Yela 5
5
Korowii nɔn kpɔe dɛ́ tɔ nɛn nɛɛ wesoŋa
Kooro Devid yel
1N Naa Korowii, cheɡ deŋne
dɛ́ no n wesoŋa,
dɛ́ no n hima
maa dɛ hime nɔ.
2No n wii maa wia
dɛɛ noe nɔ dɛ́ cha mɛ,
henee n kooro ne Korowii
maa dɛ tomɛ,
henee mɛɛ soŋe.
3N Naa Korowii, chɔɔ bɛlbwa
he dɛ no n taa.
Chɔɔbɔr n kpɔ n wesoŋa
dɛɛ bil he sie,
dɛɛ kpa ɡɛ haa chaŋ mɛ.#Mak 1:35
4N Naa Korowii, he sie
aa wechɔɡa ta lɛ,
nyubinikpeɡ tena
aa won ba he be.
5Mbarafo tena
aa won che he sie,
he hah nɛra
baa dɛ ɛ wechɔɡa.#Yel 1:5
6He dɛ chɔɡ nɛra
baa dɛ teŋe nyosone,
he hah nɛra
baa dɛ kpoo nɛra,
ne nɛra baa dɛ neɡre nɛra.
7Kɛ n te, he nyina
haa dɛ nyin mɛ kohona
nomanta,
mɛɛ won ba he Dea
dɛ́ ba ɡuŋi, dɛɛ tomɛ
he Dea waa do ɡoroŋ
ta ɔmee ne.
8N Naa Korowii,
n dɔma warɔ kɛrɛdɛ!
Tɔ n sie ń ɛ anɔ la
aa too he tea,
ɡel n na he wa dɛɛ teŋɛ a ta.
9Wobol aa le ba nyoo
dɛɛ ba bwa ɛ nyosone,
ba pɛla waa bwaa nɛra chɔɡa.
Nɛra neɡra dɛ́ kpoo ba
ɡboo lɔ ba nyu bini,
nɛra ɡboo baa neɡre.
10N Naa Korowii,
pa ba bole
dɛ́ tɛr ba deŋne,
ɡel ba ɡbaɡba waa
baa vɔrɔwa ɡure ba nyu ta.
Doŋ ba le he sie,
ba wechɔɡa kohona
ne ba deŋnekpeɡ
baa dɛ ɛɛ la wa.
11Gel nɛra baa chwaa
baa marɛ sie lɛ,
baa wonoo ɡo yela
saŋ bɛlbwa ba sie lɛ.
Kpɔ nɔn tɔ ba nɛ,
ásɛ nɛra he wa aa lɔ
ba bambile ta la sie lɛ.
12Kpela, Korowii
he ɡelɔ nɛra ba wa
aa toɡra na som.
He nyina haa dɛ nyin ba la
tɔ ba ɡbemɡbe,
dɛ bar ba cheme.
လက္ရွိေရြးခ်ယ္ထားမွု
Yela 5: mzw
အေရာင္မွတ္ခ်က္
မၽွေဝရန္
ကူးယူ
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fmy-MM.png&w=128&q=75)
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.