الإنجيل زي ما كتبه مَتَّى 7
7
الحُكّم على الغيّر
1لا تدينوا عشان لا أحد يدينكم، 2لأنكم بنفس الدينونة إلا تدينوا بها بتنّدانوا، وبالكيل إلا تكيلوا به بينكال ليكم. 3ليش تشوف الشظيّة في عيون أخوك، و ما تشوف الحطبة الكبيرة إلا في عيونك؟ 4و ليش تقول لأخوك: خلني أشيل الشظيّة من عيونك، و هاديها حطبة وش قدها في عيونك! 5يالمنافق، أول شي طلع الحطبة من عيونك، و بعدين إدا قدرت تشوف عدل شيل الشظيّة من عيون أخوك. 6لا ترموا أشيائكم المُقدّسة للچلاب، ولا ترموا دُرركم عند الخنازير، عشان ما يدوسوها برجايلهم و ينقلبوا عليكم و ينهشوكم.
أسألوا، أطلبوا، دقوا
7أسألوا، تنعطوا. أطلبوا، تحصلوا. دقوا الباب، وبينفتح ليكم. 8كل من يسأل، ينال، و ألا يطلب يحصل، و ألا يدق الباب، ينفتح له. 9و إلا، أي واحد فيكم لو طلب منه ولده خبزة، يعطيه حجرة؟ 10أو إدا طلب سمچة، يقوم يعطيه حية؟ 11إدا أنتون الشرّانيين، تعرفوا كيف تعطوا أولادكم هدايا عدلة، فمو من الأولى أن أبوكم السماوي يعطي إلا يطلبوا منه بعد هدايا عدلة؟ 12عاملوا الناس زي ما تبغوهم يعاملوكم. هدي هي زبدة تعاليم التوراة و الأنبياء.
الباب الضّيق والباب الواسع
13أدخلوا من الباب الضّيق! لأن الباب إلا يودي للهلاك واسع وطريقة فسيح، و ناس واجد يدخلوا منه. 14و ما أضيق الباب و ما أصعب الطريق إلي يوصل إلى الحياة! وقليلين إلا يهتدوا له.
الشجرة و ثمرها
15أحدروا من الأنبياء الدجّالين إلا يجوا لكم لابسين ثياب الحِملان، و لكنهم من الداخل ديابة مفترسة! 16من ثمرهم تعرفوهم. فهل نقدر نجني من الشَّوك عنب، أو من نبتة السِّلة تين؟ 17و چدي كل شجرة زينة تنتج ثمر زين. وال الشجرة إلا موزينة، بتنتج ثمر مو زين. 18مستحيل أن الشجرة الزينة تنتج ثمر ردي، ولا الشجرة الرديّة تنتج ثمر زين. 19و كل شجرة ما تنتج ثمر زين، بتنقطع وبتنرمى في النار. 20وبالهطريقة من ثمرهم تعرفوهم.
التلاميد الحقيقيين و التلاميد المزيفين
21مو كل من قال ليي: يا رب، يا رب بيدخل ملكوت السماوات، لكن بس ألا يسوي إرادة أبويي إلا في السماوات. 22في داك اليوم ناس واجد بيقولوا ليي: يا رب، يا رب، مو أحنا تنبأنا بإِسمك، وبإسمك طردنا الشياطين، و سوّينا بإِسمك معاجز واجد؟ 23لكن في يومها أقول ليهم: أنا ما عمري عرفتكم! تباعدوا عني يا الشرّانيين!
البناي الحَكيم و البناي الجاهل
24كل من يسمع كلامي ويطبقه، يصير زي الرجال الحَكيم إلا بنى بيته على الصّخر، 25و لما نزل المطر، وجرت السيول، و هبّت العواصف، وضربت داك البيت، بس ما طاح لأنه مأسس عدل على الصّخر. 26و إلا يسمع كلامي ولا يطبقة، فهو زي الرجال الغَبي إلا بنى بيته على الرمل، 27و نزل المطر، وجرت السيول، و هبّت العواصف، وضربت داك البيت، و طاح طيحة، وكانت طيحته قويّة».
28و لما خلص يسوع هالكلام، أستغربوا الناس المتجمّعين من تعليمه، 29لأنه كان يعلمهم زي واحد صاحب سلطان، مو زي كتبتهم.
Terpilih Sekarang Ini:
الإنجيل زي ما كتبه مَتَّى 7: QNAV
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Qatifi New Arabic Version © 2024 Strategic Resource Group
