Luk 18
18
Jizɔs atɛs ayɛghɛnɛv anav mɔ vɛ aram ghu Aonz kpem
1Jizɔs atuwa ayɛghɛnɛv anav ikan ingin, utɛsɛn avo mɔ vɛ ram ghu Aonz kpem. 2Jizɔs akaa na, “Ghɛru ahiye ugen ungwen ɔr utunɛn ajir ungwen awayi Aonz ghɛ iyɔr ikow gha. 3Hɔ ghu ahiye hun ukwas ichɔrgur ugen aru ungwen abanayi izan kɔ ɔr utunɛn ajir mɔ gha, ukɔrun uzɔ ghu na, ‘Tunem ghɛ ɔr itsɔn uwam ɛn mɛ kɔr kwagh ungwen angwe uwam jing.’ 4Ghu mahɛ ɔr utunɛn ajir hun awayi ikow ghɛ ana gha. Ghu mas itiyo ne ɔr ijiri hun aram ghi imɛnɛgh inagh na, ‘Kas mɔ mchiyan Aonz gha sɛ mwan ikow ghi iyɔr gha, 5kpa mɔ ukwas ichɔrgur ungwen azam iyɔr itin, mtune un ijir ɛn akɔr ukwagh ungwen angwe una jing. Ɛn na ademi inan igbɔr ghu mva una kpem.’ ”
6Ne Uwun akaa na, “Mgban sɛ aram ɔr utunɛn ajir ungwen angwe gbɛngang gha ungumɔ. 7Aonz ne atune ukɔng ghi iyɔr anav, amban amba ramen ghu un usov ghi imiye gha? Ghu ɛnɛn na ashi ghi ipɛn avo? 8Mɛ kaa un, atune avo ijir ukɔngɔ tsuwar-tsuwar. Kpa ɔ ɛnɛn na Uwan ɔro abe atsɔ iyɔr amba ghu isima ibɛrɛn han ghu utar ukpɛ ungwen ava.”
Ikan Ufarasi ghɛ ɔr ɔzun ukpanɛv
9Jizɔs atuwa ikan ingin kɔ iyɔr amban vɛ ɛn na amba gbɛngang ta amba ɛnɛn iyɔr agenɛv dang: 10“Anombos ahar vɛ za iramen ghu Aonz kɔ itumbɛ Aonz, umɔm aru Ufarasi ugen mɔ aru ɔr ɔzun ukpanɛv. 11Ufarasi atire tsonguro ahiye iramen ghu Aonz na, ‘Aonz, mɛ sigha uwɛ na mɛgwe ɛn iyɔr agenɛv gha, ayiv ghu itogurov, iyɔr a ɛrɛn akaa abe, iyɔr iburov, ghɛ ɛn ɔr ɔzun ukpanɛv ungumɔ. 12Mɛ hɔrun ukwagh uya ahɔ ahar uradi, mnan umɔm ghu puwɛ ghɛkaa amem angan mkor.’
13“Ɔr ɔzun ukpanɛv, atire marɛmb, abe akond itogh isa gha, kpa akuu ɛvo ghu uvanger ghi ishon makɔrum ukaan na, ‘Aonz kɔr ishon ghɛ amwe mgwe ɔr ube.’ ” 14Jizɔs akaa na, “Mɛ ɔɔr un, ɔr ɔzun ukpanɛv ungumɔ akur kɔ itumbɛ ina tsengna kɔ ishigh inagh Aonz ghu Ufarasi ungumɔ. Hanamɔ ɔr ungwen akond iyɔr ina Aonz ahire un inya. Ɔr ungwen ahire iyɔr ina inya, Aonz akond un.”
Jizɔs ana ibɛrɛn kɔ ghu myem ararɛv
(Matiyo 19.13-15; Mak 10.13-16)
15Ihɔ igen iyɔr vɛ va ghi myem ararɛv kɔ Jizɔs na aper avo; mɔ ayɛghɛnɛv anav vɛ ɛnɛn mɔ, vɛ atsɔgh ghɛ iyɔr hun. 16Kpa Jizɔs atah myem hun na hiren kan ghu umwe, akaa na, “De myem ararɛv hin vɛ va kan ghu umwe, Ka vendan avo gha; Itiyo ikaa utorov una Aonz umbu ɛchi iyɔr amban amba ɛn kɛ avo. 17Mkaa un ukɔng, ɔr ungwen a ɔz utorov una Aonz ɛn uwan rara gha abe anɔr ken gha.”
