San Juan 5
5
Acheri ánjeli ma kétsesïrempti
1Namoni jurhia tátsekua, judiouechaksï k'uínchekua ma úntaxapti, ka Jesusi Jerusaleni karhamaspti. 2Jerusaleni, no iauani jarharetini jima inchakuarhu enga Karichicha arhinhajka, itsï jatakua ma jarhasti enga ebreo jimbo Betsata arhinhajka. Iúmu inchakua sapirhati jukaasti, 3ka jimaksï umbamukuspti uánekua p'amenchaticha, pátenharhicha, chkéjchuecha, k'urhujkurhecha (ka engaksï no úempka manakorheni. Iámenduksï ima erokorheni jarhasïremti eska manamepiringa, 4jimboka Acheri ánjeli ma kétsesïrempka itsï manamani ka ima p'amenchati enga urheta inchamempka ambakentasïrempti ambe uéjki p'amenchakua kámani japiringa.) 5Jima jarhaspti acheti ma enga ma ekuatse témbeni iúmu tanimu uéxurhini p'amenchani jápkia. 6Enga Jesusi exepka eska jima apomukuspka ka enga mítepka eska xáni ióni p'amenchaspkia, kurhamarhespti:
–¿Uéksïndi ambakentani?
7P'amenchati arhispti:
–Tata, nónemani kángorhesïnga engarini inchamaaka sáni enga manamejka. Engani uékani jarhajka inchameni máterurini t'uíni urhechepasïndia.
8Jesusi arhispti:
–Jauara, k'arhantsï chéti jatatsekuani ka xanhara.
9Acheti ambakentapaspti, ka k'arhakorhentaspti jatatsekuani ka xanharaspti. Ka jimboka sábadu jurhiatekuepka, 10judiouechaksï Jesusini arhispti:
–Iásï sábaduesti; ka nósesisti jatatsekua pákorhentani.
11Ima acheti arhiaspti:
–Ima engarini ambakerantaka arhistirini: Tarhatakorhe jatatsekua ka xanhara.
12Ka imaksï kurhamarhespti:
–¿Néski ima acheti engakini arhika: Tarhatakorhe jatatsekua ka xanhara?
13K'óru ima enga ambakeranhantapka no mítespti nésï ambakerantapi, jimboka Jesusi jimajku nónespka jimboka uáni jánhaxapka. 14Tátsekua Jesusi tiósïo xéntaspti, ka arhini:
–Exe, iásï engari ambakentakia, ásteru jáma kámanharhintani, nóri sánderu nósesi ambe úkorhenchani.
15Acheti níntaspti ka aianguani judiouechani eska Jesusisï ambakerantapka. 16Jimboksïsï judiouecha Jesusini jirinhantani jámani jáptia, jimboka sábadu jurhiatekuechani xásï ambe úsïrempka. 17Ka Jesusi arhiaspti:
–Jucheti Táte méntku isï ánchekorhesïndi, ka jíjtuni ánchekorhesïnga.
18Indeni jimbo, judiouechaksï sánderu uéksïrempti atani uándikuni, jimboka no sábadu jurhiatekuankusï juramukuani no kurhandirakuempka, ka jimbokajtu ima uandasïrempka eska Diósï jinguni májkuenispka, uandaparini eska Diósï imeri Tátjembespka.
Iámu ambe enga xáni Tátjemba újka, Uájpajtu úsïndi
19Jesusi arhiaspti: “Sési jimboksïni arhixaka eska Diósï Uájpa nómbema úsïnga úni jandiojku; imani ambejkusï újti enga Tátjembani exeni jarhajka. Iámu ambe enga xáni Tátjemba újka, Uájpajtu úsïndi. 20Jimboka Tátjemba xénhchasïnga Uájpani ka exerasïndi iámu ambe eska xáni újka; ka xéraatiteru sánderu k'érati ambe, enga chánksïni ísku pakataaka. 21Jimboka ísï eska Tátjemba na tsítantaajka uarhirichani ka tsípekua íntsaani, Uájpajtu ísï íntsaasïndi tsípekua imechani enga uéjka intsaani. 22Ka Táte nónemani k'amanharhirantasïndi, ka Uájpani íntskusti iámu juramukua eska k'amanharhirpentaaka, 23eskaksï iámenduecha májkueni k'éri ambe exeaka Uájpani eska Tátjembani. Ne enga no k'éri exejka Uájpani, nójtu k'éri exesïndi Tátjembani enga axaka.”
