Ɔkɔ̀hɔ̀n-wá-bɔ̀ kɔ̀hɔ̀n hán 17
17
Pɔlɛ̀n mán Silasɛ̀n kɛ hɔ́n Tɛsalonikɛ̀n anmàn
1Yɔ ci Anfipolisɛ̀n anmàn mán Apoloni anmàn kɩ yɔ cɔ́ Tɛsalonikɛ̀n anmàn, nanvrɛn lɔ Zhüifɛ̀n-bɔ̀ ẅɛn Ɔwɔ-sɛ́n-wɔn tɔ̀n ndù. 2Hán ɔmu le dú n'edùci nɔn, Pɔlɛ̀n hɔ́n Ɔwɔ-sɛ́n-wɔn ndɔ lɔ mɛ̀n. Ɛnyanmán-bì kru anhɔ̀n, nɛ́n mán anwrɔn hɔ̀n léyi dú nanvrɛn lɔ nɔn, yɔ wrɔ́n ecüì Ɛwrú Prɔnprɔn hɔ̀n wú; 3nɛ dɔ́ yɔ kɩ ne yé yɔ le Ɛwrú Prɔnprɔn kɛ dɔ̀ le, ke ji le Ebɩ̀die-wrɔn lɔ kɛ kán ɛgbàn, ô kè dú owú-bɔ̀ mɛ̀n kɛ̀ vá ɔkɔrɛ-bɔ̀ mɛ̀n. Nɛ dɔ́ yɔ le: “Zhezü ndɔ léyi mɛ dɔ́ nyɛ̀n n'ankà nɔn, nɛ́n de nɛ̀n dú Ebɩ̀die-wrɔn lɔ nɔn.” 4Nukù-die-bɔ̀ lɔ ɛnjanbɔ̀ bú tán ankaẅì kɩ hɔ́n cɔ́ Pɔlɛ̀n mán Silasɛ̀n. Eci ndɔ lɔ de Grɛkɛ̀n-bɔ̀ bobrebe hɔ̀n léyi kɛ sɛ́n Ɔwɔ mán ebɩ́di wúyɔ̀ bobrebe hɔ̀n mán hán nɔn. 5Tɛ́n Zhüifɛ̀n-bɔ̀ kɛ kɔ́n ecüì-hi. Yɔ bɔrɛ ɛbrɔsà-bɔ̀ janbɔ̀ léyi yɔ cɔ́ anmàn drɛnmɔɛ́n mɛ̀n nɔn ɛkru, kɩ yɔ wá ɛdrɛ̀ sɩ́ fɛcüè mɛ̀n mán anmàn mɛ̀n. Yɔ hɔ́n Zhasɔn bɩ́ lɔ mɛ̀n ô yɛ ẅɛn Pɔlɛ̀n mán Silasɛ̀n yɔ sɩ́ fɛcüè zìwú. 6Ɔmuhi, yɔ sɩ̀ cɔ̀ yɔ nɔn, yɔ ẅɛn Zhansɔn mán anwrɔn-nɛ́n-muan-ẅì hɔ̀n jan yɔ sɩ́ anmàn-ẅɛn-bɔ̀ zìwú, kɩ yɔ di bobo yɔ dɔ̀ le: “Anwrɔn ndɔ hɔ̀n lɔ wá gbɔ̀gbɔ̀ ɛnhibù mumù lɔ wú, kɩ zɛtɛ̀ lɔ, yɔ vá ɛnu lɔ! 7Zhasɔn bɩ́ yɔ sɩ́ n'ebɩ́ lɔ mɛ̀n! Anwrɔn ndɔ hɔ̀n lɔ fɛn kɛ hán eci léyi kè sɩ̀ dù Ɛnnɛ̀ncüì Vri lɔ n'ɛkɔrɛ̀-zì-ci nɔn, ɔmuhi ye tro le ɛnnɛ̀ncüì nyantɛn ndù ye bi Zhezü nɔn.” 8Ankà-dɔ̀ ndɔ hɔ̀n lɔ wá fɛcüè mán anmàn-ẅɛn-bɔ̀ gbɔ̀gbɔ̀ edù. 9Zhasɔn mán anwrɔn ndɔ hɔ̀n lɔ di anmàn-ẅɛn-bɔ̀ ɔwɔ̀ɛn yakɛ ye teze yɔ.
