Matìù 2
2
Bègɨ̧̀ ko e kɨꞋɨ̀ eye waã wu
1Bɔ li mbia Yesò a Betèlèghêm àbâ àlaꞋ a Jùdià àfɨꞋa Elɔ̀d lè wu fɔ̧̀ la. Àfɨ̀Ꞌ a me wu bòt èyì ko bɔ dzə àbâ yu nyèm nàa sàꞋa la e kɨꞋɨ̀ a Jèlusalèm. 2Bɔ kɨꞋɨ ale, me biite nê, “Waã wu bɔ bi, tàa wu Fɔ̧̀ Bèjuê la nàa wa à? Baa ye kěnto̧ tò àbâ yu nyèm nàa sàꞋa la ka nkɨ̀Ꞌɨ̂ ewùꞋte atò.”
3Mbɨ̀Ꞌɨ̀ Elɔ̀d zə ànəê yaa la, àtsəa tò a bɨ, tà taꞋa bɔa tè bòt Jèlusalèm bàgème e mè mbɔ̀a àyɔb mɨ̧̂. 4Ale, tà ghɨ̀ bètǎt bèntsìà mèpɨ̧̀ Mbɔ̧ɔ̧mà nè bènyɨꞋtà mbɨ̧te Musì e bù̧ù̧tè. Tà bììte awɔb nê, “ÀdziꞋ yu bɔ li mbɔ̌ ndɨ bɔ̌ bi a Fɔ̧̀ wu Mbɔ̧ɔ̧mà nàa yɔꞋɔ etsàà la à wu neŋàà?” 5Bɔ bɨ̀ɨ̀lè nê, “Àbot à wu a Betèlèghêm a èbem àlaꞋ a Jùdià, mbɨ̀Ꞌɨ̀ ndɨ ndàꞋàtɔŋ Mbɔ̧ɔ̧mà li shɨŋ la. 6Nê,
‘KwàꞋ àwɔ̀ Betèlèghêm,
à ntsě àpfəa techɨɨle
ayɔɔ èpfəè bòt Judà, ngu nê,
Fɔ̧̀ naa li dzə abua yê
ewua àtsəa bòt bɔ̧,
bòt Izəèlȩê.’ ”
7Elɔ̀d zə ale, ntɔ bòt èyì bu à ntsèm, mbììte awɔb ngule àfɨ̀Ꞌ yu kěnto̧ fu ke ghɨ̂ saꞋ la. 8Tà ghɨ̀ ale, ntsàà àwɔb à Betèlèghêm, bɔ me ghǎ tà nê, “Bɨa ghǎ, bɨ nèètè nkɨ waã wu, bɨ yea tò, bɨ tsè shu am, mbɨ̀Ꞌɨ̀ maa ghǎ ewùꞋte atò mɨ̧̂.”
9-10Fɔ̧̀ wu làꞋ ale, bɔ dzəè mbà̧à̧ èlu̧. Mbɨ̀Ꞌɨ̀ bɔ̌ ngà la, kěnto̧ fu bɔ ghɨ̂ ndze àlaꞋ ayɔb la, ke me ghǎ a mbì lɔb, ènyit yɔb e bɔ̀ŋ, bɔ wùꞋtè àwɔb kwàꞋ ànyaꞋne. Ke ghà ale, ntɨ̧̀ɨ̧̀ a ègwet àdzìꞋ yu waã wu wu la. 11Ale, bɔ nyi a lob ndzè waã wu bɔ̂ nyɨ̌ vi Màlià, ŋɔ̀Ꞌne a si, ngùꞋtè atò, mbɔ̂ ngàꞋte bambě bɔb ntsì a goêl, bɔ̂ èwuu èlȩê #2:11 Bɔɔ ntɔ èwuu “Èlȩê waa” ane ndɨk nê frankincense. ko e bɔ àghaa ntsɔ̧̀ la, nè èghɨbə ko bɔ̀ɔ ntɔ nê məə #2:11 Bɔɔ ntɔ “Məə” ane ndɨk nê myrrh. la ŋǎ abua tò. 12Bɔ ghɨ̀ ale, bɔ̀ nɔ̀ŋke a si, Mbɔ̧ɔ̧mà kɨ̀Ꞌɨ̂ a ndzò̧ səèŋkè ètû̧ bɔb nê bɔ̀ ka tsi ngà abua Elɔ̀d. Mbɨ̀Ꞌɨ̀ bɔ zə ale la, bɔ tsiꞋi nɨ èlu̧ tsa ngwènè àlaꞋ ayɔb.
