Ɔkɔ̀hɔ̀n-wá-bɔ̀ kɔ̀hɔ̀n hán 15
15
Zherüzalɛmɛ̀n Wɔ-fɛcüè
1Anwrɔn jan dú Zhüde kpɔsɔ wú vá Antiɔshɛ̀n anmàn kɩ bukru ke yé yɔ muan-ẅì hɔ̀n ankà-yé ndɔ lɔ: “Nyɛ́n sɩ̀ cɔ́ ɛnkru-kɔrɛ̀ ke dú kɛ ye sɩ̀ wì nyɛ̀n wúcɔ̀-domɛ̀n hán ɔmu le Mohizì nyanmàn wá tán nɔn.” 2Pɔlɛ̀n mán Barnabasɛ̀n mɛhi kè sɩ̀ shrìɛ kè bɩ̀ ankà ndɔ lɔ kɩ ɛcüìwrɔn vri tɔ̀n bru yɔ angranmɛ̀n ankà ndɔ lɔ kruhú. Zɛtɛn yɛ wá le Pɔlɛ̀n, Barnabasɛ̀n mán Antiɔshɛ̀n anmàn-bɔ̀ jan kɛ lɛ hɔ́n Zherüzalɛmɛ̀n anmàn, ô yɔ cɔ́ ɔkɔ̀hɔ̀n-wá-bɔ̀ mán ɛcüìcüì-bɔ̀ yɔ dɔ́ ankà ndɔ lɔ. 3Ɔwɔ-fɛcüè-bɔ̀ wá yɔ ɛkɔrɛ̀ yɔ nɛ̀nnyanmàn hɔ̀n lɔ mɛ̀n. Yɔ ci Fenisi mán Samari kpɔsɔ wú, yɔ dɔ́ ɔmu le anwrɔn hɔ̀n léyi kè sɩ̀ dù Zhüifɛ̀n-bɔ̀ nɔn, crɛ ezì kɛ́n Ɛẅɛnwrɔn nɔn: ɛmɛẅi ankà ndɔ lɔ tán anwrɔn-nɛ́n-muan-ẅì hɔ̀n lɔ, pɔ̀püɛ̀-brà vri. 4Ɛnvra léyi yɔ bru Zherüzalɛmɛ̀n anmàn nɔn, Ɔwɔ-fɛcüè-bɔ̀ ɔkɔ̀hɔ̀n-wa-bɔ̀ mán ɛcüìcüì-bɔ̀ ẅɛn yɔ anvrɛnvrɛn, kɩ yɔ dɔ́ yɔ eci léyi Ɔwɔ cí y'ɛmɛ̀n hán nɔn. 5Tɛ́n Ɔwɔ-nyanmàn-sùva-wá-bɔ̀ jan léyi srɔ ankaẅì-bùtan-ẅɛn-bɔ̀ nɔn, bɩ́ ankà kɩ kɛ dɔ̀ le: “Ke ji le ankaẅì-bùtan-ẅɛn-bɔ̀ léyi kè sɩ̀ dù Zhüifɛ̀n-bɔ̀ nɔn, kè wí wúcɔ̀-domɛ̀n, ô yɔ wá Mohizì nyanmàn lɔ.” 6Ɔkɔ̀hɔ̀n-wá-bɔ̀ mán ɛcüìcüì-bɔ̀ borɛkru, ô kɛ̀ crɛ́n ankà ndɔ lɔ mɛ̀n. 7Ɛnvra léyi yɔ wrɔ́n ecüì sheshe trɔ nɔn, Piɛrɛ̀n bɩ́ ankà-dɔ̀ kɩ kɛ dɔ̀ le: “Anwrɔn-nɛ́n-muan-ẅì hɔ̀n, nyɛ́n nyri ɔmu le ɛnvra sheshemɛ̀n de ny'ɛmɛ̀n lɔ, Ɔwɔ mrɛ́n mɛ̀n bɩ, ô mɛ̀n dɔ́ anwrɔn hɔ̀n léyi ke sɩ̀ dù Zhüifɛ̀n-bɔ̀ nɔn, Ɛmɛẅi ankà Ankrankran lɔ, ô yɔ cɔ̀ yɔ yá, ô yɔ ẅɛn ankaẅì-bùtan. 8Kɩ Ɔwɔ léyi nyri anwrɔnẅì ɛnbɔrɛ mɛ̀n ankà-tro nɔn, yé le nɛ̀n bɩ́ yɔ kɩ nɛ̀n tán yɔ Ɛnhɛ́n Prɔnprɔn hán ɔmu le nɛ̀n tán bɔ́ mán nɔn. 9Nɛ̀n sɩ̀ mrɛ́n ɔwrɔn zriɛmɛ́n nɛ̀n tèze hɛ̀: nɛ̀n fi y'ɛnbɔrɛ lɔ, ɔmuhi yɔ ẅɛn ankaẅì-bùtan nɔn. 10Zɛtɛn zɛtɛ lɔ, ecitan kruhú kɛ nyɛ wɔɛn Ɔwɔ nyɛ nyan, kɩ nye ji nyɛ́n wɔrɔ ankaẅì-bùtan-ẅɛn-bɔ̀ léyi kè sɩ̀ dù Zhüifɛ̀n-bɔ̀ nɔn, ɛnlowru léyi nyɛ́n nancüì hɔ̀n mán nyɛ́n mumù nyɛ́n sɩ̀ wɔrɔ rɔ́ nɛ́n? 11Tɛ́n bɔ́ nyri ɔmu le, Ɛẅɛnwrɔn Zhezü boafɔ̀n mɛ̀n de bɔ̀ cɔ́ ebɩdie zri lɔ hán yɔ hɔ́ nɔn.”
