San Lucas 24
24
Jesusiri tsíntskua
(Mt 28.1-10; Mc 16.1-8; Jn 20.1-10)
Ka sábaduksï mintsikorhespti eska juramukua na arhijka, 1ka ménderu domingu jurhiatekuaksï uarhiticha xarhentku niraspti ka p'untsumekuaksï páspti engaksï tánapka. 2Engaksï niárapka, tsakapu t'uíni kénditakata jarhasptia. 3Ka inchasptiksï ka Jesusi t'uíni nóteru jarhania. 4Ka ískuksï pakareraspti ísï exerini; ka jimajkuksï xarhakuaspti tsimani acheticha, anhaxurhitinksï jarhani ma akandani, meremerekjasï ambeksï xukuparharini. 5Kánekua chéparinksï tinguixurhispti iámu kápatserani; ka imaksï acheticha arhiaspti:
–¿Ima tsípiti jarhasti, andijtsïsï uarhiriricha jinguni jirinhantani jaki? 6Nóteru ixu jarhastia, tsíntastia. Míantsï je ambe engaksïni arhika enga útasï Galilea jámani jápka; 7arhistiksïni eska acheti Uájpa jatsipiringa k'amanharhintstichani intsïnharhitanhani, eskaksï krúsirhu cháparhatapiringa ka eska tanimu jurhia jimbo tsíntapiringa.
8Imaksï jiájkani míantaspti ambe enga Jesusi uandapka, 9ka uarhitichaksï uarhiri jatsintskuarhu uératini k'uanhatsentaspti témbeni ma jurhengorherichani ka iámenduechani iámu ambe aianguani. 10Maria Magdalena ka Juana, ka Maria enga Santiagueri nánde jémbepka ka máteru uarhitichaksï jurhengorherichani aianguaspti. 11Ka jurhengorherichaksï no jakajkukuasïrempti, ka arhiasïremptiksï eskaksï ísku ambemasï uandani jápka.
12Pédru k'óru uiriapaspti jima enga jatsinhantapka; ka enga eranhapka, takusïterkusï jima jáptia. Ka níntaspti ísku pakareratini enga ísï úkorhepka.
Emausï nirani jámani
(Mc 16.12-13)
13Ima jurhiatekuajtuksï tsimani jurhengorhericha Emausi iretarhu niraxapti, imani iretarhu enga Jerusalenini témbeni ka ma kilometru jarharetini jaka. 14Imani ambeksï uandaxepaxapti enga úkorhepka. 15Engaksï uandaxeni ka uinhamarhetsperapani jápka, Jesusi andarheraaspti ka márkuksï xanharapaxaptia. 16Ka náuejkiksï exeni jápka ambe ma no jiáretaasïrempti eskaksï mítentapiringa.
17Ka Jesusi kurhamarheaspti:
–¿Ambejtsï uandaxepaxaki?
Ka imaksï kánekua kómu ninharhiparini anhaxurhispti, 18ka ima ma isï enga Kleofasi arhinhempka kurhakorhespti:
–¿Péka t'újku uérakua ireti no mítetini jaka ambe enga arini jurhiatekuechani Jerusaleni úkorheka?
19Ka ima kurhamarheaspti:
–¿Andi ambe úkorheski?
Ka imaksï arhispti:
–Nasareti anapu Jesusiri ambe, ima k'éri ma Diósïri uandarispti ka iretani japarini ka úkua jimbo ka uandakua jimbo Diósïni xarhatasïrempti; 20ka engaksï tátecha ka juchari juramuticha intsïnharhitpeka uandikutarkorheni ka eskaksï krúsirhu cháparhatapiringa. 21Jucha mintsikaxapka eska ima Israelichani p'ímutantaapiringa. Enga úka, tanimu jurhiauestia enga ísï ambe úkorheka. 22Nájkirukajtsïni máru uarhiticha chéraka, jimbokaksï xarhentku niraska jima enga jatsinhantaka, 23ka ískuksï k'uanhatsentasti jimboka Jesusi nóteru jima jarhaspkia. Ka uandantastiksï eskaksï ánjelicha máru xarhakuaska ka eskaksïnha arhiaska eska Jesusi tsípiti jámaxaka. 24Máruksï juchari pámbetpiricha nirasti jima enga jatsinhantapka ka ísïnha jarhasti eskaksï uarhiticha na uandantaka, ka Jesusinksïnha nóteru xéntasptia.
25Jimajkani Jesusi arhiaspti:
–¡Na engajtsï xáni no kurhangujka ka na engajtsï xáni ióndajka jakajkuni imani ambe engaksï xáni Diósïri uandaricha uandaka! 26¿Andi no jatsipirini Újchakurakata íni ambe urheta úkorhenchani, enga nótki k'érikuarhu pénhantani japiringa?
