Quechua, Northern Conchucos Ancash - 2006 Edition (NT) Drama

Quechua, Northern Conchucos Ancash - 2006 Edition (NT)

Tsaypitanam Pilatuman llapan autoridäkuna Jesústa apayarqan. Tsaychönam Jesústa acusarnin niyarqan: <<Kay runatam tariyashkä nacionnintsikpa contran shäriyänanpaq runakunata willaykaqta. Manam munantsu impuestuta mandakuq Césarpaq pägayänantapis. Tsaynöllam nikan Cristo kar rey kanqanta>>.
Tsaynam Jesústa Pilato tapurqan: <<¿Rasunpaku Israel runakunapa mandakuqnin rey kanki?>>
Jesúsnam nirqan: <<Rasun kaqtam nikanki>>.
Tsaynam mandakuq sacerdötikunatawan tsaychö qorikashqa runakunata Pilato nirqan: <<Kay runapa ima jutsantapis manam tarïtsu>>.
Peru tsaynö niptinmi masraq niyarqan: <<¡Kay runaqa autoridäkunapa contran shäriyänanpaqmi runakunata yachaykätsin! Galileapita qallaykurmi kananqa kay Judeachöna yachaykätsin>>.

Tsayta wiyaykurmi Pilato tapurqan: <<¿Kay runaqa Galileapitaku?>>
<<Awmi>> niyaptinnam Galileachö mandakuq Herodes juzgananpaq Jesústa apatsirqan. Tsay junaqkunam Herodespis Jerusalénchö kaykarqan.
Jesúspaq parlayanqanta wiyashqa karmi y milagrukuna ruraqta rikayta munar Herodesqa unaypitana reqiyta munarqan. Tsaymi Jesústa chäratsiyaptin alläpa kushikurqan. Herodes yapay yapay tapuptinpis Jesúsqa manam ni imata parlakurqantsu. Tsaychömi mandakuq sacerdötikuna y ley yachatsikuqkuna Jesúspa contran imaykata niyarqan. Tsaynam reypa cäpanta ashqurkatsir soldädunkunawan Herodes asiparnin burlakuyarqan. Tsaypitanam Pilatuman yapay kutitsirqan. Tsay junaqmi Herodeswan Pilato chikinakuyanqanpita amistayarqan.


Tsaypitanam mandakuq sacerdötikunata, autoridäkunata y llapan runakunata qayaskatsir Pilato nirqan: <<Kay runatam apayämushkanki: <Autoridäkunapa contran shäriyänanpaqmi runakunata yachatsin> nir. Peru puntaykikunachö tapur manam ima jutsantapis acusayanqaykinöqa tarishkätsu. Herodespis jutsanta mana tarirmi kayman kutitsimushqa. Kay runa wañunanpaqnöqa manam ni ima mana allitapis rurashqatsu. Tsaymi astaykatsirlla kachaykushaq>>.
[Cada watam Pascuachö Pilatuqa juk prësuta qarquq.] Jesústa qarquyta munaptinmi llapan runakuna juk shimilla qayaykachar niyarqan: <<¡Tsay runaqa wañutsun! ¡Barrabásta qarquy!>>
Barrabásqa carcelchö qaykurarqan gobiernupa contran Jerusalénchö shärinqanpita y wañutsikunqanpitam.
Tsaymi runakunata Pilato yapay nirqan Jesústa qarqunanpaq. Peru masraqmi qayaykachar niyarqan: <<¡Crucificay! ¡Crucificay!>>
Pilatunam yapay nirqan: <<¿Ima mana allitatan rurashqa? Wañunanpaqqa manam ni ima jutsantapis tarïtsu. Tsaymi astaykatsirlla qarqushaq>>.
Peru crucificänanta munarmi mas jinchi qayaykachäyarqan. [Mandakuq sacerdötikuna y] runakuna tsaynö qayaykachäyaptinmi Pilato änirqan. Tsaymi runakuna mañakuyanqannö Jesústa wañutsiyänanpaq kachaykurqan. Gobiernupa contran shärishqa kaykaptin y wañutsikushqa kaykaptinpis runakuna munayanqannömi Barrabásta qarqurqan. Jesústanam wañutsiyänanpaq entregarqan.