Pɔlɛ̀n mán Silasɛ̀n dú Bere anmàn
10Ɛnvra léyi ɛnnyran gɔ̀n nɔn, anwrɔn-nɛ́n-muan-ẅì hɔ̀n hán Pɔlɛ̀n mán Silasɛ̀n hɔ́n Bere anmàn. Ɛnvra léyi yɔ cɔ́ nanvrɛn lɔ nɔn, yɔ hɔ́n Zhüifɛ̀n-bɔ̀ Wɔ-sɛ́n-wɔn lɔ mɛ̀n. 11Bere anmàn-bɔ̀ ẅɛn ɛcüɛn-borɛ anvrɛnvrɛn vrán Zhüifɛ̀n-bɔ̀ léyi dú Tɛsalonikɛ̀n anmàn nɔn; yɔ bɩ́ Ɔwɔ ankà-dɔ̀ lɔ ɛcüɛ̀n bobrebe mɛ̀n. Ɛnbi lɔ fɛn, yɔ krɛ́ Ɛwrú Prɔnprɔn hɔ̀n lɔ, ô yɔ nyan ke dú kɛ ankà zì de Pɔlɛ̀n kɛ dɔ̀ nɔn. 12Y'ɛmɛ̀n lɔ anwrɔn bobrebe srɔ ankaẅì-bùtan-ẅɛn-bɔ̀ kɩ, Grɛkɛ̀n-bɔ̀ mɛ̀n lɔ, wúyɔ̀ anvrɛnvrɛn bobrebe mán anwrɔn bobrebe bú tán ankaẅì. 13Tɛ́n ɛnvra léyi Zhüifɛ̀n-bɔ̀ léyi dú Tɛsalonikɛ̀n anmàn yá le Pɔlɛ̀n kɛ dɔ́ Ɔwɔ ankà Bere anmàn nɔn, yɔ vá Bere anmàn, yɔ wá gbɔ̀gbɔ̀ ɛyri, kɩ yɔ wá fɛcüè ankà. 14Zɛtɛn anwrɔn-nɛ́n-muan-ẅì hɔ̀n hán ɛnvra zri lɔ, Pɔlɛ̀n bɩ́ ecüe wú levri; tɛ́n Silasɛ̀n mán Timote yɛ́ Bere anmàn. 15Anwrɔn hɔ̀n léyi hɔ́n sɩ́ Pɔlɛ̀n nɔn, bɩ́ nɛ̀n hàn mán cɔ́ Atɛnɛ̀n anmàn. Zɛtɛn yɔ vru ɛmɛẅi yɔ hɔ́n Bere anmàn, yɔ bɩ́ Pɔlɛ̀n mùan-ankà yɔ hɔ́n sɩ́ Silasɛ̀n mán Timote; Pɔlɛ̀n ke ji le yɔ và yɔ cɔ́ nɛ̀n kpràkprà.
