మత్తయి 5မွ လူႀကိဳက္ႏွစ္သက္ေသာ က်မ္းပိုဒ္မ်ား။

မၽွေဝရန္

ఎయెర్‌బా ఉండ్రి దీవ కసిసి తూముదాన్‌ ముసి ఇడ్‌ఎర్. గాని ఇండ్రొణివరిఙ్‌ విజేరిఙ్‌ జాయ్‌సినివజ దీవ కంతూదునె ఇడ్నార్. అయాలెకెండ్‌నె, మీ బత్కు విజేరిఙ్‌ జాయి సీనివజ మండ్రెఙ్. నస్తివలె మీరు కిని నెగ్గి పణిఙ సుడ్ఃజి లోకుర్‌ విజెరె దేవుణు మంజిని బాడిఃదు మని మీ బుబాతి దేవుణుదిఙ్‌ పొగి‌డిఃనార్.

మీరు యా లోకమ్‌దు మనివరిఙ్‌ జాయ్‌ననికిదెర్. గొరొన్‌ ముస్కు మని పట్నం డాఙ్‌జి మండ్రెఙ్‌ అట్‌ఏద్.

నెగ్గి మన్సు మనికార్‌ దేవుణు సీని దీవనమ్‌కు మంజినికార్‌ ఆనార్‌లె, ఎందనిఙ్‌ ఇహిఙ వారు దేవుణుదిఙ్‌ సూణార్‌లె.

దేవుణు వెహ్తి వజ నీతినిజాయ్తిదాన్‌ మండ్రెఙ్‌ ఇజి నండో ఆస మనికార్‌ దేవుణు సీని దీవనమ్‌కు మంజినికార్‌ ఆనార్‌లె, ఎందనిఙ్‌ ఇహిఙ వరి మన్సు నిండ్రు ఆనిలెకెండ్‌ వరి ఆసెఙ్‌ దేవుణు తీరిస్నాన్‌లె.

గాని నాను మిఙి వెహ్నిక ఇనిక ఇహిఙ, మీ పగ్గతి వరిఙ్‌ ప్రేమిస్తు, మిఙి హిమ్‍స కిజిని వరి వందిఙ్‌ పార్దనం కిదు.

“దేవుణుదిఙ్‌ సెందితిలెకెండ్‌ బత్కిజి దన్నిలొఇ మాపు తకుదికాప్‌” ఇజి నెసి మఙి మరి మండ్రెఙ్‌ ఎయెర్‌బా ఇజి కోరిజినరొ, దేవుణు సీజిని దీవనమ్‌కు మంజినె. ఎందనిఙ్‌ ఇహిఙ, వారు దేవుణు కిని ఏలుబడిఃదు మంజినార్.

లోకుర్‌ సమాదనమ్‌దాన్‌ మండ్రెఙ్‌ ఇజి పణి కినికార్‌ దేవుణు సీని దీవనమ్‌కు మంజినికార్‌ ఆనార్‌లె, ఎందనిఙ్‌ ఇహిఙ వారు దేవుణు కొడొఃర్‌ ఇజి కూకె ఆనార్‌లె.

ఏలు దుకమ్‌దాన్‌ అడఃబాజి మన్నికార్‌ దేవుణు సీని దీవనమ్‌కు మంజినికార్‌ ఆనార్‌లె, ఎందనిఙ్‌ ఇహిఙ దేవుణు వరిఙ్‌ ఓదరిస్నాన్.

దేవుణు వెహ్తి వజ నాయం వందిఙ్‌ మల్లెఙఙ్‌ ఓరిస్నికార్‌ దేవుణు సీని దీవనమ్‌కు మంజినికార్‌ ఆనార్‌లె, ఎందనిఙ్‌ ఇహిఙ వారు దేవుణు కిని ఏలుబడిఃదు మంజినార్‌లె.

