Arabe tchadien (alphabet arabe) For more information about this text please contact: Alliance biblique du Tchad Avenue Pascal Yoadoumnadji, BP 1291 N'Djaména CHAD

La Bible en arabe tchadien © Alliance biblique du Tchad, 2019 ℗ 2022 Hosanna

الكتاب المقدس بالعربي الدارجي هنا تشاد

Arabic Chadian - 2012 Edition (NT) Drama

Arabic Chadian - 2012 - TCH NT Drama

فِي الْبِدَايَةْ الْكَلِمَةْ قَاعِدَةْ. وَ الْكَلِمَةْ قَاعِدَةْ مَعَ اللّٰهْ وَ الْكَلِمَةْ هِي اللّٰهْ. فِي الْبِدَايَةْ هِي قَاعِدَةْ مَعَ اللّٰهْ. وَ كُلَّ شَيّءْ كَانْ بِالْكَلِمَةْ وَ مِنْ كُلَّ الْأَشْيَاءْ الْكَانَوْا، مَا فِي شَيّءْ الْكَانْ بَلَاهَا. هِي عِنْدَهَا الْحَيَاةْ وَ الْحَيَاةْ هِي نُورْ لِلنَّاسْ. النُّورْ قَاعِدْ يِضَوِّي فِي الضَّلَامْ وَ لَاكِنْ الضَّلَامْ مَا قِدِرْ يَكْتُلَهْ.
وَ اللّٰهْ رَسَّلْ نَادُمْ وَاحِدْ أُسْمَهْ يَحْيَى. هُو جَاءْ أَشَانْ يَشْهَدْ. وَ شَهَدْ لِلنُّورْ أَشَانْ كُلَّ النَّاسْ يِآمُنُوا بِالنُّورْ بِسَبَبْ شَهَادْتَهْ. يَحْيَى ذَاتَهْ هُو مَا النُّورْ لَاكِنْ هُو جَاءْ أَشَانْ يَشْهَدْ لِلنُّورْ. وَ النُّورْ الصَّحِيحْ جَاءْ فِي الدُّنْيَا لِيِنَوِّرْ كُلَّ النَّاسْ.
الدُّنْيَا كَوَّنَتْ بَيَّهْ وَ لَاكِنْ وَكِتْ هُو جَاءْ فِي الدُّنْيَا، نَاسْ الدُّنْيَا مَا عِرْفَوْه. هُو جَاءْ لِنَاسَهْ وَ لَاكِنْ نَاسَهْ مَا قِبْلَوْه. لَاكِنْ لِكُلَّ النَّاسْ الْقِبْلَوْه وَ آمَنَوْا بِأُسْمَهْ، هُو أَنْطَاهُمْ الْحَقّ أَشَانْ يَبْقَوْا عِيَالْ اللّٰهْ. وَ يَبْقَوْا عِيَالْ اللّٰهْ مَا بِوَالُودَةْ وَ لَا بِشَهْوَةْ النَّاسْ وَ لَا بِنِيَّةْ هَنَا أَيِّ رَاجِلْ، لَاكِنْ هُمَّنْ بِقَوْا عِيَالْ اللّٰهْ بِقُدْرَةْ اللّٰهْ.
وَ الْكَلِمَةْ بِقَتْ إِنْسَانْ وَ هُو سَكَنْ فِي أُسُطْنَا. وَ شِفْنَا قُدُرْتَهْ الْمَجِيدَةْ. وَ قُدُرْتَهْ هِي مَجِيدَةْ بِلْحَيْن وَ مُوَافْقَةْ لِلْإِبْن الْوَاحِدْ الْجَايِ مِنْ اللّٰهْ أَبُوهْ. وَ هُو مَلَانْ بِالرَّحْمَةْ وَ الْحَقّ. وَ يَحْيَى شَاهِدْ لَيَّهْ وَ نَادَى النَّاسْ وَ قَالْ: «دَا بَسْ النَّادُمْ الْأَوْرَيْتكُو بَيَّهْ وَ قُلْت هُو الْجَايِ وَرَايِ عَالِي مِنِّي بِلْحَيْن أَشَانْ هُو مَوْجُودْ قُبَّالِي.»
وَ رَحْمَتَهْ كَامِلَةْ وَ كُلِّنَا لِقِينَا مِنْهَا بَرَكَةْ فِي بَرَكَةْ. اللّٰهْ نَزَّلْ شُرُوطْ التَّوْرَاةْ بِوَاسِطَةْ مُوسَى وَ لَاكِنْ اللّٰهْ نَزَّلْ الرَّحْمَةْ وَ الْحَقّ بِوَاسِطَةْ عِيسَى الْمَسِيحْ. أَبَداً مَا فِي نَادُمْ شَافْ اللّٰهْ لَاكِنْ إِبْن اللّٰهْ الْوَاحِدْ الْقَاعِدْ جَنْب أَبُوهْ، هُو بَسْ الْبَيَّنْ اللّٰهْ لِلنَّاسْ.