Pɔlɛ̀n dú Atɛnɛ̀n anmàn
16Ɛnvra léyi Pɔlɛ̀n dú Silasɛ̀n mán Timote ɛvrá mɛ̀n nɔn, nɛ̀n dú obòtò vriemɛ̀n ɔmuhi nɛ kàn le antɛ̀buri-Wɔ yɩ́ Atɛnɛ̀n anmàn lɔ nɔn. 17Pɔlɛ̀n mán Zhüifɛ̀n-bɔ̀, mán yɔ léyi yɔ sɩ̀ dù Zhüifɛ̀n-bɔ̀, hɩ yɔ sɛ́n Ɔwɔ nɔn, yɔ mɛhi yɔ wrɔ́n ecüì Ɔwɔ-sɛ́n-wɔn lɔ mɛ̀n, mán anmàn drɛ́nmɔɛn mɛ̀n, ɛnbì lɔ fɛn, yɔ mán anwrɔn hɔ̀n léyi yɔ cɔ́ nanvrɛn nɔn. 18Ankà-tro-bɔ̀ janbɔ̀ hɔ̀n léyi, ɔtɔ̀n ke yé le, ɔkoran ci-hán mán ɛnbɔrɛbru dú eci anvrɛnvrɛn, kɩ ɔtɔ̀n ke yé le, ɛnborɛbru mán ɛgbànkàn dú ɔwrɔnẅiemɛ̀n dùci, kɩ yɔ, anwrɔn d'anhyrɛ̀ lɔ, yɔ mán Pɔlɛ̀n mɛhi yɔ dɔ́ ankà. Anwrɔn janbɔ̀ ke yrɛ le: “Ankà tán de ɛdrɛ́-wrɔn ndɔ lɔ kɛ dɔ̀ nɛ́n?” Anwrɔn ndɔ hɔ̀n mrɛ́n ɔmùan le: “Bɔ tro le anwɔ wrù ankà de nɛ dɔ̀ nɔn”, ɔmuhi yɔ yá Pɔlɛ̀n kɛ dɔ́ Zhezü mán owúemɛ̀n-dù-frɔ́ ankà nɔn. 19Zɛtɛn yɔ bɩ́ nɛ̀n yɔ mɛhi yɔ hɔ́n anmàn mrɛ̀nci-bɔ̀ zìwú kɩ yɔ dɔ́ nɛ̀n le: “Ankà-yé wrù ndɔ lɔ ɛ tán nɔn, bɔ́ lɛ cɔ́ n'ɛmɛ̀n bɔ́ nyrìɛn? 20Ɛ hán bɔ̀ bɔ́ yá ankà vɛnvɛn, kɩ bɔ́ cüɛn ɔmu le bɔ̀ nyri n'ɛmɛ̀n.” 21Annanwɔrɛ mɛ̀n lɔ Atɛnɛ̀n anmàn-bɔ̀ lɔ fɛn mán nɛ́nnyàn-bɔ̀ hɔ̀n léyi dú yɔ ɛmɛ̀n nɔn dú ɛnvra lɔ fɛn ankà-dɔ́ mɛ̀n mán ankà wrù nukùdiemɛ̀n. 22Zɛtɛn Pɔlɛ̀n tɔhú nyɔn Ɛmrɛ̀n-ci-bɔ̀ wanzi kɩ kɛ dɔ̀ le: “Atɛnɛ̀n anmàn-bɔ̀, mɛ kán ɔmu le nyɛ́n dú anwrɔn hɔ̀n léyi ke bɩ́ Ɔwɔ ankà anvrɛnvrɛn eci lɔ fɛn mɛ̀n nɔn. 23Annanwɔrɛ mɛ̀n lɔ, ɛnvra léyi me ci ny'anmàn lɔ mɛ̀n, hɩ mɛ̀n nyán ny'Ɔwɔ-sɛ́n-ci hɔ̀n lɔ nɔn, kɩ mɛ̀n kán ye merɛ́n Ɔwɔ-cice-tɛbrɛ̀ tɔ̀n wú le: ‘Ɔwɔ léyi ye sɩ̀ nyrìɛn nɔn tɛn.’ Kɛ zrɔ, eci léyi nyɛ sɛ̀n, hɩ nyɛ́n sɩ̀ nyrìɛn nɔn, mɛ và mɛ̀n dɔ́ nyɛ̀n n'ankà. 24Ɔwɔ léyi hán ɛnhibù mán ɛci hɔ̀n lɔ fɛn léyi dú nɛ̀n ɛmɛ̀n nɔn, dú anhobɩ́ mán ɛnhi Ẅɛnwrɔn, kɩ nɛ̀n sɩ̀ sɔ̀n ebɩ́ Ɔwɔ-sɛ́n-wɔn hɔ̀n léyi anwrɔn ke kù nɔn mɛ̀n. 25Nɛ́n sɩ́ ji le anwrɔn kɛ wá nɛ̀n esùvá, ô yɔ tán nɛ̀n eci totɔtɔ̀n léyi dú eci nɔn, ɔmuhi nɛ́n de nɛ̀n tán anwrɔn hɔ̀n lɔ fɛn ɛwúvà-kɔrɛ̀, ɛndɔ̀nwrɔ̀n mán eci lɔ fɛn léyi wɔrɔ dù nɔn. 26Nɛ̀n bɩ́ ɔwrɔn zri nɛ̀n hán fɛcüè lɔ fɛn kɩ nɛ̀n hɛ́n yɔ ɛnhi mumù lɔ wú. Nɛ̀n tán yɔ ɛnvra ɛnvra ɛnnànwàn mɛ̀n, kɩ nɛ̀n yé yɔ ɔwrɔnwrɔn n'edúyri vɔ̀n. 27Nɛ̀n hán ɔmu lɔ, ô yɔ ji nɛ̀n, ô n'ejiemɛ̀n lɔ, yɔ ji ɛyri yɔ cɔ́ nɛ̀n. Annànwɔrɛmɛ̀n lɔ, Ɔwɔ kè sɩ̀ dù esù she ɔwrɔnwrɔn tɛ̀sɛ̀n, 28ɔmuhi:
‘N'ɛmɛ̀n de bɔ́ cɔ́ ɛwúvà, bɔ́ crɛ bɔ́ edomɛ̀n, kɩ bɔ́ dù nɔn.’