27Tátsekua úndaspti jánhastaani iámendu ambe enga imeri ambe karakata arhijka, enga Moisesiri karakatarhu uénanitki arhijka ka chúnguramani iámendu karakatecharhu ka enga Diósïri uandaricheri jamberi arhijka.
28Engaksï na niárapka imani iretarhu engaksï eraapani jápka, Jesusi ísï niraspti énajki urhetatakorhepirini. 29Ka imaksï uinhapetarhu p'ínguspti arhiparinksï:
–Ixujku pakara jimboka xatiniskia, chúrexatiia.
Ka Jesusi imechani jinguni pakaraspti. 30Engaksï na t'ireni jámempkia kurhinda p'íkuspti ka újchakuraspti, arhukuspti ka íntsaani. 31Jimaksï jánhaskantaspti ka mítentani eska Jesusipka; kóru ima jimajku nónespti. 32Ka imaksï arhijperasïrempti:
–Jimbochisï mintsitarhu tixanheni jápka engajtsïni uandaxechepunguani jápka, ka jimbojtsïnisï karakata jánhastapunguani jápti ¡Ano!
33K'uanhajpatsesptiksï Jerusaleni, ka témbeni ma jurhengorherichani ka imecheri pámbetpirichanksï tángorhentatixapti, 34imechanksï arhiaspti:
–Sési jimbo Acha tsíntastia, ka Simonini xarhakusti.
35Jimajkanksï ima tsimarheni aianguaspti eskaksï ima na jámapka, ka néna engaksï mítentapka Jesusini enga kurhinda íntsani jápka.
Na enga Jesusi jurhengorherichani xarhakuantaapka
(Mt 28.16-20; Mc 16.14-18; Jn 20.19-23)
36Útasïksï inderi ambe uandaxexapti, enga Jesusi terujkani niárakuaaka ka arisï arhiaparini uandajpaani:
–Sési jakuaksïni janochesti.
37Imaksï kánekua chérakorhespti, uandaparini eskaksï ánimanisï ma exeni jápka. 38Enga úpka Jesusi arhiaspti:
–¿Andijtsïsï chérakorhetini jaki? ¿Andijtsïsï tsimanitsimanheajki? 39Jíska, erajkujtsïni ka erandukujtsïni, p'árhejtsïni ka exejtsïni: Ánima ma k'uiripeta ka únichani no jukaasïndi, eskajtsïni cha jíndeni na xéni jaka.
40Enga ísï arhiapka, ima jájki ka jantsiri exeraaspti. 41Ka engaksï ima útasï no úempka jakajkuni, xáni tsípeni ka xáni nónanimaru p'ikuarheratini, Jesusi kurhamarheaspti:
–¿T'irekuajtsï no sáni jatsiski?
42Kurucha pámakataksï sáni íntskuspti, 43ka ima euaaspti ka arhani ka imaksï eramukuspti.
44Tátsekua Jesusi arhiaspti:
–Imani ambesïni úkorhenchaka engaksïni aiangupkia engani útasï chánksïni jinguni jámani jápka: Eska iámu ambe jatsipiringa úkorheni eska jima Moisesiri juramukuarhu ka Diósïri uandaricheri karakatecharhu ka pirekuecharhu jucheti ambe na karakata jaka.
45Karakatechani jimajkani kurhangutaraaspti 46ka arhiaspti:
–Karakata jarhasti eska Krístu uarhipiringa, ka eska tanimu jurhia jimbo tsíntapiringa, 47ka eska iámendu iretecharhu imeri jakanguarhikua jimbo aiangperanhapiringa eska Diósïni andarheranhantaaka, ka eska k'amanharhintskuechani púakuantauaka. Jerusaleni uénani, 48chájtsï íni ambesï uandantaaka. 49Ka jíksïni axacheaka imani enga jucheti Táte aiatspeka. K'óru cha ixu Jerusaleni iretarhu pakara je, jiájkani jamberi engajtsï auandarhu anapu uinhapekua intsïnhaaka.
Jesusi karhanchentasti
(Mc 16.19-20)
50Tátsekua Jesusi jurhengorherichani iretarhu petaataaspti, Betania jamberi páaspti ka jájki tarhatatini újchakuraaspti. 51Ka enga na újchakuraani jápka jarhareantaaspti ka auandarhu pánhantaspti.
52Engaksï ima na k'éri ambe arhipka, Jerusaleniksï kánekua tsípeparini k'uanhatsentaspti. 53Ka méntkuksï tiósïo jarhasptia, Diósïni k'éri ambe arhini.
Terpilih Sekarang Ini:
San Lucas 24: DKPJ
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Biblia en P´urhépecha, Michoacán, México © Sociedad Bíblica de México, A.C.