وَ دِي هِي شَهَادَةْ يَحْيَى وَكِتْ كُبَارَاتْ الْيَهُودْ رَسَّلَوْا لَيَّهْ رُجَالْ دِينْ وَ لَاوِيِّينْ مِنْ مَدِينَةْ الْقُدُسْ لِيَسْأَلَوْه هُو يَاتُو. يَحْيَى مَا نَكَرْ شَيّءْ وَ لَاكِنْ شَهَدْ بِكَلَامْ وَاضِحْ وَ قَالْ: «أَنَا مَا الْمَسِيحْ.» وَ أَشَانْ دَا، سَأَلَوْه بَتَّانْ وَ قَالَوْا: «إِنْتَ يَاتُو؟ إِنْتَ النَّبِي إِلِيَاسْ وَلَّا؟» وَ يَحْيَى قَالْ: «لَا، أَنَا مَا هُو.» وَ قَالَوْا: «إِنْتَ النَّبِي الْبَجِي وَلَّا؟» وَ رَدَّ لَيْهُمْ وَ قَالْ: «لَا.» وَ خَلَاصْ قَالَوْا لَيَّهْ: «إِنْتَ يَاتُو؟ أَوْرِينَا أَشَانْ نِقَبُّلُوا لِلنَّاسْ الرَّسَّلَوْنَا وَ نِأَوْرُوهُمْ. شُنُو الْكَلَامْ التُّقُولَهْ فِي نَفْسَكْ؟» وَ هُو رَدَّ لَيْهُمْ بِكَلَامْ النَّبِي إِشَعْيَا وَ قَالْ: <أَنَا حِسّ الْقَاعِدْ يِعِيطْ فِي الْخَلَاءْ وَ يُقُولْ: «عَدُّلُوا دَرِبْ الرَّبّ!»>
وَ فِيَّهْ فَرِيزِيِّينْ بَيْن النَّاسْ الرَّسَّلَوْهُمْ. وَ هُمَّنْ سَأَلَوْا يَحْيَى وَ قَالَوْا: «كَنْ إِنْتَ مَا الْمَسِيحْ وَ لَا إِلِيَاسْ وَ لَا النَّبِي الْيَجِي، مَالَا إِنْتَ قَاعِدْ تِغَطِّسْ النَّاسْ فِي الْأَلْمِي؟» وَ يَحْيَى رَدَّ لَيْهُمْ وَ قَالْ: «أَنَا نِغَطِّسْ النَّاسْ فِي الْأَلْمِي وَ لَاكِنْ نَادُمْ وَاحِدْ قَاعِدْ مَعَاكُو وَ إِنْتُو مَا تَعَرْفُوهْ. هُو بَسْ النَّادُمْ الْيَجِي وَرَايِ. وَ أَنَا مَا تَمَّيْت لَيَّهْ خَدَّامْ كُلَ.»
وَ الْبَكَانْ السَّأَلَوْا يَحْيَى فَوْقَهْ، هُو فِي حِلَّةْ بَيْت عَنْيَا الْقَاعِدَةْ غَادِي لِبَحَرْ الْأُرْدُنْ. وَ دَا الْبَكَانْ الْيَحْيَى قَاعِدْ يِغَطِّسْ فَوْقَهْ النَّاسْ.

