Ɔkɔ̀hɔ̀n-wá-bɔ̀ kɔ̀hɔ̀n hán 6
6
Yɛ mrɛ́n anwrɔn ɔbɔ̀ɛn, ô kɛ̀ wá ɔkɔ̀hɔ̀n-wá-bɔ̀ ɛkɔrɛ̀
1Zɛtɛn hɩ vra lɔ mɛ̀n, ɛsɛ̀nkɛn-bɔ̀ bukru kɛ cüɛn, ankaẅì-bùtan-ẅɛn-bɔ̀ léyi dú grɛkɛ̀n-bɔ̀ nɔn, ke bɩ́ ɛmɛ̀nhyì ku anwrɔn hɔ̀n léyi kɛ vra ebre nɔn ɛwú: yɔ dɔ̀ le ɔngrɔn-wúyɔ hɔ̀n léyi dú grɛkɛ̀n-bɔ̀ fɛcüè lɔ mɛ̀n nɔn, ye sɩ́ wá yɔ esùva ɛnvra léyi, ɛnbɩ̀ lɔ fɛn, yɛ dɛ́ ɛci-zî-ci nɔn. 2Zɛtɛn ɔkɔ̀hɔ̀n-wá-bɔ̀ ɛvà-anhyrɛ̀ lɔ borɛ ɛsɛ̀nkɛn-bɔ̀ lɔ fɛn ɛkru, kɩ kɛ dɔ́ yɔ le: “Kè sɩ̀ zrɔ̀ tàn le bɔ̀ kɛ́n Ɔwɔ ankà-dɔ̀ bɔ̀ hɛ́n, ô bɔ̀ nyan ɛci-zî ankà. 3Hɩ le kruhú, anwrɔn-nɛ́n-muan-ẅì hɔ̀n, nyɛ́n mrɛ́n ny'ɛmɛ̀n lɔ, anwrɔn ɔbɔ̀ɛn léyi ke le dú anwrɔn anvrɛnvrɛn, hɩ Ɛnhɛ́n Prɔnprɔn mán ankà-nyrì yɩ́ edomɛ̀n, kɩ bɔ́ lɛ tán yɔ ɛci-zî kɔhɔ̀n lɔ. 4Ɔmu lɔ, bɔ́ le bɩ́ bɔ́ ɛnvra lɔ fɛn, bɔ̀ dú Ɔwɔ sɛ́n mɛ̀n mán Ɔwɔ ankà-dɔ́ mɛ̀n.” 5Fɛcüè mumù lɔ fɛn shri ankà lɔ bɩ. Zɛtɛn yɛ mrɛ́n Etiɛnɛ̀n léyi ankaẅì-bùtan mán Ɛnhɛ́n Prɔnprɔn yɩ́ edomɛ̀n, ɔmu zri lɔ yɛ mrɛ́n Filipɛ̀n, Prokɔrɛ̀n, Nikanɔr, Timɔn, Parmenasɛ̀n mán Nikola léyi dú Antiɔshɛ̀n-wrɔn, hɩ ɛnbɩ̀ɛhɛ́n kɛ sɛ́n Zhüifɛ̀n-bɔ̀ Wɔ nɔn ye bɩ. 6Zɛtɛn ye bɩ́ yɔ ye yé ɔkɔ̀hɔ̀n-wá-bɔ̀, sɛ́n tán yɔ kɩ yɔ di yɔ ankɔrɛ̀ ɛwú. 7Ɔwɔ ankà-dɔ̀ lɔ kɛ sán bonyi ɛyri lɔ fɛn. Ɛsɛ̀nkɛn-bɔ̀ lɔ kɛ sán cüɛn Zherüzalɛmɛ̀n anmàn, kɩ Ɔwɔ-bɔ̀ bobrebe sɩ́ y'edomɛ̀n ɛnhi tán ankaẅì-bùtan, Zhezü bɩmɛ̀n.