Iyɔr usu ghɛ utorov una Aonz
(Matiyo 19.16-30; Mak 10.17-31)
18Ne ɔr utaan ugen apine Jizɔs na, “Ɔr tɛsɛn usɛ, kine mɛ-ɛr kpɛɛ ta mɛ kɔr umuwa utserene?” 19Jizɔs akaa ghu un na, “Aka nan sɛ utam na ɔr usɛ? Ɔr umɔm angwe usɛ gha Aonz tas na angwe usɛ. 20Ufɔ kwagh ungwen mɛnna Aonz akaa: ‘Ka ɛrɛyi ibur gha, ka wayi ikuugh gha, ka yihi gha, ka andiye ishiyada akarav gha, tugh utir uwow ghɛ ungɔ uwow.’ ”
21Ne ɔr hun akaa na, “Mɛ kɔr mɛnna ambumɔ amem Tera mɔ mru usomb uwan kpem nyan.”
22Mɔ Jizɔs amgban ukwagh ɔɔr un una, akaa ghu un na, “Ne ukwagh umɔm ashi. Za togh akaa ow amem kond inarigh hun hin na achanɛv, ɛn ukor usu kɔisa. Ta uva udundam.”
23Ne amgban mɔ aka shiya un gha tutu, mɔ aru ɔr usu shisha.
24Jizɔs a ɛnɛn un mɔ akaa na, “Ghɛ yur shisha akan iyɔr usu vɛ nɔr utorov una Aonz. 25Ɔ ɛn ɔr usu anɔr utorov unav Aonz sa, urakum anɔr ghi iher unura.”
26Amban vɛ mgba akaan angan, vɛ pine, “Ne kɛ ana ne abe ar?”
27Ne Jizɔs arumun na, “Kwagh ungwen iyɔr abe ɛr gha Aonz a ɛr.”
28Pita akaa na, “Ɛn sɛ, ghi ivond akaa aas amem ne ghi donda uwɛ.” 29Ne Jizɔs akaa ghɛ avo na, “Mɛ ɔɔr un, ukɔng, ɔr angwe avond itumbɛ ina, ukwas una, anomgban anav, amaren anav umyem ghu utorov unav Aonz, 30ɔr ungumɔ akor akaa angan ghi isum han utar ungun. Ashigh akor va umuwa utsɛrɛn kɔ utar ungun uvan mɔ.”
Jizɔs atsinga-ikaan uku una va
(Matiyo 20.17-19; Mak 10.32-34)
31Jizɔs ata ghɛ ayɛghɛnɛv anav puwɛ ahar upav a ɔɔr avo na, “Ghi imbi kɔndon kɔ Jerusalɛm, akaa angan aramenɛv ɛchi Aonz vɛ angɛr ghu Uwan Ɔro a ɛr. 32Iyɔr vɛ kɔr un vɛ na un kɔ amban amba Ujus gha, vɛ sɛ un, vɛ tuwa un, vɛ bufɛ azɔr ghɛ ana. 33Vɛ gbire un ghu anar vɛ wuwa un, ne ihɔ utar mɔ a rɛr.”
34Ayɛghɛnɛv anav vɛ kor ukwagh ufɔn ghɛ akaa angan a ɔɔr gha. Itiyo-ikaa hun iru avo uyɛr, vɛ fɔ ukwagh ungwen aruyi ghi ɔɔr gha.
Jizɔs akos ɔr pirɛ ase uhuran
(Matiyo 20.29-34; Mak 10.46-52)
35Mɔ Jizɔs aruyi kpemberen kɔ Jɛriko, ɔr pirɛ ase ugen aru atɛma ghi ihang upav ghi ihuran. 36Mɔ amgban ayɔts isum iyɔro mɔ vɛruyi ghi ikaren, apine, kine ingi izan ishi. 37Iyɔr vɛ ɔɔr un na, “Jizɔs Ɔr Nazaret angwe ghi karɛn.”
38Ne atah gbong, “Jizɔs, uwan una Dɛvid, kɔr ishon ghɛ amwe!”
39Amban vɛru kɔ ishi vɛ hure un na atɛma swɛng, kpa asoor ikongon, “Uwan una Dɛvid, kɔr ishon amwe!”
40Ne Jizɔs atire, ana uzɔ na vɛ va ghu un. Mɔ avan kpemberen, Jizɔs apine un, 41“Kine uker na mɛ-ɛr ghu uwɛ?”
Ɔr pirɛ ase akaa na, “Uwun, mker na mɛ ɛn.”
42Ne Jizɔs akaa ghu un na, “Mɛ rumun ɛn, isima ibɛrɛn iyow ɛr ushiya.” 43Kɛsmɛ ahiye ghi ɛnɛn adonda Jizɔs usighan Aonz; amem amban vɛru hen vɛ ɛnɛn mɔ, vɛ sigha Aonz.
Terpilih Sekarang Ini:
Luk 18: UTA
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
©️2024 Luke Initiative for Scripture Translation