24“Sési jimboksïni arhixaka eska ne enga sési kurhajtsïtani jaka engani ji uandani jaka ka enga jakajkuska imani engarini axaka, ambakiti tsípekua méntku isï anapu p'itixatiia; ka no k'amanharhiranhantaati, jimboka uarhikuarhu uératini ambakiti tsípekuarhu niáraskia. 25Sési jimboksïni arhixaka eska janoxakaia jurhiata, ka iásïstia, engaksï uarhiricha Diósï Uájpani kurhauaka mintsïrani; ka ima engaksï kurhaska, ambakiti tsípekuaksï jatsiati, 26jimboka májkueni eska na Tátjemba kángorhejka tsípekua, májkueni ústi eska Uájpajtu támu kángorheaka tsípekua 27ka íntskusti juramukua arhinharhikpeni, jimbokajtu támu acheti Uájpeska. 28Ásï nósesi exe je íni ambe, jimboka niáraaka jurhia engaksï iámendu uarhiricha imeri mintsirakua kurhauaka 29ka uétsentaatiksï. Ima engaksï sési ambe úka, tsíntaatiksï ambakiti tsípekua p'irani; ka ima engaksï nósesi ambe niátaka, tsíntaatiksï ka uekajpanhaatiksï ka nóksï méni k'amajpeati.”
Jesusini Táte axasti
30“Ji nómbema úsïnga jandiojkuni úni. Eskani xáni kurhajka, xántkuni arhinharhikpesïnga, ka jucheti arhijkutpekua no jukarisïndi, jimboka no jucheti eratsekueska, imanisïni uandajka eskarini na arhika ima engarini axaka. 31Ekani ji jandiojkuni uandakorhentapiringa, jucheti uandantskua no ísïpirindi. 32Jarhasti k'óru máteru enga jucheti jimbo uandantajka, ka ji míteska eska ima jucheti ambe jurhimbitku uandantasïnga. 33Chájtsï axajpeska Juánuni kurhamarheni, ka ima no chkuándiraparini jurhimbitku uandantasti. 34No jimbokani ji nemeri uandantskua jimbo jaka, íni ambe imani jimbojkuni uandasïnga, eska cha úaka p'ímutanhantani. 35Juánu erajkutarakua máespti enga étskurhitini jápka ka enga erandutpempka, ka chájtsï imeri t'íntskua jimbo no uékaska ióni tsípeni. 36Ka ji jatsiska k'óruni máteru xérpekua enga sánderu sési ambeka eska Juánueri uandantskua. Ambe engani ji újka, engarini Táte arhijka eskani úpiringa, inde jimbo xarharasïndi eskarini sési jimbo Táte axaska. 37Ka Táte, engarini axaka, jíndeni jimbo uandantasïndi. Chájtsï nómeni kurhariska ka níjtujtsï méni exe, 38ka imeri uandakuantsï no pakataska, jimbokajtsï no mintsïkasïnga imani enga axaka. 39Chájtsï karakatechani kánekua sési exeparini jurhengorhesïnga, jimbokajtsï méntku isï anapu irekuani jima xéntskuekasïnga; ka imaksï karakatecha jucheti ambesï uandantajti. 40Ka chájtsï no uéksïnga jurhani jíndeni jinguni ambakiti tsípekua p'irani.”
41“Ji k'érikua no parhakpeni intsïnhasïnga. 42Míteskaksïni k'óru eskajtsï no kámasïnga Diósïri uékperakua. 43Ji jucheti Táteri jimbo jurhaska, ka chájtsïni no jiókaska; ka enga máteru nema jutsïkorhepiringa imantsï jámapiringia jiókani. 44¿Nénajtsï ua jakajkuni, engajtsï chájku k'éri ambe arhijperajka, ka imani t'íntskuani enga Diósï axajka, enga májkueka, nójtsï jirinhantani? 45Ásï eratseni ja je eskaksïni jucheti Táteni japarini uandachentaaka; Moisesijkuksïnisï uandachentajti, ima enga cha mintsikajka. 46Jimboka enga cha Moisesini jakajkukupiringa, jíndenijtujtsïni jakajkuchepiringa, jimboka Moisesi jucheti ambesï karaka. 47Ka ekajtsï imeri karakatani no jakajkujka ¿Nénajtsï jakajkua engaksïni ji arhini jaka?”
Terpilih Sekarang Ini:
San Juan 5: DKPJ
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Biblia en P´urhépecha, Michoacán, México © Sociedad Bíblica de México, A.C.