కనికారం తోరిస్నికార్‌ దేవుణు సీని దీవనమ్‌కు మంజినికార్‌ ఆనార్‌లె, ఎందనిఙ్‌ ఇహిఙ దేవుణు వరి ముస్కు కనికారం తోరిస్నాన్‌లె.

నా ముస్కు నమకం ఇట్తి వందిఙ్‌ లోకుర్‌ మీ ముస్కు నిందెఙ్‌ మోప్సి మిఙి మల్లెఙ్‌ కిజి, మరి మీ ముస్కు అబద్దమాతి సెఇ మాటెఙ్‌ విజు వెహ్ని వెలె మీరు దేవుణు సీని దీవనమ్‌కు మంజినికార్‌. అయావలె నండొ సర్‌ద ఆజి మండ్రు. ఎందనిఙ్‌ ఇహిఙ పరలోకామ్‌దు మిఙి నండొ పలం దొహ్‌క్నాద్‌లె. మీ ముందాల బత్కిజి మహి దేవుణు ప్రవక్తరుఙ వెటబా వారు యాలెకెండ్‌ మల్లెఙ్‌ కితార్.

నిపాతి గుణం మనికార్‌ దేవుణు సీని దీవనంకు మంజినికార్‌ ఆనార్లె ఎందనిఙ్‌ ఇహిఙ యా లోకం విజు వరి సొంతం ఆనాద్.

మీరు యా లోకమ్‌దు సోరు ననికిదెర్. గాని, సోరుదిఙ్‌ రుసి సొహిఙ, ఎలాగ దనిఙ్‌ రుసి మర్‌జి తపిస్తెఙ్‌ ఆనాద్‌? అక వెల్లి విసీర్‌జి లోకుర్‌ మట్తెఙ్‌నె ఆఎండ మరి ఇని పణిదిఙ్‌బా రఇక.

పరలోకామ్‌దు మన్ని మీ బుబాతి దేవుణు ఇని కల్తి సిలికాన్. అందెఙె మీరుబా అయాలెకెండ్‌నె మండ్రు.”

మీ మాటెఙ్‌ ‘ఒఒ ఇహిఙ ఒఒ’, ఇజి మండ్రెఙ్. ‘ఆఎద్‌ ఇహిఙ ఆఎద్’, ఇజినె మండ్రెఙ్. వనకాఙ్‌ మిస్తికెఙ్‌ సెఇ వన్నిబాణిఙ్‌ వానికెఙ్”.

“‘కణకాదిఙ్‌ బదులు కణక, పలుదిఙ్‌ బదులు పలు’ ఇజి దేవుణు మోసేఙ్‌ సిత్తి మన్ని రూలుదు వెహ్తి మహిక మీరు వెహిమనిదెర్‌ గదె? నాను మిఙి వెహ్సిన, సెఇ పణిఙ్‌ కిని వరిఙ్‌ అడ్డు కిమ. మరి నీను వన్ని ముస్కు కోపమాజి వాండ్రు నిఙి కిత్తిదన్నిఙ్‌ మర్‌జి కిదెఙ్‌ ఆఏద్‌. ఎయెన్‌బా ఉణెర్‌ లెపాదు డెఃయ్తిఙ, డేబ్ర లెపబా వన్నిఙ్‌ తోరిస్‌అ.

నీ ఉణెర్‌ కణక నిఙి తపు కిబిస్తిఙ దనిఙ్‌ లాగ్జి విసీర్‌అ. నీనె ఎల్ల కాలం సిసు మంజిని బాడిఃదు సొన్సి అర్‌ఎండ, మీ ఒడొఃల్‌దాన్‌ ఉండ్రి ముక సొహిఙ అక్కాదె నెగెద్. మరి నీ ఉణెర్‌ కియు నిఙి తపు కిబిస్తిఙ, దనిఙ్‌ కత్సి విసీర్‌అ. నీనె ఎలాకాలం సిసు మంజిని బాడిఃదు సొన్సి అర్‌ఎండ, నీ ఒడొఃల్‌దాన్‌ ఉండ్రి ముక సొనికదె నెగెద్.