Ɔkɔ̀hɔ̀n-wá-bɔ̀ kɔ̀hɔ̀n hán 9
9
Sɔlɛ̀n kru crɔn
1Ɛnvra ndɔ lɔ mɛ̀n, Sɔlɛ̀n ke sɩ́ teze Ɛẅɛnwrɔn sɛ̀nkɛn-bɔ̀ lɔ y'owù gbàn hán. Nɛ́n hɔ̀n cɔ́ Ɔwɔ-cice-wrɔn cüìcüì 2kɩ nɛ dɔ́ yi kɛ̀ tán nɛ̀n ɛkɔrɛ̀-levri wrú, ô nɛ̀n bru Damasɛ̀n anmàn Wɔ-sɛ́n-wɔn hɔ̀n lɔ mɛ̀n, ô ke dú kɛ anwrɔn dú nanvrɛn, dú wúcɔ̀ mán wúyɔ̀, ke bɩ́ Ɛẅɛnwrɔn levri hô, nɛ̀n ẅɛn yɔ nɛ̀n vá Zherüzalɛmɛ̀n anmàn. 3Nɛ̀n dú ɛnlevri nɛ hɔ́n Damasɛ̀n anmàn, kɩ anmàn ndɔ lɔ nɛ bá yi ɛtɛ̀sɛ̀n, kɩ ɛnvra zri lɔ, ɛyri-kàn tɔ̀n léyi dú anhobɩ́ nvà nɔn, gbrɛ́n kɛ́n nɛ̀n ɔmùan. 4Nɛ̀n bore ɛnhibɩ́ kɩ nɛ̀n yá esùva tɔ̀n kɛ dɔ́ nɛ̀n le: “Sɔlɛ̀n, Sɔlɛ̀n, cɛci kruhú kɛ̂ ɛ kɔ́n mɛ̀n anhàà?” (9:4)
5Sɔlɛ̀n ke yrɛ le: “Antɔnwrɔn dú mɛ́n Ɛẅɛnwrɔn?” Kɩ esùva lɔ mrɛ́n ɔmùan le: “Mɛ̀n dú Zhezü léyi ɛ kɔ́n anhà nɔn. 6Tɛ́n tɔhú, brù anmàn lɔ, kɩ nanvrɛn lɔ yɛ lɛ dɔ́ mɛ́n eci léyi ke ji le ɛ̀ hán nɔn.” 7Sɔlɛ̀n yri-hɔ̀n-sɩ́-bɔ̀ lɔ, sannyɔn, ke sɩ́ cɔ́ ankà zriɛmɛ́n dɔ́ yri; yɔ yá esùva lɔ, tɛ́n yɔ sɩ́ kán ɔwrɔn zriɛmɛ́n. 8Sɔlɛ̀n dú ɛnhibɩ́ tɔhú kɩ gbɛ́ anvɛ̀, tɛ́n nɛ́n sɩ́ vru kán eci ẅì zriɛmɛ́n. Yɛ ẅɛn nɛ̀n ɛkɔrɛ̀ ye sɩ́ nɛ̀n Damasɛ̀n anmàn. 9Ɛbi anhɔ̀n nɛ́n sɩ́ kán ɛyri rɔa, kɩ nɛ̀n yɛ́ nɛ́n sɩ́ zî ɛci zriɛmɛ́n, nɛ́n sɩ́ mi ɛnshi.
