यहून्नो 14

यीशु ऊ एनोह चेला तिंङ याहऊ रंड्री

1यीशु ज़ि चेला तु हखा कुई, “केहरे परेशान था शुई! छना केहच़ी परमेश्वरो टोहकठे विशवास लहज़ातंई ध्वांए गिऊ टोहकठे ला विशवास लांही। 2गिऊ पिता परमेश्वरो घरबारंङ बंङज़िमी थल्जी महसे ठहरि तोह, अगर माशुहचंङ ता गेह केतंङ साते कुट्री तोहई; छना कुचे गेह केहतु थल्जी ठहरि तेयार लहज़ी य्वाताग। 3दंङ अगर गेह इलजे केहतु थल्जी ठहरि तेयार लोहग, दंङ यच़ाह अंज़े केतिंङ घेंङा रंङ साते रेंज़ा शोहग कि अंऊर गेह बंङज़ोग दोर्तिंङ केहरे ला बंङज़ुंई।

अम, सच्चाई दंङ जीवन

4अंऊर गेह य्वातग केहच़ी दुह ठाहरीऊ अम सेचतईं अंऊखा गेह य्वातग।”

5थोमा ज़ि यीशु ऊ हखा कुंई, “हे प्रभु, ञेंहच़ी माञेंहनी कि कांह अंऊखा य्वातन; ता अम छना ञेंहओनी?” 6यीशु ज़ि दोरंङ साते कुंई, “अम, सच्चाई दंङ अनंत जीवन गेह ए शुगाह; गेह मेह अरीला पिता परमेश्वरो कछंङ पिचे मरपोतो। 7अगर केहच़ी हेले ए गेह सेह्सी शुहचंङ, ता गिऊ पिता परमेश्वर बि ला सेहच़ी तोहई; दिऊ थल केहच़ी दुह ञेंह केहतन दंङ दुह खांई ला केहतन।” 8फिलिप्पुसे दोरंङ साते कुंई, “हे प्रभु, पिता परमेश्वर बि ञेंतिंङ कंज़े च़रतु: ञेंतिंङ तसल्ली शुहचे योतो।”

9यीशु ज़ि दोऊ हखा कुंई, “हे फिलिप्पुस, गेह धोंण ध्याड़ा बे करंङ साते तोतोग, दंङ छि केई गेह माह ञेंहना? अच़िला गेह तंङसी शुह दोई पिता परमेश्वर ला तंङसी शुह: केई छिले कुट्रातन पिता परमेश्वर बि ञेंतिंङ कंड्रु? 10छि केई विशवास माह लहज़ातना, कि पिता परमेश्वरारंङ साते गिऊ पक्‍का नाता तोह, दंङ ध्वांए पिता परमेश्वरो ला गेरंङ साते पक्‍का नाता तोह? दिऊ थल्जी अंऊ ला शिक्षा गेह केतंङ रंड्रा तग दुह गिऊ दोरच़ी माह पर गिऊ पिता परमेश्वरो दोरच़ी अपा। 11गिऊ ए विशवास लांही, कि पिता परमेश्वरारंङ साते गिऊ पक्‍का नाता तोह; दंङ पिता परमेश्वरो गेरंङ साते; माह ता अंऊ चिन्ह चमत्कार गेह लहसी तातग दोऊ टोहकठे विशवास लांही।”

12गेह केतंङ साते हेले कुट्रातग, कि अच़ि गिऊ टोहकठे विशवास तहच़ा, दिह कम अंऊ गेह लहज़ातग दोई ला लोहतो, पर दिहबे मोह्ड़े-मोह्ड़े कम लोहतो, छना कुचे धह गेह घेंङौ पिता परमेश्वरो कछंङ य्वातग। 13दंङ छिला धिर केहरे गिऊ मिन्ज़ी पेट्रोनी, दुहए गेह लोहग कि गेह मीहू योह दोरच़ी पिता परमेश्वरो महिमा शोतो। 14अगर केहच़ी गिऊ मिन्ज़ी छा पेट्रोनी ता गेह दुह लोहग।