Etiɛnɛ̀n ẅɛn-vra
8Etiɛnɛ̀n léyi ecüì yɩ́ edomɛ̀n Ɔwɔ boafɔ̀n mɛ̀n nɔn, kɛ hán eci-woroan-ci mán anvɛmɛ̀n-frɛ́n-ci ɛvrivri fɛcüè wanzi. 9Zɛtɛn anwrɔn janbɔ̀ kɛ kɛ́n nɛ̀n ezì: yɔ dú ɛnvrakpà, Ɔwɔ-sɛ́n-wɔn-mɛ̀n mɛ̀n-bɔ̀, léyi ye bi “anwɔ̀n-bɔ̀ léyi cɔ́ ɔwrɔncüe nɔn”, hɩ vru dú Sirɛnɛ̀n mán Alɛksandri anmàn Zhüifɛ̀n-bɔ̀; anhyrɛmɛ̀n, Zhüifɛ̀n-bɔ̀ léyi dú Silisi mán Azi kpɔsɔ-wú-bɔ̀ nɔn. Yɔ mán Etiɛnɛ̀n mɛhi yɔ bukru yɔ wrɔ́n-ecüì. 10Tɛ́n yɔ sɩ́ kɛ́n nɛ̀n ezì rɔa, ɔmuhi nɛ dɔ́ ankà ankà-nyriemɛ̀n Ɛnhɛ́n Prɔnprɔn cüiemɛ̀n nɔn. 11Zɛtɛn yɔ di anwrɔn ɔwɔ̀ɛn ô yɔ dɔ̀ le: “Bɔ̀ yá nɛ̀n ɔmùan nɛ̀n dɔ́ ɔwora ankà nɛ̀n ku Mohizì mán Ɔwɔ ɛwú!” 12Yɔ yɩ́ fɛcüè, ɛcüìcüì-bɔ̀ mán ɛnyànmàn-gbànvri-ankà-yé-bɔ̀ edù, ô kè sɩ́ y'edomɛ̀n ɛwú. Zɛtɛn yɔ ku Etiɛnɛ̀n ɛwú, yɔ ẅɛn nɛ̀n kɩ yɔ sɩ́ nɛ̀n ankà-dɔ̀-trɔ-bɔ̀ mrɛ̀nci zìwú. 13Yɔ vru yɔ sɩ́ ɔyɔ̀n dalɛfuɛ-di-bɔ̀ kɛ̀ dɔ̀ le: “Ɔwrɔn ndɔ lɔ ke sɩ́ kɛ́n ɔmùan hɛ́n hán, n'ankà gbangbàn léyi nɛ dɔ́ ku bɔ́ ecice-wɔn prɔnprɔn mán Mohizì nyanmàn wú nɔn! 14Bɔ̀ yá nɛ̀n ɔmùan nɛ́n dɔ̀ le, Nazàrɛtɛ̀n-wrɔn Zhezü ndɔ lɔ, ke le gbe Ɔwɔ-cice-wɔn lɔ kɩ nɛ lɛ crɔn anwrɔnẅiemɛ̀n nyanmàn léyi Mohizì tán bɔ̀ nɔn.” 15Anwrɔn hɔ̀n léyi yɛ́ ankà-dɔ̀-trɔ-bɔ̀-mrɛ̀ncì-wɔn lɔ mɛ̀n nɔn, crɛ y'anvɛ̀ lɔ fɛn kɛ́n Etiɛnɛ̀n kɩ yɔ kán n'ezì lɔ ndù cá Ɔwɔ-kùyüre-wrɔn tɔ̀n zì hɔ́.
လက္ရွိေရြးခ်ယ္ထားမွု
Ɔkɔ̀hɔ̀n-wá-bɔ̀ kɔ̀hɔ̀n hán 6: ƐAA03
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Alladian: Ɛmɛẅi ankà ankrànkràn © Alliance Biblique de Cote d'Ivoire, 2003.