12Zɛtɛn, fɛcüè lɔ fɛn kɛ́n ɔmùan hɛ́n kɩ ye die Barnabasɛ̀n mán Pɔlɛ̀n nukùɛ kɛ dɔ́ anvɛmɛ̀n-frɛ́n-ci mán eci-woroan-ci hɔ̀n lɔ fɛn léyi Ɔwɔ ci y'ɛmɛ̀n hán anwrɔn hɔ̀n léyi kè sɩ̀ dù Zhüifɛ̀n-bɔ̀ nɔn. 13Ɛnvra léyi yɔ dɔ́ ankà trɔ nɔn, Zhakɛ̀n bɩ́ ankà-dɔ̀ kɩ kɛ dɔ̀ le: “Anwrɔn-nɛ́n-muan-ẅì hɔ̀n, nyɛ́n die mɛ̀n nukùɛ! 14Simɔn dɔ́ ɔmu le, ɛnkrubɔmɛ̀n lɔ, Ɔwɔ wá anwrɔn hɔ̀n léyi kè sɩ̀ dù Zhüifɛ̀n-bɔ̀ nɔn esùvá, ô nɛ̀n mrɛ́n y'ɛmɛ̀n lɔ, fɛcüè tɔ̀n léyi ke le dú nɛ tɛn nɔn nɛ̀n bɩ. 15Kɩ Ɔwɔ-mùanwú-ankà-dɔ́-bɔ̀ ankà-dɔ̀ hɔ̀n lɔ, kè dú nzri, hɩ mán ankà ndɔ lɔ mɛhi, ɔmuhi Owrú Prɔnprɔn kɛ dɔ̀ le:
16‘Ɛẅɛnwrɔn kɛ dɔ̀ le, hɩ mɛẅi lɔ, me le vru mɛ̀n và,
ô mɛ̀n sàn ku Davidɛ̀n wɔn léyi gbe nɔn,
me le bɩ́ n'ɛci hɔ̀n léyi jrɛ́ cüe nɔn
kɩ mɛ lɛ sàn nyrɔn ɔwɔn lɔ.
17Zɛtɛn anwrɔnẅì lɔ fɛn kɛ lɛ ji Ɛẅɛnwrɔn,
hɛ̀ɛ̀, ɛnhi wú anmàn lɔ fɛn léyi mɛ́n bɩ, ô kè dú mɛ tɛn nɔn.
Nyàn ankà léyi Ɛẅɛnwrɔn kɛ dɔ̀,
18nɛ́n léyi nɛ̀n hán ye nyri n'ankà-tro ci-hán ɛnvra sheshemɛ̀n nɔn.’
19Zhakɛ̀n vru kɛ dɔ̀ le, hɩ le kruhú de mɛ cüɛ̀n le, ye bɩ́ di anwrɔn hɔ̀n léyi kè sɩ̀ dù Zhüifɛ̀n-bɔ̀, hɩ kɛ kɛ́n Ɔwɔ ɛsɛ̀n nɔn ejüe. 20Tɛ́n bɔ̀ merɛ́n yɔ owrú bɔ̀ dɔ́ yɔ le, yɔ bɩ́ rá ɛnbramɛ̀n nɔ̀n léyi ye ce antɛ̀-buri-Wɔ nɔn, yɔ bɩ́ kɛ́n eci gbàngbàn ci-hán ɛsɛ̀n, ô yɔ bɩ́ rá annɔ̀n hɔ̀n léyi ye sɩ̀ wì esùva hɩ ye wri antamɛ̀n nɔn, yɔ bɩ́ mi ɔnɔ̀n krɛ̀ mán. 21Ɔmuhi, ɛnbìɛhɛ̂n vra lɔ, anwrɔn kɛ dɔ́ Mohizì nyànmàn ankà anmàn lɔ fɛn mɛ̀n, kɩ yɛ krɛ́ ɛnyànmàn wrú lɔ ɛnyanmán-bì lɔ fɛn Ɔwɔ-sɛ́n-wɔn hɔ̀n lɔ mɛ̀n nɔn.”