10Damasɛ̀n anmàn lɔ ɛsɛ̀nkɛn-wrɔn tɔ̀n ndù ye bi Ananiasɛ̀n, Ɛẅɛnwrɔn tan nɛ̀n Ɔwɔ-mɛ̀n-yri-kàn kɩ kɛ dɔ́ nɛ̀n le: “Ananiasɛ̀n!” Nɛ̀n mrɛ́n ɔmùan le: “Nyàn mɛ̀n, Ɛẅɛnwrɔn.” 11Ɛẅɛnwrɔn kɛ dɔ́ nɛ̀n le: “Ɛ Hɔ́n zɛtɛ̀ lɔ ɛnlevri léyi nyrɔn nɔn wú, Zhüda wɔn lɔ mɛ̀n, è yrɛ Tarsɛ̀n wrɔn tɔ̀n léyi ye bi Sɔlɛ̀n nɔn. Ɛnvra ndɔ lɔ mɛ̀n nɛ̀n dú Ɔwɔ sɛ́n mɛ̀n 12kɩ, Ɔwɔ-yri-kàn mɛ̀n lɔ, nɛ̀n kán ɔwrɔn tɔ̀n léyi ye bi Ananiasɛ̀n bru anwɔn mɛ̀n kɩ di nɛ̀n ɛkɔrɛ̀ ɛwú, ô nɛ̀n vru nɛ̀n kán ɛyri.” 13Ananiasɛ̀n mrɛ́n ɔmùan le: “Ɛẅɛnwrɔn, anwrɔn bobrebe dɔ́ mɛ̀n ɔwrɔn ndɔ lɔ ankà kɩ dɔ́ mɛ̀n ɛgbàn lɔ fɛn léyi nɛ̀n hán v'ɛsɛ̀nkɛn-bɔ̀ Zherüzalɛmɛ̀n anmàn nɔn. 14Kɩ nɛ̀n vá ɛnu lɔ, Ɔwɔ-cice-bɔ̀ kɔrɛ̀-levriemɛ̀n, ô nɛ̀n ẅɛn anwrɔn léyi ke bɩ́ v'ebɩ́ lɔ nɔn.” 15Tɛ́n Ɛẅɛnwrɔn kɛ dɔ́ nɛ̀n le: “Ɛ̀ hɔ̀n, ɔmuhi mɛ̀n mrɛ́n ɔwrɔn ndɔ lɔ mɛ́n bɩ, kɩ nɛ lɛ hán ɛnhi wú anmàn ndɔ hɔ̀n mán y'ɛnnɛ̀ncüì hɔ̀n kè nyri m'ebɩ́, kɩ ɔmu zri lɔ de ke le dù tán Izraɛlɛ̀n fɛcüè nɔn. 16Mɛ́n dùku me le yé nɛ̀n ɛgbàn léyi nɛ lɛ kán m'ɛkruhú nɔn.” 17Zɛtɛn Ananiasɛ̀n nhɔ̀n. Nɛ̀n bru ɔwɔn lɔ mɛ̀n, nɛ̀n di Sɔlɛ̀n ɛkɔrɛ̀ ɛwú kɩ nɛ dɔ́ yi le: “Sɔlɛ̀n, nmàn-ẅì, Ɛẅɛnwrɔn Zhezü léyi srɔ́n mɛ́n esù ɛnlevri léyi e bɩ ɛ và nɔn, wá mɛ̀n ɔkɔhɔ̀n, ô è vru ɛ̀ sàn kán ɛyri, ô Ɛnhɛ́n Prɔnprɔn kɛ̀ và dú mɛ́n ɛmɛ̀n.” 18Ɛnvra zri lɔ ɛcàn-wrɔn-ci dú Sɔlɛ̀n anvɛ-ẅiemɛ̀n cüe kɩ nɛ̀n vru nɛ̀n kán ɛyri. Nɛ̀n tɔhu kɩ Ananiasɛ̀n wá nɛ̀n ɛnshi ɛnkru; 19Zɛtɛn nɛ̀n zî ɛci kɩ ecüì vru vá nɛ̀n edomɛ̀n.
Sɔlɛ̀n kɛ dɔ́ Ɔwɔ ankà Damasɛ̀n anmàn
Sɔlɛ̀n yɛ́ ɛnvra jan nɛ́n mán ɛsɛ̀nkɛn-bɔ̀ léyi dú Damasɛ̀n anmàn nɔn. 20Nɛ̀n bukru kpatakpata lɔ nɛ dɔ́ Ɔwɔ ankà Ɔwɔ-sɛ́n-wɔn hɔ̀n lɔ mɛ̀n kɩ nɛ dɔ̀ le Zhezü dú Ɔwɔ Ẅì. 21Anwrɔn hɔ̀n léyi kɛ yá n'ankà-dɔ̀ lɔ nɔn dú anvɛmɛ̀n-frɛ́n mɛ̀n kɩ ke yrɛ le: “Kɛ̂ kè sɩ̀ dù ɔwrɔn ndɔ lɔ de Zherüzalɛmɛ̀n anmàn lɔ kɛ hán anwrɔn hɔ̀n léyi ke bɩ́ Zhezü bɩ́, ɛgbàn shishi nɛ́n? Kɛ̂ nɛ̀n sɩ̀ kàn bìhì nɛ̀n và ɛnu lɔ, ô nɛ̀n ẅɛ̀n yɔ nɛ̀n hɔ̀n sɩ̀ Ɔwɔ-cice-bɔ̀ cüìcüì hɔ̀n lɔa?” 22Tɛ́n Sɔlɛ̀n ke yé tán ɛnvra lɔ fɛn le, nɛ̀n crɔn ɛnkruɛ: Zhüifɛ̀n-bɔ̀ léyi dú Damasɛ̀n anmàn nɔn, ke sɩ́ nyri ɔmu le yɔ lɛ hán yɔ mrɛ́n nɛ̀n ɔmùan, ɛnvra léyi ne yé yɔ le Zhezü dú Ebɩ̀die-wrɔn nɔn. 23Ɛnvra buriemɛ̀n, Zhüifɛ̀n-bɔ̀ krɔn ɔmùan, ô yɔ wri Solɛ̀n, 24tɛ́n Sɔlɛ̀n cɔ́ y'ɔmùan-krɔn-ankà lɔ yá. Yɛ nán anmàn sùgbàtà hɔ̀n lɔ ɛnnyran mán ɛcɛ̀n, ô ye wri nɛ̀n. 25Zɛtɛn Sɔlɛ̀n sɛ̀nkɛn-bɔ̀ lɔ bɩ́ nɛ̀n ɛnnyran ô kɛ̀ hán nɛ̀n nɛ̀n kàkɛ anmàn bùdrɛn mɛẅi, kɩ yɛ wá nɛ̀n ɛkɛ́ tɔ̀n mɛ̀n, yɛ hán nɛ̀n nɛ́n kàkɛ.
