San Lucas 21
21
Uarhiti tsîndi ma tumina iámu íntspesti
(Mc 12.41-44)
1Jesusi exeaxapti jatsikorherichani engaksï tumina jatakuarhu tumina jatsirani jápka, 2kájtu exespti uarhiti tsïndini ma enga tsimani taiakata sapirhati jatsirapka. 3Jimajkani uandaspti:
–Sési jimboksïni arhixaka eska iámenduecha jinguni inde uarhiti tsîndi sánderu jatsiraska; 4jimboka iámenduecha imani íntspenhasïnga enga pakajkunhajka, ka inde, nájkiruka no jatsikorheka, iámu jatsirasti enga nitamakorherapiringa.
Jesusi aiangpesti eska k'éri tiósïo xerenhantaaka
(Mt 24.1-2; Mc 13.1-2)
5Máruksï k'éri tiósteri ambe uandaxexapti, enga xáni sési járhati tsakapu jimbo tsïntsïnhapka, ka máruksï sési pirirantskata jarhani. Jesusi arhiaspti:
6–Janoati jurhiata enga iámendu i ambe engajtsï exeni jaka k'amandeaka. Iámu xerenhantaati.
Parhakpeni k'amakurhukua
(Mt 24.3-28; Mc 13.3-23)
7Jimajkanksï kurhamarhespti:
–Jurhentpiri, ¿Na jatini ísï úkorhea? ¿Néna jimbochi jánhaskaa eska i ambe úkorhexamka?
8Jesusi uandaspti: “Xéparini jáma je nóksïni tandojchani. Jimbokaksï uánekua juuaka uandakorheparini eskaksï jíiska. Uandaatiksï: ‘Jíiska’ ka ‘Iásïstia.’ K'óru cha ásï chúxapaa je. 9Ka ekajtsï kurhauaka uarhiperakua úkorheni jarhani, ásï che je, jimboka inde ambe jatsiska eska urheta úkorheaka, ka náuejki ísï, nótki k'amarhuxamti.”
10Ka arhiasptiteru: “Iretechaksï kúngorhentaati máteru iretechani jinguni uarhiperani ka ma irechekua máteru irechekua jinguni uarhipeati. 11K'érati jéncheati, ka nósesi jásï p'amenchakua ka k'arhimakua japuati, ka auandarhu nósesi jásï chérhekua ambe xarhancheati.”
12“K'óruksïni urheta chánksïni jupikaati ka atanksïni kámaati. K'umanchekua tángorhentskuecharhuksïni páti útacheni, ónhaatiksïni ka juramutichani jingunksïni páati, imani jimbo engajtsïni jíndeni chúxapajka. 13Ísï jámantsï úaka uandantani jucheti ambe. 14Ásï uandanhea je úskuni ambe engajtsï uandakorheaka, 15jimbokaksïni ji uandakua ka jurhengua íntskuaka enga nóma chári ikiatspiri úaka mókuntani ka nójtuksïni ambe ma úati arhintani. 16Ka chári táte jamberiksïni p'irhijkamacheati, o chári erachicha, o chári márkuecha o chári p'íchpiricha jamberiksïni p'irhijkamacheati. Ka márujtsï atanhaaka uandikunhani, 17ka ma parhakpenksïni ikiacheati engajtsïni chúxapaaka; 18k'órujtsï nóma jauiri tsîtaaka. 19¡Méntkisï tekaantsï je, ísï jámantsï p'ímutantskorhentaaka!”
20“Na engajtsï jatini p'urhejkutichani exeauaka Jerusaleninksï uirhipandatini jatsini, jánhaska je eska no ióndani k'amajkunhaakia. 21Imani jurhia, ne engaksï Judea jámani jauaka, juátecharhuksï niue sïpakorheni; ka ne engaksï Jerusaleni jauaka, uéakueksï, ka engaksï tarhetarhu jámani jauaka, ásïksï k'uanhatsente iretarhu. 22Jimbokari imani jurhiatechani k'amanharhiranhantaaka eska karakatarhu námendu arhijka. 23¡Jarhonheni uarhiticha engaksï jíani isï sapi jinguni jámani jauaka o engaksï sapichani etsukua íntsani jauaka! Jimboka parhakpeni kánekua nósesi úkorheaka, ka inde ireta kánekua nósesi jásï maiampetaranhaati. 24Máruksï tiámu jimbo uándikunhaati ka máteruksï iretecharhu pánhaati; ka no jakajkutichaksï Jerusaleni uanarurhaati, jiájkani jamberi enga jurhiatekua míndakata jaka.”
Néna enga acheti Uájpa junguaaka
(Mt 24.29-35,42-44; Mc 13.24-37)
25“Tata jurhiatarhu ka nana kutsirhu ka jóskuecharhu mínda xarharaati; ka k'érati iretecha parhakpenirhu kakonhaskanhaati ka chérakorheatiskï enga k'éri japunda kánekua nósesi kúskaaka. 26Ka mirikurhinhaati xáni chénhani imani eratseparini enga parhakpeni úkorheaka; jimbokaksï auandarhu anapu uinhapekuecha jamberi xamatanhaaka. 27Jiájkani acheti Uájpa janikuarhu ma xarharaati kánekua juramukua ka t'íntskua jinguni jurhani jarhani. 28Enga na uénaakia i ambe úkorheni, jurhimbentsï je ka kánharhikua tarhatani je, jimbokajtsï p'ímutanhantaxamkia.”
29Arini terukutarantskuajtu arhiaspti: “Exeatkiru je ígusïchani o náki uéjki ma p'ukurini. 30Ekajtsï exejka eska xunhuperhukurhantani jarhasïngia, jánhaskasïngajtsï eska janintaxamkia. 31Ístu, engajtsï exejka inde ambe úkorheni jarhaniia, jánhaska je eska Diósïri irechekua janoxakaia.”
32“Sési jimboksïnisï arhijka eska inde ambe úkorheaka, enga iásï anapuecha útasteru nótki uarhinhani janhaaka. 33Auanda ka parhakpenksï k'amakurhiaati, k'óru jucheti uandakuechaksï nómeni nitamaati.”
34“Xéparini je, ásïksï chári míntsitecha uéne akua ka kauikua ambe ka i parhakpeni anapu ambe kánhchani, eskaksïni no mátirku ima jurhiatekua jupindukpitini jásï ma 35janocheaka, jimboka íni parhakpeni iámendusï janokuauaka. 36Cha jinguntku ja je, méntku isï uandamukukorheparini, eskajtsï úaka sïpakorhekuni enga xáni ambe úkorheaka, ka eskajtsï úaka acheti Uájpani sési xarhakuntani.”
37Jesusi k'éri tiósïo jurhiakua jurhentpesïrempti, ka chúrekuechani olibu juátarhu nirasïrempti. 38Ka iámu ireta, xarhentku ninhasïrempti k'éri tiósïo kurhajchanhani.
Terpilih Sekarang Ini:
San Lucas 21: DKPJ
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Biblia en P´urhépecha, Michoacán, México © Sociedad Bíblica de México, A.C.