Owrú léyi ye yüre ankaẅì-bùtan-ẅɛn-bɔ̀ léyi kè sɩ̀ dù Zhüifɛ̀n-bɔ̀ nɔn
22Zɛtɛn ɔkɔ̀hɔ̀n-wá-bɔ̀ mán ɛcüìcüì-bɔ̀ mán Ɔwɔ fɛcüè-bɔ̀ lɔ fɛn wá le yɛ mrɛ́n anwrɔn janbɔ̀ y'ɛmɛ̀n lɔ, ô yɛ wá yɔ ɔkɔ̀hɔ̀n, yɔ mán Pɔlɛ̀n mán Barnabasɛ̀n yɔ hɔ́n Antiɔshɛ̀n anmàn. Yɔ mrɛ́n Zhüdɛ̀n léyi ye bi Barsabasɛ̀n mán Silasɛ̀n, yɔ anwrɔn anhyrɛ̀ lɔ, yɔ ẅɛn ɛkɔrɛ̀-levri anwrɔn-nɛ́n-muan-ẅì hɔ̀n mɛ̀n. 23Nyàn owrú léyi yɔ merɛ́n yɔ tán yɔ, yɔ hɔ̀n nɔn:
“Ɔkɔ̀hɔ̀n-wá-bɔ̀, mán ɛcüìcüì-bɔ̀, nyɛ́n muan-ẅì hɔ̀n ke bi nyɛ̀n nyan; nyɛ́n léyi nyɛ́n sɩ̀ dù Zhüifɛ̀n-bɔ̀, hɩ nyɛ́n dú Antiɔshɛ̀n anmàn, Siri mán Silisi kpɔsɔ wú nɔn. 24Bɔ̀ yá le anwrɔn dú bɔ́ anmàn nvà, wá nyɛ̀n ejüe, ku nyɛ̀n ɛnkrɛ̀ta y'ankà-dɔ́ mɛ̀n. Bɔ̀ sɩ̀ tán yɔ ɛkɔrɛ̀-levri zriɛmɛ́n ankà ndɔ lɔ wú. 25Hɩ le kruhú de ɔmùan-krɔn mɛ̀n lɔ, bɔ̀ mrɛ́n anwrɔn bɔ̀ yüre nyɛ̀n. Yɔ lɛ hɔ̀n sɩ́ bɔ́ nyran-anvrɛn hɔ̀n Barnabasɛ̀n mán Pɔlɛ̀n 26léyi vá y'ɛwúvà zrɛ́n yri, bɔ́ Ɛẅɛnwrɔn Zhezü-krisì kɔhɔ̀n hán lɔ mɛ̀n nɔn. 27Bɔ́ yüre nyɛ̀n Zhüdɛ̀n mán Silasɛ̀n léyi kɛ lɛ dɔ́ nyɛ̀n yɔ mumù ankà léyi bɔ̀ merɛ́n owrú lɔ mɛ̀n nɔn. 28Annànwɔrɛ mɛ̀n lɔ bɔ́ mán Ɛnhɛ́n Prɔnprɔn mɛhi bɔ̀ wá le bɔ́ sɩ̀ tán nyɛ̀n ɛnlowru zriɛmɛ́n nyɛ́n wɔrɔ ke dú kɛ kè sɩ̀ dù eci-hán-ci hɔ̀n léyi ke ji le nyɛ̀n ẅɛ̀n nyɛ́n hɛ́n hɩ dú eci krugbɔ́ nɔn: 29ye bɩ́ rá annɔ̀n léyi ye ce antɛ̀-buri-Wɔ nɔn; ye bɩ́ rá ɛnkrɛ̀; ye bɩ́ rá ɛnɔ̀n léyi ye wri antamɛ̀n nɔn; ye bɩ́ hán eci gbàngbàn. Nyɛ́n wá ny'edomɛ̀n esùvá ɛci ndɔ hɔ̀n lɔ fɛn yɔ hán tɛ̀sɛ̀n. Anwrɔn-nɛ́n-muan-ẅì hɔ̀n mɛ̀n, bo bi nyɛ̀n nyan!” 30Zɛtɛn yɛ tán ɔkɔ̀hɔ̀n-wá-bɔ̀ léyi yɛ mrɛ́n nɔn ɛkɔrɛ̀levri bɩ́ Antiɔshɛ̀n anmàn levri nhɔ̀n. Yɔ bɔrɛ ankaẅì-bùtan-ẅɛn-bɔ̀ lɔ fɛn ɛkru kɩ yɔ tán yɔ owru léyi ye merɛ́n nɔn. 31Yɛ krɛ́ owrú lɔ kɩ anwrɔn lɔ fɛn dú pɔpüɛ̀ mɛ̀n, edùyi ankà léyi dú nɛ̀n ɛmɛ̀n nɔn kruhú. 