Génesis 9
9
Tumpa jei uyapota oï ikawi wae Noé pewarä
1Jare Tumpa uyapo ikawi wae Noé pe jare taɨ reta pe iñee rupi kuärái: “Piñemoña jeta jare pemɨtɨnee ɨwɨ piko waerä opaete kerupi rupi,” jei. 2“Amee ma kɨye opaete mbaemɨmba reta ɨwɨ rupiwa reta pe ukɨye waerä pewi. Penoi ma mbaepuere opaete mbaemɨmba reta re, wɨra reta re, pira ɨ rupiwa reta re, jare opaete ɨwɨ rupi uyewichɨ wae reta re,” jei chupe reta. 3“Tenonde yawe, opaete temitɨ retaño ikose perembiurä. Erëi añawe, temitɨ reta ndiwe, opaete mbaemɨmba reta isoo wi amee pewe perembiurä,” jei. 4“Erëi awɨye peu soo juwɨ rewe, echa’ä juwɨ re ko oï jekowe,” jei chupe reta.
5“Awɨye piyeyuka,” jei. “Mbaemɨmba uyuka yawe kuimbae, che tae pewe jokua mbaemɨmba umanota ko. Jare ipotawe kuimbae upuruyuka wae, che tae pewe umanota ko,” jei. 6“Ipotawe japicha uyuka wae, jae japicha reta tuyuka wi, echa’ä kuimbae ayapo che echa rami,” jei chupe reta.
7“Jayawe pe reta piñemoñata ko jeta kua ɨwɨ pe. Pemɨtɨnee ɨwɨ piko waerä opaete kerupi rupi,” jei Tumpa chupe reta.
8Jare Tumpa jei wi Noé jare taɨ reta pe kuärái: 9“Mase, ayapo aï pëti yemɨngeta ikawi wae nde ndiwe jare niñemoñaa reta ndiwe,” jei. 10“Jukuärái wi ayapo aï opaete oë chalana wasu wi nde ndiwe wae reta pe – jae ko wɨra reta, jare mbaemɨmba tëta rupiwa reta, jare mbaemɨmba ñana rupiwa reta,” jei. 11“Che jae aï pewe ndarau ye ma ambou ïru ɨporu wasu ambái waerä opaetei ɨwɨ pewa reta jare ɨwɨ wi,” jei chupe reta.
12“Ambɨyekuaata pewe pëti yembɨjaanga pikuaa waerä chemandúa aï jaeño mái pewa kua yemɨngeta re,” jei. 13“Ambɨyekuaata yɨɨ amapɨ̈tu re uikuaaka waerä kua yemɨngeta ɨwɨ pewa reta pe. 14Añawe wiwe ambɨyasoi yawe ɨwɨ amapɨ̈tu pɨpe, uyekuaata yɨɨ amapɨ̈tu re. 15Jayawe chemanduata aï kua yemɨngeta re ayapo opaete ɨwɨ pewa reta ndiwe wae re. Jare ndarau ye ma ambou ɨporu wasu ambái waerä opaete ɨwɨ pewa reta,” jei. 16“Aecha yawe yɨɨ amapɨ̈tu re oï wae, chemanduata kua yemɨngeta opa mbae wae re che, peTumpa, ayapo ma opaete ɨwɨ pewa reta ndiwe wae re,” jei. 17“Jukuärái ko kua yemɨngeta jaanga ayapo opaete ɨwɨ pewa reta ndiwe wae,” jei Tumpa Noé jare taɨ reta pe.
Noé jare taɨ reta
18Noé taɨ reta chalana wasu wi oë wae reta ko jee Sem, Cam jare Jafet. Cam ko jae Canaán tu. 19Kua mbapɨ Noé taɨ reta wi uñemoña pɨau ye opaete ɨwɨ rupi.
20Jayawe Noé umbɨpɨ uparawɨkɨ koo rupi jare uyapo uvaruparä. 21Jare uyapo vino uva pewa jare jou. Jare usawɨpo yawe, opa uyemboi jare uyapakua jae jëta wakapi pewa japɨpe.
22Joko wi Cam – jae ko Canaán tu – uecha tu Noé nani etei iko wae. Jare oë oka pe jare umɨmbeu tɨkeɨ reta pe. 23Jáeramo Sem jare Jafet uipɨsɨ pëti temimonde jare oñono reta iyatiɨ re. Jayawe uike uwata reta oo jaɨkue kotɨ umbɨyasoi reta waerä tu. Jare ikotɨ̈a umae reta awɨye waerä uecha reta tu nani etei iko wae.
24-25Joko wi Noé usareko jare ukuera usawɨpo wae wi. Jare uikuaa yawe taɨ taɨkuewaete Cam uyapo wae re, jei: “¡Tuiko yepɨpeyu pe Canaán iñemoñaa reta re! Jae reta täta rupi uyeyokuita Sem jare Jafet iñemoñaa reta pe,” jei.
26Jare Noé jei wi: “Tuyembutuichaka Tumpa ikoño mái wae jee. Jae ko Sem iTumpa. Jare Canaán ikota Sem pe uyeyokui waerä,” jei. 27“Jare Tumpa tumbɨjetaete Jafet iñemoñaa reta. Jae reta tuyekou kawi Sem iñemoñaa reta ndiwe. Jare Canaán ikota Jafet pe uyeyokui waerä,” jei Noé.
28Joko wi ɨporu wasu wiwe, Noé iko ïru 350 año ye. 29Jayawe Noé ime wɨreko 950 año yawe, umano.
လက္ရွိေရြးခ်ယ္ထားမွု
Génesis 9: gnwPB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2017, Ethnos360 (New Tribes Mission). All rights reserved.