Sɔlɛ̀n dú Zherüzalɛmɛ̀n
26Ɛnvra léyi Sɔlɛ̀n bru Zherüzalɛmɛ̀n anmàn nɔn, ne ji ɛyri ô nɛ̀n hɔ̀n cɔ́ ɛsɛ̀nkɛn-bɔ̀ lɔ; tɛ́n yɔ lɔ fɛn yɔ dú ɛnjansuemɛ̀n, ɔmuhi yɔ sɩ́ bú tán ankaẅì le, Sɔlɛ̀n dú ɛsɛ̀nkɛn-wrɔn annanwɔrɛ tɔ̀n nɔn. 27Zɛtɛn Barnabasɛ̀n bɩ́ nɛ̀n, yi mɛhi, kɩ sɩ́ nɛ̀n ɔkɔ̀hɔ̀n-wá-bɔ̀ tɛ̀sɛ̀n. Nɛ dɔ́ yɔ ɔmu le Sɔlɛ̀n kán Ɛẅɛnwrɔn n'ɛnlevri sùnan mɛ̀n mán ɔmu le Ɛẅɛnwrɔn dɔ́ Sɔlɛ̀n ankà nɔn. Nɛ̀n vru nɛ dɔ́ yɔ ɔmu le, ankaẅì-bùtan mɛ̀n mán ɛsɛ́ mɛ̀n, Sɔlɛ̀n dɔ́ Ɔwɔ ankà Zhezü bɩmɛ̀n Damasɛ̀n anmàn nɔn. 28Bukru hɩ vra lɔ, Sɔlɛ̀n dú yɔ ɛmɛ̀n, nɛ hɔ̀n kɩ nɛ vá Zherüzalɛmɛ̀n anmàn, kɩ nɛ dɔ́ Ɔwɔ ankà esɛ́ mɛ̀n, Ɛẅɛnwrɔn bɩmɛ̀n. 29Nɛ́n mán Zhuifɛ̀n-bɔ̀ léyi kɛ vra grɛkɛ̀n nɔn, yɔ dɔ́ ankà kɩ yɔ wrɔ́n ecüì; tɛ́n yɔ tɛn yɔ ji nɛ̀n owri yri. 30Ɛnvra léyi nɛ́n mùan-ẅì hɔ̀n cɔ́ ankà lɔ yá nɔn, yɔ bɩ́ Sɔlɛ̀n yɔ hɔ́n Sezare anmàn, kɩ nanvrɛn lɔ, yɔ hán nɛ̀n, nɛ̀n hɔ́n Tarsɛ̀n anmàn. 31Zɛtɛn Ɔwɔ fɛcüè dú anwɔwɔmɛ̀n, Zhüde, Galile mán Samari kpɔsɔ wú; fɛcüè ndɔ lɔ kɛ ẅɛn ecüì kɩ dú edomɛ̀n ɛnhi-sɩemɛ̀n Ɛẅɛmwrɔn zìwú, nɛ sán sevri Ɛnhɛ́n Prɔnprɔn cüiemɛ̀n.
Ene cɔ́ ɛkɔrɛ̀
32Piɛrɛ̀n léyi ke ci ɛnhi wú anmàn lɔ fɛn nɔn, hɔ́n ɛnbì tɔ̀n ankaẅì-bùtan-ẅɛn-bɔ̀ léyi dú Lida anmàn nɔn, yɔ yri. 33Nɛ̀n cɔ́ ɔwrɔn tɔ̀n léyi ye bi Ene, dɛ́ sofà tɔ̀n wú ɛnnànwàn kru ɛẅirì, ɔmuhi nɛ̀n cɔ́ ɔkpɔcɔ́ lɔẅiɛ nɔn. 34Piɛrɛ̀n kɛ dɔ́ nɛ̀n le: “Ene, Zhezü Krisì kɛ kɔrɛ mɛ́n! È tɔhú, ô è serɛ vɛ́n sofà lɔ.” Ɛnvra zri lɔ Ene tɔhú. 35Lida anmàn-bɔ̀ lɔ fɛn mán yɔ hɔ̀n léyi dú Sarɔn nùwì-cɛ wú nɔn, kán nɛ̀n kɩ crɔn ɛnkru Ɛẅɛnwrɔn bɩmɛ̀n.