وَ أَمْبَاكِرْ، يَحْيَى شَافْ عِيسَى جَايِ لَيَّهْ وَ قَالْ: «دَا بَسْ الْحَمَلْ الْاللّٰهْ رَسَّلَهْ أَشَانْ يُقُشّ ذَنِبْ نَاسْ الدُّنْيَا. دَا بَسْ النَّادُمْ الْأَوْرَيْتكُو بَيَّهْ وَ قُلْت نَادُمْ وَاحِدْ جَايِ وَرَايِ وَ هُو عَالِي مِنِّي بِلْحَيْن أَشَانْ هُو مَوْجُودْ قُبَّالِي. أَوَّلْ أَنَا مَا عِرِفْتَهْ. لَاكِنْ أَنَا جِيتْ نِغَطِّسْ النَّاسْ أَشَانْ نِوَصِّفَهْ لِبَنِي إِسْرَائِيلْ.»
وَ يَحْيَى شَهَدْ لَيَّهْ وَ قَالْ: «أَنَا شِفْت الرُّوحْ الْقُدُّوسْ جَايِ مِنْ السَّمَاءْ وَ نَزَلْ فَوْقَهْ مِثِلْ حَمَامَةْ وَ قَعَدْ فَوْقَهْ. أَوَّلْ أَنَا مَا عِرِفْتَهْ لَاكِنْ الرَّسَّلَانِي لِنِغَطِّسْ النَّاسْ فِي الْأَلْمِي، حَجَّى لَيِّ مِنْ أَوَّلْ وَ قَالْ: ‹النَّادُمْ التِّشِيفْ الرُّوحْ الْقُدُّوسْ يَنْزِلْ فَوْقَهْ وَ يَقْعُدْ فَوْقَهْ، دَا بَسْ النَّادُمْ الْيِغَطِّسْ النَّاسْ بِالرُّوحْ الْقُدُّوسْ.› وَ خَلَاصْ، أَنَا شِفْتَهْ وَ أَنَا شَاهِدْ لَيَّهْ هُو إِبْن اللّٰهْ».

