Luk 3
3
Ɔtɛlɛ wʉ Zɔnɛ wʉ abaptaisa vɛnʉl
1-2Ofilikpamɛ ɔ̂tɔwʉ kɛ nɛ Zɔnɛ, wanɛ wʉ Sakalia, wʉ alɛ-lɛ kɛ oci wʉ ɔ̂lɛ kɛlɛ owemi. Ɔmanɛ kiyee, kâyeli wʉ Tibelus âbi anyʉmʉ likwoŋ nɛ ataŋɛn kɛ ɛkɔn ndalɛ Mɛfʉwa wʉboona kɛ ɔtalɛ wʉ Loma. Pontos Pailet âlɛ mɛfʉwa kɛ ɛyaŋ iyɛ Zudiya. Helod âlɛ mɛfʉwa kɛ ɛyaŋ iyɛ Galili. Wanɛŋgwan ɔna, Filip, âlɛ mɛfʉwa kɛ ɛyaŋ iyɛ Ituliya nɛ Tɛlakonitis. Lɛsaniya âlɛ mɛfʉwa kɛ ɛyaŋ iyɛ Abilene. Kɛ ɔkambɛlɛ wɔɔ, Anas nɛ Kaifas ɔ̂lɛ Vitovu yɛ Vakʉ vɛ Ɔsala Ofilikpamɛ, vo ɔfaalɛ. 3Zɔnɛ âza kɛ ɔswaŋ ɔmɔnɛmɔ wʉ ɔ̂lɛ kpʉmbɛlaŋ kɛ ɛzɔl yɛ Zodan. Alɛ ɛvɔlana vɛnʉl ala, ɔ̃va ndalɛsɛ ɔn ábaptais vo, wʉ káte ala ɔ̂sɛɛl ɛcɔcɔɔ ivo, ɛnɛ ɔva kan nɛ Ofilikpamɛ ndalɛsɛ ógife vo. 4Kâlɛ ase ndalɛsɛ ɔsaŋgɛ kɛ oŋgwe wʉ Azaya, ɔnʉl wʉ atɔwa kici yɛ Ofilikpamɛ, ala,
“Ɔmɔ ɔnʉl awʉ kɛ ɛyɛlana kɛ oci wʉ ɔlɛ kɛlɛ owemi ala,
‘Malɛ nini ɔwaa, wʉ Ɔkʉ áva-wo,
yeli nini nɛ ɔwaa ɔna ɔ́lɛ zɛlɛtɛtɛ.
5Yivili nini ɛhʉŋwaghɛ ɛmɔnɛmɔ,
yeli nini ɛkɔŋgʉ ɛmɔnɛmɔ nɛ ɔgʉ nɛ ɛ́gba iyindi.
Ɔwaa wʉhulena ɔ̃lɛ zɛlɛtɛtɛ,
aziŋgili ayɛ acɔ nɛ ɔ̃malɛ.
6Vɛnʉl vayɛmavɛ omwem váyen ɔnʉl wʉ Ofilikpamɛ ɔtɛma ndalɛsɛ áwal vɛnʉl.’”
7Zɔnɛ akaŋɛ nɛ vɛnʉl vɛ ɔvaa kɛ nɔnʉn ala ãbaptaisɛ vo ala, “Anu vɛnʉl vacɔcɔ! Navɛ ndalɛ afɔmʉ! Ɔnda avɔl anu ala, nɛ̃zowulu kɛ ɛcian yɛ Ofilikpamɛ ɔ́va nɛnɛn kɛ ito kɛɛ vɛnʉl? 8Anu kpaa náyele vɛnalɛvɛ yɛ vitee gbaŋgaŋ, ala nɛ̂sɛɛl ɛcɔcɔɔ. x-Nahee ɛkaŋana nɛ valindi anu ala, navɛ nɛ Abɛlaham ndalɛ ɛziavɛ wunu, asɔ nɛ̂wal ga! De mɛvɔl we, Ofilikpamɛ awʉ nɛ ɔtavɛ vɛ nɛ óyel ɔcʉmbʉlʉ wʉ Abɛlaham fan agon ayee. 9Izembi ayɛ ye fɛ itine iyɛ ɛtɛghɛ. Ɛtɛghɛ ɛmɔnɛmɔ kɛɛ kiyumwe aduŋgu ayasɛɛ ga, vátɛla ta ko kɛ ogus.”