13ÀfɨꞋa bòt èyì bu e ghà la, wantu̧ Mbɔ̧ɔ̧mà kɨ̀Ꞌɨ̂ abua Jòsêb a ndzò̧ shu abua tò nê, “Lɔ̀Ꞌɔ a si nɨ̀ waã wu bɔ̂ nyɨ̌ vi ndùùlà ngà a Ejìb. Bɨa ghǎ bɨ tseke abàꞋ və tè àfɨꞋa mâ shu nê bɨ dzəa la. E shua anè nkàà nê Elɔ̀d nàà me kɨ waã wu ebùŋe.”
14Jòsêb zə ale, ndɔ̀Ꞌ a si nɨ̀ waã wu bɔ nyɨ̌ vi ètsəꞋ wu mbà̧à̧ èlu̧ Ejìb. 15Bɔ ghǎ abàꞋ və ale ntsèke tè Elɔ̀d li mpfə. A li ngua anè mbɨ̀Ꞌɨ̀ àghɨa Mbɔ̧ɔ̧mà li ngɨ̀ ndàꞋàtɔŋ vi shu la aa wu nkûŋ nê, “Mâ tɔ waã am nê tà dzə a Ejìb.”
16Mbɨ̀Ꞌɨ̀ Elɔ̀d tseke te ndze nê bòt èyì bu e fɨte avi la, ànəa mbɔŋ a lu̧u̧me atò kwàꞋ ànyaꞋne. Ale, tà tsà bòt nê bɔ̀ ghǎ a Betèlèghêm nè èdziꞋ ègème a ngèt və mbùŋè bɔmbâ̧ bàgème be lu̧u̧ èngùꞋebȩ yebe la, nè ebe kà zìꞋ ndù̧ èngùꞋebȩ yebe. Tà le me shu ale, nko laꞋ nê ye kwaꞋtè ebuꞋu ane àfɨ̀Ꞌ yu bòt èyì bu e le shua vi nê bɔ ye kěnto̧ fu la. 17A li ngɨ̀ anè, ànəa ndàꞋàtɔŋ Mbɔ̧ɔ̧mà, Jèlèmìà li shu la a wu nkûŋ. 18Tà li nê,
“Bɔ zə àtɔŋ ko a Lamà ndɨ̀à kwàꞋ ànyaꞋne,
wu Lachèl ndɨ̀à bɔ̧ bi bɔ pfəꞋte la.
Tà tu̧ nê wòt ka mbɔ̀te avi,
nkàà nê bɔ̧ bu e pfəꞋte bàgème.”
Bɔ lɔꞋa Ejìb ngwènè a Nazàlet
19ÀfɨꞋa Elɔ̀d li mpfə la, wantu̧ Mbɔ̧ɔ̧mà kɨ̀Ꞌɨ̂ a ndzò̧ abua Jòsêb mbɨ̀Ꞌɨ̀ tà bele a Ejìb la shu abua tò nê, 20“Lɔ̀Ꞌɔ a si nɨ̀ waã wu bɔ nyɨ̌ vi nɨŋ ngwènè a Izəèlȩê, nkàà nè bòt bu bɔ le wua nkɨ ebùŋe atò la e pfəꞋte.”
21Tà lɔ̀Ꞌɔ a si nɨ waã wu bɔ nyɨ̌ vi me ghǎ a Izəèlȩê. 22Ka àfɨꞋa Jòsêb zə nê Akèlaɔ̀ jɨ lob tǎt vi Elɔ̀d tè ntsiꞋi fɔ̧̀ Jùdià la, tà me bɔa e ghǎ abàꞋ və. Tà ghɨ̀ ale, Mbɔ̧ɔ̧mà mè nkɨ̀Ꞌɨ̂ a ndzò̧ ŋǎ tò nkɨ̀a, tà tsiꞋi e ghǎ ne àbâ àlaꞋ a Galìlî, 23me tseke àpfəa ko bɔ̀ɔ ntɔ nê Nazàlet la. À li ngɨ̀ anè mbɨ̀Ꞌɨ̀ àghɨa bèndàꞋàtɔŋ Mbɔ̧ɔ̧mà e li shu ane Fɔ̧̀ wu Mbɔ̧ɔ̧mà li ndzɔꞋ etsàà la, aa wu nkûŋ, nê, “Bɔɔ li tɔ atò nê wòt Nazàlet.”
လက္ရွိေရြးခ်ယ္ထားမွု
Matìù 2: mnf
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2006, Cameroon Association for Bible Translation and Literacy