وَ أَمْبَاكِرْ، يَحْيَى قَاعِدْ فِي نَفْس الْبَكَانْ وَ نَاسَيْن مِنْ تَلَامِيذَهْ قَاعِدِينْ مَعَايَهْ. وَ يَحْيَى شَافْ عِيسَى رَايِغْ فِي الدَّرِبْ وَ قَالْ لَيْهُمْ: «دَاهُو حَمَلْ اللّٰهْ.» وَ التَّلَامِيذ الْإِتْنَيْن سِمْعَوْا كَلَامَهْ وَ قَمَّوْا تَابَعَوْا عِيسَى.
وَ عِيسَى أَنْلَفَتْ وَ شَافَاهُمْ جَايِينْ وَرَايَهْ. وَ سَأَلَاهُمْ وَ قَالْ: «تِفَتُّشُوا شُنُو؟» وَ رَدَّوْا لَيَّهْ وَ قَالَوْا: «يَا رَبَّايْ، إِنْتَ سَاكِنْ وَيْن؟» وَ رَبَّايْ مَعَنَاتَهْ سَيِّدْ بِاللُّغَّةْ الْأَرَامِيَّةْ. وَ عِيسَى رَدَّ لَيْهُمْ وَ قَالْ: «تَعَالُوا شِيفُوا الْبَكَانْ.» وَ دَا بِقِي فِي الْعَصُرْ. وَ مَشَوْا مَعَايَهْ وَ شَافَوْا الْبَيْت الْهُو قَاعِدْ فَوْقَهْ وَ فِي الْيَوْم دَا، قَعَدَوْا مَعَايَهْ.
وَ نَادُمْ وَاحِدْ مِنْ النَّاسَيْن السِّمْعَوْا كَلَامْ يَحْيَى وَ قَمَّوْا تَابَعَوْا عِيسَى، أُسْمَهْ أَنْدَرَيَّسْ وَ هُو أَخُو سِمْعَانْ بُطْرُسْ. أَوَّلْ شَيّءْ، أَنْدَرَيَّسْ مَشَى لِقِي أَخُوهْ سِمْعَانْ وَ حَجَّى لَيَّهْ وَ قَالْ: «لِقِينَا مَسِّيَّا.» وَ مَسِّيَّا مَعَنَاتَهْ الْمَسِيحْ بِاللُّغَّةْ الْأَرَامِيَّةْ. وَ أَنْدَرَيَّسْ وَدَّى سِمْعَانْ لِعِيسَى. وَ عِيسَى شَافْ سِمْعَانْ فِي عُيُونَهْ وَ قَالْ: «إِنْتَ سِمْعَانْ وِلَيْد يُوحَنَّا. يِسَمُّوكْ صَفَا.» وَ صَفَا مَعَنَاتَهْ حَجَرْ وَ بِاللُّغَّةْ الْيُونَانِيَّةْ دَا بُطْرُسْ.
وَ أَمْبَاكِرْ، عِيسَى دَوَّرْ يَمْشِي فِي دَارْ الْجَلِيلْ. وَ لِقِي فِلِبُّسْ وَ قَالْ لَيَّهْ: «تَعَالْ تَابِعْنِي.» وَ فِلِبُّسْ هُو مِنْ حِلَّةْ بَيْت صَيْدَا وَ دِي حِلَّةْ هَنَا أَنْدَرَيَّسْ وَ بُطْرُسْ. وَ فِلِبُّسْ مَشَى لِقِي نَتَنَايِلْ وَ قَالْ لَيَّهْ: «لِقِينَا النَّادُمْ الْمُوسَى كَتَبْ بِسَبَبَهْ فِي التَّوْرَاةْ وَ الْأَنْبِيَاء كَتَبَوْا فَوْقَهْ فِي كُتُبْهُمْ. وَ هُو عِيسَى وِلَيْد يُوسُفْ مِنْ حِلَّةْ النَّاصِرَةْ.» وَ نَتَنَايِلْ رَدَّ لَيَّهْ وَ قَالْ: «هَايْ! مَتَى كَيْ يَوْم وَاحِدْ شَيّءْ عَدِيلْ جَاءْ مِنْ النَّاصِرَةْ؟» وَ فِلِبُّسْ قَالْ لَيَّهْ: «تَعَالْ مَعَايِ وَ شِيفَهْ!»
وَ عِيسَى شَافْ نَتَنَايِلْ جَايِ لَيَّهْ وَ قَالْ: «دَاهُو إِسْرَائِيلِي صَحِيحْ. هُو مَا يُغُشّ أَيِّ نَادُمْ.» وَ نَتَنَايِلْ سَأَلَهْ وَ قَالْ: «كِكَّيْف عِرِفْتِنِي؟» وَ عِيسَى قَالْ: «شِفْتَكْ وَكِتْ إِنْتَ قَاعِدْ تِحِتْ شَدَرَةْ التِّينْ قُبَّالْ فِلِبُّسْ مَا يِنَادِيكْ.» وَ نَتَنَايِلْ قَالْ: «سَيِّدْنَا، إِنْتَ إِبْن اللّٰهْ! إِنْتَ مَلِكْ هَنَا إِسْرَائِيلْ!» وَ عِيسَى قَالْ لَيَّهْ: «إِنْتَ آمَنْت بَيِّ أَشَانْ قُلْت لَيْك أَنَا شِفْتَكْ تِحِتْ شَدَرَةْ التِّينْ؟ تِشِيفْ أَشْيَاءْ كُبَارْ مِنْ دَا!»
وَ عِيسَى قَالْ لَيْهُمْ: «أَسْمَعَوْا نُقُولْ لَيْكُو الْحَقّ، تِشِيفُوا السَّمَاءْ فَاتِحْ وَ مَلَائِكَةْ اللّٰهْ طَالِعِينْ وَ نَازْلِينْ فَوْق إِبْن الْإِنْسَانْ.»

နားေထာင္ပါ။ يُوحَنَّا 1