पवित्र आत्माओ प्रतिज्ञा

15“अगर केहच़ी गेरंङ दाह लोहनी, ता गिऊ हुकुम मनेक्पोंई। 16दंङ गेह पिता परमेश्वरारंङ साते बिनती लोहग, दंङ दोई केहतु थल्जी हमेशा साते बंङज़ा इच्च़ा मदतगार बि रमतो। 17दुह, दुह पवित्र आत्मा शुह, अच़ि परमेश्वरो पाहठी सच्चाई प्रगट लाह, अतिंङ संसारो मीहरे ग्रहण लेह मरपोर, छना कुचे माह दोच़ी दुह खंड्रातोर माह दोबि ञेंहच़ातोर: केहरे दोबि ञेंहच़ातन छना कुचे दुह केतंङ साते बंङज़ा, दंङ दोऊ केतंङ साते पक्‍का नाता शोतो। 18गेह केतिंङ यमे बमे माह केयोग; गेह केहतु कछंङ वापिस अपोग। 19दंङ थोड़े अरे टेम केहषा इल्जी तोह कि संसारो मीहरेर गिह्बी माह खमोर, केहच़ी गेह खमोंई छना कुचे गेह यच़ाह श्रींङी योह्ग, दंङ दिऊ थल्जी केहरे लाह श्रींङी बंङज़ोई। 20अपेहल गेह श्रींङी वापिस अपोग दोहपल केहच़ी ञेंहई च़रपोन, कि गिऊ नाता पिता परमेश्वरारंङ साते पक्‍का तोह, दंङ केहतु गेरंङ साते, दंङ गिऊ केतंङ साते। 21अतु कछंङ गिऊ हुकुम तोह, दंङ दोई दुह मनेक्च़ा, दोई ए गेरंङ साते दाह लहज़ा, दंङ अच़ि गेरंङ साते दाह लाह, दोरंङ साते गिऊ पिता परमेश्वरे दाह लोहतो, दंङ गेह दोरंङ साते दाह लोहग, दंङ घेंङा बि दोऊ टोईच़ी प्रगट लोहग।” 22यहूदा ज़ि अरी करियोत नगरो माह तोहई, यीशु हखा रुहक्ती, “हे प्रभु, झांह ठ्रोह छि शुहचे इलि कि केई केनाबि ञेंहतु टोईच़ी प्रगट लोहन पर संसारो मीहतु टोईच़ी माह लोहन?”

23यीशु ज़ि दोबि जुबाब रेंई, “गेह घेंङा बि झांह ठ्रोह मीहतिंङ कमोग अच़ि गेरंङ साते दाह लहज़ातोर दंङ अच़ि गिऊ शिक्षा ओ भाषे लहज़ातोर। दुह गिऊ पिता परमेश्वरो प्यारे मीह शोतो दंङ हेनर दोऊ कछंङ अंज़े दोरंङ साते बंङज़ोई।” 24अच़ि गेरंङ साते दाह माह लहज़ा, दोई गिऊ शिक्षा ला माह मनेक्च़ी, दंङ अंऊ शिक्षा केहच़ी रेड्रातंई, दुह गिऊ माह शुह पर पिता परमेश्वरो शुह, अच़ि गेह च़रसी शुगाह।

25“दिह गप्पारे गेह केतंङ साते बंङज़ा दोहपल केतंङ साते कुहतेग। 26पर केहतु मदतगार मतलब दुह पवित्र आत्मा अतिंङ पिता परमेश्वरे गिऊ अधिकारंङ च़रपोतो, दुह पवित्र आत्मा ए केतिंङ भत्ते गप्पा सिखाएपोतो, दंङ छिला धिर गेह केतंङ साते कुहषी तातग, दुह भत्ते धिर केतिंङ हिद दिलाएपोतो।” 27गेह केतिंङ शांति रंड्रातग मतलब दुह शांति अंऊ गेह तातग; दिह दुह शांति माह शुह अंऊ संसारे रें तरपोतो, केहरे परेशान था शुई दंङ बेंईन था।

28गिऊ गप्पारे हिद तंई: गेह य्वातग दंङ केहतु कछंङ वापिस अपोग। अगर केहच़ी गेरंङ साते दाह लंहीयां ता दिह ञेंहच़ाते खुश शुहचंङ कि गेह पिता परमेश्वरो कछंङ य्वातोग, अरी गिह्बी लाह महस मोह्ड़े तोह। 29दंङ गेह दिह भत्ते गप्पारे शुहबिमी बे तुई ए केतंङ साते कुचे केहतग, कि अपेहल दिह शोतो ता केहरे गिऊ टोहकठे विशवास लांही। 30गिऊ दोर्तिंङ केतंङ साते गप्पा लहज़िमी थल्जी ऊई टेम माह, छना कुचे दिह संसारो मुख्या शेतान अपि लेहकी तोह, दंङ गिऊ टोहकठे दोऊ छले वश माह। 31पर गेह ध्वांए लहज़ातग छना पिता परमेश्वरे गिह्बी हुकुम रंड्रा दिऊ थल्जी कि संसारो मीहतिंङ पता लेह्पोतो कि गेह पिता परमेश्वरारंङ साते दाह लहज़ातग। अहच़ुंई, देरच़ी योंह्‌ई।

Terpilih Sekarang Ini:

यहून्नो 14: LBFNT

Highlight

Kongsi

Salin