Jesústa crucificaq apaykäyaptinmi Simón shutiyuq runa chakrapita kutiykämurqan. Paymi Cirene nacionpita karqan. Paytam mandayarqan Jesús apaykanqan cruzta matankarkur Jesúspa qepanta aywananpaq.
Maytsikaq runakunam Jesúspa qepanta aywayarqan. Paykunawanmi atskaq warmikunapis alläpa llakikur waqarnin aywayarqan. Peru Jesúsnam tumaykur nirqan: <<Jerusalén warmikuna, ama noqapaqqa waqayaytsu, sinöqa kikikikunapaq y wamraykikunapaq waqayay. Alläpa ñakay junaqkunam chämunqa. Tsay witsaymi runakuna niyanqa: <¡Ima kushishqaraq kayan qolluq warmikuna y llulluta mana chuchuq warmikuna!> Tsay witsaymi runakuna alläpa ñakar jirkakunata niyanqa: <¡Juklla janäkunaman juchumur ushakaskatsiyämay!> Tsaynöllam qaqakunatapis niyanqa: <¡Juklla qopiskayämay!> Kawaykaq jachata kaynö ruraykarqa tsakishqa jachataqa ¡imataraq rurayanqa!>>
Jesústawan crucificäyänanpaqmi ishkaq jutsasapakunatapis apayarqan. Calavëra niyanqan sitiuman chaykatsirmi Jesústa crucificäyarqan. Apayanqan jutsasapakunatam jukaqta derëcha lädunman y jukaqtana itsuq lädunman crucificäyarqan.
[Jesúsnam nirqan: <<Taytallä, kay runakunata perdonaykuy. Manam ni imata ruraykäyanqantapis musyayantsu>>.]
Soldädukunanam Jesúspa llatapanta apayänanpaq sortiyayarqan.
Tsaychö runakuna rikaraykäyaptinmi autoridäkuna Jesústa burlakurnin niyarqan: <<Dios Yaya akranqan Cristo kaykarqa jukta salvanqannölla mä kanan kikinpis salvakutsun>>.
Tsaynöllam soldädukunapis burlakurnin puchquq vïnuta upyatsiyta munar niyarqan: <<Israel runakunapa mandakuqnin rey kaykarqa mä kikiki salvakuy>>.
Cruzpa puntanchömi juk letrëru nirqan: <<Kay runam Israel runakunapa mandakuqnin rey>>. [Tsayqa qellqashqa karqan griëguchö, latínchö y hebreo idiömakunachömi.]
Tsaynöllam crucificashqa jukaq runapis Jesústa burlakur nirqan: <<Dios Yaya mandamunqan Cristo karqa mä kikiki salvakuskir noqakunatapis salvayämay>>.
Peru jukaqnam piñapar nirqan: <<Qampis paynö kayläya ñakaychö kaykarqa ¿manaku Diospita mantsakunki? Noqantsikqa mana allita ruranqantsikpitam ñakaykantsik. Peru kay runaqa manam ni ima mana allitapis rurashqatsu>>.
Tsaypitanam Jesústa nirqan: <<Mandakuynikichö kaykar noqalläta yarpaykallämanki>>.
Jesúsnam nirqan: <<Rasun kaqtam niq: Kananpitaqa noqawanmi paraísuchö kanki>>.


Pullan junaqpita las tresyaqmi patsa tutapaskirqan. Rupaypis manam atsikyarqantsu. Tsay höram templu rurinchö cortïnapis pullanpa rachiskirqan. Jesúsnam qayaraypa nirqan: <<¡Taytallä! ¡Makikimanmi almalläta churaykamü!>> Tsaynö niskirnam wañuskirqan.
Tsaykunata rikaykurmi soldädukunapa capitannin Dios Yayata alabar nirqan: <<¡Rasunpam kay runaqa jutsannaq kashqa!>>
Tsaychö kaykaq llapan runakunanam alläpa llakikuywan pëchunkunatapis kutarraq kutikuyarqan. Jesústa reqiqnin runakunanam karullapita alläpa llakishqa rikaraykäyarqan. Paykunawanmi Galileapita qatirnin shamuq warmikunapis kaykäyarqan.


Juk runam José shutiyuq karqan. Payqa Israel runakunapa autoridänin y Dios Yaya munanqannö kawaq runam karqan. Judeachö Arimatea markapitam karqan. Paypis Dios Yayapa mandakuynintam shuyaraykarqan. Autoridä majinkuna Jesústa wañutsiyänanpaq parlayaptinpis manam munarqantsu. Paymi Pilatuman aywarnin rugakur nirqan: <<Jesúspa ayanta pampanäpaq dëjapaykallämay>>.
Äniskiptinnam Jesúspa ayanta cruzpita jipiskir lïnu säbanaswan piturqan. Tsaypitanam manaraq pitapis pampayanqan qaqachö uchkushqa sepultüraman pamparqan. Tsaynö pamparqan jamay junaqpaq alistakuyänan junaq ushaykaptinnam. Jamay junaq qallananpaqnam kaykarqan.
Galileapita Jesúswan paqta shamuq warmikunanam Josépa qepanta aywar rikäyarqan sepultüra maychö kanqanta y Jesúspa cuerpunta imanö churayanqanta. Tsaypita wajinkunaman kutiskirnam mushkuq jachakunatawan perfümikunata previniyarqan Jesúspa ayanta shupayänanpaq. Jamay junaq kaptinmi mandamientu ninqannö jamayarqan.

နားေထာင္ပါ Lucas 23