Ndɔ lɔ de ny'owrú-merɛ́n-cüɛ̀krɛ́-bɔ̀ mán kɛ dɔ̀ nɔn:
‘Bɔ mán bɔ́ dú n'ɛẅì hɔ̀n.’
29Ɔmuhi bɔ́ dú n'ɛẅì hɔ̀n nɔn, ke sɩ́ ji le bɔ́ tro le Ɔwɔ dù cá ansɩ̀kɛ tɛ̀buri-Wɔ, ɔkùa mán obù picɛ̀ léyi ɔwrɔnẅì ankà-tro mɛ̀n lɔ, ẅɛn srɔ Ɔwɔ nɔn. 30Tɛ́n Ɔwɔ ke sɩ́ vru nyan ɛnvra hɔ̀n léyi anwrɔnẅì dú ɔbrɔ̀sà mɛ̀n, tɛ́n, ne bi yɔ zɛtɛ̀ lɔ, yɔ lɛ fɛn, ɛyri lɔ fɛn, yɔ crɔn y'eci-hán-ci. 31Ɔmu lɔ de nɛ̀n wá ɛnbì léyi ne le ci ɛnhibù mumù lɔ fɛn ɛmrɛ̀n ɛnyrɔnnan mɛ̀n, ɔwrɔn tɔ̀n léyi nɛ̀n mrɛ́n nɛ́n bɩ nɔn n'ebɩ́mɛ̀n. Nɛ̀n hán tán anwrɔn lɔ fɛn nyrì, kɩ nɛ̀n hán ɔwrɔn ndɔ lɔ dú ɔwú-bɔ̀ mɛ̀n vá ɔkɔrɛ-bɔ̀ mɛ̀n!” 32Ɛnvra léyi yɔ yá Pɔlɛ̀n kɛ dɔ́ owúemɛ̀n-dù-frɔ́ ankà nɔn, anwrɔn janbɔ̀ kɛ hán nɛ̀n ɛnhyürɛ̀ kɩ, ndɔ hɔ̀n kɛ dɔ̀ le: “Bɔ́ le die mɛ́n nukù ankà ndɔ lɔ wú ɛnbì nyantɛn.” 33Ɔmu lɔ de Pɔlɛ̀n cɔhɔ́ y'anmàn lɔ nɔn. 34Ɔmu tɛ̀kɩ, anwrɔn janbɔ̀ ẅɛn ankaẅì-bùtan kɩ kɛ́n Pɔlɛ̀n ɛsɛ̀n: y'ɛmɛ̀n lɔ, yɛ cɔ́ Deni léyi dú ɛmrɛ̀n-ci-wrɔn tɔ̀n, y'ɛkruborɛ yri lɔ, ɛnnyɔnwrɔn tɔ̀n léyi ye bi Damari mán anwrɔn nyantɛn hɔ̀n nɔn.
လက္ရွိေရြးခ်ယ္ထားမွု
Ɔkɔ̀hɔ̀n-wá-bɔ̀ kɔ̀hɔ̀n hán 17: ƐAA03
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Alladian: Ɛmɛẅi ankà ankrànkràn © Alliance Biblique de Cote d'Ivoire, 2003.