəla ghe zuw tsughuu. 42Ghe mo â wìzən vʉ enyəa, “À kòom bùʼ kà yò ko ghəa ghə̀là ghù mò dzɛ â ghàʼ a ghəŋlo enyəa ghàʼ boō fughu â wə̄n, ghùe e ghùe zaʼā zə n zuw, yia a boō tsughu enyəa tûw wə̄n kûm lò Bəghambī.”
Yɛso bǎaŋ wɛ̀ ù ghùw ù nè ù lì
43A m bùghò tsuʼ mì m bə̀ghà tsə̀ghà tsughu, Yɛso n zə̀ghàa tsughu luʼū chì, nùghù ndùw aŋ Galèlîi, 44#Mat 13:57; Mâk 6:4; Lûk 4:24 (nu ghuūghùe u Yɛso ù mafə̄ dzɛ̂ enyəa ghùwshʉ̀ghà ù Kə̀zə̀ kì dzə yo kɔʼso mò an naʼ e wə̄n). 45#Dzn 2:23A m bùghò ù bùghò aŋ Galèlîi, ghî a Galèlîi ghə̀ m kpènì wə̄n, ghe màʼa fə̀ lo mo ghe mafə̄ kôʼ ghəa ghə̀là ù fə̀ ghəə̄ŋ tsughu an Yɛ̀lusalɛ̀m aŋghəa ghe fə̀ zəā zə ko; tɔŋlo enyəa ghe fə̀ bɔŋ nduw sugho zə kə te ko.
46 #
Dzn 2:1-11
Ù ŋ kòom bùghò kpèʼe aŋ naʼ e Kanàn aŋ Galèlîi, a fiā ù fə fə̂nsò mùghù mò alo nlʉ̀. Êzə̄ŋ ghùw ù ne ù lì n lo a fughu mo wɛ dzaŋà nù, aŋ Kàpɛnùm. 47A m bùghò ghùw vʉ zuw tsughu enyəa Yɛso n zə̀ghàa wò Dzùdîa bùghò aŋ Galèlîi, ù n ndùw buʼ tsughu kəghu â Yɛso enyəa ù tsughuu bughò baāŋ kɔʼ wɛ ù wə̄n ù nùu, nu à fə̀ lo mo wɛ vʉ sô kǔu kòʼò ndùw nù. 48Yɛso n dzɛ̀ fughu â wə̄n enyəa, “Ghùw wɛʼɛ u mɔ̀ʼ yò aleboō fughu à gɔ̀ʼɔ̀ ko mò ghɛ̀ kôʼ tsùghù dzə̀ tsə̌a tə aghəa ghəla dzughu a lo alezūm aghî a te.” 49Ghùw ù ne vʉ n dzɛ̀ â Yɛso enyəa, “Mughu ù te, tsughu wò ko nû, e kwo wɛ waŋā e kpuw.” 50Yɛso dzɛ̀ â wə̄n enyəa, “Ndǔuw ko nû; wɛ wʉ̂a sò tùghuu nù.” Tûw vʉ n nì ndùw ko aŋghəa Yɛso dzɛ̌ â wə̄n, sə̀ kwù ndùw wə̄n â dzì. 51Aŋghəa ù tsughuu nduw, kɔ̀ɔ ŋ wə̄n mə̀ m kpeen wò ghèe ghee an dziī, kpènì ko â wə̄n enyəa, “Wɛ wʉ̂a n dzàŋ tùghū.” 52Ù fi bvʉ tsughu nû â ghee nə̄ghā zəla ù mò dzâŋ tughu kɔʼ a te. Ghe n dzɛ̀ â wə̄n enyəa, “À mò lò tò an tàm zə̀ zuuw e mɔ̀ʼ â tsə̀ tò a zʉɛɛ ghùe u te u mò zəghàa tsughu wə̄n.” 53Tselè ù wɛ̀ vʉ fi daŋso mòʼn wò nù enyəa zən nyoʼn lò nəgha zəla Yɛso mò dzɛ̂ wo â wə̄n enyəa, “Wɛ wʉ̂a sò tùghuu nù.” Ghuūghùe u wə̄n ghèe ghê ghî a wə̄n gho a dzə̀m an ndughu lô wə̄n n daŋso boo fughu tsughu â Zə̀ kò. 54Zən fə̌ êzəŋ ghəəŋ tsughu tə nəgha tə bə̀ghà ù dè tsughu sʉghà wò aŋghəa ù mò zəghàa wô Dzùdîa, bùghò aŋ Galèlîi.
လက္ရွိေရြးခ်ယ္ထားမွု
Dzɔ̌n 4: agq
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