32Zhüdɛ̀n mán Silasɛ̀n mumù léyi dú Ɔwɔ-mùanwú-ankà-dɔ́-bɔ̀ nɔn dɔ́ anwrɔn-nɛ́n-muan-ẅì hɔ̀n lɔ ankà sheshe, ô kɛ̀ tán yɔ edùyi mán ecüì ankàẅì-bùtan mɛ̀n. 33Yɔ dú nanvrɛn lɔ ɛnvra cá, zɛtɛn anwrɔn-nɛ́n-muan-ẅì hɔ̀n sán ɛnlevri wɔwɔ tán yɔ kɩ yɔ vru ɛmɛẅi yɔ hɔ́n cɔ́ anwrɔn hɔ̀n léyi wá yɔ ɔkɔ̀hɔ̀n nɔn. [34Tɛ́n Silasɛ̀n wá le nɛ lɛ yɛ́ nanvrɛn anmàn lɔ.] 35Tɛ́n, pɔlɛ̀n mán Barnabasɛ̀n yɛ́ Antiɔshɛ̀n anmàn. Yɔ mán anwrɔn brobebe nyantɛn mɛhi, yɔ yé kɩ yɔ dɔ́ Ɛẅɛnwrɔn mùanwú-ankà.
Pɔlɛ̀n mán Barnabasɛ̀n gbɛ́ angramɛ̀n ɔmùan
36Ɛnvra jan vacì Pɔlɛ̀n kɛ dɔ́ Barnabasɛ̀n le: “Bɔ̀ vru ɛmɛẅi bɔ̀ hɔ̀n bɔ̀ nyan anwrɔn-nɛ́n-muan-ẅì hɔ̀n léyi dú anmàn hɔ̀n lɔ fɛn léyi bɔ̀ dɔ́ Ɛẅɛnwrɔn ankà, ô bɔ̀ nyan ɔmu le yɔ dù nɔn.” 37Barnabasɛ̀n ke ji kè bɩ́ Zhan léyi ye bi Markɛ̀n nɔn, kɛ̀ cɔ́ yɔ mɛhi yɔ hɔ̀n; 38tɛ́n Pɔlɛ̀n kè sɩ̀ shrìɛ, ɔmuhi Markɛ̀n teze yɔ Panfili kpɔsɔ wú, kɩ nɛ̀n sɩ̀ vrù hɔ̀n sɩ̀ yɔ y'ɔkɔ̀hɔ̀n hán lɔ mɛ̀n nɔn. 39Yɔ ẅɛn ecüìwrɔn vri tɔ̀n, hán tán kɩ yɔ gbɛ́ angranmɛ̀n ɔmùan. Barnabasɛ̀n bɩ́ Markɛ̀n, kɩ yɔ bɩ́ ɛhɛ̀ yɔ hɔ́n Shiprɛ̀n hi wú, 40tɛ́n pɔlɛ̀n mrɛ́n Silasɛ̀n nbɩ kɩ ɛnvra léyi anwrɔn-nɛ́n-muan-ẅì hɔ̀n bɩ́ yɔ wá Ɛẅɛnwrɔn antamɛ̀n nɔn, yɔ hɔ̀n. 41Yɔ ci Siri mán Silisi hi-nan wú kɩ yɔ wá Ɔwɔ-fɛcüè-bɔ̀ ecüì edù, ô ankaẅì-bùtan kɛ̀ ẅɛn yɔ ecüì.
လက္ရွိေရြးခ်ယ္ထားမွု
Ɔkɔ̀hɔ̀n-wá-bɔ̀ kɔ̀hɔ̀n hán 15: ƐAA03
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Alladian: Ɛmɛẅi ankà ankrànkràn © Alliance Biblique de Cote d'Ivoire, 2003.