Génesis 28
28
1Isaac kuetuꞌan juii Jacob, ko are juexin binchenchaon ixin sarrukji, jeꞌe kuetuꞌen: «Xruꞌin nchrii cananea thinchieꞌe ixin sarikoꞌo. 2Icha jian sathji ngain nunthe Padan-aram, nchianduꞌe ndudachriꞌa Betuel, ko darikoꞌo naa xeꞌen chrinia Labán. 3Ko Ndo Dio, Ndo chunda kainxin juachaxin, sinthanchaon ko sincheꞌe Ndo ixin sarichunda tsjé xaꞌan ko jaꞌa rukjan ndudaꞌa ngain naa nunthe anto jié. 4Ndo Dio sinthanchaon jaꞌa ko ni sachrjeninxin inchin binchenchaon Abraham, ko sayeꞌe thi nunthe jaꞌa riꞌi jai, ixin Ndo Dio ubajon Ndo ngain Abraham.»
5Ko jañaa Isaac ruaꞌan Jacob ngain nunthe Padan-aram ixin kjui bithuꞌe ngain Labán, xan choo Rebeca, janee Jacob ko Esaú.
Esaú kutheꞌe
6Esaú kunuꞌe are ndudee binchenchaon Jacob ko ixin sarruaꞌan ngain nunthe Padan-aram, ixin rukjee naa nchrii ixin rugekaꞌo ko kai ixin ndachro Isaac: «Darikoꞌa nchrii te ngain nunthe Canaán.» 7Ko Jacob bithikaon ndudee ko janee, ko sakjui ngain nunthe Padan-aram. 8Ko jañaa Esaú kunuꞌe ixin ndudee banchexruxinꞌa kexreen bancheꞌe nchri cananea, 9mexinxin sakjui ngain Ismael, xeꞌen Abraham, ko bekaꞌo Mahalat, xan choo Nebaiot, xeꞌen Ismael, ko mee bincheꞌe Esaú maski ubekaꞌo ikainxion nchri cananea.
Ndo Dio kununxiꞌin Jacob nthiꞌa Bet-el
10Jacob bachrjexin Beerseba ko sakjui ngain nunthe Harán. 11Ko are sajithji tatse thi̱e ngatja nthiꞌá, ko jeꞌe kuaa naa xro beꞌe nthiꞌa ko bekjon xro ko tabejua. 12Ko thi̱e mee kuxinxin ko bikon naa nthaa taninxin ni nui, thixinxin ngataꞌa nunthe ko diji ngajni ko bikon angeel Ndo Dio tetajiꞌin ko texinkajinxin ngain ntha mee. 13Ko thi thjexinxin ntha tajii Ndo Dio, ko ndachro Ndo: «Jaꞌan Nchaa, Diue ndudachriꞌa Abraham, ko Diue ndudaa Isaac. Ko thi nunthe tarrichritaꞌa, jikininxin nunthe jaꞌa ko ni sachrjeninxin. 14Ko ni sachrjeninxin jaꞌa tsutsjéxin na̱ inchin jinche jii ngain nunthe, ko ruchjekee na̱ nguii nunthe jiꞌi, nguii nu thi dachrjexin nchaꞌon, nu thi diataunxin nchaꞌon, nu kuꞌe ko nu nunthe, ko kain chujni nguii nunthe tsunchaon na̱ ixin jaꞌa ko thi ni sachrjeninxin. 15Ko jaꞌan sariꞌi ngajin ko sayakuꞌan nguii thi jaꞌa sakji, ko jaꞌan sinthaꞌa ixin jaꞌa rukjan siꞌi ngain nunthe jiꞌi inaa, ko jaꞌan sariꞌi ngajin ko sinthaꞌa kain thi jaꞌan rindathjo.»
16Ko Jacob are xingameꞌe ndachro: «Nduaxin nthiꞌi jii Ndo Dio, ko jaꞌan benunaꞌa.» 17Aro kai anto xraon ko ndachro: «¡Anto jié juasaaya jikininxin nunthe jiꞌi, ko ndua nthiꞌi nchianduꞌa Ndo Dio, ko nthiꞌi thi jixrangexin ngajni!»
18Ko nduexin anto nduuyo xingameꞌe Jacob, tse xro kuenkjon jaa ko kuengathjen xro ko kuinthjithe aceitee tho olivo ngataꞌa xro ixin xro yaa ruxraxaunxin Ndo Dio. 19Ko binchegiꞌin nunthe mee Bet-el, maski are saꞌo nunthe mee biꞌin Luz.
20Kuthimejan Jacob ndachro: «Ja̱ Suixin sarinda na ngain nthiana, ruchjana thi sine ko ruchjana luntho saringaꞌa, 21ko ja̱ Suixin sincheꞌe ixin rukjan na ngain nchianduꞌa ndudana ko xruꞌin tsuna, Suixin rukjan Nchana. 22Ko thi bakee xro ixin ruxraxaunxin Suixin, rukjan nchiandui, ko kain thi ruchjana, jaꞌan santsjenda thi thexin ngain thi ruchjana ixin ruchjaꞌa Suixin.»
လက္ရွိေရြးခ်ယ္ထားမွု
Génesis 28: plsNT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2017, Wycliffe Bible Translators, Inc. All rights reserved.