San Mateo 7မွ လူႀကိဳက္ႏွစ္သက္ေသာ က်မ္းပိုဒ္မ်ား။

မၽွေဝရန္

Maimua ĩchab ich Jesuupai magjim anʉm: —Pʉaba jeeubat; pãachdeu nem igbarm Ẽwandamau deeju. Pãrau i jʉrmʉn, i baauju; i sim aar dubaag pãach weeu aupi jeeumʉn, irua pãar weeu auju ajim anʉm.

Pãrau khaphʉ nʉmgui ajim anʉm, ar õor nem jeeu paraam khʉʉnagan deeb khaba deejem; ar amachdeu nem inag ig nʉm pʉaba jʉr nʉm khʉʉnau baaujem; maagwai ĩchab chi puertdi sirbaichem khʉjã weeu auwia dubpiejem a jaaumajim aajem.

’Magua, ãbmiecha paawai pãrag mag chirʉmgui ajim anʉm, ich Jesuu: Chi mʉg mʉ iek ũrnaa mua jaaumam ipierraa nem wau sim wounan, woun ãb khĩirjug khaug sĩerrau durrkhudau ee ich dibʉ jukhanaa di eutarrjota simgui ajim anʉm.

’Magua mua pãrag ĩchab mag chirʉmgui ajim anʉm: Chikhamnau pãach dʉi khaigba apimapha nʉm khai, pãach garmuajã oob chikham dʉi khaigba amiet. Õrau pãach dʉi apim khõsimjota pãach garmuajã am dʉi abat ajim anʉm. Moiseeu ley phã pʉatarr gaaijã magta jaaunaa ĩchab Ẽwandamau ich iek jaaupiejerr khʉʉnaujã ich magta jaaujerr aawai, magta aju aai nʉmgui ajim anaabá.

Pari jũrr ʉ̃gthar arrjem khʉdan phĩrkhinaa chi dub nʉm aram puertdijã phĩrkhi khitʉm. Mag sim aawai chadcha dubju phithur sĩerrʉmgui ajim anʉm. Magua ĩchab mag gar chan õor pom wetba aajem ajim anaabá.

’Ʉ̃gthar oberm khõsi nʉm khai, puertdi phĩrkhim garta dubju ẽkhabat ajim anʉm Jesuu. ¿Jãgwi? Dosãt aar maajem khʉdta khʉdjã pomnaa chi puertdijã nem wäg sĩejeewaima. Mag sim garta õor pom erereu aajem.

Magnaa, Pãar jãg o ãkhãraa khitheem khʉʉnaujã pãach chaainau nem jeeuwai, ¿nem wajaphamjã ĩgkhaba deeba aajẽ? ajim anʉm. Pãrau jãg deejem khai, pãar Aai ʉ̃gthar simua chará pãrau pãach chaainag nem deejem khãaijã wajapcharamta deebajup ajim anʉm, ichig jeeu nʉm khʉʉnag.

’Chikham ĩgkham khõchgaupai chan oob chikham pekau phemiet, eeu Ẽwandamau pãach chach nʉm ed magʉm iek pãachig igdukham ajim anʉm Jesuu. Pãrauta chikham jaaum khõchgau “Jãan magta sĩerrʉm” amʉn, pãachdeu chikham jaau nʉmjo aju Ẽwandamaujã pãar dʉi. Pãachdeu chikham jaau nʉmjo ich ag jaautarr iekhau Ẽwandamaujã pãach khĩir pãar jaau thʉnʉʉujugui ajim anaabá.

Pari jũrr ar sĩi par jʉ̃gʉupai mʉ iek ũrnaa mua nem jaau chirʉmjã mʉ ipierraa wauba sim wounan, jũrr agjo woun ãb khĩirjugjã chukhu sĩi khõmarii mosjã ee di eutarrjota simgui ajim anʉm.

Mag simta ¿jãgwi pua sĩi pʉch khapeer dau ee pasurdam wai simta eerpa nʉʉ aajẽma, pʉch dau eejã agjo pasur pomkham wai sim khaugba? Maachin nacha dich khĩirjunaata iekha nʉmgui ajim anʉm. ¿Jãga pua pʉch khaperag, “Daai kake, mua pʉ dau eem pasur noi aukhim” aju, pʉch dau eejã ag khãyau nem pom sim joothʉ thʉnʉm noi auba simta?

’Kharin Ẽwandamau ich iek jaaupibaawaita i iek jaau wenʉrrʉm aajem khʉʉnan chi seumienta mag wenʉrraajem. Magʉm khʉʉn dʉi khĩir khaphʉ abat ajim anʉm. Mag sĩsidʉmta pãar khũguraag sĩi ovejadamjo daumeraa pãar aig beejem. Pari am odiin sĩi khum nem oo wai simjota sĩsidʉmgui ajim anʉm, pãarjã amachjo amkhĩir amach gar thereu awaag. Ich jãg miu gayam uva phierrba ni higojã ag bʉ gayam khabam phierrba aajemjo, amau nem wau nʉm gaaimua pãrau am khaphʉ aju aai nʉm, õor wajapham khʉʉná wa õor khaigbam khʉʉná.

Pãrau khaphʉ nʉm, nemjĩir bʉʉn ich che sim gaaimuata khaphʉ aajem, nemjõ ajaphamʉ́ wa nemjõ khaigbamʉ́.

Nemjõ ajapham chan mie neeme cheba ni nemjõ ãkhãraamjã mie chukkhu khaba sĩerrʉm.

Pãrau khaphʉ nʉmgui ajim anʉm ĩchab, nemjõ ãkhãraa cheejemʉn thu werpnaa jʉʉubaadee orpäaijem.