10Saŋ vɛnʉl ofii Zɔnɛ ala, “Asɔ aŋgiee sáyel naa?”
11Zɔnɛ agɔl navo ala, “Ɔnʉl ɔmɔnɛmɔ wʉ alɛ nɛ vokuu vɛ ɛyʉlʉ ɔfaalɛ, nɛ ákie ɔnʉl wʉ alɛ nɔnʉn masɛ ɔmɔ ga. Ɔmɔnɛmɔ wʉ alɛ nɛ ɔyɛ, nɛ ákie ɔnʉl wʉ alɛ nɔnʉnʉ ga.”
12Vɛnʉl vedivi vɛ ɔgbaala ɔkpanɛvɛ kpaa ɔ̂va wʉ Zɔnɛ ábaptais vo. Ôfii ɔn ala, “Ɔkʉnʉl, sáyel naa?”
13Avɔl navo ala, “x-Nagbaala ɛŋgɔl yɛ ɔkpanɛ kɛ nɛ vɛnʉl nɛ ɛ́kalɛ ga.”
14Vɛnʉl vɛ ɛta vedivi ôfii ɔn ala, “Ini ɛnɛ sáyel?”
Avɔl navo ala, “x-Nagbaala ɛŋgɔl yɛ ɔnʉl kɛ ɔtavɛ ga, x-nawaa ɔnʉl ɛkaŋɛ ga, ɛŋgɔl yɛ ɔna anu kɛ ɔtʉmʉ wʉ nɛyele ɛ̃kɛma anu.”
15Ɔnʉl ɔmɔnɛmɔ âlɛ kɛ ɛkʉlana Ɔnʉl wʉ Ɛwalɛ, ohee ɛyaaŋana kɛ asɛma avo kasɛ cɛb-cɛb Zɔnɛ ɛnɛ âlɛ Klais wʉ alɛ nɛ áva. 16Asɔ Zɔnɛ akaŋɛ navo omwem ala, “Mɛbaptaisā anu nɛ ɛzɔl, kpa ɔnʉl awʉ kɛ ɛvaana wʉ abo afo mɛ, mɛkɛma kpa wʉ máfalɛ ɔkʉlʉ wʉ ɛkɔwʉ ɛnaghɛ ga. Ábaptais anu nɛ Mʉndʉ wʉ Ofilikpamɛ nɛ ogusu. 17Âtɛŋɛ ye ɔmanɛ kɛɛ ofuwe asaŋgɛ ayɛ ɛnalɛ, áwes oci wʉ anɛsa simi asaŋgɛ kɛ nɛ ayaŋa, nɛ áwes asaŋgɛ nɛ ávɛl kɛ ɔva, nɛ áta ayaŋa kɛ ogusu wʉ ɔ́ka-pil kpem-kpem ga”. 18Ana vo ɔcia nɛ amʉ ayidi cɛŋ, avɔl kpaa ɔtɛlɛ wʉsɛɛ wʉ Ofilikpamɛ.
19Zɔnɛ ayam nɛ Helod, kici yɛ ayɔs Helodias, okeyi wʉ wanɛŋgwan ɔna, wʉ âlɛ tɔ ɔyɛma, nɛ akaŋɛ ayidi ayacɔcɔ ayɛ âyeli. 20Helod ayel pe ɛkaŋɛ iyɛ ɛcɔ kaka, wʉ akɔlʉ wa Zɔnɛ kɛ ɛya.
Zɔnɛ abaptais Zisɔs
21Kɛ ɔkambɛlɛ wʉ Zɔnɛ âlɛ kɛ ɛbaptaisana vɛnʉl vedivi, abaptais kpaa Zisɔs. Ndalɛsɛ Zisɔs âlɛ kɛ ivelena, ɔtalɛ-atʉlʉ ovuu. 22Mʉndʉ wʉ Ofilikpamɛ asen va nɛ ɛyʉlʉ ndalɛ kakuŋgughu, kacaal kɛ ɔn, saŋ ɔŋgwa ɛmʉ kɛ ɔtalɛ-atʉlʉ ala, “Owe kɛlɛ wanɛ wamɛ, mɛteŋg we, kâsɛva mɛ nawe kaka.”