Dorkasɛ̀n rɔ́ vá ɔkɔrɛ-bɔ̀ mɛ̀n
36Zhafa anmàn lɔ, ankaẅì-bùtan nyɔnwrɔn tɔ̀n ndù ye bi Tabita. Ebi ndɔ lɔ grɛkɛ̀n brɛ̀ mɛ̀n lɔ, ye bi “Dorkasɛ̀n”, hɩ mɛ̀n kɛ dɔ̀ le ovú nɔ̀n léyi ye bi “esè” nɔn. Nɛ̀n dú ɛnvra lɔ fɛn anvrɛn hán mɛ̀n kɩ nɛ wá ɛmian-bɔ̀ ɛkɔrɛ̀. 37Hɩ vra lɔ nɛ̀n bore ɛnlɔẅiɛ mɛ̀n, kɩ nɛ́n wù. Ɛnvra léyi yɛ jrɔ́ nɛ̀n ɛnshi trɔ nɔn, yɛ hɛ́n nɛ̀n ɔwɔndà tɔ̀n mɛ̀n, anhyrɛmɛ̀n wɔn wú. 38Zhafa sɛ̀nkɛn-bɔ̀ ncɔ́ nyrì le Piɛrɛ̀n dú Lida anmàn léyi dú Zhafa tɛ̀sɛ̀n nɔn. Yɔ wá anwrɔn anhyrɛ̀ ɔkɔ̀hɔ̀n hɔ́n cɔ́ nɛ̀n, kɩ yɔ bɩ́ ɛkùyüre ndɔ lɔ yɔ hɔ́n sɩ́ nɛ̀n: “Bɔ́ sɛ́n mɛ́n, ɛ̀ và cɔ́ bɔ̀ zɛtɛ lɔ.” 39Piɛrɛ̀n cɔ́ yɔ, yɔ hɔ́n ɛnvra zri lɔ mɛ̀n. Ɛnvra léyi nɛ̀n bru nɔn, ye sɩ́ nɛ̀n ɔwɔndà léyi dú anhyrɛmɛ̀n wɔn wú nɔn mɛ̀n. Ngrɔn-wúyɔ̀ lɔ fɛn sɔnba nɛ̀n ɛtɛ̀sɛ̀n eyú wúemɛ̀n; yɔ yé nɛ̀n ɛwú ceci mán kotù hɔ̀n léyi Tabita hán ɛnvra léyi nɛ̀n dú ɔkɔrɛ-bɔ̀ mɛ̀n nɔn. 40Piɛrɛ̀n hán anwrɔn lɔ fɛn srɔ ɛntrɛ, shɛ́n annan-kruemɛ̀n kɩ sɛ́n Ɔwɔ. Zɛtɛn nɛ̀n crɛ ezì nɛ̀n kɛ́n edùwrú lɔ kɩ nɛ dɔ̀ le: “Tabita, tɔhú!” Tabita gbɛ́ anvɛ̀, kɩ ɛnvra léyi nɛ̀n kán Piɛrɛ̀n nɔn, nɛ̀n yɛ́. 41Piɛrɛ̀n ẅɛn nɛ̀n ɛkɔrɛ̀ kɩ wá nɛ̀n ɛkɔrɛ̀ nɛ̀n tɔhú. Zɛtɛn Piɛrɛ̀n bi ankaẅì-bùtan-ẅɛn-bɔ̀ mán ngrɔn-wúyɔ̀, kɩ bɩ́ Tabita yé yɔ ankɔrɛkɔrɛ mɛ̀n. 42Zhafa anmàn lɔ fɛn wú, ye nyri eci lɔ wɔɛ̀n nɔn, kɩ bobrebe bú Ɛẅɛnwrɔn ankà tán ankaẅì. 43Piɛrɛ̀n yɛ́ Zhafa anmàn nmɔ̀ɛn, ɔnɔ̀n-wru kɔhɔ̀n-hán-wrɔn tɔ̀n léyi ye bi Simɔn nɔn yri ɛbemɛ̀n.
လက္ရွိေရြးခ်ယ္ထားမွု
Ɔkɔ̀hɔ̀n-wá-bɔ̀ kɔ̀hɔ̀n hán 9: ƐAA03
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Alladian: Ɛmɛẅi ankà ankrànkràn © Alliance Biblique de Cote d'Ivoire, 2003.