Wambeela 5
5
Makolo awale wambeela Adamu ofiyedha Nowe
1Ola mwaha woweelengiwa wa makolo wambeela Adamu: Mulugu vampaddusiliiye muthu, ahimusasanya oofwanafwana ni oliye. 2Ahimpaddusa mulobwana ni mwihiyana. Vaapaddusiliiye, ahaareeliha, waathwa ndina nowi <<muthu>>.
3Adamu aganna yaaka zana ni yaaka makumi maraaru (130), ahimbala mwaanaye oofwanafwana ni ooligana ni oliye, vano ahimuthwa ndina naaye Seti. 4Agambalile Seti, Adamu ahimala yaaka mazana matanu namaraaru (800), vano ahaabala ahima amohiwa anaalobwana ni anaahiyana.#5.4 Athu aatene a mwiilaboni nili emudhi emohive vowi nili abaabi mmohi Adamu, ni mmeehu Eva. Nalekethiwaga wi niharaharege nikuru, naari nlogo, naari mukalelo, nuubuwelege wi Mulugu dinipaddusile aatene, nili amohive. 5Adamu amalile yaaka mazana matanu namannayi ni yaaka makumi maraaru (930) okwa.
6Seti aganna yaaka zana ni yaaka tanu (105), ahimbala Enoxi. 7Agambalile Enoxi, Seti ahimala yaaka mazana matanu namaraaru ni yaaka tanu nabiili (807), vano ahaabala ahima amohi anaalobwana ni anaahiyana. 8Seti amalile yaaka mazana matanu namannayi ni yaaka kumi nabiili (912) okwa.
9Enoxi aganna yaaka makumi matanu namannayi (90), ahimbala Kenani. 10Agambalile Kenani, Enoxi ahimala yaaka mazana matanu namaraaru ni yaaka kumi ni tanu (815), vano ahaabala ahima amohi anaalobwana ni anaahiyana. 11Enoxi amalile yaaka mazana matanu namannayi ni yaaka tanu (905) okwa.
12Kenani aganna yaaka makumi matanu nameenddi (70), ahimbala Mahalaleli. 13Agambalile Mahalaleli, Kenani ahimala yaaka mazana matanu namaraaru ni yaaka makumi mannayi (840), vano ahaabala ahima amohiwa anaalobwana ni anaahiyana. 14Kenani amalile yaaka mazana matanu namannayi ni yaaka kumi (910) okwa.
15Mahalaleli aganna yaaka makumi matanu nammohi ni yaaka tanu (65), ahimbala Zharedi. 16Agambalile Zharedi, Mahalaleli ahimala yaaka mazana matanu namaraaru ni yaaka makumi maraaru (830), vano ahaabala ahima amohi anaalobwana ni anaahiyana. 17Mahalaleli akwile aganna yaaka mazana matanu namaraaru ni yaaka makumi matanu namannayi ni yaaka tanu (895).
18Zharedi aganna yaaka zana ni makumi matanu nammohi ni yaaka biili (162), ahimbala Enoki. 19Agambalile Enoki, Zharedi ahimala yaaka mazana matanu namaraaru (800), vano ahaabala ahima amohi, anaalobwana ni anaahiyana. 20Zharedi amalile yaaka mazana matanu namannayi ni yaaka makumi matanu nammohi ni yaaka biili (962) okwa.
21Enoki aganna yaaka makumi matanu nammohi ni yaaka tanu (65), ahimbala Methuzalemi. 22Enoki eedda ni Mulugu. Agambalile Methuzalemi ahimala yaaka mazana maraaru (300), vano ahaabala ahima amohi anaalobwana ni anaahiyana. 23Yaaka dhaaye dhaatedhene dhaali mazana maraaru ni yaaka makumi matanu nammohi ni yaaka tanu (365). 24Enoki ola eedda ni Mulugu, veva ahirimeela kuhooneyaga. Di Mulugu amuthukule.
25Methuzalemi aganna yaaka zana ni makumi matanu namaraaru ni yaaka tanu nabiili (187), ahimbala Lameki. 26Agambalile Lameki, Methuzalemi ahimala yaaka mazana matanu nameenddi ni yaaka makumi matanu namaraaru ni yaaka biili (782), vano ahaabala ahima amohi anaalobwana ni anaahiyana. 27Methuzalemi amalile yaaka mazana matanu namannayi ni makumi matanu nammohi ni yaaka tanu nennayi (969) okwa.
28Lameki aganna yaaka zana ni yaaka makumi matanu namaraaru ni yaaka biili (182) ahimbala mwaana-mulobwana. 29Ahimuthwa ndina naaye Nowe, ahiwoga: <<Ola dineere avugule goyi ni mabasa oonyemela a theya ela Nabwiya yoolumeleliiye>>. 30Agambalile Nowe, Lameki ahimala yaaka mazana matanu ni makumi matanu namannayi ni yaaka tanu (595), vano ahaabala ahima amohi, anaalobwana ni anaahiyana. 31Lameki amalile yaaka mazana matanu nameenddi ni makumi matanu nameenddi ni yaaka tanu nabiili (777) okwa.
32Nowe aganna yaaka mazana matanu (500) ahaabala anaaye Semu, Kami ni Zhafeti.
လက္ရွိေရြးခ်ယ္ထားမွု
Wambeela 5: tke
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2015, Wycliffe Bible Translators, Inc. All rights reserved.