Itumu yɛ Zisɔs
23Zisɔs ɛŋga âlɛ masɛ anyʉmʉ iti nɛ likwoŋ, wʉ ahee ɛvɔlana ɛmʉ iyɛ Ofilikpamɛ. Vɛnʉl ocil Zisɔs ndalɛ wanɛ wʉ Zosef,
Zosef wanɛ wʉ Heli, 24Heli wanɛ wʉ Matat,
Matat wanɛ wʉ Levi, Levi wanɛ wʉ Meliki,
Meliki wanɛ wʉ Zanai, Zanai wanɛ wʉ Zosef,
25Zosef wanɛ wʉ Matatias, Matatias wanɛ wʉ Ɛmɔs,
Ɛmɔs wanɛ wʉ Nahʉm, Nahʉm wanɛ wʉ Isili,
Isili wanɛ wʉ Nagi, 26Nagi wanɛ wʉ Maat,
Maat wanɛ wʉ Matatias, Matatias wanɛ wʉ Semin,
Semin wanɛ wʉ Zosek, Zosek wanɛ wʉ Zoda,
27Zoda wanɛ wʉ Zowanan, Zowanan wanɛ wʉ Leza,
Leza wanɛ wʉ Zelubabel, Zelubabel wanɛ wʉ Selitel,
Selitel wanɛ wʉ Neli, 28Neli wanɛ wʉ Meliki,
Meliki wanɛ wʉ Adi, Adi wanɛ wʉ Kɔsam,
Kɔsam wanɛ wʉ Ɛlmadam, Ɛlmadam wanɛ wʉ Ɛl,
29Ɛl wanɛ wʉ Zosuwa, Zosuwa wanɛ wʉ Ɛliaza,
Ɛliaza wanɛ wʉ Zolim, Zolim wanɛ wʉ Matat,
Matat wanɛ wʉ Levi, 30Levi wanɛ wʉ Simiyon,
Simiyon wanɛ wʉ Zuda, Zuda wanɛ wʉ Zosef,
Zosef wanɛ wʉ Zonam, Zonam wanɛ wʉ Ɛliakim,
31Ɛliakim wanɛ wʉ Meliya, Meliya wanɛ wʉ Mena,
Mena wanɛ wʉ Matata, Matata wanɛ wʉ Natan,
Natan wanɛ wʉ Devit, 32Devit wanɛ wʉ Zesi,
Zesi wanɛ wʉ Obet, Obet wanɛ wʉ Buwaz,
Buwaz wanɛ wʉ Salamɔn, Salamɔn wanɛ wʉ Nasɔn,
33Nasɔn wanɛ wʉ Aminadab, Aminadab wanɛ wʉ Lam,
Lam wanɛ wʉ Hɛzɛlɔn, Hɛzɛlɔn wanɛ wʉ Pelez,
Pelez wanɛ wʉ Zuda, 34Zuda wanɛ wʉ Ziakɔb,
Ziakɔb wanɛ wʉ Azik, Azik wanɛ wʉ Abɛlaham,
Abɛlaham wanɛ wʉ Tela, Tela wanɛ wʉ Nahɔ,
35Nahɔ wanɛ wʉ Selu, Selu wanɛ wʉ Lu,
Lu wanɛ wʉ Peleg, Peleg wanɛ wʉ Ɛba,
Ɛba wanɛ wʉ Sela, 36Sela wanɛ wʉ Kainan,
Kainan wanɛ wʉ Afazad, Afazad wanɛ wʉ Sem,
Sem wanɛ wʉ Nʉwa, Nʉwa wanɛ wʉ Lamek,
37Lamek wanɛ wʉ Metusela, Metusela wanɛ wʉ Ɛnɔk,
Ɛnɔk wanɛ wʉ Zaled, Zaled wanɛ wʉ Mahalalel,
Mahalalel wanɛ wʉ Kenan, 38Kenan wanɛ wʉ Ɛnɔs,
Ɛnɔs wanɛ wʉ Set, Set wanɛ wʉ Adam,
Adam wanɛ wʉ Ofilikpamɛ.
Terpilih Sekarang Ini:
Luk 3: Iceve-Maci
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
©️2024 Luke Initiative for